Ojarawatɛi ni Hiɛ Kamɔ yɛ Namibia!
NAMIBIA bele shi yɛ Afrika wuoyi-anaigbɛ nɔ ni miihe ashɛ kilomitai 1,500. Maŋ muu lɛ ŋshɔnaa gbɛ lɛ fɛɛ ji shia gɔji, tɛ gɔŋkpɔi, kɛ ŋmilitsa ŋa kpataa agbo. Nɔ ni efutu tɛi ni yɔɔ Namibia ŋshɔi anaa fɔbitɛi lɛ ateŋ ji tɛi ni jara wa ni hiɛ sui srɔtoi fɛɛ ni abaanyɛ asusu he. Bei komɛi po anaa ojarawatɛi yɛ jɛi. Shi maŋ lɛ yɛ nɔ ko ni jara wa kwraa fe nɛkɛ tɛi nɛɛ. Namibia yɛ ojarawatɛi ni hiɛ kamɔ—emli gbɔmɛi ni jɛ maji akui babaoo mli lɛ.
Klɛŋklɛŋ Namibiabii lɛ wie wiemɔi komɛi ni je amɛhe ni atsɛɔ lɛ Khoisan. Ale amɛ naawiemɔ lɛ yɛ egbeeŋ gbɛɛmɔ lɛ hewɔ. Mɛi ni fata Khoisan wielɔi lɛ ahe ŋmɛnɛ ji Damarabii ni amɛ hewolo nɔ diɔ lɛ, mɛi ni hewolo nɔ kã ni yɔɔ gbɔmɔtso bibioo ni atsɛɔ amɛ Nama lɛ, kɛ Gbɔbilɔi ni hiɔ jwɛiaŋ ni ehe gbɛi lɛ. Mɛi diji awekui babaoo hu eba Namibia yɛ nyɛsɛɛ afii oha nɛɛ mli. Mɛnɛɛmɛi baa maŋ kui titrii etɛ komɛi ashishi: Ovambo (ni ji adesai awiemɔ kuu ni da fe fɛɛ yɛ Namibia), Herero, kɛ Kavango. Europabii bɔi shihemɔ yɛ Namibia yɛ afii ohai 19 lɛ mli. Gbɔi babaoo ba sɛɛ mli beni ana akɛ ojarawatɛi yɛ shia-ŋa nɛɛ nɔ lɛ.
Abuɔ Namibiabii lɛ waa ejaakɛ amɛji je lɛ fã ni fata adesai aweku hewɔ ni Nyɔŋmɔ kɛ e-Bi lɛ ha, ni no gbele gbɛ kɛha naanɔ wala namɔ lɛ. (Yohane 3:16) Namibiabii ohai abɔ ni jɛ akutsei babaoo mli lɛ ehere yiwalaheremɔ sane lɛ nɔ momo. Abaanyɛ akɛ amɛ ato ojarawatɛi ni hiɛ kamɔ he ejaakɛ amɛfata “jeŋmaji lɛ fɛɛ anii ni jara wa lɛ” ni amrɔ nɛɛ abuaa naa awoɔ Yehowa shia kɛha jamɔ lɛ ahe—Hagai 2:7.
Mumɔŋ Suŋ Nii Atsaa Je Shishi
Afi 1928 lɛ mli ni aje shishi akɛ aaatsa mumɔŋ tɛi ni jara wa ni yɔɔ Namibia lɛ. Yɛ nakai afi lɛ mli lɛ Buu Mɔɔ Asafo lɛ nitsumɔhe nine ni yɔɔ South Africa lɛ maje Biblia kasemɔ woji bibii 50,000 kɛha gbɔmɛi ni egbɛ eshwã maŋ lɛ mli fɛɛ lɛ. Afi ni nyiɛ sɛɛ lɛ mli lɛ, Kristofonyo ko ni afɔ lɛ mu ni jɛ South Africa ni gbɛi ji Lenie Theron lɛ tiu miishɛɛ ni ajie lɛ kpo lɛ sɛɛ. Yɛ nyɔji ejwɛ mli lɛ yoo lɛ kpa maŋ wulu nɛɛ mli ekome too, ni eja Biblia kasemɔ woji 6,000 yɛ Afrikaans, Ŋleshi, kɛ Germany wiemɔ mli. Lɛɛlɛŋ nɛkɛ nitsumɔ nɛɛ wo yibii.
