Filipo Sanekpakpa Shiɛlɔ ni Yɔɔ Ekãa

HII kɛ yei ni amɛhemɔkɛyeli sa kasemɔ lɛ ahe saji babaoo yɛ Ŋmalɛi lɛ amli. Susumɔ Filipo, klɛŋklɛŋ afii oha lɛ mli Kristofonyo maŋsɛɛ sanekpakpa shiɛlɔ lɛ he okwɛ. Jeee bɔfo ji lɛ, ni kɛlɛ akɛ lɛ tsu nii waa diɛŋtsɛ yɛ Maŋtsɛyeli shɛɛ sane lɛ gbɛɛ-kɛ-shwamɔ mli. Lɛɛlɛŋ, abale Filipo akɛ “sanekpakpa shiɛlɔ.” (Bɔfoi lɛ Asaji 21:⁠8) Mɛni hewɔ Filipo ná nakai kadimɔ gbɛi lɛ? Ni mɛni wɔbaanyɛ wɔkase kɛjɛ eŋɔɔ?

Filipo he sane je kpo yɛ Biblia mli saji lɛ mli yɛ Pentekoste 33 Ŋ.B. sɛɛ nɔŋŋ. No mli lɛ Yudafoi ni wieɔ Hela (Helenibii) lɛ bɔi Yudafoi ni wieɔ Hebri wiemɔ lɛ ahe huhuuhuwiemɔ, ni amɛkɛɔ akɛ akuɔ hiɛ ashwieɔ amɛkulafoyei lɛ anɔ yɛ daa gbi niyenii ni ajaa lɛ mli. Bɔni afee ni atsu sane lɛ he nii lɛ, bɔfoi lɛ hala “hii kpawo ni yɔɔ gbɛi kpakpa.” Filipo fata mɛi ni ahala lɛ ahe.​—⁠Bɔfoi lɛ Asaji 6:​1-⁠6.

Nɛkɛ hii kpawo nɛɛ ‘yɛ gbɛi kpakpa.’ James Moffatt shishitsɔɔmɔ lɛ kɛɔ akɛ “amɛfee gbɛi kpakpa.” Hɛɛ, beni ahalaa amɛ lɛ, no mli lɛ ale amɛ momo akɛ mumɔŋ gbɔmɛi ni yɔɔ jwɛŋmɔŋ nyɛmɔ ni mli tse. Nakai nɔŋŋ eji yɛ mɛi ni sɔmɔɔ akɛ Kristofoi nɔkwɛlɔi ŋmɛnɛ lɛ ahe. Akɛ kpalakpalafeemɔ halaaa nɛkɛ hii nɛɛ. (1 Timoteo 5:​22) Esa akɛ ‘mɛi ni yɔɔ sɛɛ lɛ hu aye amɛhe odase kpakpa,’ ni esa akɛ nanemɛi Kristofoi ale akɛ amɛhe jɔ ni amɛjwɛŋmɔ mli tse.​—⁠1 Timoteo 3:​2, 3, 7; Filipibii 4:⁠5.

Odaseyeli tsɔɔ akɛ, Filipo tsu enitsumɔ lɛ jogbaŋŋ yɛ Yerusalem. Shi kɛlɛ, etsɛɛɛ ni yiwaa ni naa wa te shi, ni egbɛ Kristo sɛɛnyiɛlɔi lɛ eshwã. Taakɛ mɛi krokomɛi fee lɛ, Filipo shĩ maŋtiase lɛ, shi esɔɔmɔ nitsumɔ lɛ baaa naagbee. Etsɛɛɛ kwraa ni ebɔi shiɛmɔ kɛ ekãa yɛ shikpɔŋkuku hee​—⁠Samaria maŋ lɛ mli.​—⁠Bɔfoi lɛ Asaji 8:​1-⁠5.

