Te Ole Biblia Lɛ Jogbaŋŋ Oha Tɛŋŋ?

‘Toma wolo lɛ? Hɛɛ, enɛ yɛ Biblia lɛ mli. Shi Yona wolo lɛ bɛ mli. Kristo fɔmɔ he lɛ? Oh, jɛmɛ ji Yerusalem​—aloo Nazaret moŋ? Mibɛ nɔmimaa akɛ Yesaia wolo lɛ yɛ Biblia lɛ klɛŋklɛŋ fa lɛ loo nɔ ni ji enyɔ lɛ mli. Bɔfoi lɛ ayibɔ? Mileee.’

WOLO tɛtrɛɛ ni ji Christianity Today lɛ kɛɛ akɛ, “kɛji akɛ saji ni ana nɛɛ jɛ mɛi ni jeee Kristofoi ateŋ pɛ kulɛ, ebafeŋ naakpɛɛ sane. Shi nɔ ni yɔɔ naakpɛɛ​—kɛ nɔ ni gbaa jwɛŋmɔ naa​—ji Ŋmalɛ mli saji ni aleee kwraa ni ana yɛ Kristofoi ni akɛɛ afɔ amɛ ekoŋŋ lɛ ateŋ lɛ.”

Akɛ nɔkwɛmɔ nɔ lɛ, mɛi ni kɛɛ amɛji Kristofoi ni abibii amɛ saji lɛ ateŋ oha fɛɛ mli 22 susu akɛ Toma wolo ko diɛŋtsɛ yɛ Biblia lɛ mli, yɛ be mli ni oha fɛɛ mli 13 bɛ nɔmimaa. Yɛ Yona gbɛfaŋ lɛ, oha fɛɛ mli 27 kɛɛ ebɛ Biblia lɛ mli, ni oha fɛɛ mli 12 kɛɛ amɛleee. Oha fɛɛ mli mɛi ekpaa nyɛɛɛ atsɔɔ he ni afɔ Kristo yɛ, yɛ be mli ni oha fɛɛ mli 16 tsɛ Yerusalem, ni oha fɛɛ mli 8 kɛɛ Nazaret. Oha fɛɛ mli 13 leee he ni abaana Yesaia wolo lɛ yɛ, yɛ Biblia lɛ mli, yɛ be mli ni oha fɛɛ mli 11 kɛɛ eyɛ Kristofoi a-Hela Ŋmalɛi (“Kpaŋmɔ Hee”) lɛ amli. Ni yɛ be mli ni amɛteŋ mɛi pii le akɛ bɔfoi 12 yɔɔ lɛ, oha fɛɛ mli 12 ha yibɔ kroko, kɛjɛ 2 kɛmiiya nɔ ni fe 20, ni oha fɛɛ mli 10 kɛɛ amɛleee kwraa.

Sanebimɔ ni gba amɛnaa titri ji kɛji akɛ wiemɔ, “Nyɔŋmɔ yeɔ buaa mɛi ni yeɔ buaa amɛ diɛŋtsɛ amɛhe” lɛ yɛ Biblia lɛ mli aloo ebɛ mli. “Kristofoi” ni abibii amɛ saji lɛ ateŋ oha fɛɛ mli 38 pɛ le akɛ anaŋ yɛ Biblia lɛ mli he ko he ko, yɛ be mli ni mɛi ni fa, oha fɛɛ mli 42, susu akɛ eji Biblia lɛ mli wiemɔ. Mɛi ni eshwɛ lɛ leee.

Christianity Today lɛ bi akɛ: “Mɛni hewɔ aleee Biblia lɛ he nɔ ko nɔ ko kwraa nakai lɛ? Eeenyɛ efee akɛ ejɛ Biblia lɛ ni akaneee. Amerikabii ateŋ mɛi fa kpotoo kaneee Biblia lɛ. Kristofoi ni akɛɛ afɔ amɛ ehee lɛ ateŋ mɛi ni fa kaneɔ Biblia lɛ shikome loo shii enyɔ yɛ otsi mli, aloo amɛkaneee kwraa. Ebɛ naakpɛɛ mɔ akɛ no hewɔ ni Ŋmalɛi lɛ ahe nɔ ko bibioo ko pɛ Kristofoi pii le lɛ!”