Nɔkwɛlɔi kɛ Asafoŋ Sɔɔlɔi ni Ahalaa Amɛ yɛ Teokrase Gbɛ Nɔ
“Nyɛlea nyɛhenɔkwɛmɔ kɛ tooiku lɛ fɛɛ ni Mumɔ krɔŋkrɔŋ lɛ ewo nyɛ amɛnɔkwɛlɔi lɛ.”—BƆFOI LƐ ASAJI 20:28.
1, 2. Yesaia 60:22 miiba mli yɛ mɛɛ gbɛ nɔ?
YEHOWA gba efɔ̃ shi kɛjɛ jeeŋmɔ akɛ nɔ ko ni sa kadimɔ waa baaba yɛ naagbee be lɛ mli. Ajaje kɛtsɔ gbalɔ Yesaia nɔ akɛ: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa: Kɛ́ shɛ ebe lɛ mi, Yehowa, maha efee oyá!”—Yesaia 60:22.
2 Ani odaseyeli ko yɛ ni tsɔɔ akɛ nɛkɛ gbalɛ nɛɛ miiba mli ŋmɛnɛ? Hɛɛ, odaseyeli ko yɛ ni tsɔɔ nakai! Yɛ afi 1870 afii lɛ amli lɛ, ato Yehowa webii asafo kome ko shishi yɛ Allegheny yɛ Pennsylvania, U.S.A. Asafoi akpei nyɔŋmai abɔ efã kpo kɛjɛ shishijee bibioo nɛɛ mli ni amɛmiishwere yɛ jeŋ fɛɛ. Maŋtsɛyeli jajelɔi akpekpei abɔ—maŋ ni he wa diɛŋtsɛ—kɛ amɛhe miibɔ asafoi fe 91,000 he bianɛ yɛ maji 235 nɔ yɛ shikpɔŋ lɛ fɛɛ nɔ. Sanebimɔ ko bɛ he akɛ, enɛ maa nɔ mi akɛ Yehowa miiha anɔkwa jálɔi anaabuamɔ lɛ miiya nɔ oya dani “amanehulu kpeteŋkpele” lɛ ni ebɛŋkɛ kpaakpa bianɛ lɛ afɛ ashwie shi.—Mateo 24:21; Kpojiemɔ 7:9-14.
3. Ní aaabaptisi mɔ ‘yɛ Tsɛ lɛ, Bi lɛ, kɛ mumɔ krɔŋkrɔŋ lɛ gbɛi amli’ lɛ tsɔɔ mɛni?
3 Beni gbɔmɛi akpekpei abɔ nɛɛ ejɔɔ amɛhe nɔ amɛha Yehowa sɛɛ, ni yɛ Yesu famɔi lɛ kɛ gbeekpamɔ naa lɛ, abaptisi amɛ yɛ “Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛi amli.” (Mateo 28:19) ‘Tsɛ lɛ gbɛi amli’ ni abaptisiɔ amɛ yɛ lɛ tsɔɔ akɛ nɛkɛ aŋkroaŋkroi ni amɛjɔɔ amɛhe nɔ nɛɛ yɔseɔ Yehowa akɛ amɛ ŋwɛi Tsɛ kɛ Wala-Halