Mikase Bɔ ni akɛ He Fɔ̃ɔ Yehowa Nɔ

TAAKƐ JÁN KORPA-ONDO GBA

No mli lɛ afi 1942 ni, ni Hungary asraafoi miibu mihe yɛ Kursk gbɛ, yɛ Russia. No mli lɛ wɔji Axis (Nɔyeli Hewalɛi Etɛ) ni kɛ Russiabii lɛ wuu beni awuɔ Jeŋ Ta II lɛ. Atsa migbonyobu, ni aha mi minitii nyɔŋma koni mikɛkpɛ miyiŋ, kɛji akɛ mikɛ miwaonaa gbɛi baawo wolo ni tsɔɔ akɛ mijeee Yehowa Odasefoi lɛ ateŋ mɔ ko dɔŋŋ lɛ shishi. Dani matsɔɔ nyɛ nɔ ni ba kɛtsa nɔ lɛ, nyɛhaa magbaa nyɛ bɔ ni fee ni miyaje jɛmɛ.

AFƆ́ mi afi 1914 yɛ Zahor akrowa bibioo lɛ mli, he ni amrɔ nɛɛ lɛ ekã Slovakia bokagbɛ lɛ. Yɛ Jeŋ Ta I lɛ sɛɛ lɛ, Zahor batsɔ Czechoslovakia maŋ hee ni atse lɛ fã. Shiai aaafee 200 kɛ sɔlemɔtsui enyɔ, Greek Osɔfo kome kɛ mɔ kroko lɛ ni ji Calvinnyo yɔɔ wɔkrowa lɛ.

Eyɛ mli akɛ mitee Calvinist Sɔlemɔ lɛ moŋ, shi nɔ ko etsĩii minaa yɛ jeŋba gbonyo mli. Nuu ko ni esoro lɛ kwraa lɛ yɛ wɔmasɛi nɔŋŋ. Gbi ko lɛ ekɛ mi je sanegbaa shishi, ni ema mi Biblia ko. Nakai be lɛ ji klɛŋklɛŋ be ni mikɛmɔ nakai wolo lɛ mli. Aaafee nɛkɛ beaŋ lɛ yɛ afi 1926 mli lɛ, mikɛ Barbora bote gbalashihilɛ mli, ni etsɛɛɛ ni wɔfɔ bii enyɔ, Barbora kɛ Ján.

Mije shishi mibɔi Biblia lɛ kanemɔ, shi nibii pii yɛ ni minuuu shishi. No hewɔ lɛ mitee osɔfo lɛ ŋɔɔ, ni mibi lɛ koni eye ebua mi. Ekɛɛ akɛ: “Afee Biblia lɛ aha woloŋlelɔi pɛ, kaabɔ mɔdɛŋ po akɛ ooonu shishi.” Kɛkɛ ni efɔ̃ mi nine koni wɔtswa kaad.

No sɛɛ lɛ, mitee nuu ni kɛ Biblia lɛ ma mi lɛ ŋɔɔ. Eji Biblia Kaselɔ, taakɛ atsɛɔ Yehowa Odasefoi yɛ no bei amli lɛ. Eyɛ he miishɛɛ akɛ eeeye ebua mi, ni yɛ be fioo komɛi asɛɛ lɛ mihiŋmɛi bɔi gbelemɔ. Mikpa dãa ni minuɔ shɛii lɛ numɔ, ni mije shishi miba mijeŋ jogbaŋŋ; mibɔi Yehowa he wiemɔ kɛ mɛi krokomɛi tsɔɔmɔ. Yɛ afi 1920 afii lɛ amli lɛ, Biblia mli anɔkwalei hé shi yɛ Zahor, ni etsɛɛɛ ni ato Biblia Kaselɔi akuu ni yɔɔ ekãa ama shi.

