Lee Mǐ Ðó Na Wà Nǔ Xá Mɛ E È Ðè Sín Agun Mɛ É ɖé Gbɔn É

Wuvɛ̌ e mǐ nɔ sè hwenu e è ɖè hɛnnumɔ alǒ xɔ́ntɔn vívɛ́ mǐtɔn ɖé sín agun mɛ é nɔ syɛn tawun. Lee mǐ wà nǔ gbɔn sɔgbe xá alixlɛ́mɛ e Biblu na dó ninɔmɛ enɛ jí é sixu xlɛ́ bǎ e mɛ mǐ yí wǎn nú Mawu ɖó é kpo bǎ e mɛ mǐ nɔ nɔ gbeji nú tuto tɔn ɖó é kpo.a Mi nú mǐ ni ba dò nú nùkanbyɔ e nɔ fɔ́n ɖò ninɔmɛ enɛ mɛ é ɖé lɛ.

Nɛ̌ mǐ ka ɖó na wà nǔ xá mɛ e è ɖè sín agun mɛ é ɖé gbɔn? Biblu ɖɔ: “Mi ni ma kpé nǔ ɖebǔ xá mɛ e ɖɔ emi nyí [Klisanwun], bo ka nɔ ɖò aga lɛ̀ wɛ, abǐ mɛ nú jló wɛ, abǐ vodun sɛ̀n wɛ, abǐ nùyá ɖɔ nú mɛ wɛ, ahan nu mú wɛ, abǐ ajo ja wɛ é ó. Mi ɖó na ɖu nǔ xá mɛ mɔhunkɔtɔn lɔ vɔ́vɔ́ ǎ.” (1 Kɔlɛntinu lɛ 5:11) Mǐ xà dó mɛɖebǔ e “ma nɔte nùkplɔnmɛ Klisu tɔn lɛ kɛɖɛ jí ǎ” é wu ɖɔ: “Mi ma yí i dó xwé mitɔn gbè ó; mi ma ka dó gbè é lɔ vɔ́vɔ́ ó. Ðó mɛ e dó gbè é ɔ, nǔ nyanya e é nɔ wà lɛ wà xá ɛ wɛ é ɖè.” (2 Jaan 9-11) Mǐ nɔ ɖɔ xó dó gbigbɔ sín nǔ lɛ jí alǒ dó gbɛ̌ xá mɛ e è ɖè sín agun mɛ lɛ é ǎ. Atọ̀họ̀-Nuhihọ́ lọ Tọn 1^er janvier 1982, wexwɛ 11 ɖɔ jí: “‘A fɔ́n ganji à?’ yayǎnɔ ɖiɖɔ sixu nyí afɔ nukɔntɔn e è na ɖè bo dó jɛ xóɖɔɖókpɔ́ xá mɛɖé jí bo tlɛ lɛ́ zun xɔ́ntɔn xá mɛ ɔ é ɖé. Mǐ jló na hun ali enɛ nú mɛ e è ɖè sín agun mɛ é ɖé wɛ à?”

É ka ɖò dandan dóó ɖɔ mǐ ni ɖó wǔ zɔ bǐ mlɛ́mlɛ́ nú mɛ e è ɖè sín agun mɛ lɛ é wɛ à? Ɛɛn dandan wɛ, ɖó hwɛjijɔ gègě wu. Nukɔntɔn ɔ, mɔ̌ biblo nɔ xlɛ́ ɖɔ mǐ ɖò gbeji nú Mawu kpo Xó tɔn kpo. É nyí hwenu e é bɔwǔ nú mǐ é kɛɖɛ jɛn mǐ nɔ setónú nú Jehovah ǎ, amɔ̌, mǐ nɔ lɛ́ wà mɔ̌ hwenu e é vɛwǔ nú mǐ é. Wǎn yí nú Mawu nɔ sísɛ́ mǐ bɔ mǐ nɔ setónú nú sɛ́n tɔn lɛ bǐ, lobo nɔ tuùn ɖɔ hwɛjijɔnɔ kpo wanyiyinɔ kpo wɛ n’i, bɔ sɛ́n tɔn lɛ nɔ hɛn lè ɖaxó hugǎn lɛ wá nú mǐ. (Ezayíi 48:17; 1 Jaan 5:3) Wegɔ ɔ, wǔ ɖiɖó zɔ nú nùwanyidotɔ́ e ma lɛkɔ ǎ é ɖé nɔ cyɔn alɔ mǐ kpo hagbɛ̌ agun ɔ tɔn e kpò lɛ é kpo jí, bɔ akpà nɔ jɛ kancica e ɖò mǐ kpo Mawu kpo tɛntin é kpo walɔ mǐtɔn kpo wu ǎ, lobo nɔ lɛ́ jɛhun dó nyikɔ ɖagbe agun ɔ tɔn jí. (1 Kɔlɛntinu lɛ 5:6, 7) Atɔngɔ ɔ, nugbodòdó Biblu tɔn lɛ xwixwedó télélé tlɛ sixu hɛn lè wá nú mɛ e è ɖè sín agun mɛ é. Enyi mǐ xwedó gbeta e kɔn wěɖegbɛ́ hwɛɖiɖɔ tɔn ɔ wá é ɔ, enɛ sixu zɔ́n bɔ nùwanyidotɔ́ e ma yí gbè nú gǎn e mɛxo lɛ dó bo na d’alɔ ɛ é ǎ kaka jɛ finɛ é na lin nǔ kpɔ́n. Gbɛ̌ xɔ akwɛ e é ma sɔ́ sixu dó xá mɛvívɛ́ tɔn lɛ ǎ é sixu d’alɔ ɛ bɔ é na wá “dó ayi dò,” bo mɔ nǔ jɛ lee nùwanyido tɔn syɛn sɔ́ é wu, lobo na ɖè afɔ e jɛ lɛ é bo lɛkɔ wá Jehovah gɔ́n.​—Luki 15:17.

