Lěe mǐ sixú bló gbɔn bɔ wǎnyíyí e mǐ ɖó nú mǐɖée lɛ́ é ná ɖo jijɛjí wɛ é

1-2. (a) Étɛ́ ka sixú ko zɔ́n bɔ mɛsɛ́dó Pɔ́lu ɖɔ wǎnyíyí wɛ nyí jijɔ e “hú gǎn” jijɔ lɛ́ bǐ é? (b) Nǔkanbyɔ́ tɛ́ lɛ́ mǐ ka ná gbéjé kpɔ́n?

HWENU e mɛsɛ́dó Pɔ́lu ɖo xó ɖɔ dó nǔɖiɖi, nukúnɖíɖó kpó wǎnyíyí kpó wú wɛ é ɔ, é ɖɔ ɖɔ “éé hú gǎn bǐ ɖo [jijɔ] énɛ́ lɛ́ mɛ é wɛ nyí wǎnyíyí.” (1 Kɔ. 13:13) Aniwú é ka ɖɔ mɔ̌? Ðo sɔgúdo ɔ, é sɔ́ ná byɔ́ ɖɔ mǐ ní ɖó nǔɖiɖi nú akpá e Mawu dó dó gbɛ yɔ̌yɔ́ ɔ wú lɛ́ é, alǒ ɖó nukún ɖɔ akpá énɛ́ lɛ́ ná jɛnu ǎ, ɖó yě ná ko jɛnu. Amɔ̌, hwebǐnu wɛ é ná byɔ́ ɖɔ mǐ ní nɔ yí wǎn nú Jexóva kpó mɛ ɖěvo lɛ́ kpó. Nǔgbó ɔ, wǎn e mǐ yí nú yě é ná kpo ɖo jijɛjí wɛ tɛgbɛ.

² Ðó hwebǐnu ɔ, é byɔ́ ɖɔ mǐ ní yí wǎn nú mɛ wútu ɔ, mǐ ná gbéjé nǔkanbyɔ́ atɔn ɖé lɛ́ kpɔ́n. Nukɔntɔn, aniwú mǐ ka ɖó ná nɔ yí wǎn nú mǐɖée lɛ́? Wegɔ́, nɛ̌ mǐ ka nɔ ɖe wǎnyíyí xlɛ́ mǐɖée lɛ́ gbɔn? Atɔngɔ́, nɛ̌ mǐ ka sixú bló gbɔn bɔ wǎn e mǐ yí nú mǐɖée lɛ́ é ná kpo ɖo jijɛjí wɛ?

ANIWÚ MǏ KA ÐÓ NÁ NƆ YÍ WǍN NÚ MǏÐÉE LƐ́?

3. Hwɛjijɔ tɛ́ lɛ́ mǐ ka ɖó bo ná nɔ yí wǎn nú mǐɖée lɛ́?

³ Aniwú é ka ɖo tají ɖɔ mǐ ní nɔ yí wǎn nú mǐɖée lɛ́? Hwɛjijɔ lɛ́ ɖokpó wɛ nyí ɖɔ wǎnyíyí wɛ nɔ dó gesí klisánwun nǔgbó lɛ́. Jezu ɖɔ xó élɔ́ nú mɛsɛ́dó tɔn lɛ́: “Ényí mi yí wǎn nú miɖée lɛ́ ɔ, mɛ lɛ́ bǐ ná tuun ɖɔ mi nyí ahwanvú ce lɛ́.” (Jaan 13:35) Gɔ́ ná ɔ, ényí mǐ nɔ yí wǎn nú mǐɖée lɛ́ ɔ, é ná zɔ́n bɔ mǐ ná kpo ɖo bǔ. Pɔ́lu ɖɔ ɖɔ wǎnyíyí “nɔ dɔn mɛ lɛ́ bǐ ɖó bǔ ganjí.” (Koló. 3:14) Amɔ̌, é lɛ́ kpo hwɛjijɔ tají e wú mǐ ɖó ná yí wǎn nú mǐɖée lɛ́ é ɖěvo. Mɛsɛ́dó Jaan wlán nǔ élɔ́ sɛ́dó nǔɖitɔ́ hǎtɔ́ tɔn lɛ́: “Mɛ ɖěbǔ e yí wǎn nú Mawu é ɖó ná yí wǎn nú nɔví tɔn lɔmɔ̌.” (1 Jaan 4:21) Ényí mǐ nɔ yí wǎn nú mǐɖée lɛ́ hǔn, xlɛ́xlɛ́ wɛ mǐ ɖe ɖɔ mǐ yí wǎn nú Mawu lɔmɔ̌ nɛ́.

