Nɛ̌ tuto Biblu kplɔ́nkplɔ́n tɔn e Kúnnuɖetɔ́ Jehovah tɔn lɛ́ nɔ xwlé mɛ é ka nɔ yi gbɔn?
Kúnnuɖetɔ́ Jehovah tɔn lɛ́ nɔ xwlé mɛ ali tawun tawun e nu è sixú gbɔn, bó kplɔ́n nǔ e Biblu ɖɔ lɛ́ é é. Tuto Biblu kplɔ́nkplɔ́n tɔn mǐtɔn sixú d’alɔ we bɔ a ná:
Ðó gbɛzán awǎjijɛnɔ ɖé
Húzú xɔ́ntɔn Mawu tɔn
Kplɔ́n nǔ dó akpá e Biblu dó dó sɔgúdo wú lɛ́ é wú
Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:
Un ka sixú kplɔ́n nǔ azɔn ɖokpó hwɛ̌, bó kpɔ́n lěe é nɔ yi gbɔn é a?
Un ka sixú ylɔ́ mɛ ɖěvo lɛ́ bónú yě ní gɔ́ nú mì ɖo nǔkplɔ́nkplɔ́n ɔ domɛ a?
Ényí un ko kplɔ́n nǔ xá Kúnnuɖetɔ́ Jehovah tɔn lɛ́ ɖ’ayǐ ɔ, un ka sixú lɛ́ kplɔ́n nǔ xá yě din a?
Nɛ̌ Biblu kplɔ́nkplɔ́n ɖé ka nɔ yi gbɔn?
Nǔkplɔ́nmɛtɔ́ towe ná d’alɔ we, bɔ a ná mɔ nǔ jɛ xóta Biblu tɔn lɛ́ mɛ ɖěbɔdóɖěwú. Biblu kplɔ́nkplɔ́n e ná hɛn le wá nú we, bó jínjɔ́n wěma Ðu gbɛ víví káká sɔ́yi! jí é ná zɔ́n bɔ a ná kplɔ́n xó e ɖo Biblu mɛ é kpó lěe é sixú d’alɔ we gbɔn é kpó. Nú a jló ná tuun nǔ gěgé d’é jí hǔn, kpɔ́n video élɔ́.
Un ɖó ná sú akwɛ́ cóbɔ è ná kplɔ́n nǔ xá mì wɛ a?
Éǒ. Kúnnuɖetɔ́ Jehovah tɔn lɛ́ nɔ xwedó alixlɛ́mɛ élɔ́ e Jezu ná ahwanvú tɔn lɛ́ é: “Lěe un ná acɛ mi vɔ̌nu ɔ, mi lɔmɔ̌ mi bó wa nǔ lɛ́ bǐ vɔ̌nu.” (Matíe 10:8) Gɔ́ ná ɔ, è nɔ sú akwɛ́ ɖě nú azɔ̌wanú nǔkplɔ́nkplɔ́n ɔ tɔn lɛ́ ǎ; yě wɛ nyí Biblu kpó wěma e xóta tɔn nyí Ðu gbɛ víví káká sɔ́yi! é kpó.
Táan nabí nǔkplɔ́nkplɔ́n ɔ ka nɔ ɖu?
Nú è ná kplɔ́n nǔ bǐ mlɛ́mlɛ́ ɔ, è ɖó ná fó nǔkplɔ́nkplɔ́n 60 e ɖo wěma ɔ mɛ lɛ́ é. Hwiɖésúnɔ wɛ ná ɖɔ lěe a ná bló gbɔn bó fó wěma ɔ é, amɔ̌, nǔkplɔ́ntɔ́ gěgé nɔ ba ná fó nǔkplɔ́nkplɔ́n ɖokpó alǒ hú mɔ̌ ɖo aklúnɔzán gbla ɖokpó ɖokpó mɛ.
Nɛ̌ un ka ná bɛ́ gbɔn?
1. D’alɔ wěma mɛ ɖo Ɛntɛnɛ́ti jí. Nǔ ɖokpó géé e è ná zán nǔ e kúnkplá we bɔ a ɖɔ lɛ́ é dó wa é wɛ nyí ɖɔ è ná bló tuto bɔ Kúnnuɖetɔ́ Jehovah tɔn ɖokpó ná wlán nǔ sɛ́dó we alǒ ylɔ́ we lěe a byɔ́ gbɔn é.
2. Nǔkplɔ́nmɛtɔ́ ɖé ná wlán nǔ sɛ́dó we alǒ ylɔ́ we. Nǔkplɔ́nmɛtɔ́ towe ná tínmɛ nǔ e a sixú ɖó nukún ɖo nǔkplɔ́nkplɔ́n ɔ domɛ lɛ́ é nú we. É ná lɛ́ ná xósin nú nǔkanbyɔ́ ɖěbǔ e a ɖó é.
3. Hwi kpó nǔkplɔ́nmɛtɔ́ towe kpó ná bló tuto nǔkplɔ́nkplɔ́n ɔ tɔn. È sixú nɔ kpɔ́ tlɔlɔ bó kplɔ́n nǔ, alǒ kplɔ́n nǔ gbɔn alǒkan alǒ video jí, kabǐ gbɔn nǔ wínwlán sɛ́dó mɛ gbɔn Ɛntɛnɛ́ti jí gblamɛ. Ganxixo ɖokpó mɔ̌ wɛ nǔkplɔ́nkplɔ́n ɖé nɔ ɖu, amɔ̌, é sixú hwe alǒ sukpɔ́ hú mɔ̌; tuto towe wú wɛ é ná sín.
Un ka sixú kplɔ́n nǔ azɔn ɖokpó hwɛ̌, bó kpɔ́n lěe é nɔ yi gbɔn é a?
Ɛɛn. Bó ná dó wa mɔ̌ ɔ, d’alɔ wěma mɛ ɖo Ɛntɛnɛ́ti jí. Ényí nǔkplɔ́nmɛtɔ́ ɖé wlán nǔ sɛ́dó we alǒ ylɔ́ we hǔn, nǔ é ní tuun ɖɔ a jló ná tɛ́n nǔkplɔ́nkplɔ́n ɔ kpɔ́n, bó ná kpɔ́n ɖɔ émí ná yí wǎn ná a jí. É ná zán alɔnuwéma Ðu gbɛ víví káká sɔ́yi!, éé mɛ nǔkplɔ́nkplɔ́n bǐbɛ́mɛ tɔn atɔn ɖe é dó d’alɔ we, bɔ a ná kpɔ́n ɖɔ émí ɖu nǔkplɔ́nkplɔ́n ɔ sín vǐví a jí.
Nú un yí gbe bó ná kplɔ́n Biblu ɔ, nǔkplɔ́nmɛtɔ́ ce ná gbídí kɔ nú mì ɖɔ nyi ní húzú Kúnnuɖetɔ́ Jehovah tɔn wɛ a?
Éǒ. Kúnnuɖetɔ́ Jehovah tɔn lɛ́ yí wǎn nú nǔ kplɔ́nkplɔ́n mɛ ɖěvo lɛ́ dó Biblu wú, amɔ̌, mǐ nɔ gbídí kɔ nú mɛ ɖěbǔ gbeɖé bónú é ná xo kpóɖó nú sinsɛn mǐtɔn ǎ. É nyɔ́ wa ɔ, mǐ nɔ xwlé nǔ e Biblu ɖɔ é mɛ kpó sísí kpó, bó nɔ tuun ɖɔ mɛ ɖokpó ɖokpó ɖó acɛ bó ná ɖɔ nǔ e é ná ɖi nǔ ná é.—1 Piyɛ́ɛ 3:15, 16.
Un ka sixú zán Biblu nyiɖésúnɔ tɔn a?
