LĚE È SIXÚ ÐU ÐO WǍNGBƐ́NÚMƐ JÍ GBƆN É

4 | Mawu Sixú D’alɔ We Bɔ A Ná Ðu Ðo Wǎngbɛ́númɛ Jí

Nǔ e Biblu ɖɔ é:

“Loɔ, nǔ e [gbigbɔ mímɛ́] nɔ ná mɛ ɔ wɛ nyí wǎnyíyí, xomɛhunhun, [fífá], suúluɖíɖó, xomɛyínyɔ́, ɖagbewiwa, [nǔɖiɖi], [xomɛfífá], mɛɖéejíɖuɖe.”—GALATINU LƐ́ 5:22, 23.

Tínmɛ tɔn:

Kpó alɔdó Mawu tɔn kpó ɔ, è sixú ɖu ɖo wǎngbɛ́númɛ e ɖo kan vun wɛ é jí. Gbigbɔ mímɛ́ tɔn sixú d’alɔ mǐ bɔ mǐ ná ɖó jijɔ ɖěɖěe mǐ ma sixú nɔ mǐɖóɖó, bó ɖó gbeɖé ǎ lɛ́ é. Énɛ́ wú ɔ, é ná nyɔ́ ɖɔ mǐ ní ɖeji dó alɔdó Mawu tɔn wú, bó ma nɔ tɛ́n kpɔ́n bá ɖu ɖo wǎngbɛ́númɛ jí mǐɖóɖó ó. Ényí mǐ ɖeji dó alɔdó Mawu tɔn wú ɔ, lěe nǔ cí nú mɛsɛ́dó Pɔ́lu é wɛ é ná cí nú mǐ lɔmɔ̌. É wlán ɖɔ: “Mɛ e nɔ ná hlɔ̌nhlɔ́n mì ɔ wɛ nɔ zɔ́n, bɔ un nɔ sixú kpé nǔ énɛ́ lɛ́ bǐ wú.” (Filípunu lɛ́ 4:13) Nǔgbó ɔ, mǐ ná kpé wú bó ɖɔ: “Alɔdó ɔ, Mawu Mavɔmavɔ gɔ́n wɛ é nɔ gosín wá nú mì.”—Ðɛhan 121:2.

Nǔ e a sixú wa é:

“Jehovah húzú mì, bɔ un sɔ́ nyí dǎkaxotɔ́ ǎ, loɔ, fífá kan wɛ un nɔ xo.”—WALDO

Nɔ xo ɖɛ sɛ́dó Jehovah, bó nɔ byɔ́ ɛ dó nǔjɔnǔ mɛ ɖɔ é ní ná émí gbigbɔ mímɛ́ tɔn. (Luki 11:13) Nɔ byɔ́ ɛ ɖɔ é ní d’alɔ we bónú a ná ɖó jijɔ ɖagbe lɛ́. Nɔ kplɔ́n nǔ e Biblu ɖɔ dó jijɔ lěhun lɛ́ wú é: wǎnyíyí, fífá, suúlu kpó mɛɖéejíɖuɖe kpó. Jijɔ mɔ̌hun lɛ́ sixú d’alɔ we bɔ a ná hɔn ɖɔ nú wǎngbɛ́númɛ sín ayi towe mɛ. Nɔ ba ali ɖěɖěe nu a ná sɔ́ nǔ nú jijɔ énɛ́ lɛ́ ɖo gbɛzán towe mɛ ɖe lɛ́ é. Gɔ́ ná ɔ, nɔ zán hwenu ɖó kpɔ́ xá mɛ ɖěɖěe ɖo tíntɛ́nkpɔ́n wɛ bó ná sɔ́ nǔ nú jijɔ mɔ̌hun lɛ́ hwi ɖɔhun é. Mɛ mɔ̌hun lɛ́ sixú ‘flɔ́ wǎnyíyí kpó ɖagbewiwa kpó sín zo dó lanmɛ nú we.’—Eblée lɛ́ 10:24.

Nǔ e jɛ nǔgbó é ɖé—WALDO

É ɖu ɖo wǎngbɛ́númɛ e ko dó ve bǐ é jí

Hwenu e nya e nɔ nyí Waldo é ɖo susu wɛ é ɔ, wǎngbɛ́númɛ dó ɖɔ do ɖo ayi tɔn mɛ, bɔ énɛ́ zɔ́n bɔ wǔvɛ́ gɔ́ gbɛzán tɔn mɛ. É ɖɔ: “Hwɛhwɛ wɛ un nɔ nyi akpotokwín xá mɛ ɖěɖěe nɔ sa gěe lɛ́ é ɖo toxo mɛ. . . . Gbe ɖokpó ɔ, jaguda e nɔ nyi akpotokwín xá mì lɛ́ é ɖokpó sú axɔ́ nya e mɛ bǐ tuun ɖɔ é nyí mɛhutɔ́ akowunká é ɖé ɖɔ é ní hu mì. Amɔ̌, un tɛ́n kpɔ́n bó hɔn; é ka sɔ́ hwǐ ɖokpó mì cá.”

Hwenu e Waldo sín asi jɛ Biblu kplɔ́n xá Kúnnuɖetɔ́ Jehovah tɔn lɛ́ jí é ɔ, é víví nú Waldo ɖěbǔ ǎ. É ɖɔ: “Un gbɛ́ wǎn nú Kúnnuɖetɔ́ lɛ́, bɔ azɔn gěgé wɛ un sá heelú yě. Amɔ̌, gbe fífá jɛ́n yě nɔ sɔ́ dó ɖɔ xó nú mì ná hwebǐnu.”

É ná bló táan ɖé gúdo é ɔ, Waldo lɔ jɛ Biblu kplɔ́n jí. É ɖɔ: “Nǔ e kplɔ́n wɛ un ɖe lɛ́ é zínzán bɔ wǔ nú mì ɖěbǔ ǎ. Un kú d’é jí ɖɔ un kún ná kpé wú gbeɖé bó ɖu ɖo xomɛsin ce jí, lobo lɛ́ gɔn adǎka xo ó.” Amɔ̌, nǔ e é kplɔ́n ɖo Biblu mɛ é ɖé zɔ́n bɔ ninɔmɛ tɔn húzú.

Waldo tínmɛ ɖɔ: “Gbe ɖokpó ɔ, Alejandro e nɔ kplɔ́n Biblu xá mì é byɔ́ mì ɖɔ nyi ní xa Galátinu lɛ́ 5:22, 23. . . . Alejandro tínmɛ nú mì ɖɔ nyi kún sixú nɔ nyiɖóɖó bó sɔ́ nǔ nú jijɔ énɛ́ lɛ́ ó, lé alɔdó Mawu tɔn jɛ́n ná nyí tɔn. Nǔgbó énɛ́ húzú lěe un nɔ lin nǔ gbɔn é bǐ mlɛ́mlɛ́!”

Ðó Waldo ɖeji dó alɔdó Mawu tɔn wú wútu ɔ, é sɔ́ nɔ gbɛ́ wǎn nú mɛ ɖěvo lɛ́ ɖě ǎ. É ɖɔ: “Hɛ̌nnumɔ ce lɛ́ kpó xɔ́ntɔn ce xóxó lɛ́ kpó sixú lin ɖɔ un ná húzú káká yi ɖó bǎ énɛ́ mɛ ǎ.” É ɖɔ gɔ́ ná ɖɔ: “Jehovah húzú mì, bɔ un sɔ́ nyí dǎkaxotɔ́ ǎ, loɔ, fífá kan wɛ un nɔ xo.”