Nɛ̌ A ka Sixu Xoɖɛ Sɛ́dó Mawu B’ɛ Na Sè Gbɔn?

NƆ XOÐƐ SƐ́DÓ JEHOVAH MAWU ÐÒ JEZU NYIKƆ MƐ

“Nǔ e mi na byɔ Tɔ́ ɔ, é na na bǐ mi ɖò nyikɔ ce mɛ.” —Jaan 16:23.

Xó Jezu tɔn lɛ xlɛ́ vaan ɖɔ Jehovah ba ɖɔ mǐ ni nɔ xoɖɛ sɛ́dó emi, é ka nyí gbɔn ɖiɖe lɛ, mɛ mímɛ́ lɛ, wɛnsagun lɛ, alǒ mɛkúkú lɛ jí ǎ, loɔ, ɖò nyikɔ Jezu Klisu tɔn mɛ. Enyi mǐ nɔ xoɖɛ sɛ́dó Mawu ɖò Jezu nyikɔ mɛ ɔ, mǐ nɔ xlɛ́ ɖɔ mǐ tuùn azɔ̌ taji e wà wɛ Jezu ɖè é. Jezu ɖɔ: “Mɛ ɖebǔ sixu yì Tɔ́ ɔ gɔ́n nyɛ mɛvo ǎ.”—Jaan 14:6.

NƆ XOÐƐ SÍN AYI MƐ

“Mi ɖɔ nǔ e ɖò ayi mitɔn mɛ lɛ bǐ n’i.”—Ðɛhan 62:9.

Enyi mǐ ɖò ɖɛ xò sɛ́dó Jehovah wɛ ɔ, mǐ ɖó na ɖɔ xó n’i lee mǐ nɔ ɖɔ xó nú tɔ́ wanyiyinɔ ɖé gbɔn é. É nyí nǔ e ɖò wema ɖé mɛ é wɛ mǐ na xà, alǒ ɖɛ e mǐ kplɔ́n dó tamɛ é ɖé wɛ mǐ na nɔ vɔ́ xò ǎ, é nyɔ́ wà ɔ, mǐ ɖó na nɔ ɖɔ xó n’i kpo sísí kpo sín ayi mɛ.

NƆ XOÐƐ SƆGBE XÁ JLǑ MAWU TƆN

“Mǐ byɔ nǔ ɖebǔ nú é sɔgbe xá jlǒ tɔn ɔ, é nɔ ɖótó mǐ.”—1 Jaan 5:14.

Ðò Biblu mɛ ɔ, Jehovah Mawu ɖɔ nǔ e é ba na wà nú mǐ lɛ é kpo nǔ e é ba ɖɔ mǐ ni wà n’i lɛ é kpo. Cobonu Mawu na sè ɖɛ mǐtɔn lɛ ɔ, mǐ ɖó na xoɖɛ “sɔgbe xá jlǒ tɔn.” Bo na dó kpé enɛ wu ɔ, mǐ ɖó na kplɔ́n Biblu, enɛ ɔ, mǐ sixu kpéwú bo tuùn i ganji. Enyi mǐ nɔ wà mɔ̌ ɔ, ɖɛ mǐtɔn lɛ na nɔ nyɔ́ nukún tɔn mɛ.

TƐ LƐ SÍN TAKÚNMƐ MǏ KA SIXU NƆ XOÐƐ DÓ?

Nɔ Xoɖɛ Dó Hudo Towe lɛ Takúnmɛ. Mǐ sixu xoɖɛ sɛ́dó Jehovah dó nǔ e nɔ hudo mǐ ayihɔngbe ayihɔngbe lɛ é sín takúnmɛ, enɛ wɛ nyí, nǔɖuɖu, nǔzinzan kpo xɔ kpo. Mǐ sixu lɛ́ xoɖɛ bo byɔ nǔnywɛ bá dó sixu wá gbeta ɖagbe lɛ kɔn, lobo lɛ́ mɔ hlɔnhlɔn bá dɛ ɖò wuvɛ̌ mǐtɔn lɛ nu. Mǐ sixu xoɖɛ bo byɔ nǔɖiɖi, hwɛsɔ́kɛ, kpo alɔdó Mawu tɔn kpo.—Luki 11:3, 4, 13; Jaki 1:5, 17.

