TÀN 3
Sunnu Nukɔntɔn ɔ kpo Nyɔnu Nukɔntɔn ɔ Kpo
ETƐ ka gbɔn vo ɖò ɖiɖe elɔ kpo e wá yí é kpo mɛ? Gbɛtɔ́ lɛ ɖ’emɛ. Sunnu nukɔntɔn ɔ kpo nyɔnu nukɔntɔn ɔ kpo wɛ. Mɛ̌ ka ɖó ye? Mawu wɛ. A ka tuùn nyikɔ tɔn à? É nɔ nyí Jehovah. Sunnu ɔ nɔ nyí Adamu bɔ nyɔnu ɔ nɔ nyí Ɛva.
Lee Jehovah Mawu bló Adamu gbɔn é ɖíe: É sɔ́ kɔgudu ayikúngban tɔn dó bló agbaza maɖóblɔ̌ ɖé, é wɛ nyí agbaza gbɛtɔ́ tɔn. Enɛ gudo ɔ, é dó fùnfún awɔntín tɔn mɛ bɔ Adamu huzu mɛ gbɛɖe.
Jehovah Mawu ɖè azɔ̌ nú Adamu. É ɖɔ n’i ɖɔ é ni na nyikɔ kanlin alɔkpa alɔkpa lɛ bǐ. Adamu kpɔ́n kanlin lɛ nú hwenu gègě cobo na nyikɔ e sɔgbe é ye. Hwenu e Adamu ɖò nyikɔ na kanlin lɛ wɛ é ɔ, é ɖó ayi nǔ ɖokpo wu. A ka tuùn nǔ e wɛ é à?
Kanlin asú lɛ bǐ wɛ ɖó asì: ajinakú asú lɛ kpo ajinakú asì lɛ kpo gɔ́ nú kinikini asú lɛ kpo kinikini asì lɛ kpo. Amɔ̌, Adamu ɖó asì ɖě ǎ. Enɛ wu ɔ, Jehovah bló, bɔ Adamu dɔ sɛnmlɔ, bɔ é ɖè adajaxú tɔn ɖokpo. Jehovah sɔ́ adajaxú Adamu tɔn enɛ dó bló nyɔnu ɖokpo na, bɔ é huzu asì tɔn.
Kpɔ́n lee xomɛ na ko hun Adamu sɔ dìn é! Lɛ́ kpɔ́n lee xomɛ Ɛva tɔn na ko hun sɔ hwenu e é mɔ éɖee ɖò jikpá ɖɛkpɛɖɛkpɛ elɔ mɛ é! Ye hɛn dìn ɔ, ye na jì vǐ, bo nɔ kpɔ́ ɖò awǎjijɛ mɛ.
Jehovah jló ɖɔ Adamu kpo Ɛva kpo ni nɔ gbɛ̀ kaka sɔyi. É jló ɖɔ ye ni bló bonu ayikúngban ɔ jí bǐ ni nyɔ́ ɖɛkpɛ jikpá Edɛnu tɔn ɖɔhun. Kpɔ́n lee xomɛ na ko hun Adamu kpo Ɛva kpo sɔ hwenu e ye ɖò tamɛ lin dó azɔ̌ enɛ jí wɛ é! É na jló we ɖɔ a ni wà azɔ̌ enɛ xá ye à cé? Amɔ̌, Adamu kpo Ɛva kpo hɛn awǎjijɛ enɛ ɔ bú. Mǐ ni kpɔ́n nǔ e wu wɛ é.
Psaume 83:18; Genèse 1:26-31; 2:7-25.