Heremɔ Obi lɛ Yiwala!

MICHAEL kɛ Alphina hi shi yɛ gɔji ateŋ jɔɔ akrowa ko ni yɔɔ gɔji ni efee frɔfrɔ ni yɔɔ KwaZulu-Natal maŋ ni yɔɔ South Africa lɛ ateŋ lɛ mli. Amɛkɛ kaai babaoo kpe yɛ be mli ni amɛtsɔseɔ bii kpawo lɛ. Yɛ sɛɛfimɔ ni yɔɔ kpɛŋŋ ni Michael ŋa kɛha hewɔ lɛ, efee bɔ ni eeenyɛ koni efee toiboo eha kita ni Biblia lɛ kɛhaa tsɛmɛi lɛ: “Nyɛlɛa [nyɛbii lɛ] yɛ Nuntsɔ [Yehowa, NW] lɛ tsɔsemɔ kɛ ŋaawoo lɛ mli.” (Efesobii 6:4) Shi bei komɛi lɛ, naagbai teɔ shi.

Akɛ nɔkwɛmɔ nɔ lɛ, gbekɛbii hii ni kpalaa tsinai ni yɔɔ Afrika lɛ sumɔɔ ni amɛfee amɛ fɔlɔi krokomɛi atsinai lɛ ekome, koni amɛna be babaoo kɛfee ekome kɛshwɛ. Bei komɛi lɛ, amɛfeɔ efɔŋ, ni amɛgbaa saji ni esaaa akɛ amɛgbaa. Kɛ Michael bihii lɛ miiya ni amɛyakpala weku lɛ tsinai lɛ, ekɛɔ amɛ veveeve ni amɛkɛ gbekɛbii komɛi akabɔ. (Yakobo 4:4) Kɛlɛ, bei komɛi kɛ ejɛ nitsumɔ eeeba shia lɛ, enaa akɛ amɛmiifee nakai. Enɛ hewɔ lɛ, ebiɔ ni egbala amɛtoi.—Abɛi 23:13, 14.

Ani osusuɔ akɛ Michael yɛ veveeve tsɔ yɛ ebii lɛ anɔ? Mɛi komɛi baanu he nakai, shi Yesu Kristo kɛɛ akɛ, “abuɔ nilee jalɔ kɛtsɔɔ enitsumɔi anɔ.” (Mateo 11:19, NW) Michael kɛ Alphina ha suɔmɔ kɛ miishɛɛ hi amɛshia lɛ mli, ni amɛkɛ amɛbii lɛ hiɔ shi bei saŋŋ, ni amɛtsɔɔ amɛ Biblia lɛ mli saji kɛ anɔkwalei lɛ.

Michael kɛ Alphina yɛ biyei ejwɛ—Thembekile, Siphiwe, Tholakele, kɛ Thembekani. Nyɔŋmɔ Maŋtsɛyeli lɛ he sanekpakpa lɛ be-fɛɛ shiɛlɔi ji amɛ fɛɛ. Amɛ bihii lɛ ateŋ mɛi enyɔ miisɔmɔ akɛ onukpai asɛinɔtalɔi yɛ Yehowa Odasefoi asafoi lɛ amli. Amɛ binuu ni ji etɛ lɛ, mɔ ni eŋa hu ji be-fɛɛ sanekpakpa jajelɔ lɛ sɔmɔɔ akɛ asafoŋ sɔɔlɔ.

Akɛ omanyeyeli ejɔɔ fɔlɔi Kristofoi pii ni yɔɔ wekui ni dara lɛ yɛ amɛbii lɛ atsɔsemɔ hewɔ. Shi kɛlɛ, gbekɛbii komɛi ní nine shɛɔ fɔlɔi kpakpai akwɛmɔ nɔ lɛ shĩɔ anɔkwale lɛ. Ŋwanejee ko bɛ he akɛ amɛ fɔlɔi haa Yesu abɛbua ni kɔɔ bi nyenyeŋtswi lɛ he lɛ hiɔ amɛjwɛŋmɔ mli, ni amɛnaa hiɛnɔkamɔ akɛ amɛ binuu loo biyoo lɛ baatsake etsui, ní yɛ naagbee lɛ, ahere eyiwala.—Luka 15:21-24.

