Yehowa Odasefoi ni Yɔɔ Jeŋ Fɛɛ—Colombia

COLOMBIA ji South Amerika shikpɔŋ ko ni yɔɔ sɔrɔto. Atlantik kɛ Pasifik ŋshɔ lɛ fɛɛ kpeɔ yɛ maŋ ni asɛ̃ɛɛ lasu gɔji ahe yɛ nɔ nɛɛ ŋshɔ naa. Kɔɔyɔŋ tsakemɔ lɛ yɛ sɔrɔto kɛjɛ eshikpɔji ni baa shi lɛ amli dɔlɛ nɔ kɛyashi Andes Gɔji ni kwɔlɔ lɛ ayiteŋ snoo lɛ anɔ.a

Eyɛ mli akɛ ale Colombia kɛha shika tsuru kɛ ojarawa tɛi moŋ, shi emli gbɔmɛi lɛ ji enii ni jara wa fe fɛɛ. Ŋmɛnɛ, Yehowa kɛ anunyam miiwo emumɔŋ shia lɛ obɔ. Jálɔi ni he yɔɔ fɛo ni ataoɔ amɛ miiho yuu kɛmiiba mli yɛ shikpɔŋ lɛ nɔ he fɛɛ he, ni Colombia fata he.—Hagai 2:7.

Nitsumɔtsɛmɛi Kpanakui Ahiɛ Sɔ

Hɔgbaa, November 1, 1992, kadi be mli ni ajɔɔ Buu Mɔɔ Asafo lɛ nitsumɔ he nine kɛ woji akalamɔ tsũi heei ni yɔɔ Facatativá, yɛ Bogota kooyi-anaigbɛ, shitoi 26 lɛ anɔ. Shishɛramɔ ni akɛ mɛi ni basara nitsumɔ he nine lɛ tee lɛ na amɛnɔ hewalɛ waa. Beni saralɔi lɛ ateŋ mɔ kome ku esɛɛ kɛtee enitsumɔ he lɛ, ekɛ miishɛɛ wo enitsumɔtsɛmɛi onukpai lɛ hewalɛ ni amɛya ni amɛyakwɛ gbɛjianɔtoo ko ni tsɔɔ ‘hesaa ni yɔɔ naakpɛɛ, gbɛjianɔtoo kpakpa, kɛ nitsulɔi ni yɔɔ jeŋba kpakpa.’ Nitsumɔtsɛmɛi kpanakui nɛɛ ni ba yɛ sɛɛ mli lɛ amii shɛ amɛhe waa yɛ jɛmɛ ni amɛyasara lɛ hewɔ, ni amɛbibii saji babaoo.

Nɛkɛ nitsumɔtsɛmɛi kpanakui nɛɛ miisumɔ ni amɛtsu amɛ nitsumɔ mli onukpai, nɔkwɛlɔi, kɛ hiɛnyiɛlɔi lɛ—yɛ anɔkwale mli lɛ, amɛnitsulɔi lɛ fɛɛ—ni amɛbakwɛ nitsumɔ he nine lɛ. Daa otsi lɛ, amɛtoɔ nitsulɔi 15 kɛmiishɛ 25 he gbɛjianɔ ni amɛyashɛraa shi amɛkwɛɔ nitsumɔ he nine lɛ aahu kɛyashi be mli ni nitsulɔi fɛɛ ni amɛyifalɛ ji 1,300 lɛ nyɛ amɛyakwɛ nɛkɛ gbɛjianɔtoo mli hesaa nɛɛ.

Amɛ nitsulɔi lɛ ateŋ mɛi ohai abɔ eyakwɛ nitsumɔ he nine lɛ ni amɛna video ni ji Jehovah’s Witnesses—The Organization Behind the Name lɛ. Akɛni gbɛjianɔtoo lɛ dalɛ kɛ bɔ ni Maŋtsɛyeli-shiɛmɔ nitsumɔ lɛ yaa nɔ yɛ jeŋ fɛɛ lɛ eha amɛhiɛ esɔ waa hewɔ lɛ, amɛnaa kpɛɔ amɛhe yɛ tsɔnei ahe nilee ni nɔ kwɔ waa ni Asafo lɛ kɛtsuɔ nii lɛ hu he. Beni amɛshiɔ jɛmɛ lɛ, anu ni amɛteŋ mɛi pii miiwie akɛ amɛnuɔ he tamɔ nɔ ni ‘amɛmiishi Paradeiso ni amɛya amɛyatsu nii yɛ jeŋ ko ni yɔɔ basabasa mli.’