4-5. Nǎ kpɔ́ndéwú ɖé bo dó xlɛ́ lěe wǎnyíyí e mǐ ɖó nú Mawu é cá kan xá wǎnyíyí e mǐ ɖó nú mǐɖée lɛ́ é gbɔn é.

⁴ Ali tɛ́ nu wǎn e mǐ yí nú Mawu é ka cá kan tawun xá wǎn e mǐ yí nú nɔví mǐtɔn lɛ́ é ɖe? Dǒ nukún kancícá e ɖo hǔn mǐtɔn kpó wǔjɔnú agbaza mǐtɔn tɔn ɖěvo lɛ́ kpó tɛ́ntin é mɛ kpɔ́n. Ényí dotóo ɖé gbéjé fí e alɔ mǐtɔn kpó awa mǐtɔn kpó kplé ɖe é kpɔ́n, bá dó kpɔ́n ɖɔ é vɔ́ da, alǒ gǎn ɖo wǔ tɔn a jí ɔ, é sixú d’alɔ ɛ bɔ é ná tuun nǔɖé lɛ́ dó lěe hǔn mǐtɔn ɖe gbɔn é wú. Nɛ̌ mǐ ka sixú zán nǔgbódodó énɛ́ ɖo wǎnyíyí kpáxwé gbɔn?

⁵ Lěe fí e alɔ mǐtɔn kpó awa mǐtɔn kpó kplé ɖe é gbígbéjé kpɔ́n ná d’alɔ dotóo ɖé, bɔ é ná tuun nǔɖé lɛ́ dó ninɔmɛ e mɛ hǔn mǐtɔn ɖe é wú gbɔn é ɔ, mǐ sixú tuun lě do mǐ yí wǎn nú Mawu sɔ é gbɔn wǎnyíyí e mǐ ɖó nú mɛ ɖěvo lɛ́ é gbígbéjé kpɔ́n gblamɛ. Ényí mǐ ɖ’ayi wú ɖɔ wǎn e mǐ yí nú nǔɖitɔ́ hǎtɔ́ mǐtɔn lɛ́ é vɔ́ da ɖo ali ɖé nu hǔn, xlɛ́xlɛ́ wɛ é ɖe ɖɔ wǎn e mǐ yí nú Mawu é lɔ ɖo da vɔ́ wɛ nɛ́. Amɔ̌, ényí mǐ nɔ ɖe wǎnyíyí xlɛ́ nǔɖitɔ́ hǎtɔ́ mǐtɔn lɛ́ hwɛhwɛ ɔ, énɛ́ nɔ xlɛ́ ɖɔ wǎn e mǐ yí nú Mawu é gɔ́ngɔ́n.

6. Ényí wǎnyíyí e mǐ ɖó nú nɔví mǐtɔn lɛ́ é jɛ da vɔ́ jí ɔ, aniwú é ka ɖó ná ɖu ayi mɛ nú mǐ? (1 Jaan 4:7-9, 11)

⁶ Ényí wǎn e mǐ yí nú nɔví mǐtɔn lɛ́ é jɛ da vɔ́ jí hǔn, awǒvinú wɛ. Aniwú? Ðó ganjíninɔ mǐtɔn ɖo gbigbɔ lixo wɛ ɖo axɔ́ nu mɔ̌ nɛ́. Mɛsɛ́dó Jaan ɖe énɛ́ xlɛ́ nyi wɛn ɖo nǔ élɔ́ e é flín mǐ é mɛ: “Mɛ e ma yí wǎn nú nɔví tɔn e mɔ wɛ é ɖe é ǎ é sixú yí wǎn nú Mawu e é ma nɔ mɔ ǎ é ǎ.” (1 Jaan 4:20) Étɛ́ ka nyí nǔkplɔ́nmɛ ɔ? Wǎn jɛ́n mǐ ná to “yí . . . nú mǐɖée lɛ́” hwɛ̌ cóbɔ nǔ mǐtɔn ná nyɔ́ Jexóva nukúnmɛ.—Xa 1 Jaan 4:7-9, 11.

