Nǔ E Ðɛ Sixu Wà Nú We É

Hwenu e Pamela ɖò azɔn syɛnsyɛn ɖé jɛ wɛ é ɔ, é byɔ alɔdó dotóo e tuùn azɔ̌ ganji lɛ é tɔn. É ka ɖò mɔ̌ có, é lɛ́ xoɖɛ sɛ́dó Jehovah bá mɔ hlɔnhlɔn bo na ɖí xwi xá ninɔmɛ tɔn. Ðɛ ka d’alɔ ɛ à?

Pamela tinmɛ ɖɔ: “Hwenu e è ɖò nukún kpé dó kansɛ́ɛzɔn ce wu wɛ é ɔ, hwɛhwɛ wɛ ado nɔ hu mì. Amɔ̌, enyi un xoɖɛ sɛ́dó Jehovah Mawu ɔ, un nɔ vo, bo nɔ kpéwú bo nɔ ɖí xwi xá ninɔmɛ ce. Wuvɛ̌ ɔ kpò ɖò finɛ có, ɖɛxixo d’alɔ mì bɔ un nɔ ɖó linlin e sɔgbe é. Enyi mɛ lɛ kan lee un ɖè gbɔn é byɔ mì ɔ, un nɔ ɖɔ ɖɔ, ‘Un ɖò ganji ǎ, amɔ̌, un ɖ’awǎjijɛ!’”

Nǔgbo ɔ, mǐ ɖó na nɔte kaka jɛ hwenu e mǐ na bɛ́ azɔn syɛnsyɛn ɖé é hwɛ̌ cobo xoɖɛ ǎ. Mǐ bǐ wɛ nɔ mɔ wuvɛ̌ lɛ, é sixu nyí nú hwenu línlín, alǒ klewun ɖé, bɔ hwɛhwɛ ɔ, mǐ nɔ mɔ ɖɔ mǐ ɖó hudo alɔdó tɔn, cobo na ɖí xwi xá ye. Ðɛxixo ka sixu d’alɔ à?

Biblu ɖɔ: “Sɔ́ nǔ linlin towe dó alɔ mɛ nú Mawu Mavɔmavɔ; é na hɛn we ɖó te. Hwɛjijɔnɔ na bo j’ayǐ ɔ, é na jó è dó bɔ é na nɔ mɔ̌ kaka sɔyi ǎ.” (Ðɛhan 55:23) Linlin e dó gbɔ nú mɛ é tɛ ɖíe! Enɛ wu ɔ, nɛ̌ ɖɛxixo ka sixu d’alɔ we gbɔn? Enyi a xoɖɛ sɛ́dó Mawu lee è ɖó na xoɖɛ gbɔn é ɔ, é na na nǔ e sín hudo a ɖó bo na ɖí xwi xá wuvɛ̌ towe lɛ é we.—Kpɔ́n gbǎví “Lè E Ðɛxixo Sixu Hɛn Wá nú We É.”

Lè E Ðɛxixo Sixu Hɛn Wá nú We É

Fífá ayi mɛ Tɔn

“Mi . . . byɔ nǔ e hudo mi lɛ Mawu. Enɛ ɔ, fífá Mawu tɔn e hugǎn nukúnnúmɔjɛnǔmɛ gbɛtɔ́ tɔn bǐ ɔ na bló ayixa mitɔn kpodo linlin mitɔn lɛ kpo ɖó, bɔ mi na sixu nɔ bǔ ɖò Klisu Jezu mɛ.” (Filipunu lɛ 4:6, 7) Enyi a nɔ zlɔ́n nǔ e ɖò linkpɔ́n nyí nú we wɛ lɛ é bǐ sín agban dó Mawu jí ɔ, é na d’alɔ we bɔ linkpɔ́n lɛ na ɖò finɛ có, a na nɔ xwíi bo wà nǔ kpo nǔnywɛ kpo.

Nǔnywɛ e nɔ gosin Mawu gɔ́n é

“É ka ɖò mɔ̌ có, enyi nǔnywɛ hwedó mɛɖé ɖò mi mɛ hǔn, ni byɔ Mawu nú é na na ɛ; ɖó Mawu nɔ hun alɔ dó na nǔ mɛ bǐ kpo xomɛhunhun kpo.” (Jaki 1:5) Enyi è ɖò kɔ gbidí nú mǐ wɛ ɔ, mǐ nɔ wá gbeta ɖagbe lɛ kɔn hwebǐnu ǎ. Enyi a nɔ xoɖɛ bo nɔ byɔ nǔnywɛ ɔ, Mawu sixu flín we nǔgbododó e sixu d’alɔ we lɛ é ɖò Xó tɔn Biblu mɛ.

Hlɔnhlɔn kpo gbɔdónúmɛ kpo

“Mɛ e nɔ na hlɔnhlɔn mì ɔ wɛ nɔ zɔ́n, bɔ un nɔ sixu kpé nǔ enɛ lɛ bǐ wu.” (Filipunu lɛ 4:13) Ðó Jehovah wɛ nyí Mawu Nǔbǐwukpétɔ́ ɔ wu ɔ, é sixu na we hlɔnhlɔn e sín hudo a ɖó bo na ɖí xwi xá wuvɛ̌ towe lɛ, alǒ d’alɔ we ɖò wuvɛ̌ towe lɛ hwenu. (Ezayíi 40:29) Biblu lɛ́ ylɔ́ Jehovah ɖɔ “Mawu e nɔ dó gbɔ nú mɛ ɖò ali bǐ nu é.” É sixu dó gbɔ nú mǐ, “ɖò wuvɛ̌ e mǐ nɔ mɔ lɛ bǐ mɛ.”—2 Kɔlɛntinu lɛ 1:3, 4.

A KA BA ÐƆ ÐƐ NI D’ALƆ WE À?

É ɖò wɛn ɖɔ Jehovah kún nɔ hɛn we gannugánnú bonu a na xoɖɛ sɛ́dó è ó. É nyɔ́ wà ɔ, é byɔ we kpo wanyiyi kpo ɖɔ hwi ni wà mɔ̌. (Jelemíi 29:11, 12) Amɔ̌, enyi ɖ’ayǐ ɔ, a nɔ mɔ ɖɔ Mawu kún nɔ sè ɖɛ towe lɛ ó ɔ ka lo? Ma nú wǔ kú we ó, ma ka jó gbè ó. Mɛjitɔ́ wanyiyinɔ ɖé sixu gɔn alɔ dó vǐ tɔn lɛ lee vǐ lɛ ba gbɔn é pɛ́ɛ, alǒ hwenu e ba dó wɛ ye ɖè tawun é. Vlafo ɔ, mɛjitɔ́ ɔ sixu ɖó nǔ e ba wɛ ye ɖè é fɛɛ. É ɖò mɔ̌ có, nǔɖe tíìn bo ɖó jiɖe: Mɛjitɔ́ wanyiyinɔ lɛ nɔ d’alɔ vǐ yetɔn lɛ.

Jehovah Mawu wɛ nyí mɛjitɔ́ wanyiyinɔ hugǎn ɔ, bo ba na d’alɔ hwi lɔ. Enyi a gbéjé alixlɛ́mɛ Biblu tɔn e wu mǐ ɖɔ xó dó lɛ é kpɔ́n kpo sɔxwixwe kpo, bo wà nǔ e wu a kpé é bǐ bo zán ye ɔ, Mawu na na sinkɔn nú ɖɛ towe lɛ ɖò ali e nyɔ́ hugǎn é nu!—Ðɛhan 34:16; Matie 7:7-11.