Gamaliel—Etsɔɔ Saulo Ni Jɛ Tarso lɛ Nii

ASAFO lɛ fee dioo diɛŋtsɛ kɛdamɔ shi. Eshwɛ fioo ni kulɛ amɛgbe bɔfo Paulo be fioo ko ni eho nɛ. Taakɛ ale lɛ hu akɛ Saulo ni jɛ Tarso lɛ, Roma asraafoi lɛ here eyiwala, ni agbɛnɛ edamɔ atrakwei ni bɛŋkɛ Yerusalem sɔlemɔwe lɛ nɔ eekwɛ gbɔmɛi lɛ.

Beni efɔ enine akɛ amɛfee dioo lɛ, Paulo bɔi wiemɔ yɛ Hebri mli ekɛɛ: “Anyɛmimɛi kɛ ataamɛi, nyɛboa minaa ni majie matsɔɔ nyɛ nɛɛ toi. . . . Mi lɛ Yudanyo ji mi, ni afɔ mi yɛ Tarso yɛ Kilikia moŋ, shi maŋ nɛɛŋ alɛ mi yɛ, ni Gamaliel naji anaa atsɔse mi yɛ, yɛ wɔ tsɛmɛi lɛ amla lɛ naa fitsofitso, ni mihiɛ dɔɔ Nyɔŋmɔ sane he, tamɔ bɔ ni nyɛ fɛɛ nyɛfeɔ ŋmɛnɛ nɛɛ.”—Bɔfoi Asaji 22:1-3.

Yɛ ewala ni kã oshara mli lɛ fɛɛ sɛɛ lɛ, mɛni hewɔ Paulo bɔi enaajiemɔ akɛ Gamaliel tsɔse lɛ lɛ? Namɔ ji Gamaliel, ni ákɛ eeetsɔɔ mɔ ko nii lɛ tsɔɔ mɛni? Ani tsɔsemɔ nɛɛ na Saulo nɔ hewalɛ yɛ be mli ni ebatsɔ Kristofonyo bɔfo Paulo lɛ sɛɛ?

Namɔ Ji Gamaliel?

Gamaliel ji Farisifonyo ni ale lɛ jogbaŋŋ. Eji Onukpa Hillel ni to Farisifoi kɛ Yudafoi ajamɔ tsɔsemɔ skul wuji enyɔ lɛ ateŋ ekome shishi lɛ nabi.a Abuɔ gbɛ ni Hillel tsɔ nɔ etsɔɔ nii lɛ akɛ tsuishiŋmɛɛ yɛ mli waa fe Shamai, mɔ ni kɛ lɛ shiɔ akaŋ lɛ nɔ lɛ. Beni akpata Yerusalem sɔlemɔwe lɛ hiɛ yɛ afi 70 Ŋ.B. sɛɛ lɛ, Yudafoi lɛ basumɔ Bet Hillel (Hillel Shia lɛ) fe Bet Shamai (Shamai Shia lɛ). Akɛni jamɔ kui krokomɛi lɛ fɛɛ laaje yɛ sɔlemɔwe lɛ hiɛkpatamɔ lɛ hewɔ lɛ, Hillel Shia lɛ bama shi akɛ Yudafoi ajamɔ lɛ hegbɛ ni yɔɔ lolo yɛ maŋ lɛ mli. Yudafoi amla ni yɔɔ Mishnah lɛ mli, ni bafee shishitoo nɔ kɛha Talmud lɛ, damɔ Bet Hillel yiŋkpɛi anɔ titri, ni ekã shi faŋŋ akɛ bɔ ni ale enɛ waa jɛ hewalɛ ni Gamaliel hewalɛ ná yɛ nɔ lɛ.