Nɔ Xoɖɛ Dó Mɛ Ðevo lɛ Takúnmɛ. Mɛjitɔ́ e vǐ yetɔn lɛ sín nǔ nɔ ɖu ayi mɛ na lɛ é nɔ ɖó awǎjijɛ, hwenu e vǐ yetɔn lɛ nɔ ɖè wanyiyi xlɛ́ mɛ ɖevo lɛ é. Jehovah lɔ nɔ ba ɖɔ nǔ mɛ ɖevo lɛ tɔn ni nɔ ɖu ayi mɛ nú vǐ emitɔn e ɖò ayikúngban jí lɛ é. È sɔgbe ɖɔ mǐ ni nɔ xoɖɛ dó mɛ e mǐ da é, vǐ mǐtɔn lɛ, xwédo mǐtɔn, kpo xɔ́ntɔn mǐtɔn lɛ kpo sín takúnmɛ. Ahwanvu Jaki ɖɔ, ‘mi nɔ xoɖɛ nú miɖée.’—Jaki 5:16.

Nɔ Ðè Nǔsumɛnukúnmɛ Xlɛ́. Biblu ɖɔ dó Gbɛɖotɔ́ mǐtɔn wu ɖɔ: ‘É nɔ wà ɖagbe, bo nɔ sɛ́ jǐ dó mǐ, bo nɔ na jinukún mǐ dó hwetɔnnu. É nɔ na nǔɖuɖu mǐ túnflá; é nɔ na xomɛhunhun mǐ.’ (Mɛ. 14:17) Enyi mǐ nɔ lin tamɛ dó nǔ e Mawu wà nǔ mǐ lɛ é bǐ jí ɔ, enɛ na sísɛ́ mǐ, bɔ mǐ na dókú n’i ɖò ɖɛ mɛ. Nǔgbo ɔ, mǐ ɖó na lɛ́ ɖè nǔsumɛkúnmɛ mǐtɔn xlɛ́ Mawu, gbɔn lee mǐ nɔ zán gbɛ̀ gbɔn é gblamɛ.—Kolosinu lɛ 3:15.

NƆ ÐÓ SUÚLU BO NƆ LƐ́ ÐÓKAN DÓ ÐƐXIXO WU

Hweɖelɛnu ɔ, mǐ sixu jɛ aluwɛ mɛ, ɖó mǐ yawǔ mɔ xósin nú ɖɛ e mǐ xò kpo ayi bǐ kpo lɛ é ǎ wutu. Enɛ na zɔ́n bɔ mǐ na ɖɔ ɖɔ nǔ mǐtɔn kún nɔ ɖu ayi mɛ nú Mawu ó wɛ à? Eǒ! Mi nú mǐ ni gbéjé kpɔ́ndéwú elɔ lɛ e xlɛ́ ɖɔ é sixu byɔ kpowun ɖɔ mǐ ni ɖókan dó ɖɛxixo wu é kpɔ́n.

Steve e xó mǐ ɖɔ ɖò xóta nukɔntɔn ɔ mɛ é ɖɔ ɖɔ, “É ma nyí kan wɛ un ɖó dó ɖɛxixo wu ǎ ɔ, na ko jó gbè dó gbɛ̀ xó ɔ wu sín xwè ɖé lɛ ɖíe.” Tɛ ka zɔ́n bɔ nǔ lɛ ɖyɔ? É jɛ Biblu kplɔ́n jí, bo lɛ́ kplɔ́n nǔ dó lee é na xoɖɛ gbɔn é kpo lee é na ɖókan d’ewu gbɔn é kpo wu. Steve ɖɔ: “Un xoɖɛ sɛ́dó Mawu bo dókú n’i nú gudo e xɔ́ntɔn vívɛ́ ce lɛ nɔ nú mì kpo wanyiyi kpo lɛ é bǐ. Un ɖó awǎjijɛ dìn tawun hú ɖ’ayǐ tɔn.”

