Mɛni Hewɔ Gbeyei Emɔ Je Lɛ?

NAMƆ sumɔɔ ni ehi shi yɛ gbeyeishemɔ mli? Gbɔmɔ fɛɛ gbɔmɔ sumɔɔ shihilɛ ni yɔɔ shweshweeshwe, ni awooo ewala loo enibii ahe gbeyei. No hewɔ lɛ mɛi pii fãa ni amɛshiɔ hei ni awuiyelii yɔɔ. Ni kɛlɛ, nibii ni haa asheɔ gbeyei lɛ yɛ he fɛɛ he.

Osharai ni jɛ nuklea okpɛlɛmii kɛ amɛ nitsumɔ hei ahe osharai teeɔ hiɛkpatamɔ he gbeyeishemɔ shi yɛ adesai amli. Awuiyelii ni faa babaoo kɛ gbeyeishemɔ baa. Mɛi pii miishe gbeyei akɛ AIDS tsɛŋemɔ hela lɛ baatsɔ hela ni gbeɔ mɛi fe fɛɛ yɛ afii oha nɛɛ mli. Nibii ni ebɔle wɔhe kɛkpe lɛ fitemɔ fata nibii ni kɛ gbeyeishemɔ baa lɛ ahe. Ani nɛkɛ gbeyeishemɔi nɛɛ tsɔɔ nɔ krɛdɛɛ ko? Ni ani wɔɔnyɛ wɔna hiɛnɔkamɔ akɛ wɔɔhi jeŋ ko ni gbeyeishemɔ ni tamɔ nɛkɛ bɛ mli lɛ mli?

Jeŋ Muu Fɛɛ Gbeyeishemɔ lɛ Tsɔɔ Nɔ Ko Pɔtɛɛ

Ŋmɛnɛ gbeyeishemɔ ni egbɛ eshwa nɛɛ tsɔɔ nɔ ko pɔtɛɛ yɛ nɔ ni agba afɔ shi yɛ Biblia lɛ mli lɛ hewɔ. Yesu Kristo tsĩ shihilɛi ni kɛ gbeyeishemɔ baaba lɛ atã yɛ egbalɛ ni kɔɔ naagbee gbii lɛ ahe lɛ mli. Ekɛɛ: “Shi maŋ aaate shi awo maŋ, ni maŋtsɛyeli aaate shi awo maŋtsɛyeli; ni hɔmɔ kɛ tsɛŋemɔ-helai kɛ shikpɔŋhosomɔi aaaba he sɔrɔtoi fɛɛ.” Yesu wie “mlakwamɔ [ni] baafa” hu he. Kɛjɛ 1914 kɛbaa nɛɛ, tawuu, hɔmɔ, shikpɔŋhosomɔi, kɛ mlakwamɔ eha gbeyeishemɔ kɛ wala hiɛkpatamɔ babaoo eba.—Mateo 24:7-14.

Subaŋ ni gbɔmɛi yɔɔ lɛ po kɛ gbeyeishemɔ baa ŋmɛnɛ. Wɔkaneɔ bɔfo Paulo gbalɛ wiemɔi lɛ yɛ 2 Timoteo 3:1-4 akɛ: “Naagbee gbii lɛ anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔlɔi, shika suɔlɔi, shwalɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.” Akɛni gbɔmɛi ni tamɔ nɛkɛ ebɔle wɔhe kɛkpe yɛ naagbee gbii nɛɛ amli hewɔ lɛ, ŋwanejee ko bɛ he akɛ no hewɔ ni gbeyeishemɔ babaoo yɔɔ nakai lɛ!

Nɔ ni Je Nɛɛ Baanyɛ Akpa Gbɛ

Yesu kɛ be nɛɛ to Noa be lɛ mli je lɛ naagbee gbii lɛ ahe. Ŋwanejee ko bɛ he akɛ no mli lɛ, gbeyeishemɔ babaoo yɛ, ejaakɛ Biblia mli yinɔsane he amaniɛbɔɔ lɛ kɛɔ akɛ: “Ni shikpɔŋ lɛ nɔ efite yɛ Nyɔŋmɔ hiɛ, ni awo shikpɔŋ lɛ nɔ obɔ kɛ yiwalɛ.” No hewɔ lɛ, “Nyɔŋmɔ kɛɛ Noa akɛ: ‘Heloo fɛɛ naagbee eba mihiɛ; ejaakɛ shikpɔŋ lɛ nɔ eyi obɔ kɛ yiwalɛ ni jɛ amɛ.’ ” (1 Mose 6:11, 13) Nakai yiwalɛ je lɛ efite aahu akɛ Nyɔŋmɔ tsɔ jeŋ muu fɛɛ Nu Afua nɔ ekɛba naagbee. Shi Yehowa Nyɔŋmɔ jɛ suɔmɔ mli ebaa jalɔ Noa kɛ eweku lɛ yi.—2 Petro 2:5.