Ɛɛn, a sixú zán lǐlɛ́dógbeɖévomɛ Biblu tɔn ɖěbǔ e a ba é. Lẹdogbedevomẹ Aihọn Yọyọ Tọn tíin ɖo gbe gěgé mɛ, bɔ zǐnzán tɔn nɔ víví nú mǐ, ɖó é za wě bó sɔgbe. Amɔ̌, mǐ lɛ́ mɔ nǔ jɛ wú ɖɔ mɛ gěgé nɔ ba ná zán lǐlɛ́dógbeɖévomɛ e ko má yě é.
Un ka sixú ylɔ́ mɛ ɖěvo lɛ́ bónú yě ní gɔ́ nú mì ɖo nǔkplɔ́nkplɔ́n ɔ domɛ a?
Ɛɛn. Xwédo towe blěbú sixú gɔ́ nú we, alǒ xɔ́ntɔn towe ɖěbǔ e a ylɔ́ é.
Ényí un ko kplɔ́n nǔ xá Kúnnuɖetɔ́ Jehovah tɔn lɛ́ ɖ’ayǐ ɔ, un ka sixú lɛ́ kplɔ́n nǔ xá yě din a?
Ɛɛn. Nǔgbó ɔ, a tlɛ sixú ɖu nǔkplɔ́nkplɔ́n din tɔn ɔ sín vǐví hú gǎn ɖ’ayǐ tɔn ɔ, ɖó è ko lɛ́ w’azɔ̌ ɖ’é wú, bónú é ná d’alɔ mɛ lɛ́ ɖo gbɛ din tɔn ɔ mɛ. Nǔ e nukún nɔ mɔ lɛ́ é, kpó xóɖɔɖókpɔ́ kpó gěgé ɖo tuto nǔkplɔ́nkplɔ́n tɔn élɔ́ mɛ hú éé wá yi lɛ́ é.
Mi nɔ xwlé mɛ Biblu kplɔ́nkplɔ́n nǔkplɔ́nmɛtɔ́ mɛvo a?
Ɛɛn. Nǔkplɔ́ntɔ́ gěgé nɔ mɔ ɖɔ ényí mɛ̌si ɖé d’alɔ émí ɔ, émí nɔ kplɔ́n nǔ hú gǎn có, mɛɖé lɛ́ nɔ ba ná kplɔ́n nǔ yěɖokpó hwɛ̌. Ðo azɔ̌wanú Biblu kplɔ́nkplɔ́n tɔn mǐtɔn lɛ́ mɛ ɔ, è slɛ́ azɔ̌wanú kpó nǔ ɖěɖěe sixú d’alɔ we ɖo Biblu kplɔ́nkplɔ́n towe hwenu lɛ́ é kpó. Azɔ̌wanú e sixú d’alɔ we é ɖé lɛ́ ɖíe:
Nǔkplɔ́nmɛ Biblu tɔn lɛ́. Nǔgbódodó Biblu tɔn ɖěɖěe è sixú zán ɖo gbɛ zínzán ayǐhɔ́ngbe ayǐhɔ́ngbe tɔn mɛ lɛ́ é ɖo xóta énɛ́ lɛ́ mɛ, ɖi: “Lěe è sixú ɖí xwi xá adohu adohu gbɔn é,” “Lěe è sixú nɔ gbɛ hwenu e è ma ɖó akwɛ́ káká ɖé ǎ é gbɔn é,” “Lěe mi ná kplɔ́n vǐ mitɔn gbɔn é.”
Video e jínjɔ́n Biblu jí lɛ́ é. Video kléwún kléwún ɖé lɛ́ wɛ, bó tínmɛ nǔkplɔ́nmɛ tají Biblu tɔn ɖé lɛ́.
Nǔkanbyɔ́ Biblu tɔn lɛ́ sín xósin. Xóta énɛ́ lɛ́ ná xósin nú nǔkanbyɔ́ Biblu tɔn gěgé.
Wěmafɔ Biblu tɔn e è tínmɛ lɛ́ é. Mɔ wěmafɔ Biblu tɔn e a tuun ganjí é ɖé lɛ́ kpó xógbe Biblu tɔn e a tuun ganjí é ɖé lɛ́ kpó sín tínmɛ.