Nǔ Sinsɛnzɔ́ Towe Ni Bí Alɔ nú We D’eji: Azɔ̌ Kpinkplɔn Mɛ Yɔyɔ̌ Lɛ

Nǔ E Wu É Ðò Taji É: Jezu sín ahwanvu yɔyɔ̌ lɛ ɖó na kplɔ́n tónúsíse nú ‘nǔ e sín gbè é ɖè lɛ é bǐ,’ kaka jɛ nugbǒ ɔ kpinkplɔn mɛ ɖevo lɛ jí. (Mat. 28:19, 20) Mɛ yɔyɔ̌ gègě ko kpéwú bo nɔ w’azɔ̌ ɖò Wemaxɔmɛ Azɔ̌ Yɛhwexɔsuɖuto ɔ Tɔn, lobo sixu ko lɛ́ ɖekúnnu e ma nyí aca tɔn ǎ é nú hɛnnumɔ alǒ xɔ́ntɔn yetɔn lɛ. É ɖò mɔ̌ có, hwenu e nǔ e kplɔ́n wɛ ye ɖè lɛ é na ɖò nukún yetɔn mɛ nyɔ́ d’eji wɛ, bɔ ye na wá tuùn ɖɔ Jehovah ba ɖɔ gbɛtɔ́ lɛ bǐ ni sè wɛnɖagbe ɔ é ɔ, ye sixu ɖɔ ɖɔ emi ɖó jlǒ bo na ɖ’alɔ ɖò wɛnɖagbejijlazɔ́ ɔ mɛ. (Hlɔ. 10:13, 14) Enyi è yí gbè nú mɛ yɔyɔ̌ lɛ bonu ye nyí wɛnjlatɔ́ e ma ko bló baptɛm ǎ lɛ é gudo ɔ, azɔ̌ kpinkplɔn ye ganji na d’alɔ ye bɔ ye na lɛ́ kpankɔ́n d’eji hwenu e ye ɖè afɔ taji enɛ bo na dó sixu yì nukɔn ɖò gbigbɔ lixo é.—Luk. 6:40.

Lee È Sixu Bló Gbɔn É:

• D’alɔ wɛnjlatɔ́ yɔyɔ̌ ɔ bonu é ni yí wema ɖěɖee sín hudo é na ɖó bo na dó sixu jla wɛnɖagbe ɔ bo lɛ́ kplɔ́n nǔ mɛ é. Xlɛ́ ɛ lee a tò kúnnuɖegbe saki towe gbɔn é, bo sɔ́ wema lɛ ɖokpo ɖokpo bo tinmɛ nǔ e wu a hɛn é n’i.

• Mi nɔ kpɔ́ bo sɔ́ nùxwlémɛ ɖokpo ɖò Sinsɛnzɔ́ Axɔsuɖuto ɔ Tɔn Mǐtɔn mɛ bo bló vɔ̌gbɔnji tɔn. Dǒ wusyɛn lanmɛ nú wɛnjlatɔ́ yɔyɔ̌ ɔ ɖɔ é ni zán nùxwlémɛ ɔ ɖò xógbe éɖesunɔ tɔn lɛ mɛ. Mi vɔ́ wlɛnwín nùxwlémɛ tɔn e ɖò wema Mọaleyi, wexwɛ 82gɔ́ ɔ jí bo sɔgbe kpo xá mitɔn mɛ kpo lɛ é jí gbɔn. Tɛɖɛ̌ nǔ e wu nǔsisɔ kpo acɔ́biba ɖó jlɛ̌ jí kpo ɖò taji é jí.—2 Kɔ. 6:3, 4.

• Kplɔ́n ɛ azɔ̌ ɔ kpɛɖé kpɛɖé. Xlɛ́ kati fí e agun ɔ nɔ ɖekúnnu ɖè lɛ é tɔn lɛ ɖokpo wɛnjlatɔ́ yɔyɔ̌ ɔ, bo kplɔ́n ɛ lee é na zán xwé ɖé gbè jɛ xwé ɖé gbè wema ɔ gbɔn é. Tinmɛ nǔ ɖěɖee é sixu wlan ɖ’ayǐ dó mɛ e ɖè jlǒ xlɛ́ lɛ é wu é n’i. Kplɔ́n ɛ lee é sixu zán jw.org kpo akpomɛwema Une bonne nouvelle pour des gens de toutes nations kpo ɖò sinsɛnzɔ́ ɔ mɛ gbɔn é. D’alɔ ɛ bonu é ni nɔ dó afɔ nú mɛ e ɖè jlǒ xlɛ́ lɛ é.—1 Kɔ. 3:6.

• Nɔ kú hǔn bo nɔ kpa mɛ. (Nùnywɛxó 25:11) Zě kpɔ́ndéwú ɖagbe ɖ’ayǐ. Kanɖodonǔwu kpo jlǒ e hwiɖesunɔ mɛtún ɔ nɔ ɖexlɛ́ é kpo na hɛn nyɔna lɛ wá ɖò xwè e ja lɛ é mɛ.

Tɛ́n Nǔ Elɔ Kpɔ́n Sun ɔ Mɛ:

• Wà sinsɛnzɔ́ xwé ɖé gbè jɛ xwé ɖé gbè tɔn xá nùkplɔntɔ́ towe; nú a xwè mɛbakpɔ́n gbé alǒ Biblu kplɔ́n xá mɛ gbé hǔn, nɔ kplá ɛ yì. Enyi a ma ɖó nùkplɔntɔ́ ɖé ǎ hǔn, byɔ wɛnjlatɔ́ e ma ko mɔ nǔ kpɔ́n sɔmɔ̌ ǎ é ɖé ɖɔ é ni w’azɔ̌ xá we.