Ŋshɔ Tsuru Lɛ Foo

KWƐMƆ nɔ ni yaa nɔ lɛ! Mose ni, ni ekpã etso lɛ mli yɛ Ŋshɔ Tsuru lɛ nɔ. Mɛi ni fata ehe ni amɛyɔɔ shweshweeshwe yɛ afãgbɛ lɛ ji Israelbii lɛ. Shi Farao kɛ etai lɛ fɛɛ miimii nu yɛ ŋshɔ lɛ mli. Nyɛhaa wɔkwɛa bɔ ni fee ni eba lɛ nakai.

Taakɛ wɔkase lɛ, beni Nyɔŋmɔ kɛ haomɔ ni ji 10 lɛ ba Mizraimbii lɛ anɔ lɛ, Farao kɛɛ Israelbii lɛ ni amɛshi Mizraim. Israelbii ni tee lɛ ayifalɛ aaafee hii 600,000, kɛ yei kɛ gbekɛbii babaoo hu. Agbɛnɛ hu, mɛi krokomɛi babaoo, ni ebatsɔmɔ mɛi ni heɔ Yehowa amɛyeɔ lɛ hu fata Israelbii lɛ ahe kɛtee. Amɛ fɛɛ amɛloo amɛtooi kɛ amɛtsinai kɛtee.

Dani amɛbaaya lɛ, Israelbii lɛ bi Mizraimbii lɛ ni amɛha amɛ atadei kɛ nibii ni akɛ shika kɛ jwiɛtɛi efee lɛ eko. Mizraimbii lɛ miishe gbeyei waa yɛ naagbee haomɔ ni ba amɛnɔ lɛ hewɔ. No hewɔ lɛ amɛha Israelbii lɛ nɔ fɛɛ nɔ ni amɛbi amɛ lɛ.

Gbii fioo komɛi asɛɛ lɛ Israelbii lɛ bashɛ Ŋshɔ Tsuru lɛ he. Amɛjɔɔ amɛhe yɛ jɛmɛ. Yɛ nakai be lɛ mli lɛ, ebɔi Farao kɛ emaŋbii lɛ dɔɔ akɛ amɛha Israelbii lɛ etee. Amɛkɛɛ akɛ: ‘Wɔha wɔnyɔji lɛ etee!’

No hewɔ lɛ Farao tsake ejwɛŋmɔ shikome ekoŋŋ. Efee oya ni eha eta shwiili kɛ etabilɔi lɛ fɛɛ saa amɛhe. Kɛkɛ ni amɛkɛ shwiilii krɛdɛɛi 600, kɛ Mizraim shwiilii krokomɛi fɛɛ nyiɛ Israelbii lɛ asɛɛ.

Beni Israelbii lɛ na akɛ Farao kɛ ewebii lɛ nyiɛ amɛsɛɛ kɛmiiba lɛ, amɛshe gbeyei waa. He ko bɛ ni amɛbaajo foi kɛtsɔ. Ŋshɔ Tsuru lɛ yɛ amɛhiɛ gbɛ, ni Mizraimbii lɛ hu ejɛ he kroko ni ji amɛsɛɛgbɛ kɛmiiba. Shi Yehowa kɛ atatu fo ewebii lɛ kɛ Mizraimbii lɛ ateŋ. No hewɔ lɛ Mizraimbii lɛ enaaa Israelbii lɛ koni amɛtutua amɛ.

Kɛkɛ ni Yehowa kɛɛ Mose koni ekpã etso lɛ mli yɛ Ŋshɔ Tsuru lɛ nɔ. Beni efee nakai lɛ, Yehowa ha kɔɔyɔɔ ko ni naa wa waa tswa kɛjɛ bokagbɛ. Ŋshɔ lɛ mli nui lɛ amli gba enyɔ, ni nui lɛ wa edamɔ shi yɛ biɛ kɛ biɛ!

Kɛkɛ ni Israelbii lɛ nyiɛ shikpɔŋ gbiŋ nɔ kɛtsɔ ŋshɔ lɛ teŋ. Eye ŋmɛlɛtswai babaoo dani mɛi akpekpei abɔ lɛ fɛɛ kɛ amɛkooloi lɛ fɛɛ tsɔ ŋshɔ lɛ mli kɛyaje esɛɛ yɛ afã kroko lɛ shweshweeshwe. Yɛ naagbee lɛ, Mizraimbii lɛ na Israelbii lɛ ekoŋŋ. Amɛnyɔji lɛ miiya! No hewɔ lɛ amɛjo foi kɛbote ŋshɔ lɛ mli kɛnyiɛ amɛsɛɛ.

Beni amɛfee nakai lɛ, Nyɔŋmɔ ha amɛshwiilii lɛ anaji lɛ bɔi kpɔlɔmɔ. Mizraimbii lɛ atsui fã waa ni amɛbɔi bolɔmɔ akɛ: ‘Yehowa miiwu eeshi wɔ kɛmiiha Israelbii lɛ. Nyɛhaa wɔkua wɔsɛɛ kɛjɛa biɛ.’ Shi no mli lɛ ekpe sɛɛ tsɔ̃.

Nɛkɛ be nɛɛ mli ni Yehowa kɛɛ Mose akɛ ekpã etso lɛ mli yɛ Ŋshɔ Tsuru lɛ nɔ, tamɔ bɔ ni ona yɛ mfoniri lɛ mli lɛ. Ni beni Mose fee nakai lɛ, nui ni damɔ shi tamɔ gbogboi lɛ ku amɛsɛɛ ni amɛbaha Mizraimbii lɛ kɛ amɛshwiilii lɛ fɛɛ anɔ. Amɛtai lɛ fɛɛ enyiɛ Israelbii lɛ asɛɛ kɛtee ŋshɔ lɛ mli. Ni Mizraimbii lɛ ateŋ mɔ kome folo po ejeee mli ni ehiɛ kã!

Kwɛ bɔ ni Nyɔŋmɔ webii lɛ fɛɛ na miishɛɛ amɛha, akɛ ahere amɛ yiwala! Hii lɛ la shidaa lala ko amɛha Yehowa, ni amɛkɛɛ: ‘Yehowa eye kunim ni ewo ehiɛ nyam. Eloo okpɔŋɔi lɛ kɛ amɛ nɔtaralɔi lɛ fɛɛ ewo ŋshɔ lɛ mli.’ Ni Mose nyɛmi yoo Miriam kɔ akasha lɛ ehiɛ edɛ, ni yei ni eshwɛ lɛ fɛɛ kɔlɔ amɛkashai lɛ kɛnyiɛ esɛɛ. Ni beni amɛkɛ miishɛɛ miijo lɛ, belɛ amɛmiila lala ni hii lɛ laa lɛ nɔŋŋ, akɛ: ‘Yehowa eye kunim ni ewo ehiɛ nyam. Eloo okpɔŋɔi lɛ kɛ amɛnɔtaralɔi lɛ fɛɛ ewo ŋshɔ lɛ mli.’