Nǔnámɛ ná zɔ́n bɔ a ná ɖó awǎjijɛ

1-2. Nɛ̌ mǐ ka nɔ ɖu le dǎ e è dá mǐ kpó nǔwúkpíkpé ɔ kpó bɔ nǔnámɛ nɔ d’awǎjijɛ nú mǐ hú nǔyíɖomɛsí é tɔn gbɔn?

HWENU e Jexóva dá gbɛtɔ́ lɛ́ é ɔ, é dá yě kpó nǔwúkpíkpé ɔ kpó bɔ nǔnámɛ nɔ dó awǎjijɛ nú yě hú nǔyíɖomɛsí. (Mɛ. 20:35) Xlɛ́xlɛ́ wɛ énɛ́ ka ɖe ɖɔ nǔyíɖomɛsí kún nɔ dó awǎjijɛ ɖěbǔ nú mǐ ó a? Éǒ. Mǐ bǐ wɛ é nɔ víví ná hwenu e è ná nǔɖé mǐ é. É ɖo mɔ̌ có, ényí mǐɖésúnɔ wɛ ná nǔ mɛ ɔ, é tlɛ nɔ dó awǎjijɛ nú mǐ hú gǎn. Nǔgbó ɔ, ɖagbe mǐtɔn wú wɛ Jexóva bló mǐ gbɔn mɔ̌. Aniwú?

² Ðó Jexóva dá mǐ gbɔn mɔ̌ wútu ɔ, mǐ sixú bló bɔ awǎjijɛ mǐtɔn ná jɛjí. Nú mǐ nɔ ba ali ɖěɖěe nu mǐ ná ná nǔ mɛ ɖe lɛ́ é ɔ, mǐ sixú bló bɔ awǎjijɛ mǐtɔn ná jɛjí. Lěe è bló mǐ gbɔn é sín akpáxwé ɖaaɖagbe ɖé nɛ́ ǎ cé?—Ðɛh. 139:14.

3. Étɛ́wú è ka sixú ylɔ́ Jexóva ɖɔ “Mawu awǎjijɛnɔ”?

³ Nǔwlánwlán mímɛ́ lɛ́ ná mǐ gǎnjɛwú ɖɔ nǔnámɛ nɔ zɔ́n bɔ è nɔ ɖó awǎjijɛ, énɛ́ wú ɔ, é sɔ́ nɔ kpácá mǐ ɖɔ Biblu ylɔ́ Jexóva ɖɔ “Mawu awǎjijɛnɔ” ǎ. (1 Tim. 1:11) É wɛ nyí nǔnámɛtɔ́ téwúngbéjú ɔ, bɔ mɛ ɖěbǔ ná nǔ mɛ sɔ ɛ ǎ. Lěe mɛsɛ́dó Pɔ́lu ɖɔ gbɔn é ɔ, é wɛ zɔ́n bɔ “mǐ ɖo gbɛ, nɔ dán wǔ, bo lɛ́ tíin.” (Mɛ. 17:28) Nǔgbó ɔ, Jexóva gɔ́n wɛ “nǔníná ɖagbe ɖagbe bǐ kpó nǔníná e nǔ bǐ vɔ ɖ’é wú é bǐ kpó” nɔ gosín.—Ja. 1:17.

4. Étɛ́ ka ná d’alɔ mǐ bɔ mǐ ná ɖó awǎjijɛ d’é jí?

⁴ Mǐ bǐ ná ɖibla ba ná ɖó awǎjijɛ e nǔnámɛ nɔ zɔ́n bɔ è nɔ ɖó é d’é jí. Mǐ sixú wa mɔ̌ gbɔn kpɔ́ndéwú alɔhundónánǔmɛ tɔn Jexóva tɔn xwixwedó gblamɛ. (Efɛ́. 5:1) Ée mǐ ná ɖo énɛ́ gbéjé kpɔ́n wɛ é ɔ, mi nú mǐ ní kpɔ́n nǔ e mǐ sixú wa hwenu e mɛ ɖěvo lɛ́ ma tuun nǔ e mǐ wa nú yě é nú mǐ ǎ é. Nǔflínmɛ énɛ́ lɛ́ ná d’alɔ mǐ bɔ mǐ ná kpo ɖo awǎjijɛ e è nɔ mɔ ɖo nǔnámɛ mɛ é ɖó wɛ, bo ná tlɛ bló bɔ é ná lɛ́ jɛjí.

