Nɛ̌ A ka Sixu Sɛkpɔ Mawu Gbɔn?

1. Mawu ka nɔ ɖótó ɖɛ lɛ bǐ à?

Mawu byɔ gbɛtɔ́ alɔkpa lɛ bǐ ɖɔ ye ni sɛkpɔ emi gbɔn ɖɛxixo gblamɛ. (Ðɛhan 65:3) É ɖò mɔ̌ có, é ka nɔ ɖótó alǒ yí ɖɛ lɛ bǐ ǎ. Kpɔ́ndéwú ɖokpo ɖíe, sunnu e nɔ doya nú asì tɔn ɔ ɖɛ tɔn lɛ sixu cí ali. (1 Piyɛ́ɛ 3:7) Mɔ̌ ɖokpo ɔ, hwenu e Izlayɛli-ví lɛ ɖò nǔ nyanya wà wɛ magbokɔ é ɔ, Mawu gbɛ́ ɖɔ emi kún na sè ɖɛ yetɔn ó. Mǐ ɖó na tuùn céɖécéɖé ɖɔ ɖɛ ɔ, wǔjɔmɛ Mawu tɔn wɛ. É ɖò mɔ̌ có, enyi hwɛhutɔ́ akowunká ɖé lɛkɔ sín hwɛ tɔn lɛ gudo ɔ, Mawu na sè ɖɛ tɔn.​—Xà Ezayíi 1:15; 55:7.

Kpɔ́n video Mawu ka Nɔ Ðótó Ðɛ lɛ Bǐ À?

2. Nɛ̌ mǐ ka ɖó na nɔ xoɖɛ gbɔn?

Alabǔ wɛ ɖɛ nyí ɖò sinsɛn-biblo mǐtɔn mɛ, hǔn Gbɛɖotɔ́ ɔ, Jehovah kɛɖɛ wɛ mǐ ɖó na xoɖɛ sɛ́dó. (Matie 4:10; 6:9) Mɔ̌ ɖokpo ɔ, ɖó mǐ nyí hwɛhutɔ́ wu ɔ, mǐ ɖó na nɔ xoɖɛ ɖò nyikɔ Jezu tɔn mɛ, ɖó éyɛ wɛ kú dó hwɛ mǐtɔn lɛ tamɛ. (Jaan 14:6) Jehovah nɔ jló ɖɔ mǐ ni nɔ vɔ́ ɖɛ e è kplɔ́n dó tamɛ abǐ wlan lɛ é xà kpowun ǎ. É nɔ jló ɖɔ mǐ ni nɔ xoɖɛ sín ayi mɛ.​—Xà Matie 6:7; Filipunu lɛ 4:6, 7.

Gbɛɖotɔ́ ɔ tlɛ sixu sè ɖɛ e è xò dó xomɛ lɛ é lɔ. (1 Samuwɛli 1:12, 13) É jló ɖɔ mǐ ni nɔ xoɖɛ sɛ́dó emi hwebǐnu, é sixu nyí zǎnzǎn, gbada, nùɖuɖu hwenu, kpo hwenu e adǎn ɖé gbò mǐ é kpo.​—Xà Ðɛhan 55:23; Matie 15:36.

3. Etɛwu Klisanwun nugbǒ lɛ ka nɔ kplé ɖó kpɔ́?

Mawu sisɛkpɔ na fá ǎ, ɖó mǐ ɖò mɛ e ma ɖó nùɖiɖi nú Mawu ǎ lɛ é tɛntin bɔ ye nɔ ko akpá e é dó ɖɔ fífá na tíìn ɖò ayikúngban jí é. (2 Timɔtée 3:1, 4; 2 Piyɛ́ɛ 3:3, 13) Hǔn, mǐ ɖó hudo kanmɛsyɛn nina mɛ e è nɔ mɔ ɖò gbɛ̌dido xá nùɖitɔ́ hàtɔ́ lɛ mɛ é tɔn, bɔ ye lɔ ɖó hudo mǐtɔn.​—Xà Eblée lɛ 10:24, 25.

Gbɛ̌ dó xá mɛ e yí wǎn nú Mawu lɛ é nɔ d’alɔ mǐ bɔ mǐ nɔ sɛkpɔ Mawu ganji. Kplé Kúnnuɖetɔ́ Jehovah tɔn lɛ tɔn nɔ hun ali ɖagbe nú mɛ bɔ è nɔ ɖu lè nùɖiɖi mɛ ɖevo lɛ tɔn tɔn.​—Xà Hlɔmanu lɛ 1:11, 12.

4. Nɛ̌ a ka sixu sɛkpɔ Mawu gbɔn?

A sixu sɛkpɔ Jehovah enyi a nɔ lin tamɛ kpɔ́n dó nǔ e a ko kplɔ́n ɖò Xó tɔn mɛ é wu ɔ nɛ. Nɔ lin tamɛ dó nǔ e nǔwiwa tɔn lɛ, wěɖexámɛ tɔn lɛ kpo akpá e é dó lɛ é kpo sixu kplɔ́n mɛ é wu. Ðɛxixo kpo tamɛ linlin kpo nɔ d’alɔ mǐ bɔ mǐ nɔ mɔ nukúnnú jɛ lee wanyiyi Mawu tɔn kpo nùnywɛ tɔn kpo xɔ akwɛ sɔ́ é mɛ.​—Xà Jozuwée 1:8; Ðɛhan 1:1-3.

Enyi a ɖeji dó Mawu wu bo ɖi nǔ n’i ɔ jɛn a sixu sɛkpɔ ɛ. Amɔ̌ nùɖiɖi cí nǔɖògbɛ e ɖó hudo nùɖuɖu tɔn ɔ ɖɔhun. Tamɛ linlin dó nǔ e wu a ɖi nǔ é jí na nyí nùɖuɖu e a ɖó na nɔ na nùɖiɖi towe hwɛhwɛ ɔ.​—Xà Matie 4:4; Eblée lɛ 11:1, 6.

5. Lè tɛ sisɛkpɔ Mawu ka na hɛn wá nú we?

Jehovah nɔ kpé nukún dó mɛ e yí wǎn n’i lɛ é wu. É nɔ cyɔn alɔ ye jí sín nǔ ɖebǔ e sixu nyí awovinú nú nùɖiɖi yetɔn kpo nukúnɖiɖo gbɛ̀ mavɔmavɔ tɔn yetɔn kpo é sí. (Ðɛhan 91:1, 2, 7-10) É gb’akpá nú mǐ dó gbɛzinzan ɖěɖee sixu wà nǔ dó lanmɛ na nɔ ganji mǐtɔn kpo awǎjijɛ mǐtɔn kpo wu é wu. Jehovah nɔ kplɔ́n gbɛzán ɖagbe hugǎn e mǐ na zán é mǐ.​—Xà Ðɛhan 73:27, 28; Jaki 4:4, 8.