Akɛ Anɔkwale lɛ Miiha Gbɔmɛi Sɔrɔtoi Fɛɛ

Akɛ sanekpakpa lɛ miiha gbɔmɛi sɔrɔtoi fɛɛ. (1 Timoteo 2:3, 4) Akɛ nɔkwɛmɔ nɔ lɛ, tsutsu lalafolɔ kɛ rɔk joo ashwɛlɔi ahiɛnyiɛlɔ ko kpɛlɛ Biblia mli anɔkwale lɛ nɔ, efee tsakemɔi yɛ eshihilɛ mli, ni etsɛɛɛ ni ebatsɔ daa gbɛgbalɔ. Yɛ sɛɛ mli lɛ, ahala lɛ akɛ asafoŋ sɔɔlɔ. Aŋkroaŋkroi babaoo ni fata maŋ atuatsemɔ kui ahe ebana hekɛnɔfɔɔ kɛ hiɛnɔkamɔ yɛ Yehowa Maŋtsɛyeli lɛ mli. Amrɔ nɛɛ amɛkɛ amɛhe ewo shɛɛ sane ni kɔɔ toiŋjɔlɛ jeŋ hee lɛ he lɛ shiɛmɔ mli kɛ ekãa.

Mɛi ni kɛ tsofai fɔji tsuɔ nii ni amɛhɔɔ amɛhaa mɛi hu etsɔ amɛhe kɛtee anɔkwale lɛ he. Obalanyo ko ni amrɔ nɛɛ eji Odasefonyo kwɛ tsofai fɔji aŋmɔ̃ kɛ kokein feemɔ nitsumɔ he ko nɔ yɛ koo ko mli afii enumɔ sɔŋŋ dani etsi ehe kɛjɛ nakai nitsumɔ lɛ he kwraa. Ena miishɛɛ yɛ Biblia mli shishitoo mlai akasemɔ kɛ amɛkɛ nitsumɔ hewɔ. Yɛ gboklɛfoi atsu ko mli lɛ, gbɔmɔgbelɔi ni abu amɛ fɔ, ni Biblia lɛ kasemɔ yɛ anɔkwayeli mli lɛ kanya amɛ lɛ kɛ hiɛdɔɔ miisɔle amɛmiiha Yehowa koni ekɛ amɛhe eshai ake amɛ ni ekpɛlɛ amɛnɔ akɛ etsuji.

Ni nakai eji akɛ gbɔmɛi sɔrɔtoi fɛɛ miikpɛlɛ Maŋtsɛyeli lɛ he shɛɛ sane lɛ nɔ. No hewɔ lɛ, Yehowa kɛ anunyam miiwo ewe lɛ obɔ yɛ Colombia, taakɛ eji yɛ hei krokomɛi hu lɛ.

[Shishigbɛ niŋmai]

[Akrabatsa ni yɔɔ baafa 8]

MAŊ LƐ HE SANE

1993 Sɔɔmɔ Afi

YIFALƐ NI FE FƐƐ NI YAA SHIƐMƆ: 60,854

EMLIJAA: Odasefonyo 1 kɛha mɛi 558

MƐI NI BA KAIMƆ LƐ: 249,271

GBƐGBALƆI AMLIJAA: 8,487

BIBLIA KASEMƆI AMLIJAA: 100,927

MƐI NI ABAPTISI: 5,183

ASAFOI SƆRƆTOI AYIBƆ: 751

NITSUMƆ HE NINE: FACATATIVÁ

[Mfoniri ni yɔɔ baafa 9]

Nitsumɔ he nine nitsulɔi kɛ maŋsɛɛ sanekpakpa shiɛlɔi yɛ 1956

[Mfoniri ni yɔɔ baafa 9]

Nitsumɔ he nine lɛ mfoniri ni ajɛ ŋwɛi asha