Nɛ̌ nǔ lɛ ka yì gbɔn nú Jenny e nɔ lin ɖɔ emi kún jɛxa bonu Mawu na ɖótó ɖɛ emitɔn lɛ ó é? É ɖɔ: “Enyi un mɔ ɖɔ un kún vó nǔtí ó ɔ, un nɔ byɔ Mawu ɖɔ é ni d’alɔ mì bonu ma mɔ nǔ jɛ nǔ e wu nǔ ɖò mɔ̌ cí nú mì wɛ é wu.” Nɛ̌ enɛ ka d’alɔ ɛ gbɔn? É ɖɔ: “Xóɖiɖɔ nú Mawu d’alɔ mì bɔ un nɔ kpɔ́n nyiɖée lee é nɔ kpɔ́n mì gbɔn é, bo nɔ mɔ ɖɔ enyi ayi ce na bo tlɛ ɖò hwɛ dó mì wɛ ɔ, éyɛ kún nɔ wà mɔ̌ ó. Enɛ lɛ́ d’alɔ mì bɔ un jó gbè ǎ.” Etɛ mɛ é ka wá tɔ́n kɔ dó? É ɖɔ: “Ðɛxixo d’alɔ mì bɔ un mɔ ɖɔ Jehovah tíìn nǔgbo, nyí wanyiyinɔ, Mawu e nǔ mɛtɔn nɔ ɖu ayi mɛ na é, Tɔ́, kpo xɔ́ntɔn e ɖò finɛ nú mì hwebǐnu bo nɔ d’alɔ mì, bonu ma kpò ɖò nǔ e é ba lɛ é wà wɛ é ɖé kpo.”

Mǐ ni lɛ́ kpɔ́n kpɔ́ndéwú Isabel tɔn. Hwenu e é mɔ xò é ɔ, dotóo tɔn ɖɔ n’i ɖɔ vǐ e é na jì é na ɖó wɔn ɖò wǔ, b’ɛ na syɛn tawun. É flú bǐ. Mɛɖé lɛ tlɛ ɖè wě xá ɛ ɖɔ é ni ɖè xò ɔ. “É nɔ cí nú mì ɖɔ wuvɛ̌ e sè wɛ un ɖè é ɖò na hu mì wɛ ɖɔhun.” Etɛ é ka wà? É ɖɔ: “Un xoɖɛ ɖě ɖò ɖě jí sɛ́dó Mawu bo byɔ alɔdó.” Nukɔnmɛ ɔ, é jì vǐ sunnu ɖé, bo sun nyǐ i ɖɔ Gerard, b’ɛ nyí wɔ̌nɖowǔnanɔ. Isabel ka mɔ ɖɔ Mawu na sinkɔn nú ɖɛ tɔn lɛ à? Ɛɛn é lin mɔ̌! Ð’ali tɛ nu? Isabel ɖɔ: “Enyi un mɔ vǐ sunnu ce e ɖó xwè 14 dìn é ɖó wɔ̌n ɖò wǔ, cobo ka nɔ ɖò awǎ jɛ wɛ ɔ, un nɔ mɔ ɖɔ é wɛ nyí xósin ɖagbe hugǎn e Mawu na nú ɖɛ ce lɛ é, nyɔna ɖaxó hugǎn e Jehovah Mawu na mì é.”

Xó enɛ lɛ e é ɖɔ kpo ayi bǐ kpo é flín mǐ xógbe ɖɛhanwlantɔ́ ɔ tɔn elɔ: “Mawu Mavɔmavɔ, mɛmaɖómɛɖé lɛ ɔ, a nɔ sè ɖɛ yetɔn, a nɔ na akɔ́nkpinkpan ye, a nɔ ɖótó ye.” (Ðɛhan 10:17) Hwɛjijɔ ɖaaɖagbe tɛ lɛ ɖíe mǐ ka ɖó, bo na kpò ɖò ɖɛ xò sɛ́dó Mawu wɛ è!

Mǐ mɔ ɖɛ e Jezu xò lɛ é gegě ɖò Biblu mɛ. É ɖò wɛn ɖɔ ee è tuùn hugǎn é wɛ nyí ee é kplɔ́n ahwanvu tɔn lɛ é. Etɛ lɛ ɖɛ enɛ ka sixu kplɔ́n mǐ?