NƐ̌ MǏ KA NƆ ÐE WǍNYÍYÍ XLƐ́ MǏÐÉE LƐ́ GBƆN?

7-8. Ðɔ ali e nu mǐ sixú ɖe wǎnyíyí xlɛ́ mǐɖée lɛ́ ɖe é ɖé lɛ́.

⁷ Azɔn mɔ̌kpán wɛ è ɖe gbe élɔ́ nú mǐ ɖo Xó Mawu tɔn mɛ: “Mi ní yí wǎn nú miɖée lɛ́.” (Jaan 15:12, 17; Hlɔ̌. 13:8; 1 Tɛ. 4:9; 1 Pi. 1:22; 1 Jaan 4:11) Amɔ̌, wǎnyíyí ɔ, jijɔ ɖé wɛ bo ɖo ayi mǐtɔn mɛ, gbɛtɔ́ ɖěbǔ ka sixú mɔ nǔ jɛ ayi mǐtɔn mɛ ǎ. Énɛ́ wú ɔ, nɛ̌ mǐ ka sixú ɖe wǎnyíyí xlɛ́ nɔví mǐtɔn lɛ́ gbɔn? Mǐ sixú wa mɔ̌ gbɔn xó kpó nǔwiwa kpó mǐtɔn lɛ́ gblamɛ.

⁸ Ali gěgé nu wɛ mǐ sixú ɖe xlɛ́ nɔví mǐtɔn lɛ́ ɖɔ mǐ yí wǎn nú yě ɖe. Ðé lɛ́ ɖíe: “Mɛ ɖokpó ɖokpó ní nɔ ɖɔ nǔgbó nú nɔzo tɔn.” (Zak. 8:16) “Mi nɔ nɔ fífá mɛ xá miɖée lɛ́.” (Mak. 9:50) Mi ní nɔ jɛ nukɔn “bo nɔ wlí yɛ̌yi nú miɖée lɛ́.” (Hlɔ̌. 12:10) “Mi ní nɔ yí miɖée lɛ́.” (Hlɔ̌. 15:7) “Mi ní nɔ . . . sɔ́ hwɛ kɛ miɖée lɛ́.” (Koló. 3:13) “Mi ní nɔ hɛn wǔvɛ́gban mitɔn lɛ́ xá miɖée lɛ́.” (Ga. 6:2) “Mi ní . . . nɔ ɖo gbɔ dó nú miɖée lɛ́ wɛ.” (1 Tɛ. 4:18) “Mi ní nɔ . . . bló bónú mi ní lí dǒ.” (1 Tɛ. 5:11) “Mi . . . nɔ xo ɖɛ nú miɖée lɛ́.”—Ja. 5:16.