Shi kɛlɛ, jamɔŋ shitee-kɛ-woo ni mli wa yɛ. Osɔfo ni yɔɔ jɛmɛ lɛ ha miwekumɛi lɛ ateŋ mɛi pii te shi amɛwo mi, ni amɛkɛɔ akɛ miye sɛkɛ. Shi mibɔi yiŋtoo namɔ yɛ mishihilɛ mli, ni mitswa mifai shi akɛ masɔmɔ Yehowa, anɔkwa Nyɔŋmɔ koome lɛ. Enɛ hewɔ lɛ, yɛ afi 1930 lɛ, mikɛ baptisimɔ fee mihenɔjɔɔmɔ kɛha Yehowa lɛ he okadi.

Kaai ni Naa Wa Shishijee

Yɛ afi 1938 mli lɛ, Hungary ni kɛ Germany fee ekome yɛ Jeŋ Ta II lɛ mli lɛ baye wɔkpokpaa lɛ nɔ. Yɛ nakai bei amli lɛ Odasefoi aaashɛ 50 yɛ wɔkrowa lɛ, ni mɛi ni yɔɔ jɛmɛ lɛ shɛɛɛ akpe. Eyɛ mli akɛ shiɛmɔ kɛ wɔwala kɛ heyeli mli ni wɔyɔɔ lɛ baawo oshara mli moŋ, shi wɔtee nɔ wɔfee nakai.

Yɛ afi 1940 mli lɛ, agbala mi awo Hungary asraafoi anitsumɔ lɛ mli. Mɛni mafee? Ojogbaŋŋ, mikane Biblia mli gbalɛi ni tsɔɔ akɛ gbɔmɛi kɛ amɛ akplɔi aaafee nibii ni kɛ toiŋjɔlɛ baa, ni mile akɛ yɛ be ni sa mli lɛ Nyɔŋmɔ baajie tai fɛɛ kɛjɛ shikpɔŋ lɛ nɔ. (Lala 46:9; Yesaia 2:4) Enɛ hewɔ lɛ, miná nyɛɛ kɛha ta, ni mikpɛ miyiŋ akɛ mifataŋ asraafoi lɛ ahe, ekɔɔɔ he eko nɔ ni baajɛ mli aba.

Awo mi tsũŋ nyɔji 14, ni misɔmɔ yɛ tsũŋwoo mli yɛ Pécs, yɛ Hungary. Odasefoi krokomɛi enumɔ yɛ nakai tsũŋwoohe lɛ nɔŋŋ mli, ni eŋɔɔ wɔnaa akɛ wɔnyɛ wɔkɛ wɔhe bɔ. Shi yɛ be saŋŋ ko sɛɛ lɛ, akɛ dadei fimɔ minaji ni ayawo mi tsũŋ yɛ he ko banee. Kɛ wɔkpoo akɛ wɔfeee nɔ ko ni kɛ ta lɛ yɔɔ tsakpaa lɛ, ayiɔ wɔ. Agbɛnɛ hu anyɛ wɔnɔ koni wɔdamɔ shi jaŋŋ gbi muu fɛɛ, bɛja ŋmɛlɛtswai enyɔ hejɔɔmɔ yɛ shwane mli pɛ. Nɛkɛ yiwaa nɛɛ tee nɔ nyɔji abɔ. Shi kɛlɛ wɔná miishɛɛ ejaakɛ wɔhiɛ henilee kpakpa yɛ wɔ Nyɔŋmɔ lɛ hiɛ.

Sane ni Aaaŋmɛɛ he Kɛsaa He Sane Lɛ

Gbi ko lɛ Katolik osɔfoi akuu ni feɔ mɛi 15 ba koni amɛbabɔ mɔdɛŋ ní amɛkɔne wɔyiŋ ni wɔna akɛ ehe miihia ni wɔfi ta lɛ sɛɛ kɛtsɔ asraafoi lɛ ni wɔɔfata amɛhe lɛ nɔ. Yɛ be mli ni amɛkɛ wɔ gbaa sane lɛ, wɔkɛɛ akɛ: “Kɛ nyɛnyɛ nyɛtsɔɔ kɛjɛ Biblia lɛ mli akɛ susuma lɛ gbooo ni akɛ wɔbaaya ŋwɛi kɛ wɔ gboi yɛ ta lɛ mli lɛ, no lɛ wɔbaafata asraafoi lɛ ahe.” Yɛ anɔkwale mli lɛ, amɛnyɛɛɛ amɛtsɔɔ, ni amɛsumɔɔɔ ni amɛtsaa sanegbaa lɛ nɔ.

