Nikasemɔ 11

Hemɔkɛyelii kɛ Kusumii ni Esaaa Nyɔŋmɔ Hiɛ

Mɛɛ hemɔkɛyelii kɛ kusumii nɛkɛ ehiii? (1)

Ani esa akɛ Kristofoi ahe aye akɛ Nyɔŋmɔ ji Triniti? (2)

Mɛni hewɔ anɔkwa Kristofoi yeee Blonya, Easter, loo fɔmɔgbii? (3, 4)

Ani gbohii baanyɛ aye hiɛkalɔi awui? (5) Krɔɔs nɔ Yesu gbo yɛ? (6) Te Nyɔŋmɔ hiɛ ni aaasa lɛ he hiaa ha tɛŋŋ? (7)

1. Jeee hemɔkɛyelii kɛ kusumii fɛɛ ehiii. Shi kɛ amɛjɛ apasa jamɔ mli loo eteɔ shi ewoɔ Biblia tsɔɔmɔi lɛ, Nyɔŋmɔ ekpɛlɛɛɛ nɔ.—Mat. 15:6.

2. Triniti: Ani Yehowa ji Triniti—mɛi etɛ ni efee Nyɔŋmɔ kome? Dabi! Yehowa, ni ji Tsɛ lɛ, ji “anɔkwa Nyɔŋmɔ kome lɛ.” (Yoh. 17:3; Mar. 12:29) Yesu ji E-kromɔ Bi, ni ebaa ehe shi ehaa Nyɔŋmɔ. (1 Kor. 11:3) Tsɛ lɛ nɔ kwɔ fe Bi lɛ. (Yoh. 14:28) Mumɔ krɔŋkrɔŋ lɛ jeee gbɔmɔ; Nyɔŋmɔ nifeemɔ hewalɛ ni.—1 Mose 1:2; Bɔf. 2:18.

3. Blonya kɛ Easter: Afɔɔɔ Yesu yɛ December 25. Afɔ lɛ aaafee October 1, afi lɛ mli be ni tookwɛlɔi kɛ amɛtookui jeɔ kpo gbɛkɛ. (Luka 2:8-12) Yesu wooo Kristofoi akita kɔkɔɔkɔ akɛ amɛye efɔmɔgbi. Shi moŋ, ekɛɛ ekaselɔi akɛ amɛkai egbele lɛ. (Luka 22:19, 20) Blonya kɛ emli kusumii lɛ jɛ blema apasa jamɔi amli. Nakai nɔŋŋ eji yɛ Easter kusumii ahe, tamɔ wuɔwɔji kɛ kpɛŋkpɛlɛi ni akɛtsuɔ nii lɛ. Mra be mli Kristofoi yeee Blonya loo Easter, asaŋ anɔkwa Kristofoi hu yeee ŋmɛnɛ.

4. Fɔmɔgbii: Mɛi ni ye fɔmɔgbii enyɔ pɛ ni Biblia lɛ wie he lɛ ji mɛi ni jaaa Yehowa. (1 Mose 40:20-22; Mar. 6:21, 22, 24-27) Mra be mli Kristofoi lɛ yeee fɔmɔgbii. Kusumii ni ji fɔmɔgbii ni ayeɔ jɛ blema apasa jamɔi amli. Anɔkwa Kristofoi keɔ nibii ni amɛjieɔ amɛhiɛtserɛ kutuu yɛ bei krokomɛi amli yɛ afi lɛ mli.

5. Gbohii lɛ Agbeyeishemɔ: Gbohii lɛ nyɛŋ afee nɔ ko loo ni amɛaanu nɔ ko he. Wɔnyɛŋ wɔye wɔbua amɛ, ni amɛnyɛŋ amɛye wɔ awui. (Lala 146:4; Jaj. 9:5, 10) Susuma gboɔ; ekãaa he ehiii shi yɛ gbele sɛɛ. (Ezek. 18:4) Shi bei komɛi lɛ ŋwɛibɔfoi fɔji, ni atsɛɔ amɛ daimonioi lɛ, kwaa amɛfeɔ amɛhe gbohii lɛ amumɔi. Kusumii fɛɛ ni kɔɔ gbohii lɛ agbeyeishemɔ loo amɛ jamɔ he lɛ ji efɔŋ.—Yes. 8:19.

6. Krɔɔs: Yesu gbooo yɛ krɔɔs nɔ. Egbo yɛ tso ni ma shi jaŋ nɔ. Hela wiemɔ ni atsɔɔ shishi akɛ “krɔɔs” yɛ Bibliai pii amli lɛ tsɔɔ mplaŋ kome kɛkɛ. Krɔɔs he okadi lɛ jɛ blema apasa jamɔi amli. Mra be mli Kristofoi kɛ krɔɔs lɛ tsuuu nii ni amɛjaaa hu. No hewɔ lɛ, ani osusuɔ akɛ ebaafee nɔ ni ja akɛ akɛ krɔɔs aaatsu nii yɛ jamɔ mli?—5 Mose 7:26; 1 Kor. 10:14.

7. Eeefee nɔ ni wa waa akɛ aaakpoo nɛkɛ hemɔkɛyelii kɛ kusumii nɛɛ ekomɛi. Ekolɛ wekumɛi kɛ nanemɛi baabɔ mɔdɛŋ akɔne oyiŋ ni okatsake ohemɔkɛyelii. Shi Nyɔŋmɔ hiɛ ni ooosa he miihia fe ni ooosa gbɔmɛi ahiɛ.—Abɛi 29:25; Mat. 10:36, 37.

[Mfonirii ni yɔɔ baafa 22]

Nyɔŋmɔ jeee Triniti ko

[Mfonirii ni yɔɔ baafa 23]

Blonya kɛ Easter jɛ blema apasa jamɔi amli

[Mfonirii ni yɔɔ baafa 23]

Yiŋtoo ko kwraa bɛ ni aaadamɔ nɔ aja gbohii lɛ loo ni ashe amɛ gbeyei