Nɔ Hewɔ Ni Esa Akɛ Awu Harmagedon
“NYƆŊMƆ LƐ SUƆMƆ JI LƐ.” Jeee akɛ Nyɔŋmɔ jieɔ suɔmɔ kpo kɛkɛ, taakɛ bɔfo Yohane kɛɛ lɛ, shi moŋ suɔmɔ ji lɛ—mɔ ni enɔ fɛɛ nɔ tsɔɔ suɔmɔ.—1 Yohane 4:8.
Ni kɛlɛ, afɔɔ nɛkɛ Nyɔŋmɔ ni yɔɔ suɔmɔ nɛɛ nɔŋŋ he wiemɔ akɛ eji nyɔŋmɔ ni tɔɔ owele ni kɛ toigbalamɔ ni mli wa baa mɛi ni tɔ̃ɔ emla nɔ lɛ anɔ. Nɔ ni ejɛ mli eba ji akɛ, mɛi pii elaaje hemɔkɛyeli ni amɛyɔɔ yɛ Nyɔŋmɔ mli lɛ, aloo amɛye Biblia lɛ he fɛo, ni amɛkɛɔ akɛ enyɛŋ ejɛ Nyɔŋmɔ ni tamɔ nɛkɛ lɛ ŋɔɔ. Awieɔ ashiɔ Kpojiemɔ wolo lɛ mli fai komɛi, titri kɛ eba he ni awieɔ Nyɔŋmɔ kojomɔi ahe ekɛ ekɛbaaba efɔŋfeelɔi anɔ ni ebaaha Harmagedon tɛ lɛ ajɛ mli aba lɛ he lɛ.
Akɛ nɔkwɛmɔ nɔ lɛ, Joseph Wheless ŋma yɛ ewolo, Is It God’s Word? lɛ mli akɛ: “Yɛ anɔkwale mli lɛ, nikanelɔ heshibalɔ lɛ nyɛŋ adamɔ kpojiemɔ mli ninaa ni jieɔ susuma ni mli hi ni etsake etsui ni hɔ eshafeelɔi (kɛjɛ shishijee aloo yɛ esha ni gbeɔ mɔ hewɔ) ni nii yɔɔ mɔbɔ ‘ni akɛ lɛ kɛ swɔɔ piiɔ amɛ yɛ bɔfoi krɔŋkrɔŋi lɛ kɛ Toobi lɛ hiɛ’ ni kwɛɔ hɔ ni yaa nɔ lɛ ni jeee amɛhe saneko yɛ be mli ni ‘amɛlasu lɛ kwɔɔ kɛyaa ŋwɛi daa nɛɛ: ni amɛjɔɔɔ amɛhe nyɔɔŋ kɛ shwane’ yɛ Nyɔŋmɔ Ofe lɛ mlifu ni naa wa lɛ hiɛ lɛ ateŋ lɛ́ naa. (Kpoj. 14:10, 11) Enɛ ji kpojiemɔ ni jɛ mumɔŋ ni jɛ Nyɔŋmɔ ni yɔɔ suɔmɔ fɛɛ lɛ ŋɔɔ.”
Mɔ ni wie Kpojiemɔ mli sane lɛ he veveeve hu ji Nilelɔ Gerald A. Iiarue, ni jɛ University of Southern California, ni ŋma nyɛsɛɛ nɛɛ ewo wolo tɛtrɛɛ, Free Inquiry lɛ mli lɛ: “Ashɛrɛɔ mɛi ni heee yeee lɛ ewoɔ piŋmɔ bu kwɔŋkwɔŋ ko ni haa ŋmiŋmi mɔɔ mɔ lɛ mli. Amɛ toigbalamɔ lɛ jeee lex talionis lɛ, hiŋmɛi yɛ hiŋmɛi najiaŋ kojomɔ lɛ; ni asɛŋ etamɔɔɔ weku mli bei ni haa wekui sɔrɔtoi gbeɔ wekui krokomɛi kwraa amɛkɛtɔɔ owele lɛ (1 Mose 4: 23, 24; Yosh. 6; kɛ ekrokomɛi lɛ) . Enɛ lɛ aagbala mɔ toi kɛmiiya naanɔ. Mɔbɔnalɛ ko bɛ, toigbalamɔ lɛ baaa naagbee. Eshaifaa ko bɛ, toigbalamɔ sɔŋŋ ni haaa mɔ ko agbo po ni etoiŋ ajɔ lɛ. Enɛ jeee nɔ ni ale yɛ Yesu he akɛ ebaa ehe shi ni emli jɔ lɛ.” Kɛkɛ lɛ beni etsɛɔ wiemɔ kɛjɛɔ Kpojiemɔ 14:9-11 lɛ, etee nɔ akɛ: “Atsɔɔɔ toi kome ahaaa ekroko yɛ biɛ—shi moŋ mlifu kɛ mlila kɛ hiɛdɔɔ oweletɔɔ ni hiŋmɛi gbelemɔ bɛ mli ni kɛ akɛto Nazi yiwaa lɛ he lɛ, ejeee nɔko kwraa.”