Mitsũŋwoo lɛ ba naagbee yɛ afi 1941 mli, ni miikpa gbɛ akɛ masaa mikɛ miweku lɛ baafee ekome ekoŋŋ. Yɛ no najiaŋ lɛ akɛ mi wo dade adabaŋi amli kɛtee he ko ni asraafoi lɛ yɔɔ yɛ Sá-ros-pa-tak, Hungary. Beni wɔyashɛ jɛmɛ lɛ, akɛ hegbɛ ha koni aŋmɛɛ mihe. Akɛɛ mi akɛ: “Nɔ ni he hiaa ni ofee nɔŋŋ ji ni okɛ owaonaa gbɛi awo shiwoo nɛɛ shishi akɛ, obaawo pengö 200 nyɔmɔ kɛ oku osɛɛ otee shia.”

Mibi akɛ: “Te aaafee tɛŋŋ eba lɛ nakai lɛ? Mɛni nyɛtao shika lɛ kɛyafee?”

Amɛkɛɛ mi akɛ: “Kɛ okɛ shika lɛ ba lɛ, abaaha bo odaseyeli wolo ko ni tsɔɔ akɛ oyayeee omanye yɛ be mli ni akwɛɔ akɛ oyɛ gbɔmɔtoŋ hewalɛ kɛha asraafoi anitsumɔ lɛ lo lɛ.”

Enɛ bafee yiŋkpɛɛ ko ni wa kɛha mi. Mikɛ nɔ ni fe afi ena nɔ̃, ni mɔbɔnalɛ ko kwraa bɛ mli; ni eetɔ mi. Agbɛnɛ kɛtsɔ kpɛlɛmɔ ni makpɛlɛ akɛ mawo shika ko he nyɔmɔ lɛ nɔ lɛ, abaanyɛ aŋmɛɛ mihe. Miwie blɛoo akɛ, “Masusu he.”

Te makpɛ miyiŋ tɛŋŋ? Miŋa kɛ mibii lɛ yɛ ni masusu amɛhe. Ojogbaŋŋ, yɛ nakai be lɛ mli lɛ, naanyo Kristofonyo ko ŋma mi wolo ni ekɛwo mi hewalɛ. Etsɛ Hebribii 10:38 lɛ sɛɛ, he ni Paulo tsɛ Yehowa wiemɔi lɛ ayisɛɛ yɛ lɛ: “Jalɔ ni jɛ hemɔkɛyeli mli lɛ yi aaana wala; ni kɛ ekpa yɛ mishɛɛ lɛ, misusuma naŋ ehe tsuijurɔ.” No sɛɛ etsɛɛɛ nɔŋŋ ni Hungarybii asraafoi onukpai ni yɔɔ asraafoi ashia lɛ kɛ mi bawie, mɔ kome kɛɛ akɛ: “Oleee bɔ ni wɔbuɔ bo wɔhaa yɛ Biblia mli shishitoo mlai ni ohiɛ mli kpɛŋŋ lɛ hewɔ! Kaaŋmɛɛ he!”

Enɔ jetsɛremɔ lɛ mitee nakai mɛi ni kɛɛ mi akɛ miwo pengö 200 koni amɛŋmɛɛ mihe lɛ aŋɔɔ, ni mikɛɛ amɛ akɛ: “Akɛni Yehowa Nyɔŋmɔ ŋmɛ gbɛ koni awo mi tsũŋ hewɔ lɛ, lɛ nɔŋŋ ebaakwɛ koni aŋmɛɛ mihe. Miwoŋ shika ko ni akɛjie mi.” No hewɔ lɛ, awo mi tsũŋ afii nyɔŋma. Shi jeee no ji mɔdɛŋ ni amɛbɔɔ koni amɛha maŋmɛɛ sane he ni mikɛsaa lɛ naagbee. Kojomɔhe lɛ kɛɛ mi akɛ amɛbaaŋmɛɛ mihe kɛji akɛ makpɛlɛ akɛ masɔmɔ akɛ asraafonyo nyɔji enyɔ pɛ, ni ehe ebahiaŋ ni mahiɛ tu po! Mikpoo no hu, ni mitsũŋwoo be lɛ je shishi.

