Hlebeka Jló Na Hɛn Xomɛ Jehovah Tɔn Hun

Nyɔnu e yí wǎn nú Jehovah é ɖé wɛ Hlebeka nyí. Asú tɔn nɔ nyí Izaki. É lɔmɔ̌ yí wǎn nú Jehovah. Nɛ̌ Izaki ka da Hlebeka gbɔn? Nɛ̌ Hlebeka ka xlɛ́ ɖɔ emi jló na hɛn xomɛ Jehovah tɔn hun gbɔn? Nǔ mǐ ni kplɔ́n nǔ dó wǔtu tɔn gɔ́ na.

Ablaxamu kpo Sala kpo wɛ jì Izaki. Ye nɔ nɔ toxo Kanáa tɔn mɛ. Mɛ lɛ nɔ sɛn Jehovah ɖò finɛ ǎ. Amɔ̌, Ablaxamu jló ɖɔ vǐ sunnu emitɔn ni da Jehovah sɛntɔ́. Enɛ wu ɔ, é sɛ́ mɛsɛntɔ́ tɔn dó ɖɔ é ni yì ba asì nú Izaki ɖò Halani. Finɛ wɛ Ablaxamu sín hɛ̌nnumɔ ɖé lɛ nɔ nɔ. É sixu ko nyí Eliezɛ́ɛ wɛ é sɛ́dó.

Eliezɛ́ɛ kpo mɛsɛntɔ́ Ablaxamu tɔn ɖevo lɛ kpo ɖidó Halani. Ali ɔ lín ɖesu. Ye dó nǔɖuɖu kpo nǔnina kpo sín agban nú lakunmi wǒ. Nɛ̌ Eliezɛ́ɛ ka na tuùn nyɔnu e na jɛxa Izaki é gbɔn? Ee Eliezɛ́ɛ kpo mɛsɛntɔ́ lɛ kpo wá Halani é ɔ, ye nɔte ɖò dotɔ ɖé kɔn, ɖó Eliezɛ́ɛ tuùn ɖɔ mɛ lɛ na wá dun sin zaanɖé ɖò finɛ. É xoɖɛ sɛ́dó Jehovah bo ɖɔ: ‘Enyi un byɔ sin ɖyɔvǐ ɖé bonu é na nyi kpo lakunmi ce lɛ kpo ɔ, un na tuùn ɖɔ é wɛ nyí nyɔnu e a sɔ́ é.’

Zaan ɔ, ɖyɔvǐ Hlebeka wá dotɔ ɔ nu. Biblu ɖɔ ɖɔ é nyɔ́ ɖɛkpɛ tawun. Eliezɛ́ɛ ka byɔ ɛ sin, bɔ é ɖɔ: ‘É nyɔ́, un na na sin ɔ we, bo na lɛ́vɔ na lakunmi towe lɛ lɔmɔ̌.’ Lin tamɛ kpɔ́n kpɛɖé! Lakunmi e kɔ ko xú lɛ é nɔ nu sin ɖesu. Enɛ wu ɔ, Hlebeka dun sin ɔ, é nɔ lɛ́vɔ dun. A mɔ lee é ɖò azɔ̌ syɛnsyɛn wà wɛ sɔ ɖò ɖiɖe ɔ mɛ é à?— Lee Jehovah sè ɖɛ Eliezɛ́ɛ tɔn gbɔn é jiwǔ n’i.

Eliezɛ́ɛ na nǔ ɖagbe gegě Hlebeka. Hlebeka kplá Eliezɛ́ɛ kpo mɛsɛntɔ́ ɖě lɛ kpo yì mɛ tɔn lɛ gɔ́n. Eliezɛ́ɛ tinmɛ nǔ e wu Ablaxamu sɛ́ ɛ dó finɛ é, kpo lee Jehovah ko sè ɖɛ tɔn gbɔn é kpo. Xomɛ hun Hlebeka sin mɛ lɛ ɖɔ é ni da Izaki.

Amɔ̌, a ka lin ɖɔ Hlebeka jló na da Izaki à?— Hlebeka tuùn ɖɔ Jehovah wɛ sɛ́ Eliezɛ́ɛ dó. Enɛ wu ɔ, hwenu e Hlebeka sín mɛ lɛ kanbyɔ ɛ ɖɔ é ka jló na yì Kanáa bo na da Izaki à jí é ɔ, é ɖɔ: ‘Ɛɛn, un jló na yì.’ Tlolo ɔ, é xwedó Eliezɛ́ɛ. Ee ye wá Kanáa é ɔ, é da Izaki.

Jehovah dó nú Hlebeka, ɖó é wà nǔ e Jehovah jló ɖɔ é ni wà é. Xwè gegě gudo ɔ, è jì Jezu ɖò kúnkan Hlebeka tɔn mɛ! Enyi a nɔ hɛn xomɛ Jehovah tɔn hun Hlebeka ɖɔhun ɔ, é na dó nú hwi lɔ.