Shi awerɛho sane ji akɛ, fɔlɔi Kristofoi komɛi abii fɛɛ miije amɛdɛŋ kɛmiibote je lɛŋ. Enɛ ji sane ko ni he hiaa ni yɔɔ Afrika hei komɛi, he ni etamɔ nɔ ni gbekɛbii bɔɔ mɔdɛŋ yɛ aahu kɛyashiɔ amɛdaraa yɛ afii amli lɛ. Kɛkɛ lɛ, beni amɛbatsɔmɔ obalahii kɛ obalayei lɛ, Satan je lɛ mli jeŋba gbohii gbɛi lɛ gbalaa amɛ. (1 Yohane 5:19) Enɛ hewɔ lɛ, tsɛmɛi pii esaaa mɛi ni sɔmɔɔ akɛ asafoŋ onukpai. (1 Timoteo 3:1, 4, 5) Eyɛ faŋŋ akɛ, esa akɛ tsɛ Kristofonyo asusu lɛ diɛŋtsɛ eshia mli bii lɛ ayiwalaheremɔ lɛ he akɛ eji sane ko ni he hiaa waa diɛŋtsɛ. No hewɔ lɛ, mɛni fɔlɔi baanyɛ afee koni amɛkɛhere amɛbii lɛ ayiwala?

Feemɔ Ohe Naanyo ni Bɛŋkɛɔ Mɔ Kpaakpa

Jeee emuu pɛ kɛkɛ Yesu ye, shi moŋ, enɔ kwɔ kwraa fe adesai krokomɛi fɛɛ yɛ nilee kɛ niiashikpamɔ mli. Kɛlɛ, ekɛ ekaselɔi ni yeee emuu lɛ ye akɛ enanemɛi ni bɛŋkɛ lɛ kpaakpa. (Yohane 15:15) No hewɔ ni amɛsumɔɔ ni amɛkɛ lɛ ahi shi lɛ, ni amɛnaa ekãa kɛ amɛna lɛ. (Yohane 1:14, 16, 39-42; 21:7, 15-17) Fɔlɔi baanyɛ akase nii kɛjɛ enɛ mli. Taakɛ tsei bibii kɛ enɔ baai ni egbɛlɛ amɛmli etsɔɔ hulu la ni edɔ lɛ ji lɛ, nakai gbekɛbii naa ekãa, kɛ́ suɔmɔ kɛ naanyobɔɔ shihilɛ ko yɛ shia lɛ mli.

Fɔlɔi, ani nyɛbii lɛ kɛ nibii ni amɛsusuɔ he lɛ fɛɛ baa nyɛŋɔɔ be fɛɛ be ni amɛsheee gbeyei? Ani oboɔ amɛ toi? Dani ooomu sane ko naa lɛ, ani onuɔ amɛsusumɔi kɛ henumɔi ashishi bɔni afee ni onu sane muu lɛ fɛɛ shishi jogbaŋŋ? Ani oŋmɛɔ otsui shi ni oyeɔ obuaa amɛ koni amɛna sanebimɔi komɛi ahetoo kɛtsɔ saji ni okɛ amɛ taoɔ mli yɛ Biblia woji amli lɛ nɔ?

Yoofɔyoo ko ni yɔɔ South Africa lɛ tsɔɔ mli akɛ: “Kɛjɛ klɛŋklɛŋ gbi nɔ ni wɔbiyoo lɛ je skul shishi lɛ, wɔwo lɛ hewalɛ koni ekɛɛ wɔ nibii ni afee yɛ gbi lɛ mli. Akɛ nɔkwɛmɔ nɔ lɛ, mibiɔ akɛ: ‘Namɔ okɛye nii shwane lɛ? Kɛɛmɔ mi nɔ ko yɛ nyɛ tsɔɔlɔ hee lɛ he. Te onaa lɛ tɛŋŋ? Mɛɛ nifeemɔi ato he gbɛjianɔ kɛha otsi lɛ?’ Gbi ko lɛ, wɔbiyoo lɛ ba shia ebakɛɛ wɔ akɛ Blɔfo wiemɔ tsɔɔlɔ lɛ kɛ klasbii lɛ baaya ni amɛyakwɛ sini ko ní yɛ sɛɛ mli lɛ akɛbaaka amɛjwɛŋmɔ akwɛ. Sane yɛ sini lɛ gbɛi lɛ he. Beni wɔtao mli lɛ, wɔna akɛ ejeee nɔ ni esa akɛ Kristofonyo kwɛɔ. Wɔgba he sane ákɛ weku. Gbi ni nyiɛ sɛɛ lɛ, wɔbiyoo lɛ yana tsɔɔlɔ lɛ, ni etsɔɔ mli akɛ, esumɔŋ ni eyakwɛ sini lɛ eko, ejaakɛ jeŋbai ahe mfonirii ni abaajie lɛ kɛ e-Kristofoi ahemɔkɛyelii kpaŋ gbee. Tsɔɔlɔ lɛ susu sane lɛ he ekoŋŋ, ni sɛɛ mli lɛ, eda wɔbiyoo lɛ shi, ni ekɛɛ akɛ esumɔŋ ni ekɛ klasbii lɛ ayakwɛ nɔ ko ni baaha eshwa ehe.” Mɔ he susumɔ ni suɔmɔ yɔɔ mli ni fɔlɔi nɛɛ tee nɔ amɛjie kpo amɛtsɔɔ yɛ amɛ biyoo lɛ yiwalaheremɔ he lɛ wo yibii kpakpai. Eyɛ miishɛɛ kɛ jwɛŋmɔ kpakpa, ni eesɔmɔ ákɛ mɔ ni kɛ ehe eha ni miitsu nii yɛ Watch Tower Bible and Tract Society nitsumɔhe nine ni yɔɔ South Africa lɛ bianɛ.

Yesu fee nɔkwɛmɔ nɔ ni ekaaa yɛ bɔ ni ekɛ gbɔmɛi krokomɛi abii ye ha lɛ mli efɔ shi. Ena ekɛ amɛshihilɛ he miishɛɛ. (Marko 10:13-16) Kwɛ bɔ ni esa akɛ fɔlɔi ana miishɛɛ ákɛ amɛkɛ amɛ diɛŋtsɛ amɛbii aaatsu nii! Yɛ Afrika hei komɛi lɛ, efeɔ tsɛ ko hiɛgbele akɛ abaana lɛ ni ekɛ ebihii miitswa bɔɔl loo ni ekɛ amɛ miishwɛ shwɛmɔi komɛi. Shi esaaa akɛ tsɛ Kristofonyo ko nuɔ he akɛ ehe hiaa tsɔ fe bɔ ni abaana lɛ ni ekɛ ebii miifee nii. Fɔlɔi ni sumɔɔ ni amɛkɛ amɛbii aye bei ahe hiaa gbekɛbii. Enɛ haa efeɔ mlɛo kɛhaa gbekɛbii ni amɛtsɔɔ nɔ ni amɛsusuɔ he. Kɛ aku hiɛ afɔ henumɔŋ hiamɔ nii ni tamɔ nɛkɛ nɔ lɛ, ekolɛ ebaaha gbekɛbii lɛ amli afu loo amɛtse amɛhe titri lɛ, kɛ agbalaa amɛtoi daa.

