“Nyɛhiɛa Nɔ ni Nyɛyɔɔ lɛ Mli Kpɛŋŋ”

Kuu ko ni ji Odasefoi miishiɛ yɛ ŋshɔkpɔi aaafee 30 ni feɔ Cycldes Ŋshɔkpɔi ni yɔɔ Greece lɛ nɔ. Beni amɛteŋ mɛi enyɔ shiɛɔ kɛnyiɛɔ gbɛjegbɛ lɛ nɔ lɛ, amɛkɛ polisifonyo ko kpe, ni ekɛɛ amɛ akɛ amɛnyiɛ esɛɛ kɛya polisifoi anitsumɔhe lɛ. Amɛshɛ polisifoi anitsumɔhe lɛ etsɛɛɛ nɔŋŋ ni tɛlifoŋ lɛ gbɛɛ. Akrowa lɛ mli osɔfo lɛ ni. Ekɛɛ akɛ: “Minu akɛ Yehowa Odasefoi yɛ akrowa lɛ mli.” Polisifonyo lɛ here nɔ akɛ: “Hɛɛ, mimɔmɔ mɛi enyɔ, ni amɛyɛ biɛ.” “Miiba nɔŋŋ.” Gbee ni nyɛmimɛi lɛ nu yɛ tɛlifoŋ lɛ nɔ lɛ ha amɛtsui fã.

Shi ni osɔfo lɛ bashɛ shi pɛ kɛkɛ ni eŋmɔ, ni eta amɛdɛ, ni eyata sɛi ni tsa polisifonyo lɛ nɔ lɛ nɔ. Beni sanegbaa lɛ yaa nɔ lɛ, polisifonyo lɛ mli bafu, yɛ be mli ni osɔfo lɛ kã he enáa tsui ni emli fuuu lɛ. Ekɛɛ polisifonyo lɛ akɛ, ekaba Odasefoi lɛ shi, ni ekɛfata he akɛ: “Amɛbaanyɛ amɛha sanebimɔ fɛɛ sanebimɔ hetoo, ejaakɛ amɛnine shɛɔ tsɔsemɔ nɔ kɛjɛɔ Teokrase Sɔɔmɔ Skul lɛ mli. Ebaafee nɔ ni yɔɔ mlɛo akɛ aaatsɔ̃ je lɛ abu shi fe ni aaatsake Yehowa Odasefoi lɛ teŋ mɔ ko hemɔkɛyeli.”

Enɔ jetsɛremɔ beni nyɛmimɛi lɛ shiɛɔ lɛ, amɛkɛ osɔfo lɛ kpe ekoŋŋ, ni amɛbi lɛ akɛ: “Mɛni hewɔ ojie naanyobɔɔ su kpo waa otsɔɔ wɔ yɛ be mli ni sanegbaa lɛ yaa nɔ yɛ polisifoi anitsumɔhe lɛ?” Osɔfo lɛ kɛɛ amɛ akɛ, ele Odasefoi pii yɛ Syros, ni akɛ, ekɛ afii pii ekane Buu-Mɔɔ kɛ Awake! woji tɛtrɛbii lɛ. Yɛ anɔkwale mli lɛ, ekɔɔ Buu-Mɔɔ wolo tɛtrɛɛ lɛ ni ekɛtoɔ ewolo mli bei pii, ni ekɛtsuɔ nii ni ekɛshiɛɔ yɛ sɔlemɔtsu lɛ mli. Ewie akɛ: “Eji mikaneee nyɛ woji lɛ kulɛ, efeee mi akɛ manyɛ mahi shi. No ji mihiɛnɔkamɔ.”

Sɛɛ mli lɛ osɔfo lɛ kɛɛ Odasefoi lɛ akɛ: “Esa akɛ makɛɛ nyɛ nɔ kome. Nyɛhiɛa nɔ ni nyɛyɔɔ lɛ mli kpɛŋŋ. Ekaba lɛ akɛ nyɛbaasusu akɛ nyɛbaashi. Nɔ ni mikɛɔ nyɛ nɛɛ lɛ ji shiɛmɔ ni fe fɛɛ ni mikɛha pɛŋ, ni jeee akɛ miiwie kɛ minaabu kɛkɛ; miiwie kɛmiijɛ mitsui fɛɛ mli.”