Yiwaa lɛ Mli Wo Wu

Akɛ mi tee Pécs tsũŋwoohe lɛ ekoŋŋ. Agbɛnɛ lɛ yiwaa lɛ naa bawa kwraa fe tsutsu lɛ. Afimɔ miniji yɛ misɛɛ, ni afimɔ nomɛi yɛ ŋwɛi ni mitsotsoro shi nakai aaafee ŋmɛlɛtswai enyɔ. Nɔ ni jɛ mli ba ji akɛ, mikɔŋji enyɔ lɛ fɛɛ kpɔlɔ. Awa mi yi yɛ nɛkɛ gbɛ nɔ shii abɔ yɛ nyɔji ekpaa mli. Yehowa pɛ shi manyɛ mada akɛ miŋmɛɛɛ mihe mihaaa.

Yɛ afi 1942 mli lɛ, akɛ wɔteŋ kuu ko—maŋkwramɔŋ gboklɛfoi, Yudafoi, kɛ Yehowa Odasefoi 26—tee Kursk maŋtiase lɛ mli, ni ji he ko ni Germany asraafoi lɛ ehe shi yɛ lɛ. Akɛ wɔ wo Germanybii lɛ adɛŋ, ni amɛha gboklɛfoi lɛ tsu nii, ni amɛtereɔ niyenii, tui, kɛ atadei amɛyahaa asraafoi ni wuɔ ta lɛ. Wɔ ni ji Odasefoi lɛ, wɔkpoo nitsumɔ lɛ ejaakɛ eteɔ shi ewoɔ wɔhe ni wɔkɛwooo maŋ saji amli akɛ Kristofoi lɛ. No hewɔ lɛ, akɛ wɔ ku sɛɛ kɛyaha Hungarybii lɛ ekoŋŋ.

Yɛ naagbee lɛ, akɛ wɔ yawo Kursk tsũŋwoohe ni yɔɔ jɛmɛ lɛ mli. Akɛ rɔba kɛ ehe kpɔbii yi wɔ shii etɛ gbii babaoo. Ama miyitso atswɛrɛ ni migbee shi. Beni ama mi atswɛrɛ lɛ, misusu akɛ, ‘Gbele waaa kwraa.’ Mishɔ̃ kpɛŋŋ, no hewɔ lɛ minuuu nɔ ko he kwraa. Ahaaa wɔ niyenii ko kwraa gbii etɛ. Kɛkɛ ni akɛ wɔ tee kojomɔhe, ni abu mɛi ekpaa gbele fɔ́. Beni abuɔ mɛi lɛ fɔ́ lɛ, eshwɛ wɔteŋ mɛi 20.

Hemɔkɛyeli he kaai ni mikɛkpe yɛ nakai gbii lɛ amli yɛ Kursk, yɛ October 1942 lɛ ji nɔ ni naa wa fe fɛɛ ni mikɛkpe dã. Wɔsusumɔi fee tamɔ Maŋtsɛ Yehoshafat ni hi shi yɛ blema lɛ nɔ lɛ pɛpɛɛpɛ, beni ewebii lɛ kɛ naagbai ni naa wawai kpeɔ lɛ: “Wɔbɛ hewalɛ yɛ nɛkɛ ta babaoo nɛɛ ni baa wɔnɔ nɛɛ hiɛ ni wɔleee bɔ ni wɔɔfee, shi moŋ bo onɔ wɔhiŋmɛii jwere!”—2 Kronika 20:12.

