Mɛni Eba Emuuyeli Nɔ?

NƆ NI fa fioo fe afii oha nɛ ni Barney Barnato, ni yeɔ ojarawatɛi ahe jara lɛ, ku esɛɛ kɛjɛ South Africa kɛtee England. Beni eyashɛ lɛ, ekɛ adafitswaa wolo ko mli sane ni aŋma yɛ ehe lɛ kpaaa gbee kwraa. No hewɔ lɛ ekɛ nibii ni ekɛ eniji eŋmala lɛ maje adafitswaa wolo ŋmalɔ lɛ kɛha ehe sane ni ji enyɔ, “koni ekɛjaje nibii ni awie yɛ ehe lɛ kɛkɛ,” kɛ wolo ni akɛheɔ shika, ni aŋma shika ni fá yɛ nɔ áha lɛ.

Niŋmalɔ, J. K. Jerome, shɛrɛ nibii ni eŋmala emaje lɛ nɛɛ ewo jwɛiniiaŋ, ni ekɛ wolo ni akɛheɔ shika lɛ ku sɛɛ eha lɛ. Enaa ni kpɛ ehe sɔŋŋ hewɔ lɛ, Barnato hã shika ni ekɛkeɔ lɛ lɛ bɔ he toi enyɔ amrɔ nɔŋŋ. Ekpoo no hu nakai nɔŋŋ. Ni ebi lɛ akɛ: “Shika enyiɛ otaoɔ?” Beni ekaiɔ sane ni ba nɛɛ, Jerome wie akɛ: “Mihã ele faŋŋ akɛ afeee nakai—jeee yɛ London.” Eka shi faŋŋ akɛ ekɛ anɔkwayeli ni yɔɔ eniŋmaai amli lɛ tsakeŋ shika.

Atsɔɔ “emuuyeli” shishi akɛ “jeŋba kpakpa; anɔkwayeli.” Mɔ ko ni yeɔ anɔkwa lɛ sa mɔ ni akɛ he fɔɔ enɔ. Shi ŋmɛnɛ, jalɛ nifeemɔ ni bɛ—anɔkwayeli ni bɛ—miisa gbɔmɛi ni yɔɔ shihilɛi sɔrɔtoi fɛɛ mli lɛ ahe yɛ gbɛ fɔŋ nɔ.

Yɛ Britain lɛ, adafitswaa gbɛi sɔrɔtoi lɛ eha abale Blɔfo wiemɔ “sleaze” ni akɛtsuɔ nii akɛtsɔɔ anɔkwa ni ayeee yɛ jeŋba mli lɛ waa. Taakɛ The Independent adafitswaa wolo lɛ wie he lɛ, anɔkwa ni ayeee yɛ jeŋba mli lɛ saa “nɔ fɛɛ nɔ he, kɛjɛ nuu kɛ yoo teŋ suɔmɔ saji kɛ nibii ni nɔyelii feɔ ni amɛkɛshishiuɔ amɛ shishibii, aahu kɛyashi nitsumɔ mli shika ni akpaa hiɛ ahaa mɛi, yɛ nibii wuji ni ahãa amɛshɛɔ lɛ ahewɔ lɛ anɔ.” Shihilɛ fã ko kwraa yeee ehe kɛjɛɛɛ enɛ mli.

Anɔkwayeli He Tɛi ni Tsakeɔ Daa Lɛ

Anɔkwayeli etsɔɔɔ akɛ aye emuu moŋ, shi ejieɔ su pɔtɛɛ ko kpo yɛ mɔ mli. Ekolɛ abuɔ anɔkwayeli akɛ gbɛtsii nii, shi jeee jeŋba kpakpa, yɛ wɔ jeŋ ni asumɔɔ ni ana nii oya yɛ mli nɛɛ mli. Akɛ nɔkwɛmɔ nɔ lɛ, skulbii ni kɛ ɛlɛktrɔnik tsɔnei ni yɔɔ haŋtsii tsuɔ nii ni amɛkɛshishiuɔ mɛi yɛ kaa-feemɔ mli lɛ miifa babaoo, ni bei pii lɛ, anyɛɛɛ ana akɛ amɛhiɛ nɛkɛ tsɔnei heei nɛɛ. Britain univɛsiti tsɔɔlɔ nukpa ko wie akɛ Britain skul nikaselɔi ateŋ mɛi ni fe fã kpotoo eshishiu mɛi, ni eka shi faŋŋ akɛ, jeee Britain pɛ enɛ yaa nɔ yɛ.

Esaaa ni akuɔ hiɛ afɔ̃ɔ nɔ ni jɛɔ mli baa mɛi ni efeko efɔŋ ko lɛ anɔ, kɛji aŋkroaŋkroi ni esaaa akɛ akɛ he fɔɔ amɛnɔ lɛ male ni amɛshishiu mɛi lɛ nɔ. Okɛ nɔ ni ba yɛ India maŋ ni ji Bhopal, hé ni yɛ 1984 mli lɛ, kɔɔyɔɔ fɔŋ gbe hii, yei, kɛ gbekɛbii fe 2,500, ní eye mɛi akpei ohai abɔ hu awui lɛ afee nɔkwɛmɔ nɔ. The Sunday Times lɛ bɔ amaniɛ akɛ: “Yelikɛbuamɔ gbɛjianɔtoi ni akɛbaaye abua mɛi ni oshara lɛ sa amɛhe lɛ eyi kɛ juu-kɛ-fɔ̃ sɔŋŋ. . . . Ahã ehe nitsumɔ ni ji anɔkwa saji diɛŋtsɛ lɛ mlikwɛmɔ efee haŋtsii kɛtsɔ amale ni mɛi kɛwieɔ akɛ amɛfata he, kɛ woji ni akɛ mɛi krokomɛi agbɛi efee kɛ amale odaseyeli nɔ.” Nɔ ni ejɛ mli eba ji akɛ, afii nyɔŋma sɛɛ lɛ, $470,000,000 ni sa akɛ akɛhã mɛi ni oshara lɛ ba amɛnɔ lɛ mli $3,500,000 pɛ aja ahã mɛi ni ehia amɛ lɛ.

Ni jamɔ hu? Mɛɛ ŋɛlɛ nɔ edamɔ yɛ anɔkwayeli he sane nɛɛ mli? Dɔlɛ sane ji akɛ, bei pii lɛ, tɛi ni amɛhiɔ shi yɛ naa lɛ tamɔ nɔ ni je lɛŋ bii hiɔ shi yɛ naa lɛ nɔŋŋ. Okɛ Roma Katolik osɔfonukpa Eamon Casey, ni kpɛlɛ nɔ akɛ lɛ efɔ ajwamaŋ bi, ni ji gbekɛ nuu, ni amrɔ nɛɛ eye fe afii 13 lɛ afee nɔkwɛmɔ nɔ. Casey sane lɛ, taakɛ Britain Guardian adafitswaa wolo lɛ wie he lɛ, “jeee nɔ ni efɔɔɔ kaa.” The Times lɛ bɔ amaniɛ, kɛ susumɔ ni tamɔ nakai, akɛ: “Anɔkwale ni kɔɔ Osɔfonukpa Casey hiɛgbele lɛ he lɛ jeee akɛ efɔŋ ni efee nɛɛ yɛ sɔrɔto, shi moŋ jeŋba shara ni ekɛku oshijayeli he kita ni ekã lɛ mli lɛ jeee nɔ̃ hee loo nɔ ni efɔɔɔ kaa.” Beni efĩɔ sane naataamɔ nɛɛ sɛɛ lɛ, The Glasgow Herald, ni akalaa yɛ Scotland lɛ wie akɛ, Roma Katolik osɔfoi ni yɔɔ United States lɛ amlijaa oha mli 2 pɛ etsi amɛhe kɛjɛ gbɔmɛi sɔrɔtoi ni akɛ amɛ naa bɔlɛ, kɛ hii ni kɛ hii naa bɔlɛ lɛ anifeemɔi fɛɛ ahe. Kɛ́ yibɔ nɛɛ ja jio, ejaaa jio, etsɔɔ gbɛi ni Katolik osɔfoi efee kɛha amɛhe yɛ jeŋba he sane lɛ mli.

Yɛ nɔkwɛmɔ nii nɛɛ ahewɔ lɛ, ani eeenyɛ eba akɛ mɔ aŋkro ko baanyɛ ahiɛ jeŋba he emuuyeli mli? Ani nakai feemɔ he yɛ sɛɛnamɔ? Mɛni nakai feemɔ baabi, ni mɛɛ nyɔmɔwoi jɛɔ nakai feemɔ mli kɛbaa?