Yɛ be mli ni eŋmaa wolo eyaha Kolosebii lɛ yɛ saji ni kɔɔ wekui ateŋ wekukpaa he lɛ, Paulo kɛɛ: “Nyɛ tsɛmɛi lɛ, nyɛkawoa nyɛbii amli la, koni amɛtsui akafã.” (Kolosebii 3:21) Ekolɛ enɛ tsɔɔ akɛ, bei komɛi lɛ, toigbalamɔ ni fa tsɔ kɛ naanyobɔɔ fioo ko pɛ ni eŋmɛɛɛ pɛpɛɛpɛ yɔɔ. Etamɔ nɔ ni gbekɛbii, ní mɛi ni eye kɛjɛ afii 13 kɛyashi 19 fata he, ni asumɔɔ amɛ ni abuɔ amɛ waa lɛ baakpɛlɛ tsɔsemɔ ni he hiaa lɛ nɔ oya.

Nyɔŋmɔ Suɔmɔ Lɛ

Gboshinii ni jara wa waa ni fɔlɔi baanyɛ ashi aha amɛbii ji suɔmɔ ni amɛ diɛŋtsɛ amɛjieɔ kpo amɛtsɔɔ lɛ he nɔkwɛmɔ nɔ ni amɛaafee amɛfɔ shi. Ehe hiaa ni gbekɛbii ana, ni amɛnu ni amɛfɔlɔi miiwie, ní amɛmiijie suɔmɔ ni amɛyɔɔ kɛha Nyɔŋmɔ lɛ kpo amɛmiitsɔɔ yɛ anɔkwale mli. Obalanuu ko ni sɔmɔɔ yɛ Watch Tower Bible and Tract Society lɛ nitsumɔhe nine ni yɔɔ South Africa lɛ tsɔɔ mli akɛ: “Beni miji gbekɛ nuu lɛ, miyeɔ mibuaa mitsɛ yɛ shia lɛ nitsumɔi amli. Minaa miishɛɛ kɛ miiye miibua lɛ, nɔ hewɔ lɛ kɛkɛ ji akɛ, Ataa hiɛ sɔɔ nibii bibii ni mifeɔ lɛ diɛŋtsɛ. Ekɛ be lɛ tsuɔ nii ni ekɛgbaa mi saji pii ni kɔɔ Yehowa he. Akɛ nɔkwɛmɔ nɔ lɛ, mikaiɔ Hɔɔ ko beni wɔtsuɔ nii waa kɛhuɔ shia lɛ kpo lɛ nɔ lɛ. No mli lɛ jeŋ edɔ waa diɛŋtsɛ. Latsaa miitsa Ataa, no hewɔ lɛ, mijo foi miyafo nu glasei enyɔ, ni mikɛ ais wo amɛmli miha lɛ. Ataa kɛɛ: ‘Mibinuu, ani oona nilelɔ ni Yehowa ji? Ais tɛoɔ nu hiɛ. Eji eyaa nu shishi kulɛ, wala bɔɔ nii fɛɛ ni yɔɔ nu kpaakpoi kɛ nu bui amli fɛɛ baagboi. Yɛ no najiaŋ lɛ, ais tsuɔ nii akɛ nɔ ni haa nii ahe tamɔ kuntu! Ani enɛ yeee ebuaaa wɔ koni wɔle Yehowa jogbaŋŋ?’a Mina be mikɛsusu he yɛ sɛɛ mli beni áwo mi tsuŋ yɛ mihe ni mikɛwooo maŋsaji amli lɛ hewɔ. Gbi gbɛkɛ ko beni minii efee mɔbɔ yɛ tsuŋwoo lɛ mli lɛ, mikai nakai wiemɔi ni Ataa wie lɛ. Mɛɛ shishinumɔ yɔɔ mli nɛkɛ! Kɛ manyɛ lɛ, maja Yehowa kɛya naanɔ.”