XWEDÓ KPƆ́NDÉWÚ ALƆHUNDÓNÁNǓMƐ TƆN JEXÓVA TƆN

5. Nǔ tɛ́ lɛ́ Jexóva ka nɔ ná mǐ ɖo agbaza lixo?

⁵ Ali tɛ́ lɛ́ nu mɔ̌ Jexóva ka nɔ hun alɔ dó ná nǔ mɛ ɖe? Mǐ ní kpɔ́n kpɔ́ndéwú ɖé lɛ́. Jexóva nɔ ná nǔ e sín hudó mǐ ɖó ɖo agbaza lixo lɛ́ é mǐ. Mǐ sixú nɔ ma mɔ nǔ vɛnkpɛn vɛnkpɛn lɛ́ hwebǐnu, amɔ̌, Jexóva nɔ bló bɔ mǐ nɔ mɔ nǔ e sín hudó mǐ ɖó lɛ́ é. Ði kpɔ́ndéwú ɔ, é nɔ bló bɔ mǐ nɔ mɔ nǔɖuɖu, avɔ kpó fí e mǐ ná dɔ́ é kpó. (Ðɛh. 4:9; Mat. 6:31-33; 1 Tim. 6:6-8) Jexóva nɔ sú hudó agbaza tɔn mǐtɔn lɛ́ sín do, ɖó é mɔ ɖɔ azɔ̌ wɛ é nyí bɔ émí ɖó ná wa kpowun wútu wɛ a? Ðěbǔ lɔ ǎ! Étɛ́wú Jexóva ka nɔ bló mɔ̌ nú mǐ?

6. Étɛ́ Matíe 6:25, 26 ka kplɔ́n mǐ?

⁶ È ma ná lɛ xó gle ǎ ɔ, Jexóva nɔ sú hudó agbaza tɔn mǐtɔn lɛ́ sín do nú mǐ, ɖó é yí wǎn nú mǐ wútu wɛ. Ðǒ ayi xó Jezu tɔn ɖěɖěe ɖo Matíe 6:25, 26 mɛ lɛ́ é wú. (Xa.) Jezu zán nǔɖíɖó lɛ́ sín kpɔ́ndéwú. Hwenu e Jezu ɖo xó ɖɔ dó xɛ lɛ́ wú wɛ é ɔ, é ɖɔ: “Yě nɔ dó nǔkún alǒ ya nǔkún abǐ kplé nǔkún dó agɔ̌ mɛ ǎ.” É ɖo mɔ̌ có, kpɔ́n nǔ e é ɖɔ bɔ d’é wú é: “Tɔ́ mitɔn jǐxwé tɔn ɔ nɔ ná nǔɖuɖu yě.” Énɛ́ gúdo ɔ, Jezu kanbyɔ́ ɖɔ: “Mi ma xɔ akwɛ́ hú yě ǎ cé?” Nǔkplɔ́nmɛ ɔ? Mɛsɛntɔ́ gbejínɔtɔ́ Jexóva tɔn lɛ́ xɔ akwɛ́ n’i hú kanlin lɛ́. Énɛ́ wú ɔ, ényí Jexóva nɔ kpé nukún dó hudó kanlin lɛ́ tɔn wú ɔ, mǐ sixú kú d’é jí ɖɔ é ná ɖɔ mǐ lɔ tɔn! Wǎnyíyí wɛ nɔ sísɛ́ Jexóva bɔ é nɔ kpé nukún dó xwédo tɔn sín hudó lɛ́ wú, lěe tɔ́ xomɛnyɔ́tɔ́ ɖé nɔ bló gbɔn é ɖɔhun.—Ðɛh. 145:16; Mat. 6:32.

7. Ðɔ ali e nu mǐ sixú xwedó kpɔ́ndéwú alɔhundónánǔmɛ tɔn Jexóva tɔn ɖe é ɖokpó. (Kpɔ́n ɖiɖe ɔ lɔmɔ̌.)

