Amɛfee Yehowa Suɔmɔnaa Nii

Paulo Kɛ Ekãa Ye Mɛi ni Je Agbo Odase

KULƐ srɔtofeemɔ ni yɔɔ hii enyɔ lɛ ateŋ lɛ efeŋ faŋŋ jogbaŋŋ. Mɔ kome bu akekre ni mɔ kroko lɛ wo kɔsɔŋkɔsɔi. Maŋtsɛ ji mɔ kome; mɔ kroko lɛ, gboklɛfonyo ni. Beni bɔfo Paulo eye afii enyɔ yɛ tsuŋwoo mli lɛ, ebadamɔ Yudafoi anɔyelɔ Herode Agripa II hiɛ agbɛnɛ. Maŋtsɛ lɛ kɛ ehefatalɔ Berniikee “wula kiŋkãa” kɛba “ni amɛkɛ asafoiatsɛmɛi-nukpai kɛ maŋ lɛŋ gbɔmɛi agboi lɛ babote sane-toiboohe lɛ.” (Bɔfoi lɛ Asaji 25:23) Wolo ko ni atsɛɔ saji asɛɛ kɛjɛɔ mli lɛ kɛɛ: “Ekolɛ mɛi ohai abɔ ba.”

No mli lɛ, Festo ni ji amralo hee ni ahala lɛ lɛ eto kpee lɛ he gbɛjianɔ. No mli lɛ, Felike ni ji amralo ni tsɔ ehiɛ lɛ tsui enyɔ emli akɛ eha Paulo kɛ awerɛho ehi tsuŋwoo mli. Shi Festo bi ja ni saji ni akɛfolɔ Paulo naa lɛ ja ha lɛ he sane. Shi Paulo ma fɔ́ ni eyeee lɛ nɔ mi veveeve aahu akɛ ebi koni ekɛ esane lɛ aha Kaisare yeli! Paulo sane lɛ tsirɛ Maŋtsɛ Agripa waa koni ele sane lɛ mli. Ekɛɛ: “Mi hu miisumɔ akɛ mabo gbɔmɔ lɛ toi.” Oya nɔŋŋ kɛkɛ ni Festo to gbɛjianɔ, ekolɛ eesusu nɔ ni maŋtsɛ lɛ baasusu yɛ nɛkɛ gboklɛfonyo ni yɔɔ srɔto kwraa nɛɛ he.—Bɔfoi lɛ Asaji 24:27–25:22.

Enɔ jetsɛremɔ lɛ, Paulo na akɛ edamɔ mɛi ni je agbo babaoo ahiɛ. Ekɛɛ Agripa akɛ: “Eŋɔɔ minaa akɛ mibajie minaa ŋmɛnɛ yɛ ohiɛ, yɛ nibii fɛɛ ni Yudafoi lɛ folɔɔ minaa yɛ he lɛ hewɔ, ejaakɛ ole Yudafoi lɛ agbɛnaa nii lɛ kɛ ŋwanejeesaji lɛ fɛɛ mli pɛpɛɛpɛ; no hewɔ lɛ miikpao fai ni oŋmɛ oyi shi obo mi toi.”—Bɔfoi lɛ Asaji 26:2, 3.

Paulo Hefãmɔ ni Ekãa Yɔɔ Mli

Klɛŋklɛŋ lɛ, Paulo kɛɛ Agripa etsutsu beaŋ he sane akɛ eji Kristofoi ayiwalɔ. Ekɛɛ: “Mifĩfĩaa amɛ akɛ amɛwie musubɔɔ-wiemɔi. Miwaa amɛ yi kɛyaa mɛikpɔ̃ji aje tete.” Paulo tee nɔ egba bɔ ni enine shɛ ninaa ko ni sa kadimɔ waa ko nɔ, nɔ ni Yesu ni atee lɛ shi lɛ bi lɛ yɛ mli akɛ: “Mɛɛba owaa mi yi? ewa hao akɛ ooofã ŋtia oshi kooloi akplamɔtso lɛ naa dade lɛ.”a—Bɔfoi lɛ Asaji 26:4-14.

