Ani Oyeɔ Nii Jogbaŋŋ yɛ Mumɔŋ?

“Nɔ ni he hiaa adesai fe fɛɛ ji niyenii kpakpa. . . . Kɛ niyenii ni fa bɛ lɛ, wɔbaagboi.”—Food and Nutrition.

HII, yei, kɛ gbekɛbii ni ahaaa amɛna “nɔ ni he hiaa adesai fe fɛɛ” ni amɛgboiɔ kɛ hɔmɔ, ni amɛgbɔmɔtsei etãrã loo lɛ feɔ nakai shishitoo anɔkwale lɛ he mfoniri. Mɛi krokomɛi nyɛɔ amɛtsuɔ hiamɔ nii nɛɛ ahe nii kɛshɛɔ he ko, shi kɛlɛ, niyenii ni amɛnáa lɛ shɛɛɛ amɛnaa kwraa. Ni kɛlɛ, bei pii lɛ, mɛi ni nyɛɔ amɛnáa niyenii babaoo amɛyeɔ lɛ yeɔ niyenii ni hewalɛ fioo ko pɛ anáa yɛ mli. Health Eating lɛ kɛɛ akɛ: “Etamɔ nɔ ni niyenii ji nibii ni wɔyɔɔ ni akɛtsuuu nii yɛ gbɛ ni ja nɔ kwraa lɛ ateŋ ekome.”

Nakai nɔŋŋ eji yɛ mumɔŋ niyenii gbɛfaŋ—anɔkwale ni anaa yɛ Nyɔŋmɔ Wiemɔ ni ji Biblia lɛ mli lɛ. Mɛi komɛi yɛ ni amɛnaaa shishijee mumɔŋ niyenii ni he hiaa fe fɛɛ lɛ po; ni mumɔŋ hɔmɔ yeɔ amɛ waa. Mɛi krokomɛi hu kuɔ amɛhiɛ amɛshwieɔ mumɔŋ niyenii ni yɔɔ lɛ nɔ kɛkɛ. Ni bo hu? Ani bo diɛŋtsɛ lɛ oyeɔ nii jogbaŋŋ yɛ mumɔŋ? Aloo ani eeenyɛ efee akɛ ooha mumɔŋ niyenii miiŋmɛɛ bo? Ehe miihia ni wɔye wɔhe anɔkwale yɛ nɛkɛ sane nɛɛ mli, ejaakɛ mumɔŋ niyenii he miihia wɔ babaoo fe bɔ ni heloonaa niyenii he hiaa wɔ lɛ.—Mateo 4:4.

Niyenii Kɛha Mumɔŋ Dalɛ

Food and Nutrition, ni ji nikasemɔ wolo ko ni wieɔ bɔ ni ehe hiaa ni ana niyenii kpakpa he lɛ, haa wɔleɔ yiŋtoi kpakpai etɛ ni wɔɔdamɔ nɔ wɔye nii jogbaŋŋ. Ekome ji akɛ, niyenii he miihia wɔ koni “eha wɔdara ni gbɔmɔtso lɛ mli wala yibii ni fiteɔ ni atoɔ najiaŋ lɛ atsu nii jogbaŋŋ.” Ani ole akɛ gbi fɛɛ gbi yɛ owala shihilɛ mli lɛ, ogbɔmɔtso lɛŋ wala yibii akpekpei toi akpekpei abɔ fɔ̃ɔ nitsumɔ ni ehe bahiaa ni ato najiaŋ? Dalɛ kpakpa kɛ gbɔmɔtso lɛ nɔkwɛmɔ lɛ biɔ niyenii kpakpa.

Nakai eji anɔkwale hu yɛ mumɔŋ gbɛfaŋ. Akɛ nɔkwɛmɔ nɔ lɛ, beni bɔfo Paulo ŋma wolo eyaha Efeso asafo lɛ, ema bɔ ni mumɔŋ niyenii kpakpa he hiaa Kristofonyo fɛɛ Kristofonyo koni etsɔ ‘nuu ni eda kɛmɔ shi’ lɛ nɔ mi. (Efesobii 4:11-13) Kɛ wɔye mumɔŋ niyenii kpakpa jogbaŋŋ lɛ, wɔfeŋ mɛi ni egbɔjɔ dɔŋŋ tamɔ abifabii, ni wɔnyɛɛɛ wɔkwɛ wɔhe, ni wɔŋmɛ̃ɛ wɔhe wɔha osharai sɔrɔtoi fɛɛ. (Efesobii 4:14) Shi moŋ, wɔdaraa kɛtsɔmɔɔ onukpai, ni baanyɛ awu hemɔkɛyeli he ta lɛ jogbaŋŋ kɛmɔ shi, ejaakɛ akɛ ‘hemɔkɛyeli lɛ wiemɔi lɛ lɛɔ’ wɔ.—1 Timoteo 4:6.