Bɔni abuɔ Gamaliel waa diɛŋtsɛ haa hewɔ lɛ, lɛ klɛŋklɛŋ atsɛ lɛ rabban, hegbɛ ko ni nɔ kwɔ fe rabifoi anɔ. Yɛ anɔkwale mli lɛ, Gamaliel bafee gbɔmɔ ko ni abuɔ lɛ waa akɛ, yɛ be ko mli lɛ, ebatsɔ Sanhedrin lɛ, ni ji Yudafoi asaneyeli he wulu fe fɛɛ lɛ sɛinɔtalɔ. Mishnah lɛ wieɔ ehe akɛ: “Beni onukpa Rabban Gamaliel gbo lɛ, anunyam ni Torah lɛ yɔɔ lɛ sɛɛ fo, ni krɔŋŋfeemɔ kɛ hetsemɔ [yɛ faŋŋ mli lɛ, “hetsimɔ”] lɛ hiɛ kpata.”—Sotah 9:15.

Gamaliel Tsɔɔ Lɛ Nii—Yɛ Mɛɛ Gbɛ Nɔ?

Mɛni bɔfo Paulo tsɔɔ beni ekɛɛ asafo ni yɔɔ Yerusalem lɛ akɛ ‘Gamaliel naji anaa atsɔse mi yɛ’ lɛ? Mɛni yɔɔ tsɔɔlɔ ko ni tamɔ Gamaliel lɛ kaselɔ ni mɔ ko aaatsɔ lɛ mli?

Nilelɔ Dov Zlotinck ni yɔɔ Yudafoi a-Rabi Jamɔ Skul ni yɔɔ Amerika lɛ ŋma kɛkɔ tsɔsemɔ nɛɛ he akɛ: “Ja ni mla ni akɛ naabu wieɔ lɛ ja ha, ni no hewɔ lɛ anyɛɔ akɛ he fɔ̃ɔ nɔ hu lɛ, damɔ tsɔɔlɔ kɛ kaselɔ wekukpaa nɔ titri: bɔ ni tsɔɔlɔ lɛ kwɛɔ jogbaŋŋ yɛ mla lɛ tsɔɔmɔ mli kɛ kaselɔ lɛ ekãa ni ekɛkaseɔ enɛ. . . . No hewɔ lɛ, abi ni kaselɔi lɛ atara woloŋlelɔi lɛ anaji ashi, . . . ‘ni amɛkɛ kumai ni yeɔ mɔ anu amɛ wiemɔi lɛ’”—Avot 1:4, Mishnah lɛ.

Emil Schürer ha gbɛi ni klɛŋklɛŋ afii oha lɛ mli rabi tsɔɔlɔi lɛ tsɔɔ nɔ amɛtsɔɔ nii lɛ mli fee faŋŋ, yɛ ewolo ni gbɛi ji A History of the Jewish People in the Time of Jesus Christ lɛ mli. Eŋma akɛ: “Bei pii lɛ, Rabifoi ni ale amɛ jogbaŋŋ lɛ buaa obalahii bibii pii ni taoɔ tsɔsemɔ lɛ anaa kɛbɔleɔ amɛhe kɛkpeɔ, kɛ yiŋtoo lɛ akɛ, amɛbaaha amɛle ‘naabu wiemɔ mla’ lɛ fãi sɔrɔtoi pii lɛ jogbaŋŋ. . . . Nitsɔɔmɔ lɛ bafeɔ nii ni akãa he afeɔ be fɛɛ be ni akɛtoɔ jwɛŋmɔ mli. . . . Tsɔɔlɔ lɛ kɛ mla naa sanebimɔi sɔrɔtoi pii fɔ̃ɔ skulbii lɛ ahiɛ koni amɛtsɔɔ amɛjwɛŋmɔ yɛ he, ni amɛha hetoo, aloo lɛ diɛŋtsɛ ebaaha sanebimɔi lɛ ahetoo. Aŋmɛɔ skulbii lɛ hu gbɛ ni amɛbibiɔ tsɔɔlɔ lɛ saji.”

