Gbɛzinzan E Nɔ Nyɔ́ Mawu Nukúnmɛ É

1, 2. Nǎ kpɔ́ndéwú xɔ́ntɔn vívɛ́ Jehovah tɔn ɖé lɛ tɔn.

MƐ ALƆKPA tɛ a ka na ba na zun xɔ́ntɔn xá? É na ɖibla nyí mɛ e nɔ lin nǔ ɖokpo ɔ, jló nǔ ɖokpo ɔ, lobo ɖó nùɖiɖi ɖokpo ɔ hwi ɖɔhun é. Mɛ e ɖó jijɔ ɖagbe, ɖi nugbǒ ɖiɖɔ kpo xomɛnyínyɔ́ kpo é sín xɔ́ntɔn wɛ a na ba na zun.

² Mawu cyan mɛɖé lɛ bɔ ye nyí xɔ́ntɔn vívɛ́ tɔn lɛ ɖò hwexónu. Ði kpɔ́ndéwú ɖé ɔ, Jehovah ylɔ Ablaxamu ɖɔ xɔ́ntɔn emitɔn. (Isaïe 41:8; Jaki 2:23) Mawu ɖɔ dó Davidi wu ɖɔ ‘mɛɖé wɛ é nyí, bɔ jujɔ tɔn nyɔ́ nukún emitɔn mɛ,’ ɖó é nyí mɛ alɔkpa e Jehovah yí wǎn na é. (Mɛsɛ́dó 13:22) Jehovah lɛ́ mɔ gbeyiɖɔ Daniɛli dó mɔ ‘mɛ e nǔ tɔn nyɔ́ nukún tɔn mɛ ɖesu’ é.—Daniel 9:23.

3. Etɛwu Jehovah ka cyan mɛɖé lɛ bɔ ye nyí xɔ́ntɔn tɔn?

³ Etɛwu Jehovah ka mɔ Ablaxamu, Davidi kpo Daniɛli kpo dó mɔ xɔ́ntɔn tɔn lɛ? É nyɔ́, é ɖɔ nú Ablaxamu ɖɔ: “A ɖótó gbè ce.” (Genèse 22:18) Hǔn, Jehovah nɔ sɛkpɔ mɛ e nɔ sɔ́ yeɖee hwe bo wà jlǒ tɔn lɛ é nɛ. É ɖɔ nú Izlayɛli-ví lɛ ɖɔ: “Mi setónú nú gbè ce, enɛ ɔ, un na huzu Mawu mitɔn bɔ midɛɛ lɛ ɔ, mi na huzu togun ce.” (Jérémie 7:23) Enyi a setónú nú Jehovah ɔ, hwi lɔ sixu huzu xɔ́ntɔn tɔn!

JEHOVAH NƆ NA HLƆNHLƆN XƆ́NTƆN TƆN LƐ

4, 5. Nɛ̌ Jehovah ka nɔ ɖè hlɔnhlɔn tɔn xlɛ́ dó togun tɔn tamɛ gbɔn?

⁴ Lin tamɛ dó lè e xɔ́ntɔn zunzun xá Mawu ɖó lɛ é jí. Biblu ɖɔ ɖɔ Jehovah nɔ ba ali e nu é na gbɔn “bo na dó ɖè hlɔnhlɔn tɔn xlɛ́ dó mɛ e ayixa yetɔn ɖò blebu dó wutu tɔn lɛ é tamɛ” lɛ é. (2 Chroniques 16:9) Nɛ̌ Jehovah ka sixu ɖè hlɔnhlɔn tɔn xlɛ́ dó ta towe mɛ gbɔn? Psaume 32:8 ɖɔ lee é nɔ wà mɔ̌ gbɔn é ɖokpo nú mǐ bo ɖɔ: “Un [Jehovah] na bló bɔ a na ɖó nukúnnúmɔjɛnǔmɛ bo na kplɔ́n we ɖó ali e a ɖó na gbɔn é jí. Un na ɖè wě xá we, bɔ nukún ce na ɖò jǐ towe.”

⁵ Xógbe nukún kpé dó mɛ wu tɔn enɛ lɛ e Jehovah dó é dó wusyɛn lanmɛ nú mɛ tawun. É na na we alixlɛ́mɛ e sín hudo a ɖó é, bo na cyɔn alɔ jǐ towe hwenu e a ɖò alixlɛ́mɛ enɛ xwedó wɛ é. Mawu jló na d’alɔ we bonu a na dɛ ɖò nukúnvandomɛ kpo mɛtɛnkpɔn e a nɔ mɔ lɛ é kpo nu bo ɖu ɖ’eji. (Psaume 55:22) Enɛ wu ɔ, enyi a nɔ sɛ̀n Jehovah kpo ayixa jlɔjlɔ kpo ɔ, a sixu ɖeji Psaume wlantɔ́ ɔ ɖɔhun. É wlan ɖɔ: “Un zé Jehovah ɖó nukɔn ce hwebǐnu. Ðó é ɖò ɖisi ce xwé, un na fún sà ǎ.” (Psaume 16:8; 63:8) Jehovah hɛn ɔ, é na d’alɔ we bɔ a na zán gbɛ̀ e nyɔ́ nukún tɔn mɛ é. Amɔ̌, lee a tuùn gbɔn é ɔ, kɛntɔ́ Mawu tɔn ɖé tíìn bo jló na sú ali tɔn dó we.

JIDÓMƐ SATAAN TƆN

6. Etɛ Sataan ka ɖɔ dó gbɛtɔ́ lɛ wu?

⁶ Wemata 11gɔ́ wema elɔ tɔn tinmɛ lee Sataan Awovi mɔ xó ɖɔ dó nǔbǐwukpétɔ́ e Mawu nyí é wu gbɔn é. Sataan dó hwɛ Mawu ɖɔ é ɖó adingban, bo lɛ́ hɛn ayixa dó ɖɔ ɖɔ tɛn e Jehovah ma na Adamu kpo Ɛva kpo bonu yeɖesunɔ na cyan nǔ ɖagbe ɖò nǔ nyanya mɛ ǎ é kún sɔgbe ó. Ee Adamu kpo Ɛva kpo hu hwɛ bɔ kúnkan yetɔn jɛ kpɔ́ sú jí ɖò ayikúngban ɔ jí gudo é ɔ, Sataan mɔ xó ɖɔ dó nǔ e wu gbɛtɔ́ lɛ bǐ nɔ setónú nú Mawu é wu. Sataan ɖɔ: ‘Enyi wǎn wɛ gbɛtɔ́ lɛ yí nú Mawu wutu wɛ zɔ́n bonu ye nɔ sɛ̀n ɛ ǎ. Nǎ gbè mì, un hɛn ɔ, na lɛkɔ nú mɛ lɛ bǐ sín gudo towe.’ Jɔbu sín tàn xlɛ́ ɖɔ nǔ e Sataan lin é nɛ. Mɛ̌ ka nyí Jɔbu? Nɛ̌ jidómɛ Sataan tɔn ka kàn ɛ gbɔn?

7, 8. (a) Aniwu Jɔbu ka nyí mɛ nukúnɖeji ɖé ɖò hwetɔnnu? (b) Nɛ̌ Sataan ka mɔ xó ɖɔ dó nǔ e wu Jɔbu ɖò Mawu sɛ̀n wɛ é wu gbɔn?

⁷ Xwè 3 600 mɔ̌ ɖíe wɛ Jɔbu nɔ gbɛ̀. Mɛ ɖagbe ɖé wɛ n’i, ɖó Jehovah ɖɔ: ‘Étɔn ɖɔhun ɖebǔ ɖò ayikúngban ɔ jí ǎ. Nya gbejinɔtɔ́ kpo ayijlɔjlɔnɔ ɖé kpo, é nɔ ɖi xɛsi nú Mawu bo nɔ hɔn nú nǔ nyanya.’ (Job 1:8) Jɔbu sín nǔ nyɔ́ Mawu nukúnmɛ.

⁸ Sataan mɔ xó ɖɔ dó nǔ e wu Jɔbu ɖò Mawu sɛ̀n wɛ é wu. Awovi ɖɔ nú Jehovah ɖɔ: “Hwiɖesu ma ko dó kpá lɛlɛ̌ dó [Jɔbu] kpo xwédo tɔn kpo kpodo nǔ e é ɖó lɛ é bǐ kpo à? A dó nú azɔ̌ tɔn, bɔ kanlin-kpó tɔn gbakpé ayikúngban ɔ jí bǐ. Amɔ̌, bo na dó huzu ɔ, kɛnklɛn dlɛn alɔ towe, bo ya gba nǔ e é ɖó lɛ é bǐ wu [bo kpɔ́n] ɖɔ é ma na gbɛ́ we ɖò nukún towe mɛ à jí.”—Job 1:10, 11.

9. Nɛ̌ Jehovah ka na xósin jidómɛ Sataan tɔn gbɔn? Etɛwu?

⁹ Sataan ɖò ɖiɖɔ wɛ ɖɔ Jɔbu nɔ sɛ̀n Mawu ɖó lè e é nɔ mɔ ɖ’emɛ é wu. Awovi lɛ́ ɖɔ ɖɔ enyi è tɛ́n Jɔbu kpɔ́n ɔ, é na lɛkɔ sín Mawu gudo. Nɛ̌ Jehovah ka na xósin jidómɛ Sataan tɔn gbɔn? Ðó nǔ e wu Jɔbu ɖò Mawu sɛ̀n wɛ é wu wɛ Sataan mɔ xó ɖɔ dó wutu ɔ, Jehovah tin d’é bɔ é tɛ́n Jɔbu kpɔ́n. Enɛ ɔ, Jɔbu tò yí wǎn nú Mawu kpo é gbɔ kpo ɔ, è na mɔ nǔ jɛ wu céɖécéɖé.

SATAAN TƐ́N JƆBU KPƆ́N

10. Mɛtɛnkpɔn tɛ lɛ Jɔbu ka mɔ? Amɔ̌, nɛ̌ é ka wà nǔ gbɔn?

¹⁰ Sataan tɛ́n Jɔbu kpɔ́n tlolo ɖò ali vovo nu. È fin kanlin tɔn ɖé lɛ, bo hu ɖevo lɛ. È lɛ́ hu deví tɔn lɛ gègě. Enɛ zɔ́n bɔ é byɔ akwɛwuvɛ́ mɛ. Gɔ́ nú enɛ lɛ ɔ, adǎn ɖevo lɛ́ gbò Jɔbu: jɔhɔn ɖaxó ɖé nyì bo hu vǐ tɔn wǒ lɛ. Adǎn enɛ lɛ bǐ gbò é có “Jɔbu hu hwɛ̌ alǒ ɖɔ xó gblégblé ɖebǔ dó Mawu wu ǎ.”—Job 1:22.

11. (a) Jì ɖevo tɛ Sataan ka dó Jɔbu? Etɛ Jehovah ka jó Sataan dó bɔ é wà? (b) Nɛ̌ Jɔbu ka wà nǔ gbɔn ɖò azɔn baɖabaɖa e é jɛ é hwenu?

¹¹ Awakanmɛ ko kú Sataan ǎ. É na ko lin ɖɔ enyi Jɔbu na bo tlɛ dɛ ɖò nǔɖokan tɔn e sú dó lɛ é, deví tɔn kpo vǐ tɔn e kú lɛ é kpo nu ɔ, é na lɛkɔ sín Mawu gudo ɖò azɔnjɛ hwenu. Jehovah jó Sataan dó bɔ é dó azɔn baɖabaɖa ɖé Jɔbu. Amɔ̌, enɛ lɔ zɔ́n bonu nǔ e Jɔbu ɖi nú Mawu é cì fò ǎ. É nyɔ́ wà ɔ, é kudeji bo ɖɔ: “Kaka nú funfún ce na xwɛ́ ɔ, un na jó gbejininɔ ce dó ǎ!”—Job 27:5.