Ákɛ nɔkwɛmɔnɔ lɛ, susumɔ Bernhard Baade, ni ji Germany suŋ nii atsalɔ lɛ he. Yɛ afi 1929 mli lɛ, enine shɛ wuɔwɔji anɔ kɛjɛ okwaafonyo ko ni kota wuɔwɔlɔ lɛ eko fɛɛ eko yɛ Buu Mɔɔ wolo lɛ baafa ko mli lɛ ŋɔɔ. Bernhard kɛ hiɛdɔɔ kane baafa fɛɛ baafa, ni ehiɛ fee lɛ yaa yɛ mɔ ni ŋma wolo lɛ he. Naagbee mli lɛ eshɛ naagbee baafa lɛ nɔ, nɔ ni kɛ Buu Mɔɔ Asafo lɛ Germany adrɛs ha lɛ. Bernhard ŋma kɛha woji babaoo, ni ebatsɔ klɛŋklɛŋ Namibianyo ni badamɔ shi kɛha anɔkwale lɛ.
Be-Fɛɛ Nitsulɔi Bashɛ Shi
Yɛ afi 1950 mli lɛ, maŋsɛɛ sanekpakpa shiɛlɔi ejwɛ ni atsɔse amɛ yɛ Buu Mɔɔ Biblia Gilead Skul lɛ bashɛ Namibia. Beni shɛ afi 1953 lɛ maŋsɛɛ sanekpakpa shiɛlɔi lɛ ayibɔ etee hiɛ kɛyashɛ kpaanyɔ. Mɛi ni fata he ji Dick kɛ Coralie Waldron, ni ji gbalashihilɛ mli hafatalɔi ni jɛ Australia ni kã he amɛmiisɔmɔ yɛ biɛ lolo yɛ anɔkwayeli mli lɛ. Be-fɛɛ Maŋtsɛyeli shiɛlɔi krokomɛi babaoo ni jɛ South Africa kɛ maŋsɛɛ hu ena gbɛfaŋnɔ yɛ Namibia mumɔŋ tɛi ni jara wa ni atsaa lɛ mli. Atsu maŋsɛɛ sanekpakpa shiɛlɔi krokomɛi kɛ mɛi ni gbe Sɔɔmɔ Tsɔsemɔ Skul lɛ naa lɛ kɛtee Namibia.
Yelikɛbuamɔ nɔ kroko kɛha mumɔŋ nɔyaa yɛ Namibia lɛ ji Biblia kasemɔ woji lɛ ashishitsɔɔmɔ kɛ ekalamɔ yɛ maŋ lɛ wiemɔi titrii lɛ amli, tamɔ Herero, Kwangali, Kwanyama, Nama/Damara, kɛ Ndonga nɛkɛ. Kɛjɛ afi 1990 kɛbaa lɛ, akɛ woji ashishitsɔɔmɔ nitsumɔhe kɛ shia ni yɔɔ kɛha mɛi ni kɛ amɛhe eha be-fɛɛ nitsumɔ lɛ miitsu nii yɛ maŋtiase lɛ ni ji Windhoek mli. Karen Deppisch, mɔ ni kɛ ewu ena gbɛfaŋnɔ yɛ be-fɛɛ shiɛmɔ nitsumɔ lɛ mli yɛ Namibia hei srɔtoi babaoo lɛ, kɛɛ akɛ: “Mɛi babaoo anaa kpɛ amɛhe beni wɔkɛ woji ni yɔɔ amɛ diɛŋtsɛ amɛwiemɔ mli lɛ haa amɛ lɛ, titri lɛ beni woji fioo ko pɛ yɔɔ nakai wiemɔ pɔtɛɛ lɛ mli lɛ.”