9. Aniwú gbɔ dídó nú mɛ ɖěvo lɛ́ ka nyí ali e nu mǐ sixú ɖe wǎnyíyí xlɛ́ yě ɖe é tají ɖokpó? (Lɛ̌ kpɔ́n fɔtóo ɔ.)

⁹ Mi nú mǐ ní gbéjé ali e nu mǐ sixú ɖe wǎnyíyí xlɛ́ mɛ ɖěvo lɛ́ ɖe é ɖokpó kpɔ́n. Pɔ́lu ɖɔ: “Mi ní . . . nɔ ɖo gbɔ dó nú miɖée lɛ́ wɛ.” Étɛ́wú gbɔ e mǐ nɔ dó nú mɛ ɖěvo lɛ́ é ka nyí xlɛ̌ wǎnyíyí e mǐ ɖó nú yě é tɔn tají ɖokpó? Sɔgbe xá wěma alɔdlɛ́ndónǔ tɔn Biblu tɔn ɖé ɔ, xókwín e Pɔ́lu zán bɔ é nyí “gbɔ” é sín tínmɛ wɛ nyí “è ní nɔ te ɖo mɛɖé kpá, bo dó wǔsyɛ́n lanmɛ n’i hwenu e é ɖo ninɔmɛ syɛ́nsyɛ́n ɖé mɛ gbɔn dín wɛ é.” Nǔgbó ɔ, ényí mǐ nɔ dó gbɔ nú nǔɖitɔ́ hǎtɔ́ mǐtɔn e ɖo wǔvɛ́ mɛ é ɖé hǔn, alɔ dó è wɛ mǐ ɖe bónú é ná mɔ éɖée mɛ, lobo lɛ́ kpo ɖo gbɛ li ɔ jí nɛ́. Hweɖébǔnu e mǐ d’alɔ nɔví súnnu, alǒ nɔví nyɔ̌nu e ɖo xó sú dó byɔ́ alɔdó wɛ é ɖé é ɔ, wǎnyíyí e mǐ ɖó nú nǔɖitɔ́ hǎtɔ́ énɛ́ é ɖe xlɛ́ wɛ mǐ ɖe gbɔn mɔ̌ nɛ́.—2 Kɔ. 7:6, 7, 13.

10. Kancícá tɛ́ ka ɖo wǔvɛ́sexámɛ kpó gbɔdónúmɛ kpó tɛ́ntin?

¹⁰ Wǔvɛ́sexámɛ kpó gbɔdónúmɛ kpó cá kan tawun. Ðo ali tɛ́ nu? Wǔvɛ́sexámɛ nɔ sísɛ́ mɛɖé bɔ é nɔ dó gbɔ nú mɛ ɖěvo lɛ́, lobo nɔ tɛ́n kpɔ́n bo nɔ ɖe nǔ e ɖo wǔvɛ́ ɖó nú yě wɛ é síin. Hǔn, wǔvɛ́sexámɛ wɛ nɔ sísɛ́ mǐ jɛ nukɔn, bɔ énɛ́ gúdo ɔ, mǐ nɔ wá dó gbɔ nú mɛ ɖěvo lɛ́. Ð’ayi lěe Pɔ́lu cá wǔvɛ́sexámɛ Jexóva tɔn kpó gbɔ e É nɔ dó nú mɛ é kpó ɖó kpɔ́ gbɔn é wú. Pɔ́lu ɖɔ dó Jexóva wú ɖɔ é nyí “Tɔ́ e nɔ kú nǔbláwǔ ɖaxó nú mɛ é, bo lɛ́ nyí Mawu e nɔ dó gbɔ nú mɛ ɖo ali bǐ nu é.” (2 Kɔ. 1:3) Biblu nǔkplɔ́nkplɔ́n tɔn ɖé tínmɛ wěmafɔ énɛ́, bo ɖɔ ɖɔ Pɔ́lu zán xógbe “nǔbláwǔ ɖaxó” ɔ dó dó gesí wǔvɛ́ e Jexóva nɔ se xá mɛ ɖěvo lɛ́ é. Nǔgbó ɔ, “è ylɔ́ Mawu ɖɔ Tɔ́, alǒ Jɔtɛn nǔbláwǔ ɖaxó tɔn, ɖó é nɔ se wǔvɛ́ xá mɛ ɖěvo lɛ́ tawun wútu.” Gɔ́ ná ɔ, wǔvɛ́sexámɛ tɔn nɔ sísɛ́ ɛ bɔ é nɔ dó gbɔ nú “mǐ ɖo mɛtɛ́nkpɔ́n mǐtɔn lɛ́ bǐ mɛ.” (2 Kɔ. 1:4) Lěe sin zinzin e nɔ sa sín tɔjɔtɛn ɖé mɛ é nɔ fá kɔ nú mɛ ɖěɖěe kɔ xú lɛ́ é gbɔn é ɔ, mɔ̌ wɛ Jexóva nɔ fá kɔ nú mɛ ɖěɖěe ɖo wǔvɛ́ mɛ gbɔn wɛ lɛ́ é, bo nɔ lɛ́ dó gbɔ nú yě gbɔn. Nɛ̌ mǐ ka sixú xwedó kpɔ́ndéwú Jexóva tɔn, bo nɔ se wǔvɛ́ xá mɛ ɖěvo lɛ́, lobo nɔ lɛ́ dó gbɔ nú yě gbɔn? Ali e nu mǐ sixú wa mɔ̌ ɖe é ɖokpó wɛ nyí ɖɔ, mǐ ná tɛ́n kpɔ́n bo ɖó jijɔ ɖěɖěe ná d’alɔ mǐ bɔ mǐ ná nɔ se wǔvɛ́ xá mɛ ɖěvo lɛ́, lobo lɛ́ dó gbɔ nú yě lɛ́ é. Jijɔ tɛ́ lɛ́ mɔ̌ ka wɛ?