Anuɔ shishi moŋ akɛ, piŋmɔ kɛ yiwaa yɛ be mli ni apiiɔ eshafeelɔi kɛyaa naanɔ lɛ baanyɛ atee sanebimɔi ashi yɛ ‘Nyɔŋmɔ ni yɔɔ suɔmɔ lɛ he.’ Shi nɛkɛ susumɔi nɛɛ damɔ shishinumɔ ni abɛ yɛ Biblia mli okadii ni akɛtsu nii yɛ biɛ lɛ ahe lɛ nɔ. He ko he ko bɛ ni Biblia lɛ tsɔɔ yɛ akɛ adesa susuma lɛ gbooo, shi moŋ Ŋmalɛi lɛ tsɔɔ akɛ “ejaakɛ esha dɛŋ nyɔmɔwoo lɛ gbele ni”—jeee naanɔ piŋmɔ—ni akɛ yɛ gbele mli lɛ mɔ lɛ henumɔ ni enyɛmɔ ni ekɛaanu piŋmɔ he fata he lɛ sɛɛ foɔ.—Romabii 6:23; Jajelɔ 9:5, 10.
No hewɔ lɛ, toigbalamɔ lɛ ji nɔ ni hiɔ shi kɛyaa naanɔ lɛ, shi jeee toi agbalaa lɛ—ejaakɛ ekpataa efɔŋfeelɔi lɛ ahiɛ kwraa yɛ “la kpaakpo” ni damɔ shi kɛha hiɛkpatamɔ kwraa he okadi lɛ mli. (Kpojiemɔ 20:14, 15; 21:8) Shi Harmagedon ta lɛ kɛ piŋmɔi babaoo kɛ tɔlɛ baaba adesai anɔ, ni ebaafee ta ni agbeɔ gbɔmɛi aloo ashwieɔ lá shi babaoo yɛ mli fe fɛɛ eko. (Mateo 24:21, 22; Kpojiemɔ 14:20; 19:17, 18) Ani ejɛ ‘Nyɔŋmɔ ni yɔɔ suɔmɔ’ lɛ ŋɔɔ? Ani Nyɔŋmɔ kɛ ta ni tamɔ nɛkɛ baaba diɛŋtsɛ?
Eji Nyɔŋmɔ Suɔmɔ Lɛ Kpojiemɔ
Yɛ anɔkwale mli lɛ, ejɛ Nyɔŋmɔ suɔmɔ lɛ hewɔ ni awuɔ Harmagedon ta lɛ. Yehowa Nyɔŋmɔ yiŋtoo kɛha shikpɔŋ lɛ ji ní ekɛba eshishijee Paradeiso shihilɛ lɛ mli ekoŋŋ, ni eha adesai ahi nɔ yɛ toiŋjɔlɛ mli yɛ emuuyeli mli “ni mɔ ko woŋ amɛhe gbeyei.” (Ezekiel 34:28; Mika 4:3, 4; Kpojiemɔ 21:4) Be lɛ mɛni ji nɔ ni abaafee mɛi ni baatsɔ amɛ nɔfɔŋfeemɔ kɛ basabasafeemɔ lɛ anɔ amɛfite shweshweeshwe shihilɛ ni yɔɔ Paradeiso ni akɛba ekoŋŋ lɛ mli lɛ? Gbɛjianɔtoo ko bɛ ni adesa kɛba ni eye omanye yɛ nɛkɛ naagba nɛɛ he nitsumɔ mli. Gbɛ kome pɛ ni aaatsɔ nɔ ama toiŋjɔlɛ ni yeɔ emuu nɔ mi ji ni ajie yiwalɛ he gbeyeiwoo lɛ kɛya kwraa. Hɛɛ, esa akɛ Nyɔŋmɔ akpata efɔŋfeelɔi ni tsakeee lɛ ahiɛ yɛ mɛi ni sumɔɔ akɛ amɛaafee nɔ ni ja lɛ hewɔ. No hewɔ lɛ suɔmɔ hewɔ etsuɔ nii koni ekɛjie mɛi ni baafite shikpɔŋ lɛ kɛjɛ nɔ lɛ.—Kpojiemɔ 11:18.