Shikpɔŋkukuji Heei ni Aaaje Emli Nitsumɔ Shishi

Yesu egba efɔ̃ shi akɛ ekaselɔi lɛ baashiɛ “yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbeehei lɛ.” (Bɔfoi lɛ Asaji 1:⁠8) Kɛtsɔ shiɛmɔ ni Filipo shiɛ yɛ Samaria lɛ nɔ lɛ, ekɛ ehe miiwo nakai wiemɔi lɛ amlibaa mli. Bei pii lɛ, Yudafoi lɛ ebuuu Samariabii lɛ kwraa. Shi Filipo tsɔɔɔ hiɛ ekojooo nɛkɛ gbɔmɛi nɛɛ, ni ajɔɔ hiɛaŋ ni ekwɛɛɛ lɛ. Lɛɛlɛŋ, abaptisi Samariabii pii, ni tsutsu ŋkunyaayelɔ ni gbɛi ji Simon lɛ fata he.​—⁠Bɔfoi lɛ Asaji 8:​6-⁠13.

Etsɛɛɛ ni Yehowa bɔfo kɛ famɔ ha Filipo koni eya ŋa lɛ nɔ gbɛjegbɛ ni jɛɔ Yerusalem kɛyaa Gaza lɛ nɔ. Filipo na shwiili ko ni Etiopia piafonyo ko yɔɔ mli ni eekane Yesaia gbalɛ lɛ waa. Filipo jo foi kɛyanyiɛ shwiili lɛ he ni etee sanegbaa shi. Eyɛ mli akɛ no mli lɛ Etiopianyo lɛ ji mɔ ni atsake kɛba Yudajamɔ mli ni eyɛ Nyɔŋmɔ kɛ Ŋmalɛi lɛ ahe nilee fioo moŋ, shi ekɛ heshibaa kpɛlɛ nɔ akɛ yelikɛbuamɔ he miihia lɛ koni enu nɔ ni ekaneɔ lɛ shishi. No hewɔ lɛ, efɔ̃ nine etsɛ Filipo koni ekwɔ shwiili lɛ koni ebatá emasɛi. Beni aye lɛ odase agbe naa lɛ, amɛbana nu ko ni bua shi. Etiopianyo lɛ bi akɛ: “Mɛni tsĩɔ mibaptisimɔ gbɛ?” Amrɔ nɔŋŋ ni Filipo baptisi lɛ, ni Etiopianyo lɛ tee kɛ nyamɔ. Ekolɛ, nɛkɛ kaselɔ hee nɛɛ gbɛ sanekpakpa lɛ eshwã beni etee emaŋ lɛ.​—⁠Bɔfoi lɛ Asaji 8:⁠26-⁠39.

Mɛni wɔbaanyɛ wɔkase kɛjɛ Filipo sɔɔmɔ nitsumɔ ni Samariabii kɛ Etiopia piafonyo lɛ fata he lɛ mli? Nyɛkahaa wɔsusua kɔkɔɔkɔ akɛ aŋkroaŋkroi ni jɛ maŋ ko nɔ, hewolo nɔ su kroko mli, loo esoro gbɛhe ni amɛyɔɔ yɛ shihilɛ mli lɛ naŋ sanekpakpa lɛ he miishɛɛ. Yɛ no najiaŋ lɛ, esa akɛ wɔjaje Maŋtsɛyeli shɛɛ sane lɛ wɔtsɔɔ “mɛi fɛɛ.” (1 Korintobii 9:​19-23) Kɛ wɔkɛ wɔhe ha mɛi kɛtsɔ shiɛmɔ ni wɔɔshiɛ wɔtsɔɔ mɛi fɛɛ lɛ nɔ lɛ, Yehowa baanyɛ ekɛ wɔ atsu nii yɛ ‘jeŋmaji fɛɛ amli gbɔmɛi lɛ kaselɔi afeemɔ’ nitsumɔ lɛ mli dani gbɛjianɔtoo fɔŋ nɛɛ aba naagbee.​—⁠Mateo 28:⁠19, 20.

Sɔɔmɔ Hegbɛi ni Filipo Ná Kɛfata He

Beni Filipo shiɛ etsɔɔ Etiopia piafonyo lɛ egbe naa lɛ, etee eyaye odase yɛ Azoto, “ni beni efoɔ mli lɛ, ejaje sanekpakpa lɛ etsɔɔ yɛ maji lɛ fɛɛ mli kɛyashi ebashɛ Kaisarea.” (Bɔfoi lɛ Asaji 8:​40) Yɛ klɛŋklɛŋ afii oha lɛ mli lɛ, no mli lɛ Jeŋmajiaŋbii fioo ko yɔɔ nɛkɛ maji nɛɛ amli. Beni Filipo tsɔɔ kooyigbɛ kɛyaa Kaisarea lɛ, ekolɛ eshiɛ yɛ Yudafoi amaji ni ehe gbɛi waa tamɔ, Lida kɛ Yopa lɛ mli. Ekolɛ no hewɔ ni anyɛ aná kaselɔi yɛ sɛɛ mli yɛ nɛkɛ hei nɛɛ.​—⁠Bɔfoi lɛ Asaji 9:​32-⁠43.