⁷ Jexóva ɖɔhun ɔ, wǎnyíyí sixú sísɛ́ mǐ lɔ bɔ mǐ ná nɔ ná nǔ mɛ ɖo agbaza lixo. Ði kpɔ́ndéwú ɔ, a ka tuun nǔɖitɔ́ hǎtɔ́ ɖé bɔ é ɖó hudó nǔɖuɖu, alǒ nǔzínzán tɔn a? Jexóva sixú zán we dó ná nǔɖé è, dó sú hudó énɛ́ sín do. Togun Jexóva tɔn nɔ lɛ́ yá wǔ d’alɔ mɛ ɖěvo lɛ́ hwenu e adla j’ayǐ é. Ði kpɔ́ndéwú ɔ, ɖo jɛmɛjí Covid-19 hwenu ɔ, nɔví súnnu lɛ́ kpó nɔví nyɔ̌nu lɛ́ kpó má nǔɖuɖu, avɔ kpó dandannú gbɛ mɛ tɔn ɖěvo lɛ́ kpó xá mɛ e ɖo hudó mɛ lɛ́ é. Mɛ gěgé lɛ́ hun alɔ dó ná akwɛ́ dó azɔ̌ e wa wɛ è ɖe gbɔn gbɛ ɔ bǐ mɛ é tamɛ. Énɛ́ zɔ́n bɔ è hɛn sɔ mɛ gbɔn gbɛ ɔ bǐ mɛ. Yě hɛn xó élɔ́ e ɖo Eblée lɛ́ 13:16 mɛ é ayi mɛ; é ɖɔ: “Mi ma wɔn bo gɔn ɖagbe wa ó, mi ma lɛ́ wɔn bo gɔn nǔ e mi ɖó lɛ́ é má xá mɛ ɖěvo lɛ́ ó, ɖó vɔ̌sísá mɔ̌hun lɛ́ nɔ nyɔ́ Mawu nukúnmɛ titewungbe.”

8. Ali tɛ́ lɛ́ nu mǐ ka nɔ ɖu hlɔ̌nhlɔ́n Jexóva tɔn sín le ɖe? (Filípunu lɛ́ 2:13)

⁸ Jexóva nɔ ná hlɔ̌nhlɔ́n mɛ. Akpakpa nɔ sɔ́ Jexóva dó hlɔ̌nhlɔ́n tɔn ma ɖó dogbó ɔ mímá xá mɛsɛntɔ́ tɔn gbejínɔtɔ́ lɛ́ wú. (Xa Filípunu lɛ́ 2:13.) A ka ko xo ɖɛ bo byɔ́ hlɔ̌nhlɔ́n bá dó ɖí xwi xá mɛtɛ́nkpɔ́n ɖé, alǒ mɔ hlɔ̌nhlɔ́n bá dó dɛ ɖo ninɔmɛ syɛ́nsyɛ́n ɖé nu kpɔ́n a? A sixú ko lɛ́ xo ɖɛ kpowun bo byɔ́ hlɔ̌nhlɔ́n bá dó xo kéze ɖé zlɛ́. Hwenu e é ná sin nú ɖɛ e a xo dó byɔ́ hlɔ̌nhlɔ́n é ɔ, a sixú ko mɔ ɖɔ xó élɔ́ e mɛsɛ́dó Pɔ́lu wlán é ɔ nǔgbó wɛ: “Mɛ e nɔ ná mì hlɔ̌nhlɔ́n é wɛ nɔ zɔ́n bɔ un nɔ mɔ hlɔ̌nhlɔ́n dó kpé nǔ lɛ́ bǐ wú.”—Filí. 4:13.

9. Ali tɛ́ lɛ́ nu mɔ̌ mǐ ka sixú xwedó kpɔ́ndéwú Jexóva tɔn gbɔn hlɔ̌nhlɔ́n mǐtɔn zínzán dó d’alɔ mɛ ɖěvo lɛ́ gblamɛ ɖe? (Kpɔ́n ɖiɖe ɔ lɔmɔ̌.)

⁹ Gbɛtɔ́ hwɛhutɔ́ wɛ mǐ nyí có, mǐ sixú xwedó kpɔ́ndéwú lěe Jexóva nɔ zán hlɔ̌nhlɔ́n tɔn gbɔn é tɔn. Mǐ sixú ná hlɔ̌nhlɔ́n mɛ ɖěvo lɛ́ tlɔlɔ lě ǎ. Amɔ̌, mǐ sixú zán hlɔ̌nhlɔ́n mǐtɔn dó ta yětɔn mɛ. Ði kpɔ́ndéwú ɔ, mǐ sixú yi xwlé axi wá nú klisánwun mɛxómɔ, alǒ wɔ̌nɖowǔnánɔ ɖé, alǒ wa xwégbezɔ́ lɛ́ n’i. Ényí ninɔmɛ mǐtɔn lɛ́ yí gbe ná ɔ, mǐ sixú sɔ́ mǐɖée jó bo d’alɔ bɔ è hɛn kpléxɔ Axɔ́súɖuto ɔ tɔn ɖó mǐmɛ́ jí, bo lɛ́ jlá ɖó. Hlɔ̌nhlɔ́n mǐtɔn zínzán ɖo ali mɔ̌hun lɛ́ nu nɔ hɛn le wá nú mɛ ɖěvo e ɖo Jexóva sɛn wɛ lɛ́ é.

10. Nɛ̌ mǐ ka sixú ná hlɔ̌nhlɔ́n mɛ ɖěvo lɛ́ gbɔn nǔ e mǐ nɔ ɖɔ lɛ́ é gblamɛ gbɔn?

¹⁰ Ma wɔn ɖɔ a sixú lɛ́ ná hlɔ̌nhlɔ́n mɛ ɖěvo lɛ́ gbɔn xó towe lɛ́ gblamɛ ó. A ka lin ɖɔ mɛɖé ɖe bɔ ényí émí kpa ɛ dó nǔjɔnǔ mɛ ɔ, é ná hɛn le wá n’i a? A ka tuun mɛɖé bɔ é ɖó hudó gbɔdónúmɛ tɔn a? Ényí mɔ̌ hǔn, tɛ́n kpɔ́n bónú mɛ ɔ ní tuun ɖɔ nǔ émítɔn nɔ ɖu ayi mɛ nú we. A sixú yi ba ɛ kpɔ́n tlɔlɔ, ylɔ́ ɛ gbɔn alǒkan jí, alǒ sɛ́ káti abǐ wěma dó è. É byɔ́ ɖɔ a ní ɖo linkpɔ́n mɛ zɛ xwé wú dó nǔ e a ná ɖɔ é wú ǎ. Xó kléwún e bɔkun bo gosín ayi mɛ é sixú nyí nǔ e sín hudó nǔɖitɔ́ hǎtɔ́ towe ɖó pɛ́pɛ́pɛ́ bá kpo ɖo gbejí nɔ wɛ nú azǎn ɖěvo, alǒ ɖó linlin ɖagbe dó ninɔmɛ tɔn wú é.—Nǔx. 12:25; Efɛ́. 4:29.

11. Nɛ̌ Jexóva ka nɔ zán nǔnywɛ́ tɔn gbɔn?

¹¹ Jexóva nɔ ná nǔnywɛ́ mɛ. Ahwanvú Jaki wlán ɖɔ: “Ényí nǔnywɛ́ hwedó mɛɖé ɖo mi mɛ hǔn, ní fɔ́n bo ɖo byɔ̌byɔ́ Mawu wɛ, ɖó é nɔ hun alɔ dó ná nǔ mɛ bǐ, é ka nɔ dó hwɛ mɛ ǎ.” (Ja. 1:5) Xó énɛ́ lɛ́ xlɛ́ ɖɔ Jexóva kún nɔ wún fɛn dó nǔnywɛ́ tɔn jí ó. É nɔ hun alɔ dó má xá mɛ ɖěvo lɛ́. Lɛ̌ ɖ’ayi wú ɖɔ ényí Jexóva ɖo nǔnywɛ́ tɔn ná mɛ wɛ ɔ, é kún “nɔ dó hwɛ mɛ [ó].” É nɔ bló gbeɖé bónú alɔdó tɔn byɔ́byɔ́ ná vɛ́ wǔ nú mǐ ǎ. É nyɔ́ wa ɔ, é nɔ dó wǔsyɛ́n lanmɛ nú mǐ ɖɔ mǐ ní ba wěɖexámɛ émítɔn.—Nǔx. 2:1-6.

12. Ali tɛ́ lɛ́ ka hun nú mǐ bɔ mǐ ná má nǔnywɛ́ mǐtɔn?

¹² Mǐdɛɛ lɛ́ ka lo? Mǐ ka sixú xwedó kpɔ́ndéwú Jexóva tɔn gbɔn nǔnywɛ́ mǐtɔn mímá gblamɛ a? (Ðɛh. 32:8) Ali gěgé wɛ hun nú mɛ e ɖo togun Jexóva tɔn mɛ lɛ́ é nú yě ná má nǔ e yě kplɔ́n lɛ́ é. Ði kpɔ́ndéwú ɔ, hwɛhwɛ wɛ mǐ nɔ kplɔ́n azɔ̌ mɛ yɔ̌yɔ́ lɛ́ ɖo sinsɛnzɔ́ ɔ mɛ. Mɛxó agun tɔn lɛ́ nɔ xwe sɔ bo nɔ d’alɔ mɛsɛntɔ́ agun tɔn lɛ́ kpó nɔví súnnu e bló batɛ́mu lɛ́ é kpó, bɔ yě nɔ kplɔ́n lěe yě ná kpé nukún dó azɔ̌ yětɔn lɛ́ wú ɖo agun ɔ mɛ gbɔn é. Gɔ́ ná ɔ, mɛ ɖěɖěe mɔ nǔ kpɔ́n ɖo xɔ gbígbá kpó nǔ lɛ́ vívɔ́ jlá ɖó kpó kpáxwé lɛ́ é nɔ d’alɔ bɔ è nɔ kplɔ́n azɔ̌ mɛ e ma ko mɔ nǔ kpɔ́n sɔmɔ̌ ǎ lɛ́ é, bɔ yě nɔ ɖ’alɔ ɖo xɔzɔ́ tutoblónúnǔ ɔ tɔn lɛ́ mɛ.