Ojarawatɛi lɛ Ahetsuumɔ
Atsuu Namibia ojarawatɛi lɛ ekomɛi ahe diɛŋtsɛ kɛtsɔ ŋshɔkei kɛ shia nɔ fe afii akpei abɔ nɛ. Shi kɛlɛ, nakai nifeemɔ lɛ kɛ ojarawatɛi ni hiɛ kamɔ baaa. Ebiɔ mɔdɛŋbɔɔ yɛ adesai ni yeee emuu lɛ agbɛfaŋ koni ‘amɛshɛ amɛsa jeŋba lɛ amɛfɔ̃’ ni amɛkɛ subaŋ hee ni tamɔ Kristo nɔ lɛ aha amɛhe. (Efesobii 4:20-24) Ákɛ nɔkwɛmɔnɔ lɛ, woo ni akɛhaa blematsɛmɛi ni egboi lɛ ji kusum ni yɔɔ kpɛŋŋ yɛ Namibia akutsei babaoo amli. Awaa mɛi ni efeee blematsɛmɛi jamɔ nifeemɔ lɛ ayi yɛ be kɛ bei amli kɛtsɔ weku mli bii kɛ akutsoŋbii anɔ. Be mli ni aŋkroaŋkroi kaseɔ kɛjɛɔ Biblia lɛ mli akɛ gbohii lɛ “leee nɔ ko nɔ ko,” lɛ amɛkɛ kaa kpeɔ. (Jajelɔ 9:5) Yɛ mɛɛ gbɛ nɔ?
Odasefonyo ko ni ji Hereronyo lɛ tsɔɔ mli akɛ: “Eji kaa wulu akɛ aaafee toiboo aha anɔkwale lɛ. Mikpɛlɛ nɔ akɛ mikɛ Yehowa Odasefoi baakase Biblia lɛ, shi ehe mi be dani minyɛ mikɛ nɔ ni mikaseɔ lɛ tsu nii. Klɛŋklɛŋ lɛ, ebiɔ ni maka makwɛ akɛ ebaafee shweshweeshwe kɛha mi akɛ mikatsu kusum hemɔkɛyelii ahe nii. Ákɛ nɔkwɛmɔnɔ lɛ, makudɔ tsɔne kɛtsɔ hei komɛi yɛ Namibia ni miwaaa ni mikɛ tɛ ko ayaŋmɛ gbonyobu nɔ loo ni mawo mifai nɔ yɛ gbonyo ŋamɔ hewɔ. Fiofio lɛ, miyiŋ tsɔ akɛ nɔ ko baŋ minɔ kɛji mijáaa blematsɛmɛi ni egboi lɛ. Mɛɛ miishɛɛ miyɔɔ nɛkɛ akɛ Yehowa ejɔɔ mimɔdɛŋbɔi koni maye mabua miweku lɛ kɛ mɛi krokomɛi ni yɔɔ anɔkwale lɛ he miishɛɛ ni amɛkase anɔkwale lɛ nɔ!”
Hiamɔ Kɛha Mumɔŋ Suŋ Nii Atsalɔi
Dani maŋsɛɛ sanekpakpa shiɛlɔi lɛ aaashɛ shi yɛ afi 1950 lɛ, no mli lɛ sanekpakpa shiɛlɔ kome pɛ yɔɔ Namibia. Yibɔ lɛ etee hiɛ kɛyashɛ yifalɛ ni fe fɛɛ ni ji 995. Kɛlɛ, nitsumɔ babaoo yɛ ni esa akɛ atsu. Yɛ anɔkwale mli lɛ atako kpokpai lɛ ekomɛi ahe po. Ani oshihilɛ baaŋmɛ bo gbɛ ni osɔmɔ yɛ heni hiamɔ kɛha Maŋtsɛyeli shiɛlɔi ni yɔɔ ekãa da yɛ lɛ? No lɛ, ofainɛ, ba Namibia ni obaye obua wɔ kɛtao mumɔŋ tɛi ni jara wa babaoo ni wɔtsuu he.—Okɛto Bɔfoi lɛ Asaji 16:9 lɛ he.
[Shikpɔŋ he mfoniri/Mfonirii ni yɔɔ baafa 26]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
AFRIKA
NAMIBIA
[Mfonirii]
Aashiɛ sanekpakpa lɛ aatsɔɔ Namibia wiemɔ kui fɛɛ
[He ni Sane lɛ Jɛ]
Maps: Mountain High Maps® Copyright © 1997 Digital Wisdom, Inc.; Diamonds: Courtesy Namdek Diamond Corporation
[Mfonirii ni yɔɔ baafa 26]
Namibia ji maŋ ni yɔɔ ojarawatɛi ni yɔɔ fɛo
[Mfoniri ni yɔɔ baafa 28]
Ani obaanyɛ osɔmɔ yɛ heni hiamɔ kɛha Maŋtsɛyeli shiɛlɔi da yɛ lɛ?