Shi ehe ehiaaa ni mɔ ko agbo. Bɔfo Paulo ŋma akɛ: “[Nyɔŋmɔ] suɔmɔnaa nii ji ni ahere gbɔmɛi fɛɛ yiwala.” (1 Timoteo 2:4) Ni yɛ be mli ni Petro ŋmaa yɛ mumɔ lɛ tsirɛmɔ naa lɛ ejaje akɛ: “Ejaakɛ esumɔɔɔ akɛ mɛi komɛi alaaje, shi moŋ, akɛ mɛi fɛɛ atsake amɛtsui.” (2 Petro 3:9) Nyɔŋmɔ eto gbɛjianɔ koni ajaje “maŋtsɛyeli lɛ he sanekpakpa lɛ” koni mɔ fɛɛ mɔ ana hegbɛ atsu lɛ diɛŋtsɛ eyiwalaheremɔ he nii. (Mateo 24:14; Filipibii 2:12; Galatabii 6:5) Obaanyɛ ohi shi kɛya naanɔ yɛ emuuyeli mli yɛ shikpɔŋ nɔ paradeiso lɛ mli. Bo ji mɔ ni baahala nɔ ni osumɔɔ. (Romabii 2:5-9; Ezekiel 18: 23, 32) Ani enɛ jeee nɔ ni obaakpa gbɛ kɛjɛ Nyɔŋmɔ ni yɔɔ suɔmɔ lɛ ŋɔɔ?
Je Muu Fɛɛ Maŋtsɛyeli He Sane Ni Ka Shi Lɛ
Bɔni afee ni eha toiŋjɔlɛ kɛ kpoofeemɔ shihilɛ ni yeɔ emuu aba lɛ, nɔyeli kome pɛ baahi shikpɔŋ muu lɛ fɛɛ nɔ—Nyɔŋmɔ Maŋtsɛyeli lɛ. Ani jeee adesa nɔyelii pii ni eko fɛɛ eko miibɔ mɔdɛŋ yɛ pɛsɛmkunya gbɛ nɔ ni ekɛ nɔ ni etaoɔ aha emaŋ lɛ ji nɔ ni kɛ bei kɛ lashishwiemɔ babaoo eba shikpɔŋ nɛɛ nɔ lɛ? Esa akɛ ajie nɛkɛ nɔyelii nɛɛ kɛya koni gbɛ aba aha Nyɔŋmɔ Maŋtsɛyeli lɛ jalɛ nɔyeli ni yɔɔ Kristo shishi lɛ. (Daniel 2:44) Osɔleɔ ohaa nakai ŋwɛi nɔyeli lɛ yɛ be mli ni otiɔsɔlemɔ nɔkwɛmɔ nɔ ni Yesu tsɔɔ ekaselɔi lɛ mli lɛ. “Ha emaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ.”—Mateo 6:10, NW.