13. Hwenu e mǐ ɖo azɔ̌ kplɔ́n mɛ ɖěvo lɛ́ wɛ é ɔ, nɛ̌ mǐ ka sixú xwedó kpɔ́ndéwú lěe Jexóva nɔ má nǔnywɛ́ tɔn xá mɛ gbɔn é tɔn gbɔn?

¹³ Mɛ ɖěɖěe nɔ kplɔ́n azɔ̌ mɛ lɛ́ é nɔ tɛ́n kpɔ́n bo nɔ xwedó lěe Jexóva nɔ má nǔnywɛ́ tɔn gbɔn é sín kpɔ́ndéwú. Flín ɖɔ, Jexóva nɔ hun alɔ dó ná nǔnywɛ́ mɛ. Mɔ̌ ɖokpó ɔ, mǐ nɔ vo fɛɛ bo nɔ má nǔ e mǐ tuun lɛ́ é kpó nǔ e mǐ mɔ kpɔ́n lɛ́ é kpó xá mɛ ɖěɖěe kplɔ́n azɔ̌ wɛ mǐ ɖe lɛ́ é. Mǐ nɔ cí nǔ e mǐ tuun é ɖé lɛ́ jí, ɖó mǐ ɖo xɛsi ɖi wɛ ɖɔ mɛ e kplɔ́n azɔ̌ wɛ mǐ ɖe é sixú wá ɖyɔ́ mǐ wútu ǎ. Mǐ nɔ lɛ́ ɖó linlin lěhun ǎ: ‘Mɛɖé kplɔ́n azɔ̌ nyɛ ǎ! Éɖésú ní dó gǎn tɔn.’ Linlin mɔ̌hun ɖó tɛn ɖě ɖo togun Jexóva tɔn mɛ ǎ. É nyɔ́ wa ɔ, nǔ e mǐ tuun lɛ́ é kɛ́ɖɛ́ wɛ mǐ nɔ kplɔ́n mɛ e kplɔ́n azɔ̌ wɛ mǐ ɖe lɛ́ é ǎ, loɔ, mǐ nɔ lɛ́ “sɔ́ mǐɖésúnɔ bǐ jó dó ta [yětɔn] mɛ” kpó xomɛhunhun kpó. (1 Tɛ. 2:8) Mǐ nɔ ɖó nukún ɖɔ “yě lɔ ná jɛxá mlɛ́mlɛ́ bo ná kplɔ́n mɛ ɖěvo lɛ́.” (2 Tim. 2:1, 2) Ényí mǐ bǐ nɔ hun alɔ dó má nǔnywɛ́ mǐtɔn ɔ, mǐ kpó mɛ ɖěvo lɛ́ kpó bǐ ná ɖó nǔnywɛ́ d’é jí, bo lɛ́ ɖó awǎjijɛ.

HWENU E É CÍ ÐƆ NǓ E MǏ WA É KÚN SU MƐ ÐĚVO LƐ́ NUKÚNMƐ Ó É

14. Ényí mǐ hun alɔ dó ná nǔ mɛ ɖěvo lɛ́ ɔ, nɛ̌ gěgé yětɔn ka nɔ wa nǔ gbɔn?

¹⁴ Ényí mǐ hun alɔ dó ná nǔ mɛ, ɖo tají ɔ, nɔví súnnu kpó nɔví nyɔ̌nu kpó mǐtɔn lɛ́ ɔ, hwɛhwɛ ɔ, yě nɔ ɖe xlɛ́ ɖɔ é su nukún émítɔn mɛ. Yě sixú wlán nǔ sɛ́dó mǐ bo ɖɔ é ná cɛ nú mǐ, alǒ ɖe xlɛ́ ɖo ali ɖěvo nu ɖɔ é su nukún émítɔn mɛ. (Koló. 3:15) Nǔsumɛnukúnmɛ mɔ̌hun ɖiɖexlɛ́ nɔ gɔ́ so nú awǎjijɛ mǐtɔn.