11. Sɔgbe xá Kolósinu lɛ́ 3:12 kpó 1 Piyɛ́ɛ 3:8 kpó ɔ, jijɔ ɖěvo tɛ́ lɛ́ mǐ ka ɖó ná tɛ́n kpɔ́n bo ɖó, bá dó kpo ɖo wǎnyíyí e nɔ sísɛ́ mɛ bɔ è nɔ dó gbɔ nú mɛ ɖěvo lɛ́ é ɖó wɛ?

¹¹ Étɛ́ ka ná d’alɔ mǐ bɔ mǐ ná kpo ɖo wǎnyíyí e sín hudó mǐ ɖó, bo ná “nɔ ɖo gbɔ dó nú [mǐɖée] lɛ́” gbe bǐ gbe é ɖó wɛ? É byɔ́ ɖɔ mǐ ní tɛ́n kpɔ́n bo ɖó jijɔ élɔ́ lɛ́: wǔvɛ́sexámɛ, wǎnyíyí nɔví nɔví tɔn kpó xomɛnyínyɔ́ kpó. (Xa Kolósinu lɛ́ 3:12; 1 Piyɛ́ɛ 3:8.) Nɛ̌ jijɔ énɛ́ lɛ́ ka ná d’alɔ mǐ gbɔn? Ényí mǐ se wǔvɛ́ xá nɔví mǐtɔn lɛ́, bɔ nǔ yětɔn nɔ lɛ́ ɖu ayi mɛ nú mǐ nǔgbó nǔgbó ɔ, mǐ ná ba vɛ́návɛ́ná bo ná dó gbɔ nú yě hwenu e yě ɖo wǔvɛ́ mɛ é. Lěe Jezu ɖɔ gbɔn é ɔ, “nǔ e gɔ́ ayi mɛ é wɛ nu nɔ ɖɔ tɔ́n. Gbɛtɔ́ ɖagbe ɔ, nǔ ɖagbe lɛ́ wɛ é nɔ ɖɔ, ɖó nǔ ɖagbe lɛ́ wɛ gɔ́ ayi tɔn mɛ.” (Mat. 12:34, 35) Ali tají e nu mǐ sixú ɖe xlɛ́ nɔví mǐtɔn lɛ́ ɖɔ mǐ yí wǎn nú yě ɖe é ɖokpó wɛ nyí ɖɔ mǐ ná nɔ dó gbɔ nú yě.

NƐ̌ MǏ KA SIXÚ BLÓ GBƆN BƆ WǍNYÍYÍ E MǏ ÐÓ NÚ MǏÐÉE LƐ́ É NÁ KPO ÐO JIJƐJÍ WƐ?

12. (a) Étɛ́wú é ka byɔ́ ɖɔ mǐ ní kpo ɖo acéjí nɔ wɛ? (b) Nǔkanbyɔ́ tɛ́ jí mǐ ka ná ɖɔ xó dó din?

¹² Mǐ bǐ wɛ ba bo ná nɔ “yí wǎn nú mǐɖée lɛ́.” (1 Jaan 4:7) Amɔ̌, é ɖo tají tawun ɖɔ mǐ ní flín ɖɔ Jezu gba akpá nú mǐ ɖɔ “wǎnyíyí mɛ gěgé tɔn ná fá.” (Mat. 24:12) É nyí ɖiɖɔ wɛ Jezu ɖe ɖɔ ahwanvú émítɔn lɛ́ gěgé ná gɔn wǎn yí nú yěɖée lɛ́ ǎ. Amɔ̌, mǐ ɖó ná ɖo acéjí bɔ wǎnyíyí e mɛ e lɛ́ lɛ̌ dó mǐ lɛ́ é ma ɖó ǎ é ná wa nǔ dó mǐ wú ǎ. Énɛ́ ní ɖo ayi mɛ nú mǐ bónú mǐ ní ba xósin nú nǔkanbyɔ́ tají élɔ́: Étɛ́ ka ná d’alɔ mǐ bɔ mǐ ná tuun nú wǎnyíyí e mǐ ɖó nú nɔví mǐtɔn lɛ́ é gɔ́ngɔ́n, alǒ gbɔ?

