Je ni Eyi Obɔ kɛ Amanehulu
FIMƆ,nɔnyɛɛ kɛ nɔnaa be ko hako nɛkɛ yɛ adesa yinɔsane mli da. Osharai ni sharaa mɔ eba babaoo tamɔ kɔɔyɔɔ ni wɔni wɔmuɔ lɛ. Adafitswaa wolo ko wie nɔ ni yaa nɔ kɛjɛ afi 1914 lɛ he akɛ: “Enɛ ji basabasafeemɔ be ko ni eko bako yɛ jeŋmaji ahusui amli kɛ amɛsɛɛ fɛɛ.”
Nɔ ni yɔɔ musuŋshaa titri ji niseniianiifeemɔ ni anyɛɛɛ aku naa yɛ ŋmɛnɛŋmɛnɛ bei nɛɛ amli tawuu mli lɛ. Yɛ Afrika shikpɔŋ bibioo ko nɔ lɛ, afii kpawo mi akɛwuu ta lɛ egbe gbɔmɛi 20,000. Amɔmɔ gbɔmɛi, amɔmɔ yei ekaa naa akɛ amɛ wɔ, kɛ nibii krokomɛi ni tamɔ enɛɛmɛi. Hiimeji kɛ yeimeji, obalaŋtai kɛ gbekɛbii bafee mɛi ni akɛ okpɛlɛmi, tũi ni atswiaa kɛ niseniianiifeemɔ yɛ faŋŋ mli eye amɛ awui.
Kɛ wɔkwɛ haomɔ loo nɔnaa taakɛ aŋkroaŋkroi kwɛɔ lɛ lɛ, awerɛho ni yɔɔ shihilɛ nɛɛ mli lɛ bafeɔ faŋŋ. Akɛ nɔkwɛmɔ nɔ lɛ, ŋɔɔ lɛ akɛ bo ji yoo ko ni anyɛ enɔ kɛ tũ akɛ elã ni etswa edɛŋ yɛ be mli ni hii awuyelɔi akuu ko bamɔ ewu fiofio kɛyashi be mli ni egbo yɛ ebii ahiɛ lɛ. Mɛni obaafee? Hɛɛ, eji anɔkwale akɛ “jeŋmaji afimɔ” Jɛ eba ni adesa miina nɔ̃ waa diɛŋtsɛ.—Luka 21:25.
Efɔɔ kaa akɛ Kristofoi joɔ haomɔi anaa foi ejaakɛ amɛkɛ amɛhe wooo je lɛ mli ni amɛyaaa hei ni afɔɔ basabasafeemɔ yɛ lɛ. (Yohane 17:16) Shi, amɛnyɛŋ amɛjo amanehulu lɛ fɛɛ anaa foi, ni amɛnaa nɔ̃ yɛ bei komɛi amli tamɔ mɛi ni yɔɔ je lɛ mli lɛ nɔŋŋ. Satan Abosam baanyɛ ekɛ yiwaa kɛ gbele aba amɛnɔ trukaa. Akɛni sane ni Yehowa Odasefoi shiɛɔ yɛ jeŋ fɛɛ lɛ teɔ shi ewoɔ Abonsam nitsumɔi hewɔ lɛ ani esaaa akɛ wɔkpaa gbɛ akɛ Satan baatsɔ bɔ ni efeɔ ekɛ gbele baa lɛ nɔ ebɔ mɔdɛŋ akɛ ebaajie mɛi ni shiɛɔ sane nɛɛ amɛtsɔɔ lɛ kɛya? Nakai ji bɔ ni Ŋmalɛ lɛ tsɔɔ—Hebribii 2: 14, 15; Kpojiemɔ 2:10; 12:12, 17.
Amanehului Krokomɛi Jwere Kristofoi Ahiɛ
Yɛ haomɔi ni baa gbɔmɛi fɛɛ anɔ lɛ sɛɛ lɛ, esa ni Yesu Kristo sɛɛnyiɛlɔi anɔkwafoi atsɔ yiwaa ni akɛbaa amɛnɔ yɛ amɛshidaamɔ shiŋŋ kɛha Yehowa Nyɔŋmɔ, Je Muu Fɛɛ Maŋtsɛyeli lɛ hewɔ lɛ Yɛ be mli ni Yesu tsɔɔ haomɔ be ni baakadi gbɔmɔ nɔyeli gbɛjianɔtoo ni yɔɔ Satan shishi lɛ naagbee lɛ, ekɛɛ, akɛ: “No be lɛ mli lɛ amɛaajie nyɛ [Yesu kaselɔi] amɛwo amanehulu mli, ni agbenyɛ; ni migbɛi hewɔ lɛ, jeŋmaji fɛɛ aaanyɛnyɛ.” Marko tsɔɔ akɛ Yesu kɛfata he ‘akɛ, “Ni aaayinyɛ.”—Mateo 24:3, 7-9; Marko 13:9.
Hɛɛ, akɛni amɛtswa amɛfai shi akɛ amɛaashiɛ “maŋtsɛyeli lɛ he sanekpakpa nɛɛ” yɛ shikpɔŋ muu lɛ fɛɛ nɔ yɛ shihilɛ fɛɛ shihilɛ shishi hewɔ lɛ, Yehowa webii baatsɔ yiwaa he kaai amli—yii, naatsii, tsuŋwooi kɛ nibii krokomɛi ni tamɔ enɛɛmɛi amli. (Mateo 24:14) Hɛɛ, yiwalɔi komɛi po egbe Kristofoi ni “tɔmɔ” ni amɛtɔ̃ nɔŋŋ ji akɛ amɛmiitsɔɔ Nyɔŋmɔ Maŋtsɛyeli lɛ he nii akɛ eji hiɛnɔkamɔ kome too pɛ kɛha adesa!
Yesu kɛɛ akɛ: “shi mɔ ni hiɛɔ mli kɛya wulaa shi lɛ aaahere eyiwala.—Marko 13:13.
[Baafa 31]March Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)