Hɛɛ, ehe hiaa ni gbekɛbii ana akɛ amɛ fɔlɔi jieɔ suɔmɔ ni amɛyɔɔ kɛha Nyɔŋmɔ lɛ kpo amɛtsɔɔ yɛ nibii fɛɛ ni amɛfeɔ lɛ amli. Esa ni ana akɛ, nɔ titri ni kanyaa mɔ, ni haa anaa mɔ ko yɛ Kristofoi akpeei ashishi, he ni akɛwoɔ shiɛmɔ nitsumɔ lɛ kɛ weku Biblia kanemɔ kɛ nikasemɔ mli lɛ ji, suɔmɔ ni ayɔɔ kɛha Nyɔŋmɔ, kɛ suɔmɔ mli ni ajɛɔ aboɔ lɛ toi lɛ. (1 Korintobii 13:3) Nɔ ni he hiaa fe fɛɛ lɛ, esa akɛ suɔmɔ ni ayɔɔ kɛha Nyɔŋmɔ lɛ aje kpo yɛ weku sɔlemɔi ni jɛ tsuiŋ fɛɛ mli lɛ mli. Gboshinii ko ni tamɔ nɛkɛ ni okɛaaha obii lɛ nyɛŋ afee nɔ ni ama nɔ mi babaoo tsɔ̃. No hewɔ ni awo Israelbii lɛ kita akɛ: “Suɔmɔ Yehowa, o-Nyɔŋmɔ lɛ, kɛ otsui fɛɛ kɛ osusuma fɛɛ kɛ ohewalɛ fɛɛ! Ni nɛkɛ wiemɔi nɛɛ ni miwoɔo he kita ŋmɛnɛ gbi nɛɛ aka otsui nɔ ni ojwɛŋ nɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛteŋ kɛ beni oka shi kɛ beni ote shi.”—5 Mose 6:5-7; okɛto Mateo 22:37-40 he.

Gbɛtsii nii wulu ni haaa wɔsumɔ Nyɔŋmɔ ni wɔbo lɛ toi ji esha gboshinii ni ákɛfɔ wɔ lɛ. (Romabii 5:12) No hewɔ lɛ, Biblia lɛ hu woɔ kita akɛ: “Nyɛ mɛi ni nyɛsumɔɔ Yehowa lɛ, nyɛnyɛa efɔŋ.” (Lala 97:10) Bei babaoo lɛ, susumɔi gbohii ji nɔ ni kɛ nifeemɔi fɔji baa. Bɔni afee ni gbekɛ ko atsi ehe kɛjɛ enɛɛmɛi ahe lɛ, esa akɛ ena subaŋ kroko hu ni he hiaa waa.

Nyɔŋmɔ Gbeyeishemɔ

Suɔmɔ ni bulɛ kɛ gbeyeishemɔ akɛ afeŋ nɔ ko ni esaŋ Yehowa hiɛ fata he lɛ ji nɔ ko ni asumɔɔ waa. Yesu Kristo diɛŋtsɛ fee nɔkwɛmɔ nɔ ni fe fɛɛ efɔ shi, ákɛ mɔ ni náa “Yehowa gbeyeishemɔ” lɛ he miishɛɛ. (Yesaia 11:1-3) Nakai gbeyeishemɔ lɛ he hiaa yɛ be mli ni gbekɛ lɛ daa kɛboteɔ obalahiaŋ, ni ebɔiɔ bɔlɛnamɔ mli akɔnɔi namɔ lɛ. Nyɔŋmɔ gbeyeishemɔ baanyɛ aye abua obalanyo koni etsi ehe kɛjɛ je lɛŋ nɔnyɛɛi ni baanyɛ ekɛ lɛ awo jeŋba shara mli lɛ he. (Abɛi 8:13) Yɛ akutsei komɛi amli lɛ, fɔlɔi tsiɔ amɛhe kɛjɛɔ tsɔɔmɔ ni amɛaatsɔɔ amɛbii lɛ bɔ ni amɛaafee amɛdamɔ bɔlɛnamɔ mli kaai anaa amɛha lɛ he. Yɛ anɔkwale mli lɛ, mɛi pii nuɔ he akɛ eji tɔmɔ akɛ aaagba enɛɛmɛi ahe saji. Shi mɛni ejɛ hiɛ ni fɔlɔi eku efɔ nibii ni tamɔ nɛkɛ nɔ lɛ mli eba?