Shi mɛɛ nɔyeli ole akɛ eesumɔ ni eŋmɛɛ emaŋ nɔyeli he ni eba ehe shi kwraa eha Nyɔŋmɔ Maŋtsɛyeli lɛ? Ani nɔyelii kɛ amɛhe kpɛtɛɛɛ amɛ maŋ lɛ maŋtsɛyelii ahe gbagbalii ni amɛmiibɔ mɔdɛŋ yɛ be fɛɛ mli akɛ amɛaalɛɛ hewalɛ ni amɛnaa yɛ mɛi krokomɛi anɔ ni teɔ shi ewoɔ Nyɔŋmɔ Maŋtsɛyeli ni ato ama shi lɛ mli? (Lala 2:1-9) Ani be ko eba pɛŋ ni jeŋmaji lɛ etsɔɔ akɛ amɛmiisumɔ ni amɛŋmɛɛ amɛ nɔyelii ahe amɛha Nyɔŋmɔ kɛ Kristo? Bɔ ni Jeŋmaji Ekomefeemɔ lɛ efee dɛŋdade ko ni bɛ hewalɛ ko akɛ ekɛ toiŋjɔlɛ aaaba lɛ tsɔɔ bɔ ni jeŋmaji Iɛ sumɔɔɔ ni amɛŋmɛɛɔ saji ahe, kɛ́ esaa amɛmaji lɛ ahe, kɛ bɔ ni amɛsumɔɔɔ hu ni amɛbaa amɛhe shi amɛhaa nɔyeli ko lɛ. Jeŋmaji lɛ etswa amɛfai shi akɛ amɛbaatsu shikpɔŋ lɛ nɔ nii yɛ amɛ diɛŋtsɛ amɛgbɛ nɔ. (Kpojiemɔ 17:13, 14; 19:19) No hewɔ lɛ esa akɛ awu Harmagedon ta lɛ koni akɛkumɔ bɔ ni nibii eŋmɛ dɛmm nɛɛ, koni akɛha sane ni ka shi ni kɔɔ mɔ ni yɔɔ hegbɛ akɛ eyeɔ shikpɔŋ lɛ nɔ lɛ hetoo shikome nyɔŋlo.
Koni Aha Gbɔmɔ Nine Ashɛ Ehiamɔ Nii Anɔ
Nii ni Yehowa baatsu yɛ Harmagedon lɛ ji nɔ ni efeɔ yɛ adesa he jwɛŋmɔ kpakpa ni eyɔɔ hewɔ. Susumɔ enɛ he. Te onuɔ ŋmɛnɛŋmɛnɛ jeŋ shihilɛ lɛ he ohaa tɛɛŋ? Ani osumɔɔ bɔ ni amɛyɔɔ nɛɛ? Ani onuɔ he akɛ oyɛ shweshweeshwe yɛ nuklea tawuu he gbeyeiwoo nɛɛ shishi? Ani awuyeli ni onaa ni yaa nɔ yɛ akutsoŋ he ni oyɔɔ lɛ haa ŋmiŋmi mɔɔ bo ni jɛmɛ nyiɛmɔ feɔ shweshweeshwe? Ani osheɔ obii awɔsɛɛ be he gbeyei? Ani onaa akɛ toiŋjɔlɛ ko yɛ? Ani nɔyeli ko etsɔɔ akɛ ebaanyɛ ekɛ toiŋjɔlɛ kɛ shweremɔ abaha adesai fɛɛ? Ani eko enyɛ ejie helai loo gbele kɛjɛ shikpɔŋ nɔ? Jeee shihilɛ ni yɔɔ jeŋ fɛɛ lɛ moŋ fiteɔ yɛ tsɔnei ahe nilee ni etee hiɛ lɛ fɛɛ sɛɛ, kɛ agbɛnɛ yɛ be babaoo mli lɛ yɛ nɛkɛ nɔyaa nɛɛ hewɔ? Nyɔŋmɔ jalɛ Maŋtsɛyeli lɛ pɛ ji nɔ ni baaha adesai amɛ hiamɔ nii fɛɛ. No pɛ nɔ abaatsɔ ni akɛ anɔkwale toiŋjɔlɛ aba shikpɔŋ muu lɛ fɛɛ nɔ. Esa akɛ awu Harmagedon ta lɛ!
Shi adesai apiŋmɔ kɛ nɔnaa ni baajɛ Nyɔŋmɔ nifeemɔ mli aba yɛ be mli ni etsuuɔ shikpɔŋ lɛ nɔ lɛ hu? Tai kɛ nibii ni tamɔ nɛkɛ baa daa. Enɛ baaba yɛ Harmagedon yɛ bɔni jeŋmaji lɛ ekpɛlɛŋ akɛ ja amɛte shi amɛwo teokrase nɔyeli lɛ hewɔ. Amɛtswa amɛfai shi akɛ amɛbaawu ni amɛbaate shi amɛwo enɛ. (Lala 2:2, 3) Enɛ jeee tɔmɔ. Ekɛ kɔkɔbɔɔ ni sa lɛ ha amɛ: “No hewɔ lɛ, nyɛ maŋtsɛmɛi, nyɛlea nii! Nyɛ shikpɔŋ nɔ kojolɔi, nyɛboa ŋaawoo toi! Nyɛsɔmɔa Yehowa kɛ gbeyeishemɔ, ni nyɛmli afilianyɛ kɛ hekpokpomɔ! Nyɛshɔa Bi lɛ naa, koni emli akafu ni nyɛhiɛ kpata yɛ gbɛ Iɛ nɔ; ejaakɛ etsɛŋ ni emli aaawo la. Ajɔɔ mɛi fɛɛ ni yabaa lɛ abo lɛ!”—Lala 2:10-12.
