Ama Niyenii ni Fa Kɛha Je lɛ Nɔ Mi Kɛtsɔ̃ Mɛni Nɔ?

LESTER BROWN, ni ji Worldwatch Institute ni yɔɔ Washington, D.C. lɛ nɔkwɛlɔ lɛ kɛɛ akɛ: “Ekolɛ wɔ mɔdɛŋbɔɔ ni hi fe fɛɛ ni wɔkɛaaha niyenii ni fa ni wɔle yɛ afii oha nɛɛ mli bei pii amli lɛ ahi shi lɛ nyɛŋ afee nɔ ni fa.” Taakɛ New Scientist wolo tɛtrɛɛ lɛ tsɔɔ lɛ, beni afi 1995 jeɔ shishi lɛ, ŋmãa ni abua naa ashwie shi yɛ je lɛŋ lɛ ba shi kwraa kɛbashɛ tɔn akpekpei 255—ni baashɛ je lɛ naa kɛyashɛ gbii 48 pɛ. Yɛ afii ni tsɔ hiɛ lɛ amli lɛ, kɛ́ nɔ ni abua naa ashwie shi lɛ ba shi kɛteke gbii 60 lɛ, akuɔ sɛɛ anaa ekoŋŋ afataa he. Shi amrɔ nɛɛ lɛ Worldwatch bɛ nɔmimaa yɛ nyɛmɔ ni shikpɔŋ lɛ yɔɔ ni ekɛaana nɔ ni elaaje lɛ ekoŋŋ lɛ he.

Yɛ afii etɛ ni nikpamɔ eyafeee ekpakpa lɛ sɛɛ, kɛ maji ni kpaako amɛnaa nɔyaa lɛ babaoo ni kɛ ŋmãa lɛɔ amɛ kooloi hewɔ lɛ, ŋmãa ni he hiaa ohiafoi akɛ amɛ niyenii lɛ fã titri lɛ faaa dɔŋŋ. New Scientist lɛ bɔ kɔkɔ akɛ, kɛ atsuuu shihilɛ lɛ he nii amrɔ nɔŋŋ lɛ, hɔ̃mɔ baabɔi gbɔmɛi akpekpei akpe kome, ni kɛ hoo lɛ amɛkɛ shika ni amɛnine shɛɔ nɔ lɛ mli oha mlijaa 70 heɔ niyenii lɛ yeli.

Biblia lɛ gba fɔ shi akɛ “hɔmɔ” baaye shikpɔŋ lɛ nɔ bii yɛ wɔbe nɛɛ mli. (Luka 21:11) Ni kɛlɛ, naagba lɛ jeee nɔ ko ni jeee Nyɔŋmɔ he sane ko. Yɛ anɔkwale mli lɛ, yɛ naagbee lɛ, abaajie bɔ ni esusuɔ gbɔmɔ haomɔi lɛ ahe ehãa lɛ kpo beni e-Maŋtsɛyeli lɛ kudɔɔ shikpɔŋ lɛ nɔ saji lɛ. Yɛ nakai beaŋ nɔŋŋ lɛ, ‘shikpɔŋ lɛ diɛŋtsɛ aaaba enii.’ “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.” (Lala 67:7; 72:16) Kɛkɛ lɛ, gbalɛ wiemɔi ni kɔɔ Bɔlɔ lɛ he lɛ baaba mli: “Obasaraa shikpɔŋ lɛ ni . . . ohaa ebaa nii babaoo. Ŋa nɔ jwɛifɔi lɛ ewula . . . ni abele sɔŋŋ eha jɔɔi lɛ amli.”—Lala 65:10, 14.

Ani nakai shiwoo ni yɔɔ naakpɛɛ lɛ ŋɔɔ onaa? Ani obaasumɔ ni ole bɔ ni ooofee ni enɛ akɔ ohe? No lɛ bi Yehowa Odasefoi ni amɛgba bo shiwoo Paradeiso nɛɛ he saji babaoo kɛ amɛba oshinaa naa be kroko. Kɛ obaasumɔ ni mɔ ko aba oshia ni ekɛ bo abafee Biblia mli nikasemɔ ni aheee bo nɔ ko lɛ, no lɛ ofainɛ ŋmãa kɛya Watch Tower, Box 760, Accra, Ghana, aloo kɛya adrɛs ni atsɔ̃ɔ yɛ baafa 2 lɛ mli nɔ ni sa.

[He ni Mfoniri ni yɔɔ baafa 32 lɛ Jɛ]

Nɔ ni hɔ mli lɛ: Pictorial Archive (Near Eastern History) Est.