Ani nakai eji yɛ ogbɛfaŋ? Ani óda yɛ mumɔŋ? Aloo otamɔ mumɔŋ abifao lolo—ni he waaa, ni kɛ ehe fɔɔ mɛi krokomɛi anɔ kwraa, ni nyɛŋ atsu Kristofoi agbɛnaa nii ahe nii? Anuɔ shishi akɛ, wɔteŋ mɛi fioo ko baakpɛlɛ nɔ akɛ wɔtamɔ mumɔŋ abifabii, shi wɔmli ni wɔɔpɛi yɛ anɔkwayeli mli lɛ sa. Kristofoi komɛi ni afɔ amɛ mu yɛ klɛŋklɛŋ afii oha lɛ mli lɛ tamɔ nakai. Eyɛ mli akɛ kulɛ esa akɛ amɛ diɛŋtsɛ lɛ, amɛtsɔmɔ “tsɔɔlɔi” ni nyɛɔ amɛtsɔɔ mɛi krokomɛi nɔ ni Nyɔŋmɔ Wiemɔ lɛ kɛɔ, ni amɛsumɔ akɛ amɛaafee nakai moŋ, shi bɔfo Paulo ŋma akɛ: “Ehia akɛ atsɔɔ nyɛ Nyɔŋmɔ wiemɔi lɛ amli shishijee nibii lɛ ekoŋŋ, ni nyɛtsɔ̃mɔ mɛi ni fufɔ ehia amɛ, ni jeee niyenii kpakpa.” Kɛ oosumɔ ni oda yɛ mumɔŋ lɛ, ha mumɔŋ niyenii kpakpa ni wa aba otsine. Otsui akanyɔ omli yɛ mumɔŋ abifabii aniyenii he!—Hebribii 5:12.

Mumɔŋ niyenii ni wa nɛɛ hu he miihia wɔ koni wɔkɛsaa nɔ fɛɛ nɔ ni daa gbi kaai ni wɔkɛkpeɔ yɛ jeŋ ni nyɛ̃ɛ eyi mli obɔ lɛ mli lɛ fiteɔ lɛ lɛ. Enɛɛmɛi baanyɛ aha wɔ mumɔŋ nyɛmɔ lɛ agbɔjɔ kwraa. Shi Nyɔŋmɔ baanyɛ afee nakai nyɛmɔ lɛ ehee ekoŋŋ. Paulo kɛɛ: “Wɔtsui efaaa . . . , shi moŋ kɛ wɔkponɔgbɛ gbɔmɔ lɛ fiteɔ kwraa tete lɛ, kɛ̃lɛ wɔmli gbɔmɔ lɛ tsɔɔ ehee gbi fɛɛ gbi.” (2 Korintobii 4:16) Mɛɛ gbɛ nɔ atsɔɔ afeɔ wɔ “ehee gbi fɛɛ gbi”? Yɛ gbɛ kome nɔ lɛ, kɛtsɔ Nyɔŋmɔ Wiemɔ lɛ ni wɔɔye daa kɛtsɔ Ŋmalɛi lɛ kɛ woji ni damɔ Biblia lɛ nɔ lɛ ni wɔɔkase akɛ aŋkroaŋkro loo akɛ kuu lɛ nɔ.

Niyenii Kɛha Mumɔŋ Hewalɛ

Niyenii hu he miihia koni “akɛna dɔlɛ kɛ hewalɛ.” Niyenii kɛ hewalɛ haa wɔ gbɔmɔtsei lɛ koni etsu nii jogbaŋŋ. Kɛ wɔyeee nii jogbaŋŋ lɛ, hewalɛ fioo pɛ wɔbaaná. Kɛ iron bɛ wɔ niyenii amli lɛ, ebaanyɛ eha wɔnu tɔlɛ he ni wɔfee anihao. Ani nakai onuɔ he ohaa, kɛ aawie mumɔŋ nitsumɔ he? Ani onaa naagbai yɛ nitsumɔi ni Kristofonyo feemɔ kɛbaa lɛ ahe? Etɔɔ mɛi komɛi ni kɛɔ akɛ Yesu Kristo sɛɛnyiɛlɔi ji amɛ lɛ yɛ ekpakpafeemɔ mli, ni amɛbɛ hewalɛ kɛha Kristofoi anitsumɔi. (Yakobo 2:17, 26) Kɛ ona akɛ nɛkɛ eji yɛ ohe lɛ, no lɛ enaa tsabaa lɛ baanyɛ afee akɛ oha omumɔŋ niyenii afee ekpakpa bɔ ni ooonyɛ, aloo oye mumɔŋ niyenii babaoo.—Yesaia 40:29-31; Galatabii 6:9.

Kaaha alakao ni oha omumɔŋ niyeli miifee nɔ ni ehiii. Lakamɔi wuji fe fɛɛ ni Satan kɛtsu nii yɛ afii ohai abɔ ni eho lɛ amli lɛ ekome ji, ni ekɔne mɛi ayiŋ akɛ ehe ehiaaa ni amɛkane Biblia lɛ ni amɛna anɔkwa nilee kɛjɛ mli. Ekɛ blema ŋaa gbɛ ko ni asraafoi ni tutuaa mɛi lɛ kɛtsuɔ nii koni amɛkɛye henyɛlɔi amaji anɔ lɛ tsuɔ nii—amɛhaaa amɛná niyenii bɔni afee ni hɔmɔ aye amɛ ni amɛkɛ amɛ aba amɛ nɔyeli shishi. Shi ekɛ ŋaa gbɛ nɛɛ etsu nii kɛtee hiɛ fioo. Elakaa mɛi ni “ewoɔ amɛhe ka” lɛ koni hɔmɔ agbe amɛ, yɛ be mli ni mumɔŋ niyenii kpakpai ebɔle amɛhe kɛkpe. Ŋwanejee ko kwraa bɛ he akɛ mɛi babaoo gbeeɔ etutuamɔi lɛ amli!—Efesobii 6:10-18.

Niyenii Kɛha Mumɔŋ Hewalɛnamɔ

Food and Nutrition lɛ kɛɛ yiŋtoo ni ji etɛ hewɔ ni niyenii he hiaa wɔ lɛ ji “koni etsu gbɔmɔtso lɛ hewalɛnamɔ he nii jogbaŋŋ . . . ni etsĩ hela naa.” Anaaa hewalɛnamɔ he sɛɛnamɔi ni niyenii kpakpa kɛhaa lɛ faŋŋ mra. Kɛ wɔye niyenii kpakpa ko wɔgbe naa lɛ, bei komɛi lɛ nɔ ni wɔsusuɔ ji akɛ, ‘Niyenii nɛɛ he eba sɛɛnamɔ waa kɛha mitsui (loo misabai loo miheloo, kɛ ekrokomɛi).’ Ni kɛlɛ, bɔɔ mɔdɛŋ ni otsĩ ohe naa kɛjɛ niyenii he yɛ be kakadaŋŋ mli, ni nibii ni baajɛ mli aba ogbɔmɔtsoŋ hewalɛnamɔ nɔ lɛ baafee faŋŋ. Mɛni jɛɔ mli baa? Tsofafeemɔ he wolo ko ni atsɛɔ saji asɛɛ kɛjɛɔ mli lɛ kɛɔ akɛ: “Nɔ ni jɛɔ niyenii kpakpa ni ayeee lɛ mli kɛbaa lɛ ateŋ nɔ ni ale fe fɛɛ lɛ yeɔ awui: dalɛ ni eyaaa nɔ, helai bibii ni enyɛɛɛ eye nɔ, nyɛmɔ loo hewalɛ ni akɛjeɔ nifeemɔ ko shishi ni bɛ.” Mumɔŋ hela ko ni tamɔ nakai ba blema Israel nɔ be ko. Gbalɔ Yesaia wie amɛhe akɛ: “Yitso muu lɛ fɛɛ he miiye, ni tsui muu lɛ hu egbɔjɔ! Kɛjɛ naneshi aahu kɛyashi yiteŋ fɛɛ lɛ he ko he ko bɛ ni eye emuu.”—Yesaia 1:5, 6.

Mumɔŋ niyenii kpakpa haa wɔ hewalɛ koni wɔkɛte shi wɔwo nakai mumɔŋ hela lɛ kɛ nibii ni jɛɔ mumɔŋ hela mli kɛbaa lɛ. Nilee ni jɛ Nyɔŋmɔ ŋɔɔ lɛ yeɔ ebuaa wɔ koni wɔya nɔ wɔna hewalɛ yɛ mumɔŋ—kɛ wɔye! Yesu Kristo wie bɔ ni gbɔmɛi ni yɔɔ egbii lɛ amli lɛ ateŋ mɛi ni fa ekaseee nii kɛjɛɛɛ nibii ni amɛ blematsɛmɛi lɛ ku amɛhiɛ amɛshwie nɔ yɛ mumɔŋ niyenii gbɛfaŋ lɛ mli. Amɛ hu amɛkpoo akɛ amɛaaye anɔkwalei ni etsɔɔ amɛ lɛ. Mɛni jɛ mli ba? Yesu kɛɛ: “Nɛkɛ maŋ nɛɛ tsui ekpilim, ni amɛtoii ewa, ni amɛmĩamĩa amɛhiŋmɛii; koni amɛkana kɛ amɛhiŋmɛii, ni amɛkanu kɛ amɛtoii, ni amɛtsui hu akana shishi, ní amɛkpale ní mitsá amɛ.” (Mateo 13:15) Amɛteŋ mɛi ni fa naaa tsámɔ hewalɛ ni Nyɔŋmɔ Wiemɔ lɛ yɔɔ lɛ he sɛɛ kwraa. Amɛtee nɔ amɛhi shi akɛ mumɔŋ helatsɛmɛi. Kristofoi ni afɔ amɛ mu lɛ ateŋ mɛi komɛi po ‘ahe baye ni amɛhe waaa amɛ.’ (1 Korintobii 11:30) Ekaba kɔkɔɔkɔ akɛ mumɔŋ niyenii ni Nyɔŋmɔ kɛhaa lɛ aaafee wɔ tãŋ.—Lala 107:20.

Mumɔŋ Niyenii ni Efite

Yɛ mumɔŋ hɔmɔ ni gbeɔ mɔ lɛ he gbeyeishemɔ sɛɛ lɛ, oshara kroko hu yɛ ni ehe miihia ni wɔhiɛ ahi nɔ—niyenii pɔtɛɛ ni wɔyeɔ lɛ diɛŋtsɛ baanyɛ afee nɔ ni efite. Kɛ wɔɔkpɛ̃lɛ tsɔɔmɔi ni daimonioi asusumɔi ni yɔɔ oshara ebote mli lɛ nɔ lɛ, ebaanyɛ eha wɔye ebɔɔ ni wɔgboi taakɛ heloonaa niyenii ni muawai loo ebɔɔ ebote mli lɛ baanyɛ afee lɛ pɛpɛɛpɛ. (Kolosebii 2:8) Jeee be fɛɛ be efeɔ mlɛo akɛ aaayoo niyenii ni ebɔɔ yɔɔ mli. Wolo ko ni abuɔ lɛ waa ko kɛɛ: “Bei komɛi lɛ niyenii baanyɛ afee tamɔ nɔ ni ehi jogbaŋŋ, ni kɛ̃lɛ muawai ni woɔ mɔ hela baanyɛ ahi mli.” No hewɔ lɛ, wɔɔfee jogbaŋŋ akɛ wɔɔpɛi he ni wɔ mfonirifeemɔŋ niyenii baa kɛjɛɔ lɛ mli, ni wɔha ehi wɔjwɛŋmɔŋ akɛ, woji komɛi, tamɔ tsɔɔmɔi kɛ jeŋ nilee ni ŋmalɛ fiii sɛɛ lɛ baanyɛ afee nibii ni hemɔkɛyeli kwalɔi eŋmala amɛwo mli. Mɛi ni feɔ niyenii lɛ ateŋ mɛi komɛi po kɛ kadimɔ nii ni lakaa mɔ tsuɔ nii, koni amɛkɛshishiu amɛ nihelɔi lɛ yɛ nibii ni yɔɔ niyenii ni amɛfee lɛ mli lɛ he. Eka shi faŋŋ akɛ, wɔbaanyɛ wɔkpa Satan ni ji mɛi alakalɔ kpeteŋkpele lɛ gbɛ akɛ ebaafee nakai nɔŋŋ. No hewɔ lɛ, kwɛmɔ koni ona nakai mfonirifeemɔŋ niyenii lɛ kɛjɛ he ko kpakpa, koni oya nɔ ni oha ‘ohe awa yɛ hemɔkɛyeli lɛ mli.’—Tito 1:9, 13.

Thomas Adams, ni ji afii ohai 17 lɛ mli Protestant shiɛlɔ ko wie gbɔmɛi ni hi shi yɛ egbii lɛ amli lɛ ahe akɛ: “Amɛkɛ amɛnyanyɔji etsa amɛ gbohiiabui.” Yɛ gbɛ kroko nɔ lɛ, nɔ ni amɛye lɛ gbe amɛ. Kwɛmɔ koni nɔ ni oyeɔ yɛ mumɔŋ lɛ akagbe bo. Taomɔ mumɔŋ niyenii kpakpai. Beni mɛi ni jajeɔ akɛ Yehowa Nyɔŋmɔ webii ji amɛ lɛ tsɔ amɛhe kɛtee apasa tsɔɔlɔi kɛ gbalɔi lɛ aŋɔɔ lɛ, ebi akɛ: “Mɛɛba nyɛkaneɔ shika nyɛheɔ nɔ ni jeee aboloo . . . ? Nyɛboa mi toi moŋ, ni nyɛye nii kpakpai, ni nyɛsusuma mii ashɛ yɛ fɔ nii ahe! Nyɛfea toi, ni nyɛbaa miŋɔɔ! Nyɛboa toi, ni nyɛsusuma yi ana wala!”—Yesaia 55:2, 3; okɛto Yeremia 2:8, 13 he.

Mumɔŋ Niyenii Babaoo

Ekã shi faŋŋ akɛ, mumɔŋ niyenii kpakpai etãko. Taakɛ Yesu Kristo gba efɔ shi lɛ, eyɛ tsulɔ anɔkwafo kɛ nilelɔ kuu ko bianɛ ni bɛ deka yɛ ‘niyenii yɛ be ni sa mli’ ni ekɛhaa mɔ fɛɛ mɔ ni taoɔ lɛ hewɔ. (Mateo 24:45) Yehowa wo shi kɛtsɔ gbalɔ Yesaia nɔ akɛ: “Naa, mitsuji lɛ aaaye nii, shi nyɛ lɛ hɔmɔ aaaye nyɛ. . . . Naa, mitsuji lɛ aaala kɛ tsuijurɔ.” Yɛ anɔkwale mli lɛ, ewo shi akɛ ebaaŋmɛ okpɔlɔ eha mɛi fɛɛ ni sumɔɔ ni amɛye nii. “Yehowa Zebaot aaaŋmɛ okpɔlɔ . . . aha majimaji fɛɛ: fɔ nii kɛ wein kpakpa, fɔ nii kɛ wuiaŋfɔ, wein kpakpa ni atsere nɔ.”—Yesaia 25:6; 65:13, 14.

Shi, susumɔ enɛ he: Hɔmɔ baanyɛ agbe wɔ yɛ okpɔlɔŋmɛɛ ko shishi! Yɛ be mli ni niyenii ebɔle wɔhe kɛkpe lɛ, ebaanyɛ eba akɛ wɔnaŋ niyenii babaoo kwraa wɔye, kɛ wɔteee shi diɛŋtsɛ koni wɔye eko. Abɛi 26:15 tsɔɔ bɔ ni nibii yɔɔ diɛŋtsɛ akɛ: “Anihaolɔ ŋɔɔ enine etsɔɔ kã mli, ewaa ehe akɛ ekɛaawo edaaŋ tete.” Mɛɛ mɔbɔ sane nɛ! Wɔ hu wɔbaanyɛ wɔfee anihaolɔi aahu akɛ, eeewa kɛha wɔ akɛ wɔɔmĩa wɔhiɛ yɛ Nyɔŋmɔ Wiemɔ lɛ kɛ Biblia he woji, ni ato he gbɛjianɔ, ni wɔɔkase yɛ teemɔŋ, koni eye ebua wɔ ni wɔye mumɔŋ niyenii nɛɛ lɛ mli. Aloo wɔbaanyɛ wɔfee mɛi ni etɔ wɔ aahu akɛ wɔɔsaa wɔhe kɛha Kristofoi asafo lɛ kpeei aloo ni wɔkɛ wɔhe aaawo mli.

Niyeli Sui Kpakpai

Belɛ wɔyɛ yiŋtoi fɛɛ ni wɔɔdamɔ nɔ wɔna mumɔŋ niyeli sui kpakpai. Shi, sane lɛ diɛŋtsɛ ji akɛ, mɛi babaoo yeɔ amɛ mumɔŋ niyenii lɛ bibiibii, ni mɛi komɛi po ŋmɛɔ gbɛ ni amɛgboiɔ kɛ hɔmɔ kwraa. Amɛbaanyɛ amɛfee tamɔ aŋkroaŋkroi ni enaaa bɔ ni niyenii kpakpa he hiaa ha, kɛyashi amɛaana amanehulu yɛ nɔ ni jɛɔ mli baa yɛ shihilɛ mli, yɛ sɛɛ mli lɛ mli. Healthy Eating kɛ nɔ hewɔ ni wɔbaanyɛ wɔfee mɛi ni kwɛɛɛ amɛhe nɔ jogbaŋŋ yɛ wɔ niyeli sui kpakpai ahe lɛ haa, eyɛ mli akɛ wɔle akɛ niyeli kpakpa he miihia kɛha wala: “Naagba lɛ ji akɛ [ákɛ nɔ ni jɛɔ nii ni ayeee lɛ jogbaŋŋ lɛ mli baa lɛ] gbɔmɔtsoŋ naagba lɛ baaa lɛ oyayaayai, naagba lɛ baaa lɛ trukaa, taakɛ ebaa beni kɛ mɔ ko foɔ gbɛjegbɛ mli ni ekwɛɛɛ ehe nɔ jogbaŋŋ lɛ. Shi moŋ, mɔ lɛ gbɔmɔtsoŋ naagba lɛ baanyɛ aba lɛ blɛoo, ni eba lɛ fiofio, hela baanyɛ amɔ mɔ lɛ mra oya, wui amli baanyɛ agbɔjɔ, pilamɔi kɛ hela ni atsaa baanyɛ aba blɛoo.”

Kɛ etee nɔ fe nine lɛ, mɔ lɛ baanyɛ afee tamɔ obalayoo ko ni miiye anorexia hela lɛ. Éhe eye akɛ niyenii fioo ko pɛ he hiaa lɛ, ákɛ eyɛ jogbaŋŋ diɛŋtsɛ, yɛ anɔkwale ni eji akɛ eetã loo lɛ fɛɛ sɛɛ. Sɛɛ mli lɛ, niyenii baaa etsine kwraa dɔŋŋ. Tsofafeemɔ he wolo ni atsɛɔ saji asɛɛ kɛjɛɔ mli lɛ kɛɛ: “Eji shihilɛ ko ni yɔɔ oshara.” Mɛni hewɔ? “Eyɛ mli akɛ bei komɛi lɛ helatsɛ lɛ gbooo yɛ hɔmɔ diɛŋtsɛ hewɔ moŋ, shi ebafeɔ mɔ ni naaa niyenii babaoo kwraa eye, ni helai bibii baanyɛ amɔ lɛ.”

Kristofonyo yoo ko kpɛlɛ nɔ akɛ: “Mikɛ afii abɔ pele yɛ le ni mile akɛ ehe miihia ni masaa mihe kɛha kpee kɛ teemɔŋ nikasemɔ be fɛɛ be, ni kɛlɛ minyɛɛɛ mafee nakai.” Sɛɛ mli lɛ efee tsakemɔi ni ebatsɔ Nyɔŋmɔ Wiemɔ lɛ he nikaselɔ kpakpa, shi eba lɛ nakai yɛ be mli ni eyoo bɔ ni eshihilɛ lɛ he hiaa ha lɛ pɛ mli.

Belɛ, okɛ ŋaawoo ni bɔfo Petro kɛha lɛ ato otsui mli. Nyɛfea tamɔ “fufɔbii ni afɔ bianɛ,” koni “nyɛshwea wiemɔ lɛ mli fufɔ krɔŋŋ lɛ, . . . koni nyɛdara yɛ mli kɛna yiwalaheremɔ.” (1 Petro 2:2) Hɛɛ, “nyɛshwea”—ha eba otsine waa diɛŋtsɛ—akɛ oooha Nyɔŋmɔ he nilee lɛ ayi ojwɛŋmɔ kɛ otsui mli obɔ. Ehe miihia ni mɛi ni edara yɛ mumɔŋ lɛ hu aya nɔ ana nakai tsinebaa lɛ. Kaaha mumɔŋ niyenii miifee ‘onibii ni okɛtsuuu nii jogbaŋŋ fe fɛɛ lɛ ateŋ ekome.’ Ye nii jogbaŋŋ yɛ mumɔŋ, ni ona “tsámɔ wiemɔi” ni anaa yɛ Nyɔŋmɔ Wiemɔ ni ji Biblia lɛ mli lɛ he sɛɛ jogbaŋŋ kɛmɔ shi.—2 Timoteo 1:13, 14.

[Mfoniri ni yɔɔ baafa 28]

Ani ehe miihia ni oha oniyenii ahi jogbaŋŋ kɛya hiɛ?