12. Nɛ̌ nǔwiwa Jɔbu tɔn ka xlɛ́ ɖɔ nǔ e Awovi ɖɔ dó wutu tɔn é nyí adingban gbɔn?

¹² Jɔbu tuùn ɖɔ Sataan wɛ zɔ́n bɔ emi ɖò wuvɛ̌ lɛ mɔ wɛ ǎ. É lin ɖɔ Mawu wu wɛ tagba emitɔn lɛ sín, ɖó é mɔ nukúnnú jɛ jì e Awovi dó nǔbǐwukpétɔ́ e Jehovah nyí é wu ǎ. (Job 6:4; 16:11-14) É ɖò mɔ̌ có, é nɔ gbeji nú Jehovah. Gbejininɔ Jɔbu tɔn zɔ́n bɔ xó e Sataan ɖɔ bo ɖɔ é ɖò Jehovah sɛ̀n wɛ ɖó ce jɛn na bí wutu é nyí adingban.

13. Ali tɛ gbejininɔ Jɔbu tɔn ka hun?

¹³ Gbejininɔ Jɔbu tɔn na nu kɛ tɛn Jehovah bɔ é na xósin nú jidómɛ Sataan tɔn. Jɔbu nyí xɔ́ntɔn Jehovah tɔn nugbǒ bɔ É d’ajɔ ɛ ɖó gbejininɔ tɔn wu.—Job 42:12-17.

LEE É KÀN WE GBƆN É

14, 15. Etɛwu mǐ ka sixu ɖɔ ɖɔ xó e Sataan mɔ ɖɔ dó Jɔbu wu é kàn gbɛtɔ́ lɛ bǐ?

¹⁴ Gbejininɔ nú Mawu Jɔbu ɖokponɔ tɔn wu wɛ Sataan mɔ xó ɖɔ dó ǎ. É mɔ xó ɖɔ dó hwi lɔ tɔn wu. Xó Jehovah tɔn e ɖò Proverbes 27:11 mɛ é ɖè enɛ ɔ xlɛ́ céɖécéɖé; é ɖɔ: “Nyɔ̌nùí, vǐ ce, bo hɛn xomɛ ce hun, bonu ma na xósin mɛ e ɖò nǔɖɔ̀ ba mì wɛ é.” Xwè kanweko mɔkpan ɖò kú Jɔbu tɔn gudo wɛ è wlan xó enɛ lɛ. É xlɛ́ ɖɔ Sataan kpó ɖò nǔɖɔ̀ ba Jehovah wɛ bo kpó ɖò xó mɔ ɖɔ dó mɛ e nɔ sɛ̀n Ɛ lɛ é wu wɛ. Enyi mǐ nɔ zán gbɛ̀ mǐtɔn lee Jehovah jló gbɔn é ɔ, mǐ na na nu kɛ tɛn ɛ bɔ é na na xósin nú jidómɛ Sataan tɔn, bɔ mǐ na lɛ́ hɛn xomɛ tɔn hun. Etɛ a ka lin dó enɛ wu? É hun xomɛ nú we ɖɔ a hɛn ɔ, a na na nu kɛ tɛn Mawu bɔ é na na xósin nú jidómɛ Sataan tɔn, enyi é tlɛ byɔ ɖɔ a na ɖyɔ lee a nɔ zán gbɛ̀ towe gbɔn é à cé?

¹⁵ Ðǒ ayi wu ɖɔ Sataan ɖɔ: “Nǔ e mɛɖé ɖó é bǐ wɛ é na sɔ́ jó dó lindɔ̌n tɔn tamɛ.” (Job 2:4) Xókwin “mɛɖé” e Sataan zán é xlɛ́ céɖécéɖé ɖɔ é kún nyí Jɔbu ɖokponɔ wu wɛ é mɔ xó ɖɔ dó ó, amɔ̌, dó gbɛtɔ́ lɛ bǐ wu. Xó taji ɖé nɛ. Sataan mɔ xó ɖɔ dó gbejininɔ towe nú Mawu wu. Awovi jló ɖɔ a ni tlitó nú Mawu bo jó nǔjlɔjlɔwiwa dó hwenu e a na ɖò wuvɛ̌ lɛ mɛ é. Nɛ̌ Sataan ka nɔ tɛnkpɔn bo na wà mɔ̌ gbɔn?