Hungary asraafoi 18 bu wɔteŋ mɛi 20 lɛ he kɛtee ni wɔyatsa wɔgbonyobu. Beni wɔgbe bu lɛ tsaa lɛ naa lɛ, akɛɛ wɔ akɛ wɔyɛ minitii nyɔŋma ni wɔkɛ wɔwaonaa gbɛi aaawo wolo ko ni efã kaneɔ nɛkɛ shishi: “Yehowa Odasefoi atsɔɔmɔi lɛ ejaaa. Miheŋ miyeŋ aloo mifiŋ sɛɛ dɔŋŋ. Mawuu maha Hungary maŋ lɛ . . . Mikɛ miwaonaa gbɛi ni mikɛwo shishi nɛɛ miitsɔɔ akɛ miifata Roma Katolik Sɔlemɔ lɛ he.”

Yɛ minitii nyɔŋma lɛ sɛɛ lɛ, afã akɛ: “Nyɛtsɔa nyɛhe kɛyaa ninejurɔgbɛ! Nyɛshia ako kɛbotea gbonyobu lɛ mli!” Kɛkɛ ni afã akɛ: “Klɛŋklɛŋ gboklɛfonyo, kɛ gboklɛfonyo ni ji etɛ, nyɛyaa bu lɛ mli!” Aha nɛkɛ mɛi enyɔ nɛɛ minitii nyɔŋma ekoŋŋ koni amɛkɛkpɛ amɛyiŋ ni amɛkɛ amɛwaonaa gbɛi awo wolo lɛ shishi. Asraafoi lɛ ateŋ mɔ kome kpa fai akɛ: “Nyɛŋmɛɛa nyɛhemɔkɛyeli lɛ he, ní nyɛjea gbonyobu lɛ mli!” Mɔ ko mɔ ko etswaaa esɛŋ. Kɛkɛ ni asraafoi onukpa ni kwɛɔ amɛnɔ lɛ tswa amɛyi enyɔ lɛ fɛɛ tu.

Asraafonyo ko bi asraafonyo onukpa lɛ akɛ, “Ni mɛi ni eshwɛ lɛ hu?”

Eha hetoo akɛ, “Nyɛfimɔa amɛ. Wɔbaapiŋ amɛ fioo wɔfata he, koni kɛ atswa leebi ŋmɛji ekpaa lɛ wɔtswara amɛ tui.”

Mishe gbeyei amrɔ nɔŋŋ, jeee gbo ni magbo lɛ hewɔ, shi moŋ akɛni minyɛŋ madamɔ piŋmɔ lɛ naa, ni maŋmɛɛ sane he kɛsaa lɛ hewɔ. No hewɔ lɛ mitsi kɛtee hiɛgbɛ ni mikɛɛ akɛ: “Onukpa, wɔtɔ̃ tamɔ wɔnyɛmimɛi ni otswa amɛ tu lɛ nɔŋŋ. Mɛni hewɔ otswaaa wɔ tu nakai nɔŋŋ?”

Shi amɛtswaa wɔ. Afimɔ wɔniji awo wɔsɛɛ. Kɛkɛ ni afimɔ wɔniji kɛtsotsoro shi. Kɛ wɔmumɔ naa tã lɛ, kɛkɛ lɛ amɛtsi nu amɛshwie wɔhe. Piŋmɔ lɛ naa wa waa, ejaakɛ wɔgbɔmɔtso lɛ tsiimɔ ha wɔkɔŋji kpɔlɔ. Nɛkɛ piŋmɔ nɛɛ tee nɔ aaafee ŋmɛlɛtswai etɛ. Kɛkɛ ni trukaa lɛ, akɛ famɔ lɛ ba akɛ, akatswa Yehowa Odasefoi lɛ eko tu dɔŋŋ.

Shimɔ Kɛ Bokagbɛ Yaa —Kɛ Agbɛnɛ Foijee

Otsii etɛ sɛɛ lɛ, ato wɔnaa ni wɔshi akoŋ gbii fioo komɛi aaahu kɛyashi wɔyashɛ Don Faa lɛ naa. Mɛi ni kwɛɔ wɔnɔ lɛ kɛɛ wɔ akɛ akɛ wɔ ekuŋ sɛɛ kɛbaŋ akɛ hiɛkalɔi dɔŋŋ. Kɛ je tsɛre lɛ, ahaa wɔ nitsumɔ ni sɛɛnamɔ bɛ he, wɔtsaa bui ni wɔtsimɔɔ. Kɛ shɛ gbɛkɛ lɛ, wɔnáa hegbɛ fioo ni wɔkɛshɛraa shi.