Belɛ, mɛni ŋmɛnɛŋmɛnɛ yiwalɛ je nɛɛ baanyɛ akpa gbɛ? Ojogbaŋŋ, Nyɔŋmɔ miihi mɛi krokomɛi ahilɛ-kɛhamɔ ni akɛ yiwalɛ ebuuu kwraa lɛ. Enɛ jeɔ kpo yɛ lalatsɛ lɛ wiemɔi lɛ amli: “Yehowa lɛ, jalɔ moŋ ekaa; shi mɔ fɔŋ kɛ mɔ ni sumɔɔ yiwalɛ lɛ, esusuma nyɛɔ amɛ.” (Lala 11:5) Yehowa kɛ Noa gbii lɛ amli yiwalɛ je lɛ ba naagbee. No hewɔ lɛ, ani esaaa akɛ wɔkpaa gbɛ akɛ Nyɔŋmɔ kɛ jeŋ ni emli awuiyeli haa gbeyei mɔmɔɔ mɛi lɛ baŋ naagbee?

Akɛ mumɔ tsirɛ bɔfo Petro ni ewie ba ni Kristo eba lɛ he ni egba amanehulu eha ŋmɛnɛŋmɛnɛ yiwalɛ je nɛɛ. Eŋma akɛ: “Naagbee gbii lɛ anɔ lɛ, hefɛoyelɔi aaaba kɛ hefɛoyeli, mɛi ni aaanyiɛ yɛ amɛ diɛŋtsɛ amɛkɔnɔi lɛ anaa, ni amɛaakɛɛ: ‘Nɛgbɛ ba ni eba lɛ he shiwoo lɛ yɔɔ? Ejaakɛ kɛjɛ beyinɔ ni tsɛmɛi lɛ yawɔwɔi yɛ gbele mli nɛɛ, nibii fɛɛ miiya nɔ pɛpɛɛpɛ tamɔ bɔ ni eji kɛjɛ nibɔɔ shishijee lɛ.’ ” Kɛkɛ ni Petro kɛ wiemɔ “ŋwɛi” tsu nii ekɛdamɔ shi eha gbɛjianɔtoo ni yeee emuu ni yeɔ adesai anɔ lɛ, ni ekɛ wiemɔ, “shikpɔŋ” lɛ damɔ shi kɛha adesai asafoi ni ejaaa ni yɔɔ shikpɔŋ nɔ lɛ. Ekɛɛ: “Kwa amɛkwaa amɛjieɔ amɛhiɛ yɛ enɛ nɔ akɛ, ŋwɛi yɛ kɛjɛ blema beebe, ni shikpɔŋ hu jɛ nu mli, ni etsɔ nu mli ebama shi yɛ Nyɔŋmɔ wiemɔ naa; nomɛi nɔŋŋ nɔ etsɔ ni nu ŋɔ no be [Noa gbii] lɛŋ je lɛ ni ehiɛ kpata lɛ. Shi ŋwɛi kɛ shikpɔŋ ni yɔɔ nɛɛ, lɛ nɔŋŋ ewiemɔ akɛto amɛ aha la, ni akɛ amɛ eto kɛyashi kojomɔ kɛ gbɔmɛi ni kwa Nyɔŋmɔ lɛ ahiɛkpatamɔ gbi lɛ nɔ.”—2 Petro 3:3-7, New World Translation.

Yɛ nakai shishinumɔ nɔŋŋ naa lɛ, Paulo tsɔɔ mli akɛ Kristo kɛ ebɔfoi hewalɔi lɛ “aaatɔ owele yɛ mɛi ni leee Nyɔŋmɔ lɛ kɛ mɛi ni booo wɔ-Nuŋtsɔ Yesu Kristo lɛ toi lɛ anɔ . . . , mɛi ni aaana nyɔmɔwoo ni ji naanɔ hiɛkpatamɔ.” (2 Tesalonikabii 1:6-9) Biblia mli naagbee wolo lɛ wieɔ jeŋmaji lɛ anaabuamɔ kɛha “Nyɔŋmɔ Ofe lɛ gbi wulu lɛ nɔ ta lɛ” he, ni emaa nɔ mi kɛhaa wɔ akɛ Yehowa “baafite mɛi ni fiteɔ shikpɔŋ lɛ.”—Kpojiemɔ 11:18; 16:14-16.

