Ninefɔɔ ni Akɛmaa Sane Nɔ Mi kɛ Hiɛ Su

GBƆMƐI ni jɛ kusumii komɛi amli lɛ fɔ̃ɔ amɛniji kɛ maa sane nɔ mi babaoo fe mɛi ni jɛ hei krokomɛi. Ni kɛlɛ, kɛ wɔɔwie yɛ faŋŋ mli lɛ, kɛ́ mɔ fɛɛ mɔ miiwie lɛ, ehiɛ su tsakeɔ ni efɔ̃ɔ eniji yɛ gbɛ ko nɔ kɛmaa sane ko nɔ mi. Enɛ ji anɔkwale yɛ sanegbaa mli kɛ beni awieɔ yɛ mɛi ahiɛ.

Ninefɔɔ ni akɛmaa sane nɔ mi lɛ ji bɔɔsu kɛha Yesu kɛ emra be mli kaselɔi lɛ. Be ko lɛ, mɔ ko babɔ Yesu amaniɛ akɛ enyɛ kɛ enyɛmimɛi lɛ miitao ni amɛkɛ lɛ awie. Yesu ha hetoo akɛ: “Namɔ ji minyɛ, ni namɛi ji minyɛmimɛi?” Kɛkɛ ni Biblia lɛ kɛfata he akɛ: “Ni ekpã enineŋ etsɔɔ ekaselɔi lɛ ekɛɛ: Naa, minyɛ kɛ minyɛmimɛi nɛ!” (Mat. 12:48, 49, wɔma efã ko nɔ mi.) Kɛfata hei krokomɛi ahe lɛ, Biblia lɛ tsɔɔ yɛ Bɔfoi lɛ Asaji 12:17 kɛ 13:16 akɛ bɔfo Petro kɛ Paulo hu kɛ ninefɔɔ ni akɛmaa sane nɔ mi tsu nii babaoo.

Jeee gbee pɛ akɛgbaa susumɔi kɛ henumɔi ahe sane shi kɛtsɔ ninefɔɔ ni akɛmaa sane nɔ mi kɛ hiɛ su hu nɔ. Kɛ́ mɔ ni wieɔ lɛ kɛ enɛɛmɛi tsuuu nii jogbaŋŋ lɛ, ebaaha anu he akɛ ebɛ he miishɛɛ. Shi kɛ́ akɛ sanegbaa gbɛ̀i nɛɛ tsu nii jogbaŋŋ lɛ, ebaaha wiemɔ gbɛ̀i ni mɔɔ shi lɛ aya hiɛ babaoo. Kɛ́ oowie yɛ tɛlifoŋ nɔ po, ni okɛ ninefɔɔ ni akɛmaa sane nɔ mi kɛ hiɛ su kɛ nitsumɔ bɔ ni sa tsu nii lɛ, obaanyɛ okɛ hiamɔ ni yɔɔ shɛɛ sane lɛ mli, kɛ agbɛnɛ hu bo diɛŋtsɛ ohenumɔi yɛ nɔ ni okɛɔ lɛ he lɛ aha amrɔ nɔŋŋ. No hewɔ lɛ, kɛji aha bo wiemɔ kpatu loo ookane nii jio, kɛji otoibolɔi lɛ miikwɛ bo loo amɛmiikwɛ amɛ diɛŋtsɛ amɛ Biblia lɛ jio lɛ, ninefɔɔ ni akɛmaa sane nɔ mi kɛ hiɛ su he yɛ sɛɛnamɔ.

Esaaa akɛ ninefɔɔ ni akɛmaa sane nɔ mi kɛ hiɛ su lɛ feɔ tamɔ nɔ ko ní akase kɛjɛ wolo mli. Esaaa akɛ okaseɔ bɔ ni aŋmɔɔ loo bɔ ni mli fuɔ haa. Esa akɛ ninefɔɔ ni akɛmaa sane nɔ mi lɛ hu ajie henumɔi ni yɔɔ omli lɛ kpo. Babaoo ni okɛ ninefɔɔ ni akɛmaa sane nɔ mi tsuɔ nii lɛ, babaoo ni ehiɔ ji no.

Akɛ ninefɔɔ ni akɛmaa sane nɔ mi woɔ kui srɔtoi enyɔ mli: nɔ ni tsɔɔ sane mli kɛ nɔ ni maa sane nɔ mi. Ninefɔɔ ni akɛtsɔɔ sane mli lɛ wieɔ nifeemɔ loo etsɔɔ nɔ ko dalɛ kɛ he ni nɔ ko yɔɔ. Kɛ́ ootsu ninefɔɔ ni akɛmaa sane nɔ mi he nii yɛ skul lɛ mli lɛ, kaaha ekome loo enyɔ ko pɛ kɛkɛ miifa. Bɔɔ mɔdɛŋ ni okɛ ninefɔɔ ni akɛmaa sane nɔ mi atsu nii yɛ owiemɔ lɛ fɛɛ mli. Kɛ́ enɛ feemɔ wa kɛha bo lɛ, no lɛ ekolɛ, obaana akɛ ehi akɛ oootao wiemɔi ni tsɔɔ gbɛ, he ko jɛkɛmɔ, lɛɛmɔ, he ni eyɔɔ, loo he ni nɔ ko ma. Shi kɛlɛ, yɛ shihilɛi babaoo mli lɛ, nɔ pɛ ni he hiaa bo ji ni okɛ ohe awo owiemɔ lɛ mli, ni okasusu bɔ ni onáa mɛi anɔ hewalɛ lɛ he, shi moŋ ní owie ni ofee nibii taakɛ obaafee yɛ daa gbi shihilɛ mli lɛ. Kɛ́ mɔ ko gbɔjɔ ehe lɛ, no lɛ ninefɔɔ ni akɛmaa sane nɔ mi lɛ diɛŋtsɛ baa.