Kɛ mikwɛ lɛ, minaa akɛ gbɛ̀i sɔrɔtoi enyɔ yɔɔ. Wɔbaanyɛ wɔgboi yɛ jɛmɛ nɔŋŋ, aloo wɔjo foi kɛjɛ Germanybii lɛ adɛŋ ni wɔkɛ wɔhe aha Russiabii lɛ. Wɔteŋ mɛi etɛ pɛ bɔ mɔdɛŋ akɛ wɔɔjo foi kɛfo Don Faa ni etsɔ ais lɛ. Yɛ December 12, 1942 gbi lɛ nɔ lɛ, wɔsɔle wɔha Yehowa ni wɔjo foi. Wɔyashɛ he ni Russiabii lɛ yɔɔ nɔŋŋ pɛ kɛkɛ ni akɛ wɔ fata gboklɛfoi ni shɛɔ 35,000 lɛ ahe. Beni agbiɛnaa be shɛɔ lɛ, no mli gboklɛfoi 2,300 pɛ yɔɔ wala mli lolo. Hɔmɔ egbe mɛi krokomɛi lɛ.

Heyeli, Shi Naagbai yɛ Lolo

Miyi ná wala yɛ tai krokomɛi lɛ amli, ní nyɔji abɔ fata he yɛ be mli ni eba naagbee lɛ sɛɛ ákɛ Russia gboklɛfonyo. Yɛ naagbee, yɛ November 1945 mli lɛ, miyi mli kɛtee shia yɛ Zahor. Wɔŋmɔ lɛ efite kwraa, no hewɔ lɛ ebi koni maku sɛɛ maje shishi kwraa ekoŋŋ. Miŋa kɛ mibii lɛ etsu nii yɛ ŋmɔ lɛ mli beni awuɔ ta lɛ, shi yɛ October 1944 mli lɛ, beni Russiabii lɛ bɛŋkɛɔ jɛmɛ gbɛ lɛ amɛtsi kɛtee bokagbɛ. Aloo nibii ni wɔyɔɔ lɛ fɛɛ kɛtee.

Nɔ ni ehiii fe fɛɛ lɛ ji akɛ, beni mishɛɔ shia lɛ no mli lɛ miŋa bɛ hewalɛ kwraa. Egbo yɛ February 1946 mli. No mli lɛ eye afii 38 pɛ. Wɔyɛ be fioo ko pɛ ni wɔkɛaaná ekome ni wɔsaa wɔfee ekoŋŋ lɛ mli ŋɔɔmɔ, yɛ be mli ni wɔkɛ nɔ ni fe afii enumɔ kɛ emli naagbai egbɛlɛ wɔmli lɛ.

Miná miishɛjemɔ kɛjɛ mimumɔŋ nyɛmimɛi lɛ adɛŋ, ni miyaa kpeei, ni mikɛ mihe woɔ shia-kɛ-shia sɔɔmɔ nitsumɔ lɛ mli. Yɛ afi 1947 mli lɛ, minyɛ mifa shika ni mikɛfã gbɛ kɛtee Brno, he ko ni jɛkɛmɔ shɛɔ aaafee kilomitai 400, koni maya kpee. Minine shɛ miishɛjemɔ kɛ ekãawoo nɔ kɛjɛ minyɛmimɛi Kristofoi lɛ aŋɔɔ, ni Nathan H. Knorr ni no mli lɛ eji ji Buu Mɔɔ Asafo lɛ Biblia kɛ Woji Bibii lɛ asɛinɔtalɔ lɛ fata he.