15. Étɛ́ mǐ ka ɖó ná flín hwenu e mɛɖé lɛ́ ma ɖe nǔsumɛnukúnmɛ xlɛ́ ǎ é?

¹⁵ É ɖo mɔ̌ có, mɛɖé lɛ́ sixú nɔ ma dó kú nú mǐ, alǒ nɔ ma ɖe xlɛ́ ɖɔ é su nukún émítɔn mɛ hwebǐnu. Hweɖélɛ́nu ɔ, mǐ sixú zán hwenu mǐtɔn, hlɔ̌nhlɔ́n mǐtɔn, alǒ nǔɖókan mǐtɔn lɛ́ dó mɛɖé tamɛ, bo wá kanbyɔ́ mǐɖée ɖɔ mɛ ɔ ka tlɛ ké ya nú nǔ e mǐ wa n’i é a jí. Ényí nǔ mɔ̌hun jɛ ɔ, nɛ̌ mǐ ka sixú wa gbɔn bo ma ná ba awǎjijɛ mǐtɔn kpó, alǒ bɔ awakanmɛ ma ná kú mǐ ǎ? Flín xó e Mɛsɛ́dó 20:35 e jí xóta mǐtɔn jínjɔ́n é ɖɔ é. Lěe è wa nǔ gbɔn hwenu e mǐ ná nǔ mɛ é wú wɛ awǎjijɛ e mǐ nɔ mɔ ɖo nǔnámɛ mɛ é nɔ sín ǎ. Mǐ sixú wá gbeta ɔ kɔn bá ɖu vǐví e nǔnámɛ nɔ hɛn wá é, ényí é tlɛ cí ɖɔ nǔ e mǐ ná mɛ ɖěvo lɛ́ é kún su nukún yětɔn mɛ ó ɖɔhun ɔ nɛ́. Gbɔn nɛ̌ é? Mǐ ní kpɔ́n ali e nu mǐ ná wa mɔ̌ ɖe é ɖé lɛ́.

16. Étɛ́ jí mǐ ka ɖó ná sɔ́ ayi ɖó hwenu e mǐ ɖo nǔ ná mɛ wɛ é?

¹⁶ Sɔ́ ayi ɖó kpɔ́ndéwú Jexóva tɔn xwixwedó jí. É nɔ ná nǔ ɖagbe gbɛtɔ́ lɛ́, é su nukún yětɔn mɛ kpó é gbɔ kpó ɔ nɛ́. (Mat. 5:43-48) Jexóva d’akpá ɖɔ ényí mǐ lɔ nɔ ná nǔ mɛ “ma ɖó nukún nǔ ɖěbǔ” ó ɔ, “ajɔ [mǐtɔn] ná d’agba.” (Luk. 6:35) Nǔsumɛnukúnmɛ ɖiɖexlɛ́ sixú ɖo “nǔ ɖěbǔ” ɔ mɛ. Jexóva ná sú nǔ ɖagbe e mǐ wa dó d’alɔ mɛ ɖěvo lɛ́, ɖó mǐ ‘ná nǔ yě kpó xomɛhunhun kpó’ é sín axɔ́ mǐ jɛ́n wɛ, ényí é su nukún yětɔn mɛ kpó é gbɔ kpó ɔ nɛ́.—Nǔx. 19:17; 2 Kɔ. 9:7.

17. Étɛ́ ka nyí nǔ tají e mǐ ná hɛn dó ayi mɛ hwenu e mǐ ba ná ná nǔ mɛ ɖěvo lɛ́ é? (Luki 14:12-14)