Filipo tã ni atsĩ yɛ naagbee mli kwraa lɛ ba mli aaafee afii 20 sɛɛ. Yɛ Paulo maŋsɛɛ sanekpakpa shiɛmɔ gbɛfãa ni ji etɛ lɛ naagbee lɛ, ekɛ lɛlɛ baakpeleke shi yɛ Ptolemai. Paulo gbɛfãa mli hefatalɔ Luka kɛɛ: “Jetsɛrenɔ lɛ wɔyiŋ kɛtee Kaisarea, ni wɔyabote sanekpakpa shiɛlɔ Filipo . . . lɛ we.” Yɛ nɛkɛ be nɛɛ mli lɛ, Filipo yɛ “biyei oblayei ejwɛ ni gbaa.”​—⁠Bɔfoi lɛ Asaji 21:​8, 9.

Eka shi faŋŋ akɛ, Filipo eyahi Kaisarea. Shi eŋmɛko emaŋsɛɛ sanekpakpa shiɛmɔ mumɔ lɛ he, ejaakɛ Luka tsɛɔ lɛ akɛ “sanekpakpa shiɛlɔ.” Bei pii lɛ nɛkɛ wiemɔ nɛɛ tsɔɔ mɔ ni shiɔ eshia ni eyashiɛɔ sanekpakpa lɛ yɛ kpokpai ni atsuko mli nii lɛ mli. Anɔkwa sane ni tsɔɔ akɛ Filipo yɛ biyei ejwɛ ni gbaa lɛ tsɔɔ akɛ amɛnyiɛ amɛtsɛ ni yɔɔ ekãa lɛ najifamɔi asɛɛ.

Esa akɛ ŋmɛnɛŋmɛnɛ beaŋ Kristofoi akai akɛ amɛbii lɛ ji amɛkaselɔi ni he hiaa fe fɛɛ. Kɛ ehe miihia ni fɔlɔi ni tamɔ nɛkɛ aŋmɛɛ teokrase hegbɛi komɛi ahe yɛ weku mli gbɛnaa nii ahewɔ po lɛ, taakɛ Filipo ji lɛ amɛbaanyɛ amɛya nɔ amɛfee mɛi ni kɛ amɛtsui fɛɛ sɔmɔɔ Nyɔŋmɔ ni amɛfee fɔlɔi ni feɔ nɔkwɛmɔnɔ kpakpa.​—⁠Efesobii 6:⁠4.

Saramɔ ni Paulo kɛ ehefatalɔi lɛ kɛtsu nii lɛ ha Filipo weku lɛ ná hegbɛ fɛfɛo koni amɛjie gbɔfeemɔ kpo. Bo lɛ susumɔ hewalɛ ni amɛkɛaawowoo amɛhe ekãa lɛ he okwɛ! Ekolɛ nɛkɛ be nɛɛ mli ni Luka ná Filipo nitsumɔi lɛ ahe saji babaoo ní akɛfata Bɔfoi lɛ Asaji lɛ yitsei 6 kɛ 8 lɛ ahe lɛ.

Yehowa Nyɔŋmɔ kɛ Filipo tsu nii kɛtee shɔŋŋ koni eha Maŋtsɛyeli nibii lɛ aya hiɛ. Ekãa ni Filipo yɔɔ lɛ ha egbɛ sanekpakpa lɛ eshwã shikpɔŋkukuji heei amli, ni eha mumɔŋ shihilɛ kpakpa hi eshia lɛ mli. Ani obaasumɔ ni oná hegbɛi kɛ jɔɔmɔi ni tamɔ nɛkɛ mli ŋɔɔmɔ? Belɛ ooofee jogbaŋŋ akɛ oookase sui ni Filipo sanekpakpa shiɛlɔ lɛ jie lɛ kpo lɛ.