Enyi hɛnnumɔ ɖé wɛ è ɖè sín agun mɛ ɔ ka ló? Ðò ninɔmɛ mɔhun mɛ ɔ, kancica syɛnsyɛn e ɖò hagbɛ̌ xwédo tɔn lɛ tɛntin é sixu zɔ́n bɔ gbejininɔ nú sɛ́n Jehovah tɔn lɛ kpo wanyiyi kpo kàn sunnu byɔ. Nɛ̌ mǐ ka ɖó na wà nǔ kpo hɛnnumɔ mǐtɔn e è ɖè sín agun mɛ é ɖé kpo gbɔn? Mǐ sixu ɖɔ xó dó ninɔmɛ lɛ bǐ jí ɖò wema elɔ mɛ ǎ, amɔ̌, mi nú mǐ ni ɖɔ xó dó ninɔmɛ taji wè jí.

Ðò ninɔmɛ ɖé lɛ mɛ ɔ, é sixu nyí hagbɛ̌ xwédo ɔ tɔn ɖé, bɔya mɛjitɔ́ lɛ ɖokpo alǒ vǐ yetɔn kpɛví e kpó ɖò xwégbe é ɖé wɛ è ɖè sín agun mɛ. Ðó ɖè e è ɖè é sín agun mɛ é sɛ́n kàn nú kancica xwédo tɔn lɛ ǎ wutu ɔ, nǔwiwa kpo lee ye ko nɔ mɔ yeɖée gbɔn ayǐ vɔ̌ gbè ɖò xwédo ɔ mɛ lɛ é kpo sixu kpó ɖò yiyi wɛ. É ɖò mɔ̌ có, ɖó walɔ tɔn wutu ɔ, éɖesunɔ ko jló bo sɛ́n kàn nú kancica gbigbɔ mɛ tɔn e ɖò é kpo xwédo tɔn kpo tɛntin é. Enɛ wu ɔ, enyi mǐ jló na xlɛ́ Jehovah ɖɔ mǐ yí wǎn n’i bo lɛ́ ɖò gbeji n’i ɔ, mǐ sɔ́ sixu lɔn bonu hagbɛ̌ xwédo mǐtɔn tɔn e è ɖè sín agun mɛ é ɖ’alɔ ɖò gbigbɔ sín nǔ lɛ mɛ xá mǐ ǎ. Ði kpɔ́ndéwú ɔ, enyi mɛ e è ɖè sín agun mɛ é ɖò ayǐ hwenu e xwédo ɔ kplé bo ɖò sinsɛn-biblo xwédo tɔn bló wɛ é ɔ, é ɖó na ɖ’alɔ ɖ’emɛ ǎ. Amɔ̌, enyi mɛ e è ɖè sín agun mɛ é nyí yɔkpɔvu bonu mɛjitɔ́ tɔn lɛ kpó ɖò nukún kpé dó wǔ tɔn wɛ ɔ, ye ɖó na kpó ɖò kpinkplɔn ɛ wɛ bo kpó ɖò ɖiɖe é dó ali jí wɛ. Enɛ wu ɔ, mɛjitɔ́ wanyiyinɔ lɛ sixu bló tuto Biblu kpinkplɔn tɔn ɖé kpo vǐ ɔ kpo.b​—Nùnywɛxó 6:20-22; 29:17.

Ðò ninɔmɛ ɖevo lɛ mɛ ɔ, hɛnnumɔ e è ɖè sín agun mɛ é sixu ɖò fí ɖevo. Ninɔmɛ ɖé lɛ sixu byɔ ɖɔ è ni mɔ mɛɖée bo ɖɔ xó dó xwédo ɔ sín nùɖé lɛ jí. É ɖò mɔ̌ có, è ɖó na tɛnkpɔn bɔ mɛɖée mimɔ mɔhun na sukpɔ́ ǎ. Hagbɛ̌ xwédo Klisanwun gbejinɔtɔ́ lɛ tɔn nɔ ba hwɛjijɔ dó wà nǔ ɖó kpɔ́ xá hɛnnumɔ e è ɖè sín agun mɛ, b’ɛ ma ka ɖò xwé ɖokpo ɔ gbè xá ye ǎ é ɖé ǎ. É nyɔ́ wà ɔ, gbejininɔ nú Jehovah kpo tutoblonunu tɔn kpo nɔ sísɛ́ ye bɔ ye nɔ setónú nú nǔ e Biblu ɖɔ dó mɛ ɖiɖe sín agun mɛ wu é. Gbejininɔ yetɔn ɖò ninɔmɛ enɛ mɛ nɔ xlɛ́ ɖɔ nùwanyidotɔ́ ɔ sín nǔ nɔ ɖu ayi mɛ nú ye tawun, bo sixu d’alɔ ɛ bɔ é na ɖu lè tó e è dɔn n’i é tɔn.c​—Eblée lɛ 12:11.