Te Obuɔ Esha Ohãa Tɛŋŋ?

“ESHA ko bɛ omli, mɔbɔ shihilɛ ko bɛ omli; bo ji hewalɛ fɛɛ jɛɛhe.” Hindu jeŋ nilelɔ Vivekananda ni ehe gbɛi lɛ ji mɔ ni wie nɛkɛ wiemɔi nɛɛ, yɛ be mli ni etsɔ̃ɔ Hindu wolo krɔŋkrɔŋ, Bhagavad Gita lɛ mli kuku ko shishi lɛ. Beni etsɛɔ wiemɔ kɛjɛɔ Vedanta lɛ mli lɛ, ekɛɛ: “Tɔmɔ ni fe fɛɛ ji ni oookɛɛ akɛ obɛ nilee, akɛ eshafeelɔ ji bo.”a

Shi ani eji anɔkwale akɛ, esha bɛ gbɔmɔ he? Shi, mɛni gbɔmɔ náa akɛ gboshinii yɛ fɔmɔ mli, kɛ nɔ ko yɛ ni anáa? Nikhilananda, Hindu nilelɔ ko kɛɛ akɛ: “Anáa gbɔmɔtsoŋ sui kɛjɛɔ fɔmɔ mli” pɛ. Anáa sui krokomɛi kɛjɛɔ mɔ lɛ “nifeemɔi yɛ etsutsu shihilɛi amli lɛ mli.” Taakɛ Vivekananda tsɔɔ lɛ, “bo ji oshɛɛ mli sane lɛ feelɔ.” Hindu jamɔ etsɔɔɔ nɔ ko yɛ esha ni aná kɛjɛ fɔmɔ mli lɛ he.

Esha ni aná kɛjɛ fɔmɔ mli lɛ he jwɛŋmɔ lɛ hu bɛ Zoroastriabii, Shintobii, Konfusiobii, kɛ Buddhabii ateŋ. Su ni ahiɛ yɛ esha he lɛ miitsake yɛ Yudafoi kɛ Kristofoi ajamɔi ni amɛjɛ blema amɛtsɔɔ esha ni aná kɛjɛ fɔmɔ mli lɛ he tsɔ̃ɔmɔ lɛ po lɛ ateŋ. Ŋmɛnɛ, gbɔmɛi babaoo ni amɛyifalɛ yaa hiɛ ebuuu amɛhe akɛ eshafeelɔi ji amɛ.

Nyɔŋmɔ jamɔ he nilelɔ Cornelius Plantinga Jr. kɛɛ: “Ŋmɛnɛŋmɛnɛ beaŋ nii ni mɔ ko leɔ yɛ lɛ diɛŋtsɛ ehe lɛ wooo jeŋba mli ahorabɔɔ he hewalɛ; titri lɛ, ewooo ahora ni mɔ aaabɔ lɛ diɛŋtsɛ ehe lɛ he hewalɛ.” Esha ni abaa lɛ shi akɛ ejeee fɛi lɛ he fɔyeli lɛ eko kã Kristendom sɔlemɔi lɛ anɔ. Duke Univɛsiti osɔfo ko kɛɛ akɛ: “Kaaya sɔlemɔ kɛ oosumɔ ni onu sane ni kɔɔ esha he.” Ni taakɛ Plantinga tsɔɔ lɛ, sɔlemɔi komɛi wieɔ esha he kɛ aawie kwasafoŋ shihilɛ he pɛ.

Akpɛlɛɔ nɔ akɛ, kwasafo shihilɛ mli naagbai ni yɔɔ ŋmɛnɛ lɛ fa. Basabasafeemɔ, awuiyeli, tai, weku mli béi, tsofai fɔji kɛ nitsumɔ, anɔkwa ni ayeee, nɔnyɛɛ, kɛ awui ni ayeɔ gbekɛbii efa babaoo. Yɛ anɔkwale mli lɛ, átsɛ afii ohai 20 lɛ akɛ afii ohai ni ashwie lá shi babaoo yɛ mli lɛ ateŋ ekome ni adesai ele. Okɛ piŋmɔ kɛ nɔnaa ni baa kɛjɛɔ hela, gbɔlɛ, kɛ gbele mli lɛ afata he. Namɔ yɔɔ ni eshweee akɛ eeená kpɔmɔ kɛjɛ haomɔi babaoo ni yɔɔ je lɛŋ ŋmɛnɛ lɛ mli?

Belɛ, te osusuɔ esha he ohãa tɛŋŋ? Ani aná esha kɛjɛ fɔmɔ mli? Ani wɔbaaye wɔhe kɛjɛ piŋmɔ kɛ nɔnaa mli gbi ko? Sane ni nyiɛ sɛɛ lɛ baasusu nɛkɛ sanebimɔi nɛɛ ahe.

[Shishigbɛ niŋmai]