Nikasemɔ 10

Nifeemɔi ni Nyɔŋmɔ Nyɛ̃ɛɔ

Te esa akɛ onu nibii ni Nyɔŋmɔ kɛɔ akɛ ehiii lɛ ahe oha tɛŋŋ? (1)

Mɛɛ bɔlɛnamɔ mli jeŋbai nɛkɛ ehiii? (2)

Te esa akɛ Kristofonyo abu amale (3) asɔshwɛmɔ (3) juu (3) yiwalɛ (4) mumɔi atsɛmɔ (5) dãatɔɔ eha tɛŋŋ? (6)

Te mɔ ko aaafee tɛŋŋ atsi ehe kwraa kɛjɛ subaŋi gbohii nɛɛ ahe? (7)

1. Nyɔŋmɔ tsuji sumɔɔ ekpakpa feemɔ. Shi esa akɛ amɛnyɛ efɔŋ hu. (Lala 97:10) No tsɔɔ nifeemɔi komɛi ni Nyɔŋmɔ nyɛɛɔ lɛ ni aaakwa. Mɛni ji nakai nifeemɔi lɛ ekomɛi?

2. Ajwamaŋbɔɔ: Bɔlɛnamɔ ni tsɔɔ gbalashihilɛ hiɛ, gbalafitemɔ, gbɔmɔ kɛ kooloo teŋ bɔlɛnamɔ, bɔlɛnamɔ ni yaa nɔ yɛ wekumɛi ni bɛŋkɛ kpaakpa ateŋ, kɛ nuu ni kɛ nuu feɔ yakayaka nii lɛ fɛɛ ji esha ni hiɛdɔɔ yɔɔ mli ni afeɔ ashiɔ Nyɔŋmɔ. (3 Mose 18:6; Rom. 1:26, 27; 1 Kor. 6:9, 10) Kɛ mɛi enyɔ boteko gbalashihilɛ mli shi amɛhiɔ shi yɛ he kome lɛ, esa akɛ amɛgbala mli loo kɛ jeee nakai lɛ amɛbote gbalashihilɛ mli yɛ mla naa.—Heb. 13:4.

3. Amale, Asɔshwɛmɔ, Juu: Yehowa Nyɔŋmɔ nyɛŋ emale. (Tito 1:2) Esa akɛ mɛi ni sumɔɔ ni ekpɛlɛ amɛnɔ lɛ akwa amale. (Abɛi 6:16-19; Kol. 3:9, 10) Hiɛkɔ̃ɔ kpɛtɛ asɔshwɛmɔi sɔrɔtoi fɛɛ he. No hewɔ lɛ Kristofoi kɛ amɛhe wooo asɔshwɛmɔi sɔrɔtoi fɛɛ mli, tamɔ loto-tsemɔi, okpɔŋɔi afoidamɔ, kɛ bingo. (Efe. 5:3-5) Ni Kristofoi ejuuu. Amɛheee juu nii yɛ be mli ni amɛle, loo ni amɛaakɔlɔ nibii beni ahako amɛ hegbɛ.—2 Mose 20:15; Efe. 4:28.

4. Mlifu ni Naa Wa, Yiwalɛ: Mlifu ni anyɛɛɛ aye nɔ lɛ baanyɛ ekɛ yiwalɛ aba. (1 Mose 4:5-8) Mɔ ni mli woɔ la waa lɛ nyɛŋ afee Nyɔŋmɔ naanyo. (Lala 11:5; Abɛi 22:24, 25) Ehiii akɛ aaatɔ owele loo ni akɛ efɔŋ aaato nifɔjianii ni mɛi krokomɛi aaafee wɔ lɛ najiaŋ.—Abɛi 24:29; Rom. 12:17-21.

5. Klamɔi kɛ Mumɔi Atsɛmɔ: Mɛi komɛi biɔ mumɔi lɛ adɛŋ hewalɛ koni amɛbɔ mɔdɛŋ amɛkɛtsa helai. Mɛi krokomɛi hu kɛ mumɔ fɔji ahewalɛ tsuɔ nii koni amɛkɛha amɛhenyɛlɔi ahe aye loo ni amɛgbe amɛ po. Hewalɛ ni yɔɔ nifeemɔi nɛɛ fɛɛ asɛɛ ji Satan. No hewɔ lɛ esaaa akɛ Kristofoi kɛ amɛhe woɔ enɛ mli. (5 Mose 18:9-13) Yehowa ni aaahi emasɛi lɛ ji hebuu ni fe fɛɛ kɛmiijɛ mumɔi fɔji ahewalɛ ni mɛi krokomɛi baanyɛ amɛkɛshi wɔ lɛ he.—Abɛi 18:10.

6. Daatɔɔ: Ejeee tɔ̃mɔ akɛ aaanu wein, beer, loo dãa ni wa fioo. (Lala 104:15; 1 Tim. 5:23) Shi daanumɔ babaoo kɛ daatɔɔ ji efɔŋ yɛ Nyɔŋmɔ hiɛ. (1 Kor. 5:11-13; 1 Tim. 3:8) Dãa ni anuɔ babaoo fe nine lɛ baanyɛ aye ohewalɛnamɔ awui ni ebaanyɛ efite oweku lɛ. Ebaanyɛ eha okɛ ohe awo kaai krokomɛi amli oya.—Abɛi 23:20, 21, 29-35.

7. Mɛi ni feɔ nibii ni Nyɔŋmɔ kɛɔ akɛ ehiii lɛ, “amɛnine shɛŋ Nyɔŋmɔ maŋtsɛyeli lɛ nɔ.” (Gal. 5:19-21) Kɛ osumɔɔ Nyɔŋmɔ lɛlɛŋ ni oosumɔ ni osa ehiɛ lɛ, obaanyɛ oye ohe kwraa kɛjɛ nifeemɔi nɛɛ ahe. (1 Yoh. 5:3) Ná nyɛ̃ɛ oha nɔ ni Nyɔŋmɔ kɛɔ akɛ ehiii lɛ. (Rom. 12:9) Okɛ mɛi ni yɔɔ Nyɔŋmɔ gbeyeishemɔ subaŋi abɔ. (Abɛi 13:20) Kristofoi ni edara yɛ mumɔŋ lɛ anaanyobɔɔ baanyɛ afee yelikɛbuamɔ jɛɛhe. (Yak. 5:14) Nɔ ni fe fɛɛ lɛ, okɛ ohe afɔ Nyɔŋmɔ yelikɛbuamɔ nɔ kɛtsɔ sɔlemɔ nɔ.—Fil. 4:6, 7, 13.

[Mfonirii ni yɔɔ baafa 20]

Nyɔŋmɔ nyɛ̃ɛɔ daatɔɔ, juu, asɔshwɛmɔ, kɛ yiwalɛ nifeemɔi