TÀN 16
Izaki Da Asì Ðagbe Ðé
A KA tuùn nyɔnu e ɖò ɖiɖe ɔ mɛ é à? Nyikɔ tɔn nɔ nyí Hlebeka. Nya e ja kpíkpé é gbé é nɔ nyí Izaki. Nyɔnu enɛ wɛ wá nyí asì tɔn. Nɛ̌ é ka da ɛ gbɔn?
Ablaxamu jló na da asì ɖagbe nú vǐ tɔn Izaki. É ba nú Izaki ni da Kanaanu lɛ ɖě ǎ, ɖó ye nɔ sɛ̀n Mawu ǎ. Enɛ wu ɔ, Ablaxamu ylɔ deví tɔn bo ɖɔ n’i ɖɔ: ‘Un jló ɖɔ a ni yì hɛnnumɔ ce lɛ mɛ ɖò Calan bo da asì ɖokpo wá nú vǐ ce Izaki.’
Deví Ablaxamu tɔn fɔ lakunmi wǒ, bo wlí ali. Calan lín dó finɛ tawun. Ee é sɛkpɔ Calan é ɔ, é nɔte ɖò sɛ́tɔ̀ ɖé nu. Hwe ko lɛkɔ bǐ, bɔ gan e mɛ nyɔnu toxo ɔ mɛ tɔn lɛ nɔ wá dun sìn é ko sù. Deví Ablaxamu tɔn xoɖɛ sɛ́dó Jehovah bo ɖɔ: ‘Blǒ bonu nyɔnu e na na sìn nyɛ kpo lakunmi lɛ kpo é ni nyí mɛ e a jló ɖɔ é ni nyí asì Izaki tɔn é.’
Tlolo ɔ, Hlebeka wá sìn dun gbé. Ee deví ɔ byɔ ɛ sìn é ɔ, é na ɛ. É lɛ́ dun sìn bo na lakunmi lɛ bǐ. Azɔ̌ syɛnsyɛn wɛ é wà, ɖó lakunmi lɛ nɔ nu sìn tawun bɔ kɔ ka ko lɛ́ xú ye bǐ.
Ee Hlebeka dun sìn ɔ fó é ɔ, deví Ablaxamu tɔn kàn tɔ́ tɔn nyikɔ byɔ ɛ. É lɛ́ kanbyɔ ɛ ɖɔ emi sixu dɔ xwé yetɔn gbè à jí. Hlebeka ɖɔ: ‘Tɔ́ ce nɔ nyí Betuwɛlu. Fí e a na dɔ é hán ɖò xwé mǐtɔn gbè ǎ.’ Deví ɔ tuùn ɖɔ nɔví sunnu Ablaxamu tɔn Naɔɔ sín vǐ wɛ nú Betuwɛlu. Enɛ wu ɔ, é jɛkpo bo dokú nú Jehovah nú kplá e É kplá ɛ yì hɛnnumɔ Ablaxamu tɔn mɛ é.
Zǎn enɛ mɛ ɔ, deví ɔ ɖɔ nǔ e wu é wá é nú Betuwɛlu kpo Hlebeka sín nɔví sunnu Labaan kpo. Ye bǐ ɖó gbè kpɔ́ ɖɔ Hlebeka hɛn ɔ é na xwedó é yì, bo da Izaki. Etɛ Hlebeka ka lin? Ee è kàn nǔ byɔ ɛ d’ewu é ɔ, é yí gbè. Enɛ wu ɔ, Hlebeka xwedó deví ɔ, bɔ ye kpo lakunmi lɛ kpo wlí ali bo ɖido Kanaa ayihɔngbe tɔn.
Gbadanu ko sù có ye wǎ. Hlebeka mɔ nya ɖé ɖò sa ɖi wɛ ɖò gle mɛ. Izaki wɛ. Ee é mɔ Hlebeka é ɔ, xomɛ hun i, bɔ é yí wǎn n’i tawun. Nɔ tɔn Saala kú é ɔ, é ɖò xwè atɔn bló wɛ, bɔ enɛ nɔ ɖó linkpɔ́n n’i tawun. Amɔ̌ dìn ɔ, Izaki mɔ nǔ e na zɔ́n bɔ é na lɛ́ ɖó awǎjijɛ é.
Genèse 24:1-67.