Etɛ ka Sixu D’alɔ We Tawun Bɔ A Na Tuùn Sɔgudo Towe?
Mɛ gegě nɔ lin ɖɔ nǔɖoyɛswímɛ ɖé lɛ ɖó acɛ dó sɔgudo yetɔn jí. Enɛ wu ɔ, ye nɔ xwedó aca ɖěɖee ye lin ɖɔ é na gɔ́ sò nú nukɔnyiyi yetɔn lɛ é.
NǓ E MƐ GEGĚ ÐI NǓ NA É
WUNTUN SUN TƆN LƐ: Mɛɖé lɛ nɔ lin ɖɔ lee sunví lɛ tò yeɖée gbɔn hwenu e è jì ye é, wɛ na ɖɔ lee sɔgudo yetɔn na cí é. Ye nɔ kan nǔ byɔ mɛ e nɔ kpɔ́n wuntun sun tɔn dó ɖɔ nǔ ɖ’ayǐ lɛ é, bo na dó tuùn nǔ e na jɛ dó ye jí é, lobo na nyi alɔ na, kabǐ, bo na dó ɖó nukɔnyiyi.
NǓKINKAN: Mɛ ɖevo lɛ ɖi ɖɔ nǔkinkan sixu zɔ́n bɔ emi na tuùn hwɛjijɔ e wu adǎn nɔ gbò emi é kpo nǔ e emi na wà é kpo. Enyi ye tuùn hwɛjijɔ ɔ gudo ɔ, enɛ sixu zɔ́n bɔ ye na nyi alɔ nú awovínú ɖé, mɔ wlɛnwín e ye na dó ɖeɖɛ tagba ɔ na lobɔ é na kpa ye é.a
YƐSU FIFƆ NÚ MƐKÚKÚ LƐ: Gɔ́ na ɔ, mɛ ɖevo lɛ ɖi nǔ ɖɔ emi ɖó na wlí yɛ̌yi nú mɛ e ko kú lɛ é, alǒ nǔmɛsɛn vovo lɛ, enɛ ɔ, ye na nya xɛ emi jí, bo na kɔn nyɔna lɛ dó emi jí. Van, ee nɔ nɔ Viêt Nam é ɖɔ: “Un ɖi nǔ ɖɔ yɛsu fifɔ nú tɔ́gbó ce lɛ na zɔ́n bɔ un na ɖu vivǐ gbɛzinzán ɖagbe ɖé tɔn dìn, bɔ sɔgudo nyi kpo vǐ ce lɛ kpo tɔn na lɛ́ ɖó ganjɛwu.”
VƆ̌JƆ: Mɛ gegě nɔ mɔ ɖɔ gbɛzán gbɛtɔ́ tɔn kún ɖó vivɔnu ó; è kú ɔ, è na nɔ lɛ́vɔ jɔ. Ye ɖi ɖɔ nǔ ɖagbe, alǒ nǔ nyanya e ɖò jijɛ dó ye jí wɛ dìn lɛ é ɔ, nǔ e mɛ nǔ e ye ko wà wá yì lɛ é tɔ́n kɔ dó é wɛ.
Amɔ̌, mɛ gegě nɔ mɔ nǔ enɛ lɛ dó mɔ xɛxó lɛ. É ɖò mɔ̌ có, ye ka kpò ɖò alɔ ɖó ɖò aca lěhun lɛ mɛ wɛ: majiki-biblo, bonu yiyi, sun sín wuntun lɛ kpinkpɔn, du e jí e ɖè é biba, nǔkinkan kpo nǔ mɔ̌hun ɖevo lɛ kpo. Ye nɔ lin ɖɔ bɔya nǔwalɔ mɔ̌hun lɛ sixu d’alɔ ye bɔ ye tuùn sɔgudo yetɔn.
ETƐ MƐ NǓ ENƐ LƐ KA NƆ WÁ TƆ́N KƆ DÓ?
Mɛ e ɖi nǔ nú nǔ mɔ̌hun lɛ, bo nɔ ɖ’alɔ ɖò ye mɛ lɛ é ka nɔ ɖó gbɛzán ɖagbe ɖé kpo sɔgudo awǎjijɛnɔ ɖé kpo à?