Ninefɔɔ ni akɛmaa sane nɔ mi lɛ jieɔ henumɔi kɛ faishitswaa kpo. Amɛhaa susumɔ jeɔ kpo, amɛwajeɔ lɛ ni amɛkanyaa lɛ. Ninefɔɔ ni akɛmaa saji anɔ mi lɛ he miihia. Shi, kwɛmɔ jogbaŋŋ! Ninefɔɔ ni akɛmaa sane nɔ mi lɛ baanyɛ afee nɔ ni afɔɔ feemɔ. Kɛ́ okɛ ninefɔɔ kome lɛ nɔŋŋ tsu nii shii abɔ lɛ, ebaanyɛ eje shishi egbala jwɛŋmɔ kɛba no nɔ moŋ fe ni eeeha owiemɔ lɛ aya hiɛ. Kɛ́ oskul nɔkwɛlɔ lɛ tsɔɔ akɛ oyɛ nɛkɛ naagba nɛɛ, no lɛ bɔɔ mɔdɛŋ ni okɛ ninefɔɔ ni akɛtsɔɔ sane mli pɛ atsu nii. Yɛ be ko sɛɛ lɛ, jee shishi ni okɛ ninefɔɔ ni akɛmaa sane nɔ mi lɛ atsu nii ekoŋŋ.

Bɔni afee ni ole bei abɔ ni esa akɛ okɛ ninefɔɔ ni akɛmaa sane nɔ mi atsu nii kɛ nɔ̃ ninefɔɔ ni sa lɛ, susumɔ mɛi ni owieɔ otsɔɔ lɛ ahenumɔi ahe. Kɛ́ okɛ onine tsɔɔ toibolɔi lɛ, ehaŋ amɛhe ajɔ amɛ. Kɛ́ yɛ kusumii komɛi amli lɛ, nuu kɛ ninefɔɔ ko tsu nii, tamɔ ekɛ enine tsi enaabu nɔ ni ekɛmiitsɔɔ naakpɛɛ nɔ ko lɛ, abaanyɛ abu enɛ akɛ yei anifeemɔ. Yɛ je lɛŋ hei komɛi lɛ, abuɔ yei ni kɛ amɛniji maa nibii anɔ mi babaoo lɛ akɛ ejeee nɔ ni sa. No hewɔ lɛ, yɛ nakai hei lɛ, ehe miihia ni titri lɛ, nyɛmimɛi yei lɛ kɛ amɛhiɛ su atsu nii jogbaŋŋ. Ni abaanyɛ abu ninefɔɔ ni akɛmaa sane nɔ mi babaoo fe nine lɛ yɛ je lɛŋ he fɛɛ he akɛ shwɛmɔ nii.

Yɛ be mli ni onáa niiashikpamɔ ni ogbɔjɔɔ ohe babaoo yɛ wiemɔ mli lɛ, ninefɔɔ ni akɛmaa sane nɔ mi fɛɛ ni okɛtsuɔ nii lɛ baajie omli gbɛ henumɔi akpo diɛŋtsɛ, ni ebaajie ohekɛnɔfɔɔ kɛ onɔkwayeli kpo. Amɛkɛ shishinumɔ baafata owiemɔ he.

Su ní Yɔɔ Ohiɛ Lɛ. Bei pii lɛ, ohiɛ tsɔɔ bɔ ni onuɔ he diɛŋtsɛ ohaa, fe bɔ ni ogbɔmɔtso lɛ he nibii krokomɛi feɔ. Ohiŋmɛii, bɔ ni onaabu yɔɔ, kɛ bɔ ni okpa oyitso oha lɛ fɛɛ tsuɔ gbɛfaŋ nɔ ko he nii. Ohiɛ baanyɛ atsɔɔ miishɛɛ ni obɛ, nyaŋemɔ nifeemɔ, jwɛŋmɔŋ haomɔ, naakpɛɛ, loo miishɛɛ nɔ ko yɛ be mli ni owieko. Kɛ́ nakai hiɛ sui lɛ fata wiemɔi lɛ ahe lɛ, amɛkɛ ninamɔ kɛ henumɔŋ hewalɛ haa. Bɔlɔ lɛ ha hiɛ faji lɛ fa babaoo diɛŋtsɛ—ni fɛɛ fe 30. Okɛ nɔ ni miihe ashɛ fã tsuɔ nii kɛji ooŋmɔ.

Kɛ́ oyɛ wiemɔ kpoku lɛ nɔ loo okɛ ohe ewo shiɛmɔ nitsumɔ lɛ mli jio lɛ, oobɔ mɔdɛŋ ni ogba gbɔmɛi lɛ shɛɛ sane ko ní yɔɔ miishɛɛ, nɔ ni baanyɛ aha amɛtsui anya kɛ miishɛɛ. Ŋmɔlɔ ni suɔmɔ yɔɔ mli maa enɛ nɔ mi. Yɛ gbɛ kroko nɔ lɛ, kɛ ohiɛ etsɔɔɔ su ko lɛ, ebaanyɛ etee sanebimɔi ni kɔɔ onɔkwayeli he lɛ shi.

Nɔ ni fe no lɛ, ŋmɔlɔ kɛɔ mɛi krokomɛi akɛ oyɛ mlihilɛ kɛha amɛ. Enɛ he miihia titri yɛ gbii nɛɛ amli beni bei pii lɛ, gbɔmɛi sheɔ gbɔi gbeyei lɛ. Ŋmɔlɔ ní oooŋmɔ lɛ baanyɛ aha gbɔmɛi lɛ amli afili amɛ ni amɛbaabo nɔ ni okɛɔ amɛ lɛ toi jogbaŋŋ.