¹⁷ Nǔ ɖěvo e mǐ sixú wa dó xwedó kpɔ́ndéwú Jexóva tɔn hwenu e mǐ ɖo nǔ ná mɛ wɛ é wɛ nyí ɖɔ mǐ ní xwedó nǔ e Jezu ɖɔ ɖo Luki 14:12-14 mɛ é. (Xa.) É nylá ɖɔ mǐ ní yí jǒnɔ mɛ ɖěɖěe sixú wá wa nǔ ɖokpó ɔ nú mǐ lɔ lɛ́ é tɔn, alǒ hun alɔ dó ná nǔ yě ǎ. É ɖo mɔ̌ có, ényí mǐ ɖ’ayi wú ɖɔ hwɛhwɛ ɔ, mǐ nɔ ná nǔ mɛ ɖěvo lɛ́, ɖó mǐ ɖo nukún ɖó wɛ ɖɔ yě lɔ ní wa nǔɖé nú mǐ ɔ ka lo? É ná nyɔ́ ɖɔ mǐ ní tɛ́n wě e Jezu ɖe xá mɛ é kpɔ́n. Mǐ sixú yí jǒnɔ mɛ e mǐ tuun ɖɔ é kún sixú kpé wú bo yí jǒnɔ mǐtɔn ó é tɔn. Énɛ́ ɔ, mǐ ná ɖ’awǎjijɛ, ɖó mǐ ɖo kpɔ́ndéwú Jexóva tɔn xwedó wɛ. Linlin énɛ́ ɖokpó ɔ ɖíɖó ná lɛ́ d’alɔ mǐ bɔ mǐ ná kpo ɖo awǎjijɛ ɖó wɛ, hwenu e mɛ ɖěvo lɛ́ ma ɖe nǔsumɛnukúnmɛ xlɛ́ ǎ é.

18. Étɛ́ ka sixú d’alɔ mǐ bɔ mǐ ná nɔ ná nǔ mɛ ɖěvo lɛ́?

¹⁸ Ma nɔ lin ɖɔ ɖumakpamɛsi wɛ mɛ ɖěvo lɛ́ nyí ó. (1 Kɔ. 13:7) Ényí mɛ ɖěvo lɛ́ ma ɖe nǔsumɛnukúnmɛ xlɛ́ ǎ ɔ, mǐ sixú kanbyɔ́ mǐɖée ɖɔ: ‘Gɔn jɛ́n é ka gɔn nukún yětɔn mɛ su dóó a? Alǒ, yě wɔn kpowun bo gɔn nǔsumɛnukúnmɛ ɖe xlɛ́ wɛ.’ Bóyá, hwɛjijɔ ɖěvo lɛ́ wú wɛ yě nɔ ma wa nǔ lěe mǐ ɖó nukún tɔn gbɔn é. Mɛɖé lɛ́ tíin bɔ nǔ nɔ su nukún yětɔn mɛ tawun, amɔ̌, é nɔ vɛ́ wǔ nú yě bɔ yě ná ɖe xlɛ́. Winnyá sixú hu yě ɖɔ è ɖo alɔ dó yě wɛ, tají ɔ, ényí yě wɛ ko nɔ d’alɔ mɛ ɖěvo lɛ́ ɖ’ayǐ ɔ nɛ́. Ðěbǔ wɛ é ná bo nyí ɔ, wǎnyíyí klisánwun tɔn ná sísɛ́ mǐ bɔ mǐ ná nɔ ná nǔ nǔɖitɔ́ hǎtɔ́ mǐtɔn lɛ́, lobɔ nǔnámɛ ná kpo ɖo awǎjijɛ hɛn wá nú mǐ wɛ.—Efɛ́. 4:2.

19-20. Nǔ ɖěvo tɛ́ ka sixú d’alɔ mǐ bɔ nǔ ná mɛ ɖěvo lɛ́ ná nɔ víví nú mǐ? (Kpɔ́n ɖiɖe ɔ lɔmɔ̌.)

¹⁹ Yi agbɔ̌n jí. Axɔ́sú nǔnywɛ́tɔ́ Salomɔ́ɔ wlán nǔ élɔ́ dó nǔnámɛxó ɔ wú: “Da wɔ̌xúxú towe dó sin mɛ, ɖó azǎn gěgé gúdo ɔ, a ná lɛ́ mɔ ɛ.” (Nǔt. 11:1, nwt) Xó énɛ́ lɛ́ ɖo xlɛ́xlɛ́ wɛ ɖɔ, mɛɖé lɛ́ tíin bɔ ényí mǐ hun alɔ dó ná nǔ yě ɔ, táan gěgé, énɛ́ wɛ nyí “azǎn gěgé” sixú wá yi hwɛ̌ cóbɔ yě ná ɖe xlɛ́ ɖɔ é su nukún émítɔn mɛ. Nǔɖé jɛ dó nɔví nyɔ̌nu ɖé jí bo xlɛ́ ɖɔ xójɔxó séé wɛ xó énɛ́ nyí.