13. Étɛ́ lɛ́ ka sixú tɛ́n wǎnyíyí mǐtɔn kpɔ́n?

¹³ Nǔ e sixú d’alɔ mǐ é ɖokpó wɛ nyí ɖɔ mǐ ní gbéjé lěe mǐ nɔ wa nǔ gbɔn ɖo ninɔmɛ ɖé lɛ́ mɛ é kpɔ́n. (2 Kɔ. 8:8) Mɛsɛ́dó Piyɛ́ɛ ɖɔ xó dó ninɔmɛ énɛ́ lɛ́ ɖokpó wú, é ɖɔ: “Tají bǐ ɔ, mi ɖó wǎnyíyí e gɔ́ngɔ́n é nú miɖée lɛ́, ɖó wǎnyíyí nɔ cyɔ́n nǔ dó hwɛ wɔ̌búwɔ́bú.” (1 Pi. 4:8) Hǔn, gǎnmaɖó kpó nǔwanyido kpó mɛ ɖěvo lɛ́ tɔn sixú tɛ́n wǎnyíyí mǐtɔn kpɔ́n.

14. Sɔgbe xá 1 Piyɛ́ɛ 4:8 ɔ, wǎnyíyí alɔkpa tɛ́ é ka byɔ́ ɖɔ mǐ ní ɖó? Jlɛ̌ dó nǔɖé wú.

¹⁴ Mi nú mǐ ní lin tamɛ dó xó Piyɛ́ɛ tɔn lɛ́ jí kpó sɔxwixwe kpó. Akpáxwé nukɔntɔn wěmafɔ 8gɔ́ ɔ tɔn ɖɔ xó dó wǎnyíyí alɔkpa e mǐ ɖó ná ɖó é wú, é wɛ nyí “wǎnyíyí e gɔ́ngɔ́n é.” Xókwín e Piyɛ́ɛ zán, bɔ è tínmɛ bɔ é nyí “gɔ́ngɔ́n” é sín blǔju wɛ nyí “è bló bɔ é d’agba.” Akpáxwé wegɔ́ wěmafɔ ɔ tɔn ɖɔ xó dó le e nɔ tɔ́n sín wǎnyíyí e gɔ́ngɔ́n é mɔ̌hun mɛ é wú. É nɔ cyɔ́n nǔ dó hwɛ nɔví mǐtɔn lɛ́ tɔn. Mǐ sixú jlɛ́ dó nǔ élɔ́ wú: Mǐ hɛn wǎnyíyí mǐtɔn alɔ we, cí nǔ ɖɔ avɔ gblogblo ɖé wɛ ɖo alɔ mǐtɔn mɛ, bɔ mǐ ɖo vlɔ̌nvlɔ́n wɛ, bo ɖo vlɔ̌nvlɔ́n wɛ káká bɔ é cyɔ́n nǔ dó hwɛ nɔví mǐtɔn lɛ́ tɔn, é nyí ɖokpó ǎ, é ka nyí we ǎ, loɔ, “wɔ̌búwɔ́bú” ɖɔhun. Ényí è ɖɔ è cyɔ́n nǔ dó hwɛ ɔ, ɖiɖɔ wɛ è ɖe ɖɔ è sɔ́ kɛ mɛ. Lěe avɔ ɖé sixú bú nǔ dó blɔ̌ e ɖo mɛ ɖěvo lɛ́ wú é gbɔn é ɔ, mɔ̌ wɛ wǎnyíyí e gɔ́ngɔ́n é sixú cyɔ́n nǔ dó gǎnmaɖó kpó nǔwanyido kpó nɔví lɛ́ tɔn gbɔn.