16. (a) Wlɛnwín tɛ lɛ Sataan ka nɔ zán bo na dó lilɛ mɛ lɛ sín Mawu li jí? (b) Nɛ̌ Sataan ka sixu zán wlɛnwín enɛ lɛ dó wǔ we gbɔn?

¹⁶ Lee mǐ ko tinmɛ gbɔn ɖò Wemata 10gɔ́ ɔ mɛ é ɔ, Sataan nɔ zán wlɛnwín vovo dó lilɛ gbɛtɔ́ lɛ sín Mawu li jí. Wlɛnwín lɛ ɖokpo wɛ nyí ɖɔ é nɔ zɔn mɛ jí “kinikini e ɖò adǎn jí . . . bo ɖò mɛ e é na vún ɖu ɔ ba wɛ” é ɖɔhun. (1 Piyɛɛ 5:8) Sataan sixu sísɛ́ xɔ́ntɔn, hɛnnumɔ, alǒ mɛ towe ɖevo lɛ bɔ ye na ván nukún dó we, ɖó tagba e jɛ wɛ a ɖè bo ɖò Biblu kplɔ́n wɛ bo nɔ lɛ́ zán nǔ e kplɔ́n wɛ a ɖè é wu.a (Jaan 15:19, 20) Wlɛnwín ɖevo wɛ nyí ɖɔ Sataan nɔ “sɔ́ wɛnsagun weziza tɔn sín ninɔmɛ.” (2 Kolɛntinu lɛ 11:14) Awovi sixu zán wlɛnwín gɛ́dɛ́ gɛ́dɛ́ lɛ dó flú we bo na lilɛ we sín Mawu li jí. É sixu lɛ́ bló bɔ awakanmɛ kú we, bɔ a sixu lin vlafo ɖɔ emi kún sixu wà nǔ ɖebǔ bo hɛn xomɛ Mawu tɔn hun ó. (Proverbes 24:10) Sataan na bo wà nǔ “kinikini e ɖò adǎn jí é,” alǒ “wɛnsagun weziza tɔn” ɖɔhun ɔ, jidómɛ tɔn ko ɖyɔ ǎ: É ɖɔ ɖɔ enyi a kpannukɔn mɛtɛnkpɔn lɛ ɔ, a na jó Mawu sínsɛ́n dó. Nɛ̌ a ka sixu na xósin nú jidómɛ enɛ ɔ bo xlɛ́ gbejininɔ towe nú Mawu Jɔbu ɖɔhun gbɔn?

SƐ́N JEHOVAH TƆN LƐ NYÍNYÍ

17. Hwɛjijɔ tɛ ka nyí hwɛjijɔ taji e wu mǐ ɖó na setónú nú sɛ́n Jehovah tɔn lɛ é?

¹⁷ A sixu na xósin nú jidómɛ Sataan tɔn gbɔn gbɛ̀ e nɔ hɛn xomɛ Mawu tɔn hun e zinzan gblamɛ. Etɛ lɛ enɛ ka byɔ? Biblu na xósin ɖɔ: “A ɖó na yí wǎn nú Jehovah Mawu towe kpo ayixa towe bǐ kpo kpodo lindɔ̌n towe bǐ kpo kpodo hlɔnhlɔn towe bǐ kpo.” (Deutéronome 6:5) Bǎ e mɛ wǎn e a yí nú Mawu e syɛn ɖó é wɛ nǔ e é ba ɖò así towe é biblo na nɔ jló we ɖó. Mɛsɛ́dó Jaan wlan ɖɔ: “Wǎn yí nú Mawu wɛ nyí ɖɔ è ni nyì sɛ́n tɔn lɛ.” Enyi a yí wǎn nú Jehovah kpo ayixa towe bǐ kpo ɔ, a na mɔ ɖɔ ‘sɛ́n tɔn lɛ kún vɛ́ nyì ó.’—1 Jaan 5:3.