Heyeli ni wɔná yɛ tawuumɔ lɛ sɛɛ lɛ sɛɛ etsɛɛɛ. Yɛ afi 1948 mli lɛ, Kɔmunistbii lɛ bɔi wɔnɔ nyɛɛ. Yɛ afi 1952 lɛ, amɔmɔ nyɛmimɛi ni nyiɛɔ hiɛ yɛ Yehowa Odasefoi anitsumɔ mli lɛ ateŋ mɛi babaoo, ni akɛ hegbɛ ha mi akɛ mikwɛ asafoi lɛ anɔ. Yɛ afi 1954 lɛ, amɔ mi hu ni awo mi tsũŋ afii ejwɛ. Awo mibinuu Ján kɛ ebinuu Juraj hu tsũŋ yɛ amɛhe ni amɛkɛwooo maŋ saji amli akɛ Kristofoi lɛ hewɔ. Miye afii enyɔ yɛ Pankrác maŋ tsũŋwoohe yɛ Prague. Ajaje heshwamɔ kpo atsɔɔ mɛi ni aye amɛ sane ni ejaaa lɛ yɛ afi 1956, ni aŋmɛɛɛ mihe.

Heyeli Ba Agbɛnɛ!

Yɛ naagbee, yɛ afi 1989 lɛ akpa Kɔministbii anifeemɔi yɛ Czechoslovakia, ni akɛ Yehowa Odasefoi anitsumɔ lɛ wo mla shishi. Enɛ hewɔ lɛ, wɔná heyeli ni wɔkɛ wɔhe kpeɔ kutuu, ni wɔshiɛɔ yɛ faŋŋ mli. Yɛ nakai bei amli lɛ, Odasefoi aaashɛ oha yɔɔ Zahor, ni tsɔɔ akɛ yɛ gbɔmɛi 10 fɛɛ 10 mli lɛ ayɛ mɔ kome ni ji Odasefonyo yɛ akrowa lɛ mli. Yɛ afii fioo komɛi ni eho nɛɛ lɛ, wɔma Maŋtsɛyeli Asa fɛfɛo ni da saŋŋ ni gbɔmɛi 200 baanyɛ ata mli yɛ Zahor.

Mibɛ hewalɛ tsɔ bɔ ni sa dɔŋŋ, no hewɔ lɛ, nyɛmimɛi lɛ kɛ lɔle bawoɔ mi kɛyaa Maŋtsɛyeli Asa lɛ nɔ. Mináa miishɛɛ akɛ mahi jɛmɛ, ni eŋɔɔ minaa akɛ maha saji ahetoo yɛ Buu-Mɔɔ Nikasemɔ lɛ shishi. Mináa miishɛɛ waa diɛŋtsɛ akɛ minaa miweku lɛ yinɔi etɛ lɛ ateŋ mɛi babaoo damɔ minajiaŋ amɛmiisɔmɔ Yehowa. Mɛnɛɛmɛi ateŋ mɔ kome sɔmɔ akɛ Yehowa Odasefoi anɔkwɛlɔ gbɛfalɔ yɛ Czechoslovakia aahu kɛyashi weku sɔ̃i tsĩ enaa ni enyɛɛɛ etsu enɛ he nii dɔŋŋ.

Midaa Yehowa shi akɛ ewo mi hewalɛ yɛ be mli ni mikɛ mikaai babaoo lɛ kpe lɛ. Mijwɛŋmɔ ni mikɛfɔ̃ enɔ—ni ‘mimɔ mɔ ni anaaa lɛ lɛ mli tamɔ nɔ ni miina lɛ lɛ’—ji nɔ ni waje mi. (Hebribii 11:27) Hɛɛ, minu ejiemɔ ni hewalɛ yɔɔ mli lɛ he. No hewɔ ni kɛbashi ŋmɛnɛ lɛ, mibɔɔ mɔdɛŋ koni maya asafoŋ kpeei ni mikɛ mihe awo egbɛi lɛ jajemɔ yɛ shiɛmɔ nitsumɔ lɛ mli kɛyashi he ni manyɛ.

[Mfoniri ni yɔɔ baafa 25]

Maŋtsɛyeli Asa ni yɔɔ Zahor lɛ

[Mfoniri ni yɔɔ baafa 26]

Mináa hegbɛ ni mináa ni mikɛhaa saji ahetoo yɛ Buu-Mɔɔ Nikasemɔ lɛ shishi lɛ he miishɛɛ