15. Ényí wǎnyíyí e mǐ ɖó nú nɔví mǐtɔn lɛ́ é lí dǒ ganjí ɔ, étɛ́ wú mǐ ka ná kpé bá wa? (Kolósinu lɛ́ 3:13)

¹⁵ Wǎnyíyí e mǐ ná ɖó nú nɔví mǐtɔn lɛ́ é ɖó ná syɛ́n tawun, bo sixú zɔ́n bɔ mǐ ná sɔ́ nǔ e yě nɔ wa nyi do nú mǐ lɛ́ é kɛ yě, ényí é ná bo tlɛ vɛ́ wǔ tawun ɔ nɛ́. (Xa Kolósinu lɛ́ 3:13.) Ényí mǐ nɔ kpé wú bo nɔ sɔ́ hwɛ kɛ mɛ ɖěvo lɛ́ hǔn, xlɛ́xlɛ́ wɛ mǐ ɖe ɖɔ wǎnyíyí e mǐ ɖó nú yě é gɔ́ngɔ́n, bɔ mǐ ba ná nyɔ́ Jexóva nukúnmɛ. Nǔ ɖěvo tɛ́ ka sixú d’alɔ mǐ bɔ mǐ ná nɔ sɔ́ hwɛ kɛ mɛ ɖěvo lɛ́, bo ma ná nɔ yá wǔ sin xomɛ ɖó nǔ e yě wa lɛ́ é wú ǎ?

16-17. Nǔ ɖěvo tɛ́ ka ná d’alɔ mǐ bɔ mǐ ná mɔ nǔ zɛ do kléwún kléwún e mɛ ɖěvo lɛ́ nɔ jɛ nú mǐ é wú? Jlɛ̌ dó nǔɖé wú. (Lɛ̌ kpɔ́n fɔtóo ɔ.)

¹⁶ Nɔ sɔ́ ayi ɖó jijɔ ɖagbe nɔví towe lɛ́ tɔn jí, é ní ma nyí ɖó nǔwanyido yětɔn lɛ́ jí ó. Ðǒ ayi nǔjlɛ́dónǔwú élɔ́ wú. Dǒ nukún mɛ kpɔ́n ɖɔ a ɖo kpɔ́ xá nɔví súnnu kpó nɔví nyɔ̌nu kpó ɖé lɛ́. Mi ɖu hwenu ɖaaɖagbe ɖé sín vǐví, bɔ ɖo vivɔnu ɔ, a ɖe fɔtóo nú nɔví lɛ́. Nǔgbó ɔ, a lɛ́ ɖe fɔtóo we ɖěvo lɛ́ gɔ́ ná, ɖó nukɔntɔn ɔ sixú gɔn nyǐnyɔ́. Din ɔ, a ɖó fɔtóo atɔn. Amɔ̌, ɖokpó ɖ’é mɛ bɔ a ɖ’ayi wú ɖɔ nɔví súnnu ɖokpó kún ɖo nǔ ko wɛ ó. Étɛ́ a ka ná wa nú fɔtóo énɛ́? A ná súnsún, ɖó a ɖó we ɖěvo lɛ́, éé mɛ mɛ e ɖo gbɛ̌ta ɔ mɛ lɛ́ é bǐ, káká jɛ nɔví súnnu énɛ́ jí ɖo nǔ ko ɖe wɛ é.

¹⁷ Mǐ ní jlɛ́ fɔtóo énɛ́ lɛ́ dó nǔ e mǐ nɔ flín lɛ́ é wú. Hwɛhwɛ wɛ mǐ nɔ flín hwenu ɖagbe e mǐ kpó nɔví lɛ́ kpó zán ɖó kpɔ́ lɛ́ é. Amɔ̌, mǐ ní ɖɔ ɖɔ ɖo ninɔmɛ énɛ́ lɛ́ ɖokpó mɛ ɔ, nɔví súnnu, alǒ nɔví nyɔ̌nu ɖokpó ɖɔ nǔɖé, kabǐ wa nǔɖé bɔ é kún ɖe xomɛnyínyɔ́ xlɛ́ ó. Étɛ́ mǐ ka ɖó ná wa nú nǔ énɛ́ e mǐ nɔ flín é? Mǐ ɖó ná tɛ́n kpɔ́n bo wɔn, lěe mǐ ɖó ná súnsún fɔtóo énɛ́ lɛ́ ɖokpó gbɔn é ɖɔhun. (Nǔx. 19:11; Efɛ́. 4:32) Mǐ sixú tɛ́n kpɔ́n bo wɔn agɔ kléwún énɛ́ e nǔɖitɔ́ hǎtɔ́ mǐtɔn jɛ dó mǐ é, ɖó hwenu ɖagbe e sín vǐví mǐ ɖu ɖó kpɔ́ xá ɛ lɛ́ é gěgé ɖo fínɛ́. Nǔ mɔ̌hun lɛ́ wɛ mǐ ba bo ná nɔ flín, lobo lɛ́ wlíbo ná.