18. Ðɔ sɛ́n Jehovah tɔn ɖé lɛ. (Kpɔ́n gbàví “Nyì Alɔ nú Nǔ E Jehovah Gbɛ́ Wǎn Na lɛ É.”)

¹⁸ Sɛ́n tɛ lɛ Jehovah ka dó? Ðé lɛ ɖɔ xó dó walɔ e mǐ ɖó na nyì alɔ na lɛ é jí. Ði kpɔ́ndéwú ɖé ɔ, kpɔ́n gbàví e ɖò wexwɛ 122gɔ́ ɔ jí é. Xota tɔn wɛ nyí “Nyì Alɔ nú Nǔ E Jehovah Gbɛ́ Wǎn Na lɛ É.” A na mɔ bɔ è slɛ́ walɔ e Biblu gbɛ́ lɛ é ɖé lɛ ɖó finɛ. Enyi a kpɔ́n walɔ e è slɛ́ ɖó gbàví ɔ mɛ lɛ é ɖé lɛ tlolo ɔ, é nɔ cí ɖɔ ye kún nyla sɔmɔ̌ ó ɖɔhun. Amɔ̌, enyi a lin tamɛ dó wemafɔ e è slɛ́ dó nu yetɔn lɛ é jí gudo ɔ, a na mɔ nùnywɛ e ɖò sɛ́n Jehovah tɔn lɛ mɛ é. Walɔ ɖé lɛ jijodo ɖò gbɛzán towe mɛ sixu vɛwǔ nú we tawun. É ɖò mɔ̌ có, gbɛ̀ e nɔ nyɔ́ Mawu nukúnmɛ é zinzan nɔ hɛn lè wá bo nɔ lɛ́ na awǎjijɛ mɛ tawun. (Isaïe 48:17, 18) A hɛn ɔ, a na bló mɔ̌. Nɛ̌ mǐ ka wà gbɔn bo tuùn mɔ̌?

19. Nɛ̌ mǐ ka wà gbɔn bo tuùn ɖɔ Mawu kún nɔ byɔ nǔ e hugǎn mǐ é mǐ ó?

¹⁹ Jehovah nɔ zɔ́n nǔ e mǐ ma sixu bló ǎ é mǐ gbeɖé ǎ. (Deutéronome 30:11-14) É tuùn lee mǐ kpé nǔ wu gbɔn é kpo dogbó mǐtɔn lɛ kpo hú mǐɖesunɔ. (Psaume 103:14) Gɔ́ nú enɛ ɔ, Jehovah hɛn ɔ, é na d’alɔ mǐ bɔ mǐ na setónú n’i. Mɛsɛ́dó Pɔlu wlan ɖɔ: “Mawu nɔ gɔn akpá e é dó lɛ ɖè ǎ; é na lɔn bɔ tɛnkpɔn ɖé na wá nú mi zɛ hlɔnhlɔn mitɔn wu ǎ; amɔ̌ hwenu e tɛnkpɔn na wá nú mi ɔ, é na na hlɔnhlɔn mi bɔ mi na dɛ ɖ’enu; é na ɖè ali nú mi bɔ mi na tɔ́n sín mɛ.” (1 Kolɛntinu lɛ 10:13) Jehovah hɛn ɔ, é na na we “hlɔnhlɔn aditi” e na zɔ́n bɔ a na dɛ ɖò tɛnkpɔn lɛ nu é. (2 Kolɛntinu lɛ 4:7) Ee Pɔlu dɛ ɖò tɛnkpɔn gègě nu gudo é ɔ, é ɖɔ: “Mɛ e nɔ na hlɔnhlɔn mì ɔ wɛ nɔ zɔ́n, bɔ un nɔ sixu kpé nǔ enɛ lɛ bǐ wu.”—Filipunu lɛ 4:13.