Kɛkɛ ni Yesu fã Saulo koni eye jeŋmaji fɛɛ mli bii “nibii ni ona kɛ nii ni mibajie mihe kpo matsɔɔo yɛ hewɔ lɛ ahe” odase. Paulo gba akɛ ekɛ ekãa bɔ mɔdɛŋ koni etsu nitsumɔ ni akɛwo edɛŋ lɛ he nii. Ni kɛlɛ, ekɛɛ Agripa akɛ: “Enɛɛmɛi ahewɔ ni Yudafoi lɛ mɔ mi yɛ sɔlemɔwe lɛ ni amɛka mi gbee.” Beni Paulo teeɔ miishɛɛ ni Agripa yɔɔ yɛ Yuda jamɔ mli lɛ shi koni efee he nɔ ko lɛ, ema nɔ mi akɛ nɔ ni fata odase ni eyeɔ lɛ he diɛŋtsɛ ji “ni miwieee wiemɔ ko akɛ ja nii ni gbalɔi lɛ kɛ Mose hu ewie akɛ ebaaba lɛ” yɛ Mesia lɛ gbele kɛ eshitee lɛ he.—Bɔfoi lɛ Asaji 26:15-23.

Festo wie kɛfo sanegbaa lɛ mli. Ekɛ gbee walɛ kɛɛ: “Woloŋkasemɔ sɔŋŋ eha oyeɔ sɛkɛ nɛɛ.” Paulo jie naa akɛ: “Miyeko sɛkɛ, Festo jũrɔ̃, shi anɔkwale kɛ hiɛshikamɔ wiemɔi miwieɔ nɛɛ.” Kɛkɛ ni Paulo wie yɛ Agripa he akɛ: “Maŋtsɛ lɛ ni miwieɔ ekãa naa mitsɔɔ lɛ nɛɛ le saji nɛɛ amli; ni mikpaaa shi akɛ nibii nɛɛ eko yɛ ni akɛtee lɛ; ejaakɛ jeee nifĩfĩaŋ he ko afee enɛ yɛ.”—Bɔfoi lɛ Asaji 26:24-26.

Kɛkɛ ni Paulo kɛ Agripa wie tɛ̃ɛ. “Nto oheɔ gbalɔi lɛ oyeɔ, maŋtsɛ Agripa?” Ŋwanejee ko bɛ he akɛ sanebimɔ lɛ haaa Agripa he ajɔ lɛ. Yɛ fɛɛ sɛɛ lɛ, nɔ ko yɛ ejwɛŋmɔ mli ni eeeya nɔ esusu he, ni kɛ́ ekɛ Paulo baakpã gbee lɛ, belɛ ekɛ nɔ ni Festo tsɛ lɛ akɛ ‘sɛkɛyeli’ lɛ miikpã gbee. Ekolɛ beni Paulo na akɛ Agripa miishashao shi lɛ, eha lɛ diɛŋtsɛ esanebimɔ lɛ hetoo. Ekɛɛ: “Mile akɛ oheɔ oyeɔ.” Agbɛnɛ Agripa bɔi wiemɔ, shi ejieee ewiemɔi lɛ amli henumɔ lɛ kpo faŋŋ. Ekɛɛ Paulo akɛ: “Shwɛ fioo ni oha miyiŋ atsɔ ni matsɔ Kristofonyo.”—Bɔfoi lɛ Asaji 26:27, 28; wɔma efã ko nɔ mi.

Paulo kɛ Agripa wiemɔ ni bɛ tɛ̃ɛ lɛ tsu nii koni ekɛ sane oti ko ni mli wa aha. Ekɛɛ: “Miná ni kulɛ Nyɔŋmɔ ha ba mli akɛ, shwɛ fioo jio, shwɛ pii jio, jeee bo okome kɛkɛ, shi moŋ mɛi fɛɛ ni boɔ mi toi ŋmɛnɛ nɛɛ hu atsɔ tamɔ mi, shi gboklɛi nɛɛ eko kɛkɛ akawo amɛ.”—Bɔfoi lɛ Asaji 26:29.

