TÀN 23
Dlɔ̌ Falawɔɔn Tɔn Lɛ
XWÈ wè ko wá yì, bɔ Jozɛfu lɛ́ kpó ɖò gankpa mɛ. Ahanbanumɛtɔ́ ɔ sɔ́ flín i ǎ. Falawɔɔn wá kú dlɔ̌ taji wè zǎn ɖokpo mɛ, bo ɖò tinmɛ tɔn ba wɛ. A ka mɔ ɛ ɖò amlɔ dɔ wɛ ɖò ɖiɖe ɔ mɛ à? Ayihɔngbe tɔn ɔ, Falawɔɔn ylɔ nùnywɛtɔ́ tɔn lɛ bo ɖɔ dlɔ̌ lɛ nú ye. Amɔ̌, ye ɖě kpéwú bo tinmɛ ǎ.
Ahanbanumɛtɔ́ ɔ wá flín Jozɛfu lo. É ɖɔ nú Falawɔɔn ɖɔ: ‘Hwenu e un ɖò gankpa mɛ é ɔ, nya ɖé ɖò finɛ bo nɔ kpéwú bo tín dlɔ̌ lɛ mɛ.’ Tlolo ɔ, Falawɔɔn ɖegbe bɔ è ɖè Jozɛfu tɔ́n sín gankpa mɛ.
Falawɔɔn ɖɔ dlɔ̌ lɛ nú Jozɛfu: ‘Un mɔ nyibu’sì e dó jǒ bo nyɔ́ ɖɛkpɛ é tɛnwe. Un lɛ́ mɔ nyibu’sì e xú gǒ bo gblé kàn é tɛnwe. Bɔ nyibu’sì gǒxúxú lɛ fɔ ee dó jǒ lɛ é mì.
‘Ðò dlɔ̌ wegɔ ɔ mɛ ɔ, un mɔ jinukún e nɔ na yovolinfin é (blé) sín hwǐn tɛnwe ɖò blétín ɖokpo jí, bɔ ye hwǎn ganji. Un lɛ́ mɔ blé hwǐn tófwé tɛnwe bɔ ye ko xú. Bɔ blé hwǐn tófwé lɛ fɔ tɛnwe ee hwǎn lɛ é mì.’
Jozɛfu ɖɔ nú Falawɔɔn ɖɔ: ‘Tinmɛ ɖokpo ɔ wɛ dlɔ̌ wè lɛ bǐ ɖǒ. Nyibu’sì tɛnwe e dó jǒ lɛ é kpo blé hwǐn tɛnwe e hwǎn lɛ é kpo ɖexlɛ́ ɖɔ jì na jɛ, bɔ nùɖuɖu gègě na tíìn ɖò Ejipu nú xwè tɛnwe. Nyibu’sì gǒxúxú tɛnwe lɛ kpo blé hwǐn tófwé lɛ kpo ɖexlɛ́ ɖɔ adɔ na tɔ́n nú xwè tɛnwe e na bɔ d’ewu lɛ é.’
Enɛ wu ɔ, Jozɛfu ɖɔ nú Falawɔɔn ɖɔ: ‘Ba nùnywɛtɔ́ ɖé bonu é na xò nùɖuɖu kplé ɖò xwè tɛnwe e jì na jɛ na lɛ é vlamɛ. Enɛ ɔ, adɔ sɔ́ na hu gbɛtɔ́ lɛ ɖò xwè tɛnwe e na bɔ d’ewu, bɔ nùɖuɖu na hán na lɛ é hwenu ǎ.’
Xó enɛ nyɔ́ Falawɔɔn nukún mɛ. Bɔ é sɔ́ Jozɛfu nú é na xò jinukún lɛ kplé dó agɔ̌ mɛ. Jozɛfu wá nyí mɛ nukúnɖeji e bɔ dó Falawɔɔn wu ɖò Ejipu é.
Xwè tantɔn gudo ɔ, Jozɛfu mɔ nya ɖé lɛ ja. Adɔ ɔ ko tɔ́n nɛ. A ka tuùn mɛ e wɛ lɛ é à? Jozɛfu sín fofó 10 lɛ wɛ. Etɛ! Tɔ́ yetɔn Jakɔbu wɛ sɛ́ ye dó Ejipu, ɖó nùɖuɖu ko vɔ dó ye ɖò Kanaa. Jozɛfu tuùn ye, amɔ̌, yedɛɛ lɛ sɔ́ tuùn i ǎ. A ka tuùn nǔ e zɔ́n é à? Ðó Jozɛfu ko nyí mɛxo, bɔ lee é sɔnǔ gbɔn é ka lɛ́ gbɔn vo.
Jozɛfu flín dlɔ̌ e é kú hwenu e é kpó ɖò kpɛví bo mɔ bɔ fofó tɔn lɛ ɖò kɔ́ ɖé n’i wɛ é. Hwi lɔ ka flín ɖɔ mǐ ko xà nǔ mɔhun à? Jozɛfu na ko mɔ nukúnnú jɛ wu ɖɔ Mawu wɛ sɛ́ emi dó Ejipu, ɖó hwɛjujɔ ɖagbe ɖé wu. Etɛ a ka lin ɖɔ Jozɛfu wà? Mi nú mǐ ni kpɔ́n.
Genèse 41:1-57; 42:1-8; 50:20.