Lěe è ná zán video Biblu kplɔ́nkplɔ́n tɔn lɛ́ gbɔn é

Video Biblu kplɔ́nkplɔ́n tɔn ɛnɛ wɛ mǐ ɖó bo nɔ zán ɖo sinsɛnzɔ́ ɔ mɛ. Linlin tɛ́ wú è ka sɔ́ nǔ nú yě mɛ ɖokpó ɖokpó?

• 

  Étɛ́wú è ka ɖó ná kplɔ́n Biblu?: Gaga ɔ. È sɔ́ nǔ ná bo ná dó d’alɔ mɛ lɛ́ bónú nǔ e ɖo Biblu mɛ lɛ́ é ná dɔn yě, ényí yě ná bo ɖo sinsɛn ɖěbǔ mɛ ɔ nɛ́. É nɔ dó wǔsyɛ́n lanmɛ nú mɛ e ɖo kpínkpɔ́n wɛ lɛ́ é ɖɔ yě ní nɔ ba xósin nú nǔkanbyɔ́ tají gbɛ mɛ tɔn lɛ́ ɖo Biblu mɛ, bo xlɛ́ kpɔ́ndéwú nǔ e xwe ali bɔ è sixú mɔ ɖ’é mɛ é ɖé tɔn. É tínmɛ lěe è sixú byɔ́ Biblu kplɔ́nkplɔ́n gbɔn é.

• 

  Étɛ́wú è ka ɖó ná kplɔ́n Biblu? (kpɛví ɔ). Nǔ ɖokpó ɔ wɛ é nyí kpó gaga ɔ kpó, amɔ̌, gaga ɔ sín atɔnvlɔ́ɖó wɛ nú éyɛ́. É sixú nyɔ́ zán hú gǎn ɖo fí ɖěɖěe mɛ lɛ́ nɔ ɖo hwlɛndó jí ɖe lɛ́ é.

• 

  Nɛ̌ Biblu kpínkplɔ́n ɖé ka nɔ nyí gbɔn?: È sɔ́ nǔ ná bo ná dó d’alɔ mɛ lɛ́ bónú tuto Biblu kplɔ́nkplɔ́n xá mɛ lɛ́ vɔ̌nu tɔn mǐtɔn ná dɔn yě. É lɛ́ ná xósin nú nǔkanbyɔ́ e mɛ lɛ́ sixú ɖó dó Biblu kplɔ́nkplɔ́n wú é ɖé lɛ́, kpó lěe yě sixú byɔ́ ɖɔ è ní kplɔ́n Biblu xá émí gbɔn é kpó.

• 

  Doo nú we nú Biblu kplɔ́nkplɔ́n towe. È sɔ́ nǔ ná bo ná xlɛ́ Biblu kplɔ́ntɔ́ lɛ́. Nǔgbó wɛ ɖɔ wěxwɛ wegɔ́ wěma Ðu gbɛ víví káká sɔ́yi! tɔn jí wɛ è ɖɔ xó dó video ɔ wú ɖe, loɔ, è sixú xlɛ́ hwenu e è ɖo nǔ kplɔ́n wɛ ɖo alɔnuwéma Ðu gbɛ víví káká sɔ́yi! ɔ mɛ é. Video ɔ tɛ ɖɛ̌ nǔ ɖěɖěe ɖo wěma ɔ mɛ lɛ́ é jí, bo lɛ́ ɖɔ xó dó nǔ ɖěɖěe nǔkplɔ́ntɔ́ ɔ sixú ɖó nukún ɖo xóɖɔɖókpɔ́ lɛ́ hwenu lɛ́ é jí.

Linlin ɖé wú wɛ è sɔ́ nǔ nú video lɛ́ ɖokpó ɖokpó có, mǐ sixú xlɛ́ alǒ sɛ́ ɖěbǔ dó mɛ lɛ́ hweɖébǔnu e mǐ mɔ ɖɔ é jɛxá dó é. È dó wǔsyɛ́n lanmɛ nú wɛnjlátɔ́ lɛ́ ɖɔ video énɛ́ lɛ́ ní má dó yě ganjí, bónú yě ní nɔ lɛ́ zán ganjí ɖo sinsɛnzɔ́ ɔ mɛ.