Be Kɛha Nyamɔ, Jeee Gbeyeishemɔ

Yɛ nɔ najiaŋ ni nɔ ni Biblia lɛ gbaa kɛhaa je nɛɛ aaawo amɛhe gbeyei lɛ, gbɔmɛi ni ja lɛ yɛ nɔ ni amɛaadamɔ nɔ amɛnyã. Etsɛŋ ni Yehowa kɛ yiwalɛ je nɛɛ baaba naagbee, shi abaafee enɛ kɛha mɛi ni sumɔɔ jalɛ-nifeemɔ lɛ ahilɛ-kɛhamɔ. Mɛni baanyiɛ ŋmɛnɛŋmɛnɛ nibii agbɛjianɔtoo nɛɛ naagbee ni Nyɔŋmɔ kɛbaaba lɛ sɛɛ? Gbɛjianɔtoo hee, yɛ Nyɔŋmɔ ŋwɛi Maŋtsɛyeli ni Yesu tsɔɔ ekaselɔi lɛ ni amɛsɔle yɛ he lɛ shishi! Ekɛɛ: “No hewɔ lɛ, nyɛsɔlea nɛkɛ: ‘Wɔ-Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha ofee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.’ ” (Mateo 6:9, 10, NW) Mɛɛ tsakemɔi abaanyɛ akpa gbɛ beni afeɔ Nyɔŋmɔ suɔmɔnaa nii yɛ shikpɔŋ nɔ lɛ?

No mli lɛ tawuu kɛ tsuifaa nibii eba naagbee. Lala 46:10 kɛɔ akɛ: “[Yehowa Nyɔŋmɔ] haa tai asɛɛ foɔ kɛyaa shikpɔŋ lɛ naagbee hei lɛ, ekuɔ gai mli, ni efoɔ akplɔ mli, ta shwiilii lɛ hu, eshaa kɛ la.” Kɛkɛ lɛ mɔ fɛɛ mɔ baata “eweintso kɛ egbamitso shishi, ni mɔ ko woŋ amɛhe gbeyei.”—Mika 4:4.

Helai ni gbeɔ mɛi woŋ amɛhe gbeyei ni egbeŋ gbɔmɛi dɔŋŋ. Ŋwɛi shiwoo lɛ ji: “Ni maŋbii lɛ ateŋ mɔ ko ekɛŋ akɛ: ‘Mihe miiye.’ ” (Yesaia 33:24, NW) Mɛni nɔ amɛaadamɔ amɛnya nɛkɛ!

Gbeyeishemɔi ni fataa awuiyeli kɛ basabasa-feemɔi ahe lɛ hu baafee nibii ni eho etee jeeŋmɔ. Lala 37:10, 11 woɔ shi akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ, ni kɛ okwɛ eshihilɛ he lɛ ebɛ jɛi; shi mɛi ni he jɔ lɛ shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.”

Mɛɛ gbɛ nɔ aaatsɔ ni akɛ anɔkwa toiŋjɔlɛ kɛ shweshweeshwe shihilɛ ato ŋmɛnɛŋmɛnɛ beaŋ gbeyeishemɔi lɛ anajiaŋ? Kɛtsɔ jalɛ nɔyeli kome pɛ nɔ—Nyɔŋmɔ Maŋtsɛyeli lɛ. Daniel 2:44 wieɔ wɔbe nɛɛ he akɛ: “Ni nɛkɛ maŋtsɛmɛi nɛɛ ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi, ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ, eeedamɔ shi kɛaatee naanɔ.” Maŋtsɛ ni Yehowa ehala lɛ, Yesu Kristo, ‘baaye nɔ aahu kɛyashi be mli ni Nyɔŋmɔ kɛ ehenyɛlɔi fɛɛ aaafee enajiashi maaŋoo.’ (1 Korintobii 15:25) Yesu Afii Akpe Nɔyeli lɛ baaha Nyɔŋmɔ shishijee yiŋtoo akɛ eha gbɔmɛi ni yɔɔ miishɛɛ ahi paradeiso shikpɔŋ nɔ kɛya naanɔ lɛ aba mli.—Luka 23:43; Kpojiemɔ 20:6; 21:1-5.

Gbeyeishemɔ kpakpa kome pɛ baahi nakai shikpɔŋ nɔ Paradeiso lɛ mli. No baafee “Yehowa gbeyeishemɔ.” (Abɛi 1:7) Yɛ anɔkwale mli lɛ, esa akɛ wɔna nɛkɛ gbeyeishemɔ nɛɛ po bianɛ, ejaakɛ eji woo kɛ hekpokpomɔ waa ni tsɔɔ bɔ ni wɔsumɔɔɔ kwraa akɛ wɔfeɔ nii ni esaaa Nyɔŋmɔ hiɛ ejaakɛ wɔhiɛ sɔɔ eduromɔ kɛ enijuji lɛ. Nɛkɛ gbeyeishemɔ nɛɛ biɔ hekɛnɔfɔɔ kwraa ni aaana yɛ Yehowa mli kɛ toiboo ni aaafee aha lɛ yɛ anɔkwayeli mli.—Lala 2:11; 115:11.