Tsofafeelɔi etɛ ni atsɛɔ amɛ Buga, Amoko, kɛ Ncayiyana bi gbekɛbii yei 1,702 kɛ gbekɛbii hii 903 ni jɛ Transkei akrowa ni yɔɔ South Africa lɛ saji. South African Medical Journal wolo lɛ bɔ amaniɛ akɛ, “gbekɛbii yei oha mlijaa 76 kɛ gbekɛbii hii oha mlijaa 90.1 ena bɔlɛnamɔ mli niiashikpamɔ momo yɛ nii amli kwɛmɔ nɛɛ mli.” Kɛ afee afii lɛ fɛɛ ekome ni aja mli lɛ, gbekɛbii yei ni eye afii 15, kɛ mɛi pii ji mɛi ni anyɛ amɛnɔ ni akɛ amɛ ná bɔlɛ. Amɛteŋ mɛi ni fa fe 250 ena musu shikome loo nɔ ni fa fe nakai. Nɔ kroko ni ejɛ mli eba ji bɔlɛnamɔ mli helai pii.

Eyɛ faŋŋ akɛ, fɔlɔi pii enaaa hiamɔ ni yɔɔ tsɔɔmɔ ni amɛaatsɔɔ amɛbii lɛ bɔ ni amɛaatsi amɛhe kɛaajɛ bɔlɛnamɔ ni tsɔɔ gbalashihilɛ hiɛ lɛ he. Yɛ no najiaŋ lɛ, adafitswaa wolo lɛ tsĩ tã akɛ: “Ajieɔ gbekɛbii akwɛmɔ, kɛ yoofɔyofeemɔ yi akɛ amɛji yoofeemɔ su ni fe fɛɛ yɛ Transkei akrowa lɛ nifeemɔi amli, ni gbekɛbii yei lɛ yɔseɔ enɛ oya beni amɛtee tsui asɛɛ lɛ sɛɛ.” Ayeɔ naagba ni tamɔ enɛ he odase yɛ je lɛŋ hei krokomɛi.

Gbekɛbii pii ni yɔɔ Afrika lɛ wieɔ amɛshiɔ amɛfɔlɔi yɛ nɔ hewɔ ni amɛyeee amɛbuaaa amɛ koni amɛnu amɛbɔlɛnamɔ mli akɔnɔi ashishi lɛ. Fɔlɔi Kristofoi komɛi ehao waa akɛ amɛkɛ Your Youth—Getting the Best Out Of Itb wolo lɛ aaatsu nii. Etsɔɔ gbɛ ni yɔɔ nyam ni aaatsɔ nɔ akɛ fɔmɔ nii lɛ atsu nii, kɛ tsakemɔi ni baa beni mɔ ko daa lɛ mli yɛ baafai 20-3.

Esa akɛ ajie fɔlɔi Kristofoi ni damɔɔ kaa ni ji sanegbaa ni kɔɔ Nyɔŋmɔ susumɔ yɛ bɔlɛnamɔ he, ni amɛkɛ amɛbii susuɔ he lɛ naa lɛ ayi. Atsuɔ enɛ he nii jogbaŋŋ, kɛ́ awie he fiofio yɛ gbekɛ lɛ nyɛmɔ ni ekɛnuɔ sane shishi lɛ naa. Kɛ́ aaadamɔ sane tamɔ afii ni gbekɛ lɛ eye lɛ nɔ lɛ, ekolɛ ehe baahia ni fɔlɔ lɛ aje gbɛ atsĩ gbɔmɔtso lɛ hei komɛi kɛ nɔ ni amɛtsuɔ lɛ atã. Kɛ jeee nakai lɛ, gbekɛ ni bɛ niiashikpamɔ lɛ nuŋ nɔ ni akɛɔ lɛ shishi.—1 Korintobii 14:8, 9.