NǓ E WÚ È ÐÓ WǍNYÍYÍ SÍN HUDÓ TAWUN ÉGBÉ É

18. Nǔ tají tɛ́ lɛ́ mǐ ka kplɔ́n dó wǎnyíyí wú ɖo xóta élɔ́ mɛ?

¹⁸ Étɛ́wú mǐ ka ba ná bló bɔ wǎn e mǐ yí nú mǐɖée é ná kpo ɖo jijɛjí wɛ? Lěe mǐ mɔ gbɔn é ɔ, ényí mǐ nɔ ɖe wǎnyíyí xlɛ́ nɔví mǐtɔn lɛ́ hǔn, wǎnyíyí ɖe xlɛ́ Jexóva wɛ mǐ ɖe nɛ́. Nɛ̌ mǐ ka nɔ ɖe xlɛ́ nǔɖitɔ́ hǎtɔ́ mǐtɔn lɛ́ ɖɔ mǐ yí wǎn nú yě gbɔn? Ali e nu mǐ nɔ wa mɔ̌ ɖe é ɖokpó wɛ nyí gbɔ e mǐ nɔ dó nú yě é. Ényí mǐ nɔ se wǔvɛ́ xá mɛ ɖěvo lɛ́ ɔ, mǐ ná kpé wú, bo ná ‘nɔ ɖo gbɔ dó nú mǐɖée lɛ́ wɛ.’ Nɛ̌ mǐ ka sixú bló gbɔn bɔ wǎnyíyí e mǐ ɖó nú mǐɖée lɛ́ é ná fɔ́n bo ɖo jijɛjí wɛ? Mǐ ná nɔ wa nǔ e wú mǐ kpé é bǐ, bo ná nɔ sɔ́ hwɛ kɛ mɛ ɖěvo lɛ́.

19. Étɛ́wú wǎnyíyí ɖiɖexlɛ́ mǐɖée lɛ́ ka ɖo tají tawun égbé?

¹⁹ Étɛ́wú é ka ɖo tají tawun égbé ɖɔ mǐ ní nɔ ɖe wǎnyíyí xlɛ́ mǐɖée lɛ́? Ð’ayi hwɛjijɔ e Piyɛ́ɛ ná é wú: “Vivɔnu nǔ lɛ́ bǐ tɔn ko sɛkpɔ́. Énɛ́ wú ɔ, . . . mi ɖó wǎnyíyí e gɔ́ngɔ́n é nú miɖée lɛ́.” (1 Pi. 4:7, 8) Ée vivɔnu gbɛ nyanya élɔ́ tɔn ɖo sisɛkpɔ́ wɛ é ɔ, étɛ́ mǐ ka sixú ɖó nukún? Jezu ɖɔ xó élɔ́ ɖ’ayǐ dó ahwanvú tɔn lɛ́ wú: “Akɔta lɛ́ bǐ ná gbɛ́ wǎn nú mi ɖó nyǐkɔ ce wú.” (Mat. 24:9) Bo ná dó dɛ ɖo wǎngbɛ́númɛ mɔ̌hun nu ɔ, é byɔ́ ɖɔ mǐ ní kpo ɖo bǔ. Ényí mǐ nɔ wa mɔ̌ ɔ, gǎn e dó wɛ Satáan ɖe bo ná klán mǐ é ná kpa ɛ ǎ, ɖó wǎnyíyí “nɔ dɔn mɛ lɛ́ bǐ ɖó bǔ ganjí.”—Koló. 3:14; Filí 2:1, 2.