²⁰ Xwe ɖé lɛ́ ɖíe ɔ, nukúnkpénǔwútɔ́ lɛ̌dó tɔn ɖé sín asi sɛ́ wǔsyɛ́n dó lanmɛ nú mɛ sín wěma ɖé dó nɔví nyɔ̌nu e bló batɛ́mu bɔ é ma lín ǎ é ɖé, bo byɔ́ ɛ ɖɔ é ní kpo ɖo gbejí. Xwe tántɔn gúdo ɔ, nɔví nyɔ̌nu ɔ ná sin nú wěmasɛ́dómɛ ɔ bo ɖɔ: “Un lin ɖɔ un ɖó ná wlán nǔ bo ɖɔ lě do a d’alɔ mì ɖo xwe lɛ́ vlamɛ sɔ, bo ma ka tuun ǎ é nú we.” É gbɛ kan d’é nu bo ɖɔ: “[Wěmasɛ́dómɛ towe] sɔ́ akpakpa mì tawun, bɔ un wɔn wěmafɔ e xó a ɖɔ d’é mɛ é gbeɖé ǎ.”a Ée nɔví nyɔ̌nu ɔ tínmɛ wǔvɛ́ e é ko ɖí xwi xá é ɖé lɛ́ gúdo é ɔ, é ɖɔ: “Hweɖélɛ́nu ɔ, un nɔ ba ná jó gbe, bo ɖó Jexóva sinsɛn te. Amɔ̌, wěmafɔ énɛ́ e a wlán sɛ́dó mì é nɔ ɖo ayi ce mɛ, bɔ un jó gbe ǎ.” É ɖɔ gɔ́ ná ɖɔ: “Ðo xwe tántɔn énɛ́ lɛ́ bǐ mɛ ɔ, nǔ ɖě ɖe bo dó wǔsyɛ́n lanmɛ nú mì sɔ wěmasɛ́dómɛ towe ǎ.” Dǒ nukún lě do nukúnkpénǔwútɔ́ lɛ̌dó tɔn ɔ sín asi ná j’awǎ sɔ hwenu e é mɔ wěmasɛ́dómɛ énɛ́, ɖo hwenu gěgé gúdo é mɛ kpɔ́n! Ényí mǐ lɔ zán mǐɖée dó mɛ ɖěvo lɛ́ tamɛ ɖo ali ɖé nu ɔ, hwenu gěgé sixú wá yi cóbɔ yě ná ɖe nǔsumɛnukúnmɛ xlɛ́.

21. Étɛ́wú a ka kán ɖ’é jí bá kpo ɖo kpɔ́ndéwú alɔhundónánǔmɛ tɔn Jexóva tɔn xwedó wɛ?

²¹ Lěe mǐ ko ɖɔ gbɔn wá yi é ɔ, Jexóva dá mǐ kpó nǔwúkpíkpé bǔnɔ ɖé kpó. Nǔyíɖomɛsí nɔ ná awǎjijɛ mǐ có, ényí mǐ ná nǔ mɛ ɖěvo lɛ́ ɔ, é tlɛ nɔ ná awǎjijɛ mǐ hú gǎn. Ényí mǐ kpé wú bo d’alɔ nǔɖitɔ́ hǎtɔ́ mǐtɔn lɛ́ ɔ, é nɔ víví nú mǐ. Gɔ́ ná ɔ, ényí yě ɖe nǔsumɛnukúnmɛ xlɛ́ ɔ, mǐ nɔ ɖ’awǎjijɛ. Amɔ̌, ényí mɛ e mǐ ná nǔ é ɖe nǔsumɛnukúnmɛ xlɛ́ alǒ gbɔ ɔ, mǐ sixú j’awǎ ɖɔ mǐ wa nǔ e sɔgbe é. Ma ka wɔn gbeɖé ó, é ná bo nyí nǔ ɖěbǔ wɛ a ná ɔ, ‘Jexóva hɛn ɔ, é ná ná éé hú mɔ̌ ɔ we.’ (2 Tan 25:9) Ajɔ e Jexóva ná dó mǐ é ná hú nǔ e mǐ ná mɛ ɖěvo lɛ́ é flaflá tɔn! Gɔ́ ná ɔ, awǎjijɛ ɖě sɔ́ hú Jexóva ɖésúnɔ ní sú nǔ e è ná mɛ é sín axɔ́ mɛ ǎ. Hǔn, mi nú mǐ ní kán ɖ’é jí bá kpo ɖo alɔ hun dó ná nǔ mɛ wɛ Tɔ́ mǐtɔn jǐxwé tɔn ɔ ɖɔhun.