TÀN 20
Nǔ Nyanya Jɛ Dó Dina Jí
A KA mɔ mɛ e ba kpɔ́n gbé Dina xwè ɖò ɖiɖe ɔ mɛ lɛ é à? Ðyɔvǐ Kanaanu ɖé lɛ wɛ. Xomɛ tɔ́ tɔn Jakɔbu tɔn ka hun dó nǔ enɛ wu à? Cobonu a na mɔ xósin nùkanbyɔ enɛ tɔn ɔ, flín nǔ e Ablaxamu kpo Izaki kpo lin dó nyɔnu Kanaa tɔn lɛ wu é.
Ablaxamu ka jló ɖɔ vǐ emitɔn Izaki ni da Kanaanu à? É jló ǎ. Izaki kpo Hlebeka kpo lɔ ka jló ɖɔ vǐ yetɔn Jakɔbu ni da Kanaanu à? Eǒ. A ka tuùn nǔ e zɔ́n é à?
Ðó Kanaanu lɛ nɔ sɛ̀n Mawu ǎ. Ye nyí mɛ ɖagbe e è na da é ɖé ǎ, mɔ jɛn ye ma ka lɛ́ nyí mɛ e è na zun xɔ́ntɔn xá é ǎ nɛ. Enɛ wu ɔ, é ɖò gaàn ɖɔ xomɛ Jakɔbu tɔn kún hun dó xɔ́ntɔn e zun xá Kanaanu lɛ wɛ vǐ nyɔnu tɔn ɖè é wu ó.
Nugbǒ ɔ, nǔ nyanya jɛ dó Dina jí. A ka mɔ nya Kanaanu e ɖò Dina kpɔ́n sɛ́dó wɛ ɖò ɖiɖe ɔ mɛ é à? Nyikɔ tɔn nɔ nyí Sikɛmu. Gbè ɖokpo ɔ, Dina wá ba ye kpɔ́n, bɔ Sikɛmu ɖóxó xá ɛ gannugánnú. Nǔ enɛ nyla, ɖó mɛ e da yeɖee é kɛɖɛ wɛ ɖó acɛ bo na ɖóxó xá yeɖee.
Ee Dina sín nɔví sunnu lɛ sè nǔ e jɛ é ɔ, xomɛ sìn ye ɖesu. Xomɛ sìn Sinmɛnyɔ́ɔ kpo Levíi kpo kaka bɔ ye fɔ hwǐ, bo tɔ́n ahwan sunnu toxo ɔ mɛ tɔn lɛ ajijimɛ. Ye kpo nɔví sunnu yetɔn lɛ kpo hu Sikɛmu kpo sunnu toxo ɔ mɛ tɔn lɛ bǐ kpo. Nǔ e ye wà nɛ ɔ sìn xomɛ nú Jakɔbu, ɖó nǔ nyanya wɛ.
Etɛwu nǔ nyanya enɛ lɛ bǐ ka jɛ? Ðó Dina zun xɔ́ntɔn xá mɛ e ma nɔ setónú nú sɛ́n Mawu tɔn ǎ lɛ é wu wɛ. Mǐ na lɔn bo zun xɔ́ntɔn mɔhun lɛ ǎ, kabǐ?
Genèse 34:1-31.