TÀN 34
Nùɖuɖu Alɔkpa Ðevo
A KA tuùn nǔ e bɛ́ wɛ mɛ lɛ ɖè ɖò kɔ mɛ é à? Nùɖuɖu wɛ. É cí linfin ɖɔhun, bo wé tété.
Izlayɛli-ví lɛ gosin Ejipu é ɔ, sun ɖokpo bló wɛ jɛn é ɖè nɛ. Ye ɖò gbetótló mɛ. Nùɖuɖu kpɛɖé jɛn ɖò finɛ, bɔ togun ɔ jɛ nǔ hlun ɖɔ jí. Ye nɔ ɖɔ: ‘Jehovah gbɔ bo hu mǐ ɖò Ejipu ɔ, é nyɔ́ hú. Mǐ nɔ mɔ nùɖuɖu e jló mǐ lɛ é ɖu ɖò dɔ̌n vɔ́vɔ́.’
Enɛ wu ɔ, Jehovah ɖɔ: ‘Un na ja nùɖuɖu sín jixwé nú mi.’ Nǔ e Jehovah bló é nɛ. Ee Izlayɛli-ví lɛ fɔ́n ayihɔngbe tɔn zǎnzǎn é ɔ, ye mɔ nǔ wewé ɖé lɛ ɖò kɔ mɛ. Ye nɔ kanbyɔ wegɔ yetɔn lɛ ɖɔ: ‘Etɛ ka nɛ?’
Mɔyizi ɖɔ nú ye ɖɔ: ‘Nùɖuɖu e Jehovah na mi, bɔ mi na ɖu é nɛ.’ Togun ɔ ylɔ nùɖuɖu enɛ ɖɔ MANA. É víví bo cí wɔxúxú e è sɔ́ wǐin dó bló é ɖɔhun.
Mɔyizi lɛ́ ɖɔ nú ye ɖɔ: ‘Mɛ ɖokpo ɖokpo ni bɛ́ mana e é hɛn ɔ é na ɖu é.’ Nǔ e ye nɔ bló zǎnzǎn tɛgbɛ é nɛ. Enyi hwesivɔ hun bo syɛn ɔ, mana e kpò ɖò kɔ mɛ lɛ é nɔ sínsín.
Mɔyizi ka lɛ́ ɖɔ nú ye ɖɔ: ‘Mɛɖebǔ ni ma bɛ́ mana ɔ ɖ’ayǐ ɖó sɔ wunda ó.’ Amɔ̌, mɛɖé lɛ ka tlitó. A ka tuùn nǔ e nɔ jɛ é à? Ayihɔngbe tɔn ɔ, mana e ye bɛ́ ɖ’ayǐ lɛ é nɔ jì wě, bo nɔ jɛ wǎn lun jí.
É ɖò mɔ̌ có, Jehovah ɖè azǎn ɖokpo ɖó vo ɖò aklunɔzán gbla ɔ mɛ. É ɖɔ nú ye ɖɔ ye ni nɔ bɛ́ mana e ye hɛn ɔ ye na ɖu é donu wè ɖò azǎn enɛ jí. Azǎn ayizɛngɔ ɔ wɛ. Ye ɖó na bɛ́ ɖ’ayǐ, ɖó mana ɖě na ja azǎn tɛnwegɔ ɔ gbè ǎ. Mana e ye nɔ bɛ́ ɖ’ayǐ, ɖó azǎn tɛnwegɔ ɔ wunda é nɔ jì wě ǎ, é ka nɔ lun wǎn ǎ. Nùjiwǔ ɖevo lɛ́ nɛ!
Mana wɛ Jehovah na Izlayɛli-ví lɛ, bɔ ye ɖu nú xwè 40 e ye bló ɖò gbetótló mɛ é.
Exode 16:1-36; Nombres 11:7-9; Josué 5:10-12.