Ð’ayi kpɔ́ndéwú Hào, ee nɔ nɔ Viêt Nam é tɔn wu. É nɔ kpɔ́n wuntun sun tɔn lɛ, nɔ kan nǔ, bo nɔ lɛ́ fɔ yɛsu nú mɛkúkú lɛ bo na dó tuùn lee é na wà nǔ gbɔn ɖò gbɛzán tɔn mɛ é. Enɛ ka zɔ́n b’ɛ ɖó awǎjijɛ à? Hào ɖɔ: “Ajɔ̌ ce j’ayǐ, un ɖu axɔ́ blí, tagba byɔ xwédo ce mɛ, lobɔ un lɛ́ bɛ́ linkpɔ́nzɔn syɛnsyɛn ɖé.”
Qiuming, ee nɔ nɔ Taïwan é lɔ ɖi nǔ nú wuntun sun tɔn lɛ kpinkpɔn, vɔ̌jɔ, byɔwá, nǔkinkan, kpo yɛsu fifɔ nú mɛkúkú lɛ kpo. Ee é gbéjé nǔ e é ɖi nǔ na lɛ é kpɔ́n kpo sɔxwixwe kpo gudo é ɔ, é ɖɔ: “Un ɖ’ayi wu ɖɔ nǔkplɔnmɛ enɛ lɛ kpo aca enɛ lɛ kpo nɔ sɔ́ta yeɖée, bo ka lɛ́ nyi ta fí ɖě ǎ. Un mɔ ɖɔ hwɛhwɛ ɔ, wuntun sun tɔn lɛ kpinkpɔn sín nǔɖɔɖ’ayǐ lɛ kún nɔ nyí nǔgbo ó. Nú vɔ̌jɔ xó ɔ ɔ, enyi a ma sixu flín nǔ e jɛ ɖò gbɛzán towe xóxó enyíì ɔ mɛ lɛ é ɖě ǎ ɔ, nɛ̌ a ka sixu bló huzuhuzu lɛ, bo zán gbɛ̀ e nyɔ́ hugǎn é ɖé hwenu e a na vɔ́ jɔ é gbɔn?”
“Un ɖ’ayi wu ɖɔ nǔkplɔnmɛ enɛ lɛ kpo aca enɛ lɛ kpo nɔ sɔ́ta yeɖée, bo ka lɛ́ nyi ta fí ɖě ǎ.”—QIUMING, TAÏWAN
Hào, Qiuming, kpo mɛ gegě ɖevo lɛ kpo wá ɖ’ayi wu ɖɔ é kún nyí byɔwá, sunví lɛ, mɛkúkú lɛ, alǒ vɔ̌jɔ wɛ na zɔ́n bɔ mǐ na tuùn sɔgudo mǐtɔn ó. Xlɛ́xlɛ́ wɛ enɛ ɖè ɖɔ nǔwiwa mǐtɔn lɛ kún nɔ kúnkplá sɔgudo mǐtɔn ɖebǔ ó à?
Mɛ gegě nɔ mɔ ɖɔ nǔ e sixu zɔ́n bɔ mɛɖé ɖó sɔgudo ɖagbe hugǎn ɖé é wɛ nyí wemaxɔmɛ ɖaxó ɖaxó lɛ yiyi kpo dɔkun jijɛ kpo. Etɛ mɛ é ka wá tɔ́n kɔ dó nú ye mɛ e wá gbeta mɔ̌hun kɔn é ɖé lɛ?
a È ɖyɔ nyikɔ ɖé lɛ ɖò xóta elɔ kpo ee bɔ d’ewu lɛ é kpo mɛ.
b Mi sixu mɔ xó enɛ ɖò Biblu mɛ, ɖò Galatinu lɛ 6:7 mɛ. Linlin enɛ tɔ́n ɖò Azíi sín lǒ elɔ e mɛ gegě tuún é mɛ: “Nú a tun ayǐkpɛn ɔ, a na gbɛ̀ ayǐkpɛn; a dó ayikún ɔ, a na ya ayikún.”