Nibii ni yɔɔ gbeyei kadiɔ be ni wɔyɔɔ mli nɛɛ akɛ naagbee gbii. Shi, kɛ wɔjie suɔmɔ ni wɔyɔɔ kɛha Nyɔŋmɔ lɛ kpo lɛ, wɔmli baanyɛ afili wɔ moŋ, fe ni wɔɔshe gbeyei. Biblia mli gbalɛi tsɔɔ akɛ, je nɛɛ ni Nyɔŋmɔ kɛbaaba enaagbee lɛ ebɛŋkɛ. Akɛ Yehowa Nyɔŋmɔ jalɛ jeŋ hee ni ewo shi yɛ he lɛ baato najiaŋ. (2 Petro 3:13) Yɛ anɔkwale mli lɛ, etsɛŋ ni jeŋ ni gbeyeishemɔ gbonyo bɛ mli baaba yɛ Maŋtsɛyeli nɔyeli lɛ shishi.

[Akrabatsa ni yɔɔ baafa 6]

HEWALƐ NI EKOME PƐ YƆƆ

TOMASZ, obalanyo fioo ko ni jɛ Poland kɛ mla lɛ na sane, ni eha ejo foi kɛjɛ maŋ lɛ mli. Ekɛ nyɔji ekpaa kpa Europa fɛɛ, ewɔɔ buui amli ni etsuɔ nitsumɔi sɔrɔtoi. Shi beni enɛɛmɛi fɛɛ yaa nɔ lɛ, no mli lɛ sanebimɔ ko yɛ ejwɛŋmɔ mli be fɛɛ be: Mɛni ji yiŋtoo ni yɔɔ shihilɛ sɛɛ?

Aha Tomasz sanebimɔ lɛ hetoo beni aha lɛ Buu-Mɔɔ lɛ ekome yɛ Polish wiemɔ mli. Ekane wolo nɛɛ shii abɔ ni eyoo akɛ anɔkwale ni ekpaa shi etaoɔ lɛ yɛ wolo tɛtrɛɛ nɛɛ mli. Tomasz kpá tsɔnei ni hoɔ lɛ fai ni awo lɛ kɛtee shitoo 120 kɛtee Buu Mɔɔ nitsumɔ he nine ni yɔɔ Selters/Taunus, yɛ Germany lɛ. Beni eshɛ jɛmɛ yɛ Ju gbɛkɛ ko lɛ, ewo e-Buu-Mɔɔ wolo tɛtrɛɛ lɛ nɔ ni ekɛɛ: “Masumɔ ni mɔ ko atsɔɔ nibii ni yɔɔ wolo tɛtrɛɛ nɛɛ mli lɛ mli babaoo aha mi. Mɛni ehe hiaa ni mafee?”

Yehowa Odasefoi lɛ ateŋ mɛi enyɔ kɛ Tomasz wie yiŋtoo ni yɔɔ shihilɛ sɛɛ lɛ he nakai gbɛkɛ lɛ, ni amɛkɛ Biblia lɛ tsu nii akɛ amɛ sanegbaa lɛ nɔdaamɔ nɔ. Akɛni Tomasz miisumɔ ni ekase babaoo lolo hewɔ lɛ, eku esɛɛ kɛtee nitsumɔ he nine lɛ ni efee nakai daa gbi yɛ nakai otsi lɛ mli, ekase Biblia lɛ kɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ.

Tomasz kpɛ eyiŋ akɛ ebaaku esɛɛ kɛya Poland, eyɛ mli akɛ ekɛ naagbai baakpe yɛ jɛmɛ. No hewɔ lɛ, yɛ Sohaa, beni ebashɛ Selters nitsumɔ he nine lɛ sɛɛ gbii ejwɛ pɛ lɛ, Tomasz shi akɛ eeya emaŋ. Amrɔ nɔŋŋ pɛ kɛkɛ ni ekɛ Yehowa Odasefoi bɔi nikasemɔ yɛ Poland. Tomasz tee ehiɛ oyayaayai yɛ nilee mli ni ekɛ ekaa bɔi nɔ ni ekaseɔ lɛ shiɛmɔ kɛ mɛi krokomɛi ahamɔ. Yɛ October 1993, beni ebashɛ Selters klɛŋklɛŋ kwraa lɛ sɛɛ nyɔji ejwɛ pɛ lɛ, abaptisi lɛ akɛ Yehowa Odasefoi ateŋ mɔ kome.

Buu-Mɔɔ lɛ ekome pɛ ye bua nɛkɛ obalanyo nɛɛ ni epɛi yiŋtoo ni yɔɔ shihilɛ sɛɛ lɛ mli!

[Mfoniri ni yɔɔ baafa 7]

Gbeyeishemɔ mɔŋ je lɛ dɔŋŋ, yɛ Yesu Kristo Maŋtsɛyeli nɔyeli lɛ shishi