Agbɛnɛ susumɔ enɛ he. Te jeŋ shihilɛ lɛ baatamɔ tɛŋŋ kɛji akɛ Nyɔŋmɔ kɛ ehe wooo mli ni eeejaje saji ni yɔɔ je lɛŋ lɛ? Ani tai, basabasafeemɔ kɛ hetsɛ eyaŋ nɔ ni ebaaa shi taakɛ etee nɔ kɛtsɔ afii ohai abɔ ni adesa kɛye nɔ lɛ amli lɛ? Jeee nibii amli moŋ ewa bianɛ kɛyashɛ he ni agbɛnɛ akɛ nuklea tawuu kɛ nibii ahiɛ ni ebaakpata woɔ adesai fɛɛ awala he gbeyei nɛɛ? Harmagedon ji nii ni hi fe fɛɛ diɛŋtsɛ ni baaba wɔ jeŋ nɛɛ nɔ! Ekɛ jeŋmaji lɛ apɛsɛmkunya gbɛ ni amɛkɛgbeɔ amɛ diɛŋtsɛ amɛhe lɛ baaba naagbee. Ebaajie gbɛjianɔtooi lɛ fɛɛ ni kɛ naagbai baa adesai anɔ lɛ kɛya ni egba gbɛ kɛha nibii agbɛjianɔtoo hee diɛŋtsɛ, he ni awerɛho, piŋmɔ, kɛ gbele ni adesa kɛbaa lɛ baafee nɔ ni fɛɛ sɛɛ efo lɛ. Kɛkɛ lɛ, ‘tsutsu nii lɛ eho etee,’ taakɛ Nyɔŋmɔ shiwoo lɛ ji lɛ.—Kpojiemɔ 21:4; 2 Petro 3:13.
Esa akɛ wɔkai akɛ yɛ Nyɔŋmɔ nilee hewɔ lɛ ele nɔ ni hi fe fɛɛ kɛha adesai kɛ nɔ ni he hiaa koni nine ashɛ nɔ. Adesai anɔyelii po kɛ amɛhe woɔ tawuu mli koni amɛkɛsaa nɔ ni amɛsusuɔ akɛ eji jalɛsane ni ayeee aloo amɛwuɔ ta amɛbaa nɔ ni amɛsusuɔ akɛ eji gbɛ ni ja. Shi Nyɔŋmɔ pɛ ji mɔ ni yɔɔ nilee ni ekɛaawuu ta ni ja. Lɛ pɛ ji mɔ ni baanyɛ awuu ta ni ahalaa mli, he ni abaabaa aŋkroŋkroi ni amɛtsui ja lɛ ayi yɛ he fɛɛ he ni amɛyɔɔ yɛ shikpɔŋ lɛ nɔ. (Mateo 24:40, 41; Kpojiemɔ 7:9, 10, 13-17) Ni Nyɔŋmɔ pɛ ji mɔ ni yɔɔ hegbɛ akɛ enɔyeli yeɔ shikpɔŋ muu lɛ fɛɛ nɔ, ejaakɛ enibɔɔ nii ni. Hɛɛ bɔni afee ni ajie efɔŋfeemɔ fɛɛ kɛya, ni afo jalɛsane ni ayeee sɛɛ, aha apasa jamɔ ni waa mɛi ayi kɛ osato aba naagbee, ni atse Nyɔŋmɔ gbɛi krɔŋkrɔŋ lɛ he diɛŋtsɛ lɛ—esa akɛ awuu Harmagedon ta lɛ, ni abaafee nakai hu ejaakɛ “Nyɔŋmɔ lɛ suɔmɔ ji lɛ!”
[Mfoniri ni yɔɔ baafa 6, 7]
HARMAGEDON . . . . . . egbeleɔ gbɛ kɛhaa toiŋjɔlɛ