Yɛ rabifoi lɛ asusumɔ naa lɛ, nɔ ni kã shi kɛha skulbii lɛ jara wa kwraa fe yijiemɔ wolo ko kɛkɛ ni amɛaana. Abɔɔ mɛi ni kaseɔ nii kɛjɛɔ tsɔɔlɔi ni tamɔ nɛkɛ ŋɔɔ lɛ kɔkɔ akɛ: “Mɔ fɛɛ mɔ ni hiɛ aaakpa nii ni ekase lɛ mli nɔ kome nɔ lɛ—Ŋmalɛ lɛ tsɔɔ akɛ ebatsɔɔ wala kɛ gbele sane.” (Avot 3:8) Akɛ yijiemɔ ni fe fɛɛ lɛ haa nikaselɔ tamɔ “nu bu ni aplasi mli jogbaŋŋ ni nu kuli ko kwraa tsɔɔɔ mli.” (Avot 2:8) Tsɔsemɔ ni tamɔ nɛkɛ Paulo, ni ale lɛ yɛ nakai bei lɛ amli kɛ e-Hebri gbɛi akɛ, Saulo ni jɛ Tarso lɛ, na kɛjɛ Gamaliel ŋɔɔ.

Shishinumɔ Diɛŋtsɛ ni Yɔɔ Gamaliel Tsɔɔmɔ lɛ Mli

Akɛni Gamaliel kɛ ehe kpɛtɛɔ Farisifoi atsɔɔmɔ he hewɔ lɛ, eha ahe mla ni akɛ naabu tãa lɛ aye babaoo. Enɛ hewɔ lɛ, ema rabifoi ablemasaji lɛ anɔ mi waa fe Ŋmalɛi ni ajɛ mumɔŋ aŋma lɛ. (Mateo 15:3-9) Mishnah lɛ tsɛ Gamaliel wiemɔ ko sɛɛ akɛ ekɛɛ: “Taomɔ [rabinyo] tsɔɔlɔ ko oha bo diɛŋtsɛ ohe, ni oye ohe kɛjɛ yiŋkɔshikɔshi feemɔ he, ejaakɛ esaaa akɛ okɛ nɔ ni fe mlijaa nyɔŋma mli ekome haa yɛ nitsumɔ ni akaa yiŋ atsuɔ lɛ hewɔ.” (Avot 1:16) Enɛ tsɔɔ akɛ, kɛji akɛ Hebri Ŋmalɛi lɛ ewieee nɔ ni esa akɛ afee lɛ he pɔtɛɛ lɛ, esaaa akɛ mɔ ko kɛ lɛ diɛŋtsɛ ejwɛŋmɔ tsuɔ nii aloo enyiɛɔ ehenilee sɛɛ ekɛyafeɔ nɔ ko. Yɛ no najiaŋ lɛ, esa akɛ etao rabifonyo ni he esa, ni baakpɛ eyiŋ eha lɛ. Taakɛ Gamaliel tsɔɔ lɛ, nɛkɛ gbɛ nɔ pɛ mɔ ko baatsɔ akwa eshafeemɔ.—Okɛto Roma 14: 1-12 he.

Shi kɛlɛ, ale Gamaliel jogbaŋŋ yɛ gbɛ ni eŋmɛɔ etsui shi yɛ shihilɛi komɛi ashishi, ni eŋmɛɛɔ saji ahe yɛ ejamɔ mla naa saji ayelii amli lɛ. Akɛ nɔkwɛmɔ nɔ lɛ, ejie mɔ hesusumɔ kpo etsɔɔ yei, yɛ mla ni efo efɔ̃ shi akɛ “ebaaŋmɛ gbɛ ni ŋa ko abote gbalashihilɛ mli ekoŋŋ yɛ odasefonyo kome wiemɔ [kɛha ewu lɛ gbele] naa lɛ.” (Yevamot 16:7, Mishnah) Kɛfata he lɛ, Gamaliel ŋmala naatsii babaoo yɛ yooshwiemɔ he ewo yooshwiemɔ woji ahe saji ni aŋmalaa lɛ amli, bɔni afee ni ekɛbu yei ni ashwieɔ amɛ lɛ ahe.