TƐNKPƆN BO NA ÐÓ JIJƆ E MAWU YÍ WǍN NA LƐ É

20. Jijɔ e Mawu yí wǎn na é tɛ lɛ a ka ɖó na tɛnkpɔn bo na ɖó? Etɛwu ye ka nyí nǔ taji?

²⁰ Bonu nǔ towe na nyɔ́ Jehovah nukúnmɛ ɔ, alɔ nyìnyì nú nǔ e é gbɛ́ wǎn na lɛ é kpowun ko kpé ǎ. A ɖó na lɛ́ yí wǎn nú nǔ e é yí wǎn na lɛ é. (Hlɔmanu lɛ 12:9) A nɔ ba na zun xɔ́ntɔn xá mɛ e ɖó linlin ɖokpo ɔ, jlǒ ɖokpo ɔ kpo nùɖiɖi ɖokpo ɔ kpo hwi ɖɔhun lɛ é à cé? Mɔ̌ wɛ é nyí gbɔn nú Jehovah lɔ. Enɛ wu ɔ, tɛnkpɔn bo yí wǎn nú nǔ e Jehovah yí wǎn na lɛ é. Psaume 15:1-5 ɖɔ xó dó nǔ e mɛ e jló na nyí xɔ́ntɔn Mawu tɔn lɛ é na wà lɛ é kpo ee ye ma ɖó na wà ǎ lɛ é kpo ɖé lɛ jí. Xɔ́ntɔn Jehovah tɔn lɛ nɔ yí gbè bɔ gbigbɔ mímɛ́ tɔn nɔ d’alɔ ye bɔ ye nɔ ɖó jijɔ ɖagbe lɛ, ɖi “wanyiyi, xomɛhunhun, vivomimɔ, suúluɖiɖo, xomɛnyínyɔ́, ɖagbewiwa, gbejininɔ, fífá, mɛɖeejiɖuɖe.”—Galatinu lɛ 5:22, 23.

21. Etɛ ka na d’alɔ we bɔ a na ɖó jijɔ e Mawu yí wǎn na lɛ é?

²¹ Biblu xixa kpo Biblu kplɔnkplɔn hwɛhwɛ kpo na d’alɔ we bɔ a na ɖó jijɔ e Jehovah yí wǎn na lɛ é. Nǔ e Mawu ba ɖò mɛ sí lɛ é kplɔnkplɔn na d’alɔ we bɔ linlin towe lɛ na sɔgbe kpo linlin tɔn lɛ kpo. (Isaïe 30:20, 21) Lee wanyiyi e a ɖó nú Jehovah é ɖò syɛnsyɛn wɛ sɔ́ é ɔ, mɔ̌ wɛ jlǒ e a ɖó bo na zán gbɛ̀ e nɔ nyɔ́ nukún tɔn mɛ é na syɛn sɔ́ é nɛ.

22. Lè tɛ lɛ gbɛ̀ e nɔ nyɔ́ Mawu nukúnmɛ é zinzan ka nɔ hɛn wá?

²² É byɔ ɖɔ è ni dó gǎn cobo na sixu zán gbɛ̀ e nɔ nyɔ́ Jehovah nukúnmɛ é. Biblu sɔ́ gbɛzinzan towe huzuhuzu sɔ́ jlɛ́ dó gbɛtɔ́ xóxó ɔ zízé nyì ayǐ bo sɔ́ gbɛtɔ́ yɔyɔ̌ ɔ dó wu. (Kolɔsinu lɛ 3:9, 10) Amɔ̌, Psaume wlantɔ́ ɔ tinmɛ ɖɔ sɛ́n Jehovah tɔn lɛ nyínyí ɖó lè tawun. (Psaume 19:11) Hwi lɔmɔ̌ na mɔ ɖɔ gbɛ̀ e nɔ nyɔ́ Mawu nukúnmɛ é zinzan ɖó lè gègě. Enyi a zán gbɛ̀ enɛ ɔ, a na na xósin nú jidómɛ Sataan tɔn bo na hɛn xomɛ Jehovah tɔn hun.