Agripa kɛ Festo enaaa nɔ ko kwraa yɛ Paulo he ni tsɔɔ akɛ esa gbele loo tsuŋwoo. Ni kɛlɛ, anyɛɛɛ afo enibimɔ ni tsɔɔ akɛ ekɛ esane lɛ baayaha Kaisare yeli lɛ mli. No hewɔ ni Agripa kɛɛ Festo akɛ: “Eji nuu nɛɛ eŋɔko esane lɛ ehako Kaisare yeli kulɛ, aaanyɛ ehe aŋmɛɛ.”—Bɔfoi lɛ Asaji 26:30-32.

Nikasemɔ Kɛha Wɔ

Gbɛ ni Paulo tsɔ nɔ eye mɛi ni je agbo odase lɛ kɛ nɔkwɛmɔnɔ ni sa kadimɔ waa haa wɔ. Beni Paulo kɛ Maŋtsɛ Agripa wieɔ lɛ, ekɛ sɛɛyoomɔ tsu nii. Ŋwanejee ko bɛ he akɛ, ele hiɛshishwiemɔ nifeemɔ ni yɔɔ Agripa kɛ Berniikee teŋ. Wekumɛi ni bɛŋkɛ kpaakpa ni kɛ amɛhe náa bɔlɛ ji amɛ, ejaakɛ Berniikee ji Agripa nyɛmiyoo diɛŋtsɛ. Shi yɛ nɛkɛ be nɛɛ mli lɛ, Paulo sumɔɔɔ ni ewieɔ jeŋba he. Shi moŋ, ema saji otii ni lɛ kɛ Agripa fɛɛ kpɛlɛɔ nɔ lɛ nɔ mi. Kɛfata he lɛ, eyɛ mli akɛ Farisifonyo woloŋlelɔ Gamaliel ji mɔ ni tsɔse Paulo moŋ, shi ekpɛlɛ nɔ akɛ Agripa le Yudafoi akusumii saji ahe nii waa diɛŋtsɛ. (Bɔfoi lɛ Asaji 22:3) Yɛ bɔ ni Agripa jeŋba shihilɛ yɔɔ fɛɛ sɛɛ lɛ, Paulo kɛ bulɛ wie etsɔɔ lɛ, ejaakɛ Agripa hiɛ nɔyeli hegbɛ.—Romabii 13:7.

Yɛ be mli ni wɔkɛ ekãa yeɔ wɔhemɔkɛyelii ahe odase lɛ, ejeee oti ni ma wɔhiɛ akɛ wɔkpa wɔtoibolɔi lɛ anifeemɔi ni he tseee lɛ he mama loo ni wɔɔbu nomɛi fɔ. Shi moŋ, bɔni afee ni wɔha efee mlɛo kɛha amɛ akɛ amɛaakpɛlɛ anɔkwale lɛ nɔ lɛ, esa akɛ wɔma sanekpakpa lɛ mli saji otii ni sa lɛ anɔ mi, ni wɔma hiɛnɔkamɔi ni wɔ fɛɛ wɔhiɛ lɛ nɔ mi. Kɛ wɔkɛ mɛi ni edara fe wɔ loo mɛi ni yɔɔ nɔyeli hegbɛ miiwie lɛ, esa akɛ wɔkpɛlɛ gbɛhe ni amɛyɔɔ lɛ nɔ. (3 Mose 19:32) Yɛ nɛkɛ gbɛ nɔ lɛ, wɔbaanyɛ wɔkase Paulo, mɔ ni kɛɛ akɛ: “Mitsɔ mihe nɔ fɛɛ nɔ miha mɛi fɛɛ, koni be fɛɛ be ni aaafee lɛ mikɛhere mɛi komɛi ayiwala.”—1 Korintobii 9:22.

[Shishigbɛ niŋmaa]