Tsɛ ko ni yɔɔ South Africa ni yɔɔ biyei enyɔ kɛ binuu kome lɛ tsɔɔ akɛ: “Yɛ be kɛ bei amli lɛ, minaa hegbɛi mikɛ gbekɛbii yei lɛ po susuɔ saji ni henumɔ yɔɔ mli ni kɔɔ bɔlɛnamɔ he lɛ he. Kɛlɛ, miŋa hiɛ hiɔ wɔ biyei lɛ anɔ waa, ni ekɛ Your Youth—Getting the Best Out Of It wolo lɛ tsuɔ nii. [Kwɛmɔ baafai 26-31.] Beni mibinuu lɛ ye afii 12 lɛ, mikpɛ miyiŋ akɛ mikɛ lɛ baashara shi kɛya shɔŋŋ yɛ gɔji lɛ anɔ. Yɛ nakai be lɛ mli lɛ, wɔsusu bɔ ni gbekɛ nuu gbɔmɔtso lɛ daa, kɛ yiŋtoo pɔtɛ̃ɛ ni enɛ baatsu he nii yɛ sɛɛ mli yɛ gbalashihilɛ mli lɛ he fitsofitso. Mikɛ lɛ susu bɔ ni ehe hiaa ni etsi ehe kɛjɛ jeŋba ni baa shi, ni ji fɔmɔ nii ni akɛshwɛɔ kɛyashiɔ mɔ he baa lɛ he, ní ekɛ bulɛ kɛ woo aha gbekɛbii yei—taakɛ ebaabu enyɛ kɛ enyɛmimɛi yei lɛ.”

Sɛɛnamɔi ni Miishɛɛ Yɔɔ Mli

Tsɛ kɛ nyɛ lɛ ni atsĩ amɛ tã lɛ tsu nii waa, ni amɛmii shɛɔ amɛhe akɛ nibii kpakpai ejɛ amɛbii etɛ ni amɛtsɔse amɛ lɛ mli eba. Bianɛ lɛ, gbɔmɛi etɛ lɛ fɛɛ edara, ni amɛkɛ Kristofoi anɔkwafoi ebote gbalashihilɛ mli. Amɛ bihii lɛ kɛ shaahii lɛ fɛɛ sɔmɔɔ akɛ onukpai yɛ Kristofoi asafo lɛ mli, ni gbalashihilɛ lɛ mli bii lɛ enyɔ kɛ afii pii esɔmɔ yɛ be-fɛɛ sanekpakpa jajemɔ nitsumɔ lɛ mli.

Hɛɛ, fɔlɔi ni tsuɔ nii waa kɛhaa amɛshia mli bii lɛ ayiwalaheremɔ lɛ baanyɛ akpa sɛɛnamɔi ni yɔɔ miishɛɛ gbɛ kɛjɛ gbekɛbii ni halaa akɛ amɛaakpɛlɛ Biblia tsɔɔmɔi ni tamɔ nɛkɛ nɔ lɛ adɛŋ, ejaakɛ Abɛi 23:24, 25 (NW) kɛɔ akɛ: “Mɔ ni fɔɔ bi nilelɔ lɛ, emii aaashɛ ehe yɛ ehewɔ. Otsɛ kɛ onyɛ mii aaashɛ amɛhe.” Susumɔ weku agbo ni atsĩ tã yɛ sane nɛɛ hiɛkpamɔ lɛ mli lɛ he okwɛ. Alphina kɛɛ: “Kɛ misusu mumɔŋ hiɛyaa ni mibii lɛ efee lɛ he lɛ, mitsui yiɔ kɛ miishɛɛ kɛtekeɔ nɔ.” Eba akɛ, fɔlɔi Kristofoi fɛɛ baatsu sɛɛnamɔi ni miishɛɛ yɔɔ mli nɛɛ ahe nii.

[Shishigbɛ niŋmai]

[Mfoniri ni yɔɔ baafa 23]

Tsɛ baanyɛ atao be ni sa koni etsɔɔ anɔkwalei ni yɔɔ shihilɛ mli lɛ mli