Anaa su nɛɛ yɛ bɔ ni Gamaliel kɛ Yesu Kristo mra be mli sɛɛnyiɛlɔi lɛ ye ha lɛ hu mli. Bɔfoi lɛ Asaji lɛ gbaa akɛ, beni Yudafoi ahiɛnyiɛlɔi lɛ mɔmɔ Yesu bɔfoi lɛ yɛ shiɛmɔ ni amɛshiɛɔ lɛ hewɔ, ni amɛtaoɔ akɛ amɛgbe amɛ lɛ, “Farisifonyo ko ni atsɛɔ lɛ Gamaliel, mla tsɔɔlɔ ni maŋ lɛ fɛɛ buɔ lɛ lɛ, te shi damɔ shi yɛ Sanhedrin lɛ teŋ, ni efã akɛ, akɛ bɔfoi lɛ aje kpo fioo. Ni ekɛɛ amɛ akɛ: ‘Ataamɛi Israelbii, nyɛhumia shi yɛ nɛkɛ gbɔmɛi nɛɛ ahewɔ, bɔ ni nyɛkɛ amɛ aaaye aha. . . . Miikɛɛ nyɛ akɛ, nyɛŋmɛɛa nɛkɛ gbɔmɛi nɛɛ ahe; . . . koni nyɛkabafee mɛi ni kɛ Nyɔŋmɔ wuɔ.’ ” Akɛ Gamaliel ŋaawoo lɛ tsu nii, ni aŋmɛɛ bɔfoi lɛ ahe.—Bɔfoi lɛ Asaji 5:34-40.

Mɛni No Tsɔɔ Kɛha Paulo?

Rabifoi atsɔɔlɔi kpelei ni fe fɛɛ ni hi shi yɛ klɛŋklɛŋ afii oha Ŋ.B. lɛ ateŋ mɔ kome tsɔɔ Paulo nii lɛ. Ŋwanejee ko bɛ he akɛ, Gamaliel gbɛi atã ni etsi yɛ sane lɛ mli lɛ baaha asafo ni yɔɔ Yerusalem lɛ abo bɔfo lɛ wiemɔ lɛ toi jogbaŋŋ. Shi, ekɛ amɛ wie Tsɔɔlɔ ko ni nɔ kwɔ kwraa fe Gamaliel he—Yesu, Mesia lɛ. Paulo kɛ asafo lɛ miiwie bianɛ akɛ Yesu kaselɔ, shi jeee Gamaliel—Bɔfoi lɛ Asaji 22: 4-21.

Ani tsɔsemɔ ni Gamaliel kɛha Paulo lɛ sa Kristofonyo ni eji lɛ he? Ebaanyɛ eba akɛ, Ŋmalɛ kɛ Yudafoi amla tsɔsemɔ ni yɔɔ keketee lɛ he ba sɛɛnamɔ kɛha Paulo akɛ Kristofonyo tsɔɔlɔ. Shi kɛlɛ, woji ni jɛ mumɔŋ ni Paulo ŋmala, ni anaa yɛ Biblia lɛ mli lɛ tsɔɔ faŋŋ akɛ, ekpoo Gamaliel Farisifoi ashishijee tsɔɔmɔi lɛ. Paulo gbalaaa enanemɛi Yudafoi lɛ, kɛ mɛi krokomɛi fɛɛ lɛ ajwɛŋmɔ kɛyaaa rabifoi a-Yuda jamɔ lɛ, aloo gbɔmɛi ablemasaji anɔ, shi moŋ kɛtee Yesu Kristo nɔ.—Romabii 10:1-4.

Eji Paulo tee nɔ ehi shi akɛ Gamaliel kaselɔ kulɛ, ebaana hegbɛ ni hiɛnyamwoo babaoo yɔɔ mli. Mɛi krokomɛi ni yɔɔ Gamaliel kuu lɛ mli lɛ ye amɛbua ni atswa Yudafoi ajamɔ kɛha wɔsɛɛ ama shi. Akɛ nɔkwɛmɔ nɔ lɛ, Gamaliel binuu Simeon, ekolɛ Paulo naanyo nikaselɔ lɛ, tsu gbɛnaa nii ko ni he hiaa he nii yɛ atua ni Yudafoi lɛ tse amɛshi Roma lɛ mli. Beni akpata sɔlemɔtsu lɛ hiɛ sɛɛ lɛ, Gamaliel nabi, Gamaliel II, saa ekɛ hegbɛ ni Sanhedrin lɛ yɔɔ lɛ ba shihilɛ mli ekoŋŋ, ni ejie kɛtee Yavneh. Gamaliel II nabi, Judah Ha-Nasi ji mɔ ni bua Mishnah lɛ naa, ni ebafee shishitoo tɛ kɛha Yudafoi asusumɔ, kɛbashi wɔgbii nɛɛ.

Ákɛ Gamaliel kaselɔ lɛ, abaale Saulo ni jɛ Tarso lɛ waa yɛ Yudafoi lɛ ajamɔ mli. Shi kɛlɛ, Paulo ŋma yɛ nitsumɔ ni tamɔ nɛkɛ he akɛ: “Nii ni ji sɛɛnamɔ ha mi sá lɛ, mibu lɛ laajemɔ nii yɛ Kristo hewɔ. Shi lɛlɛŋ akɛ mibuɔ fɛɛ laajemɔ nii yɛ Kristo Yesu, mi-Nuntsɔ lɛ he nilee ni fe fɛɛ lɛ hewɔ, lɛ hewɔ ni nii fɛɛ ebɔ mi ni mibuɔ amɛ akɛ tumo nɔ nii, koni Kristo moŋ afee minɔ.”—Filipibii 3:7, 8.

Yɛ enitsumɔ akɛ Farisifonyo lɛ ni eŋmɛɛ he, ni ebatsɔ Yesu Kristo sɛɛnyiɛlɔ hewɔ lɛ, Paulo kɛ etsutsu tsɔɔlɔ lɛ ŋaawoo, akɛ akwɛ jogbaŋŋ ni akabafee tamɔ mɛi ni kɛ “Nyɔŋmɔ wuɔ” lɛ miitsu nii. Yɛ Yesu kaselɔi lɛ ni ekpa amɛ yiwaa hewɔ lɛ, Paulo kpa Nyɔŋmɔ ni ekɛ lɛ wuuɔ lɛ. Yɛ no najiaŋ lɛ, yɛ Kristo sɛɛnyiɛlɔ ni ebatsɔ hewɔ lɛ, ebafee “Nyɔŋmɔ hefatalɔi nitsulɔi” lɛ ateŋ mɔ kome.—1 Korintobii 3:9.

Yehowa Odasefoi ni yɔɔ ekãa yɛ wɔgbii nɛɛ amli lɛ yaa nɔ amɛjajeɔ shɛɛ saji ni kɔɔ anɔkwa Kristojamɔ he lɛ lolo. Taakɛ Paulo ji lɛ, mɛnɛɛmɛi ateŋ mɛi pii efee tsakemɔi ni sa kadimɔ waa yɛ amɛ shihilɛi amli. Mɛi komɛi eŋmɛɛ nitsumɔi ni sɛɛnamɔi yɔɔ mli lɛ ahe po, bɔni afee ni amɛtsu babaoo yɛ Maŋtsɛyeli shiɛmɔ nitsumɔ lɛ mli, nitsumɔ ni jɛ “Nyɔŋmɔ dɛŋ” nɛ lɛlɛŋ. (Bɔfoi lɛ Asaji 5:39) Kwɛ miishɛɛ ni amɛna, akɛ amɛnyiɛ Paulo nɔkwɛmɔ nɔ lɛ sɛɛ moŋ, fe etsutsu tsɔɔlɔ, Gamaliel nɔ̃ lɛ.

[Shishigbɛ niŋmaa]

[Mfonirii ni yɔɔ baafa 28]

Ákɛ Bɔfo Paulo lɛ, Saulo ni jɛ Tarso lɛ jaje sanekpakpa lɛ etsɔɔ gbɔmɛi ni jɛ jeŋmaji fɛɛ mli