Tɛsaa Grɔŋŋi lɛ Anɔ Tumɔ̃lɔi

NƆ NI yɔɔ Ŋshɔ ni Egbo lɛ anaigbɛ ŋshɔnaa lɛ ji blema maŋtiase lɛ, kɛ ŋa kpalanaa ni atsɛɔ lɛ En-gedi ni ebɔle he kɛkpe lɛ. Gbɛ̀i ni kamɔ tɛsaai ni yɔɔ hei nɛɛ amli lɛ kɛ amɛyiteŋ somoromoo lɛ bafeɔ shihilɛhei ni sa kɛha Shiwoo Shikpɔŋ lɛ nɔ tɛsaaiaŋ abotia ni tamɔ nɔ ni anaa yɛ biɛ lɛ.

Bɔɔ nɔ ni shãneee nɛɛ fata adebɔɔ kooloi ni he yɔɔ naakpɛɛ lɛ ahe. Nyɛhaa wɔgbelea Biblia lɛ ni wɔkwɛa kooloo ni he yɔɔ miishɛɛ waa nɛɛ jogbaŋŋ.

“Gɔji Somoromoi lɛ Yɛ Kɛha Tɛsaaiaŋ Abotiai Lɛ”

Nakai lalatsɛ lɛ la. (Lala 104:18, NW) Awula tɛsaaiaŋ abotiai jogbaŋŋ kɛha hei ni nɔ kwɔlɔ anɔ hilɛ! Amɛhe yɛ oya waa, amɛjoɔ foi kɛtumɔɔ kɛtsɔɔ shikpɔŋ ni nɔ yɔɔ kpɔikpɔi anɔ kɛ hekɛnɔfɔɔ kpele kɛ foi ni naa wa. Enɛ damɔ bɔ ni áfee kooloo lɛ naji koklotoi lɛ aha lɛ nɔ yɛ gbɛ ko nɔ. Gbɛ ni kã amɛwaobii ateŋ lɛ mli baanyɛ agbele yɛ abotia lɛ tsiimɔ shishi, ni ehaa ekpitiɔ shikpɔŋ kɛ edamɔ shi loo eeenyiɛ yɛ tɛsaai ni yɔɔ fintɔŋŋ lɛ anɔ.

Tɛsaaiaŋ abotiai ŋmɛɔ pɛpɛɛpɛ kɛdamɔɔ shi shiŋŋ hu. Amɛbaanyɛ amɛtu kɛjɛ he ko shɔŋŋ diɛŋtsɛ ni amɛyadamɔ tɛsaa kpɔ ko ni edaaa kwraa bɔ ni enaji ejwɛ lɛ fɛɛ aaanyɛ adamɔ nɔ lɛ nɔ. Be ko lɛ, Walashishijee he Nikaselɔ, Douglas Chadwick na tɛsaaiaŋ abotia ko ni hiɛ su kroko, ni ekɛ bɔ ni eshidamɔɔ ŋmɛɔ pɛpɛɛpɛ lɛ miitsu nii koni ekaka yɛ tɛsaa ko ni yɔɔ fintɔ̃ŋŋ tsɔ ni enyɛŋ etsɔ ehe yɛ nɔ lɛ nɔ. Ekɛɛ akɛ: “Beni abotia lɛ ekwɛ tɛsaa kpɔ ni tsa nɔ ni yɔɔ jɔɔŋ, ni jɛkɛmɔ baashɛ mitai 120 lɛ sɛɛ lɛ, ekɛ ehiɛgbɛ naji lɛ tsɛkɛ shikpɔŋ ni ekɛ esɛɛgbɛ naji lɛ tsɔ eyiteŋ blɛoo yɛ tɛsaa lɛ nɔ tamɔ nɔ ni eetu ajemelekutu. Beni mitsui suɔ lɛ, abotia lɛ tee nɔ aahu kɛyashi esɛɛgbɛ naji lɛ baje ehiɛ ni miikwɛ he ni ejɛ kɛba lɛ.” (National Geographic) Ŋwanejee ko bɛ he akɛ, no hewɔ ni atsɛɔ tɛsaaiaŋ abotia lɛ akɛ “tɛsaa grɔŋŋi lɛ anɔ tumɔ̃lɔi lɛ”!

‘Ani Ole Tɛsaaiaŋ Abotiai lɛ Afɔmɔ Be?’

Tɛsaaiaŋ abotiai ji bɔɔ nii ni hiɛ gboɔ waa. Amɛsumɔɔ ni amɛtsi amɛhe kɛjɛ gbɔmɔ he kwraa. Yɛ anɔkwale mli lɛ, etɔɔ gbɔmɛi akɛ amɛaabɛŋkɛ amɛ bɔ ni sa, ni amɛkwɛ amɛ yɛ amɛŋaŋ shihilɛhe lɛ. Enɛ hewɔ lɛ, “kooloi akpei abɔ ni yɔɔ gɔji anɔ lɛ” Anɔ̃tsɛ lɛ baanyɛ abi Hiob yɛ gbɛ ni ja nɔ akɛ: “Ani ole tɛsaaiaŋ abotiai afɔmɔ be?”—Lala 50:10; Hiob 39:1, NW.

Henumɔ ni Nyɔŋmɔ kɛha kooloi lɛ kɛɔ tɛsaaiaŋ abotia yoo lɛ be ni esa akɛ ekɛfɔɔ. Yɛ be pii amli, yɛ May loo June naagbee lɛ, etaoɔ he ko ni yɔɔ shweshweeshwe, ni efɔɔ ekome loo enyɔ. Abotiabii heei ni afɔ lɛ leɔ bɔ ni adamɔɔ shi ni ashãneee yɛ gbii fioo ko pɛ mli.

‘Ofrote ni He Yɔɔ Fɛo kɛ Tɛsaaiaŋ Abotia ni Mɔɔ Mɔ Tsui’

Nilelɔ Maŋtsɛ Salomo fã wumɛi akɛ: “Ná obalahiaŋ ŋa lɛ he miishɛɛ. Ha ni efee tamɔ ofrote ni he yɔɔ fɛo kɛ tɛsaaiaŋ abotia ni mɔɔ mɔ tsui.” (Abɛi 5:18, 19, NW) Awieee enɛ ni akɛba yei ashi. Eyɛ faŋŋ akɛ, Salomo miiwie kooloi nɛɛ ahe fɛo, nyam, kɛ sui krokomɛi ni ekaaa ni amɛyɔɔ lɛ ahe.

Tɛsaaiaŋ abotia lɛ fata “susumai ni hiɛ kamɔ” (NW) ni anyɛɛɛ akane ni yeɔ Bɔlɔ lɛ nilee lɛ he odase diɛŋtsɛ lɛ ahe. (1 Mose 1:24, 25) Ani wɔnaaa miishɛɛ akɛ Nyɔŋmɔ kɛ bɔɔ nii ni amɛhe yɔɔ miishɛɛ babaoo ebɔle wɔhe kɛkpe?

[He ni Mfoniri ni yɔɔ baafa 24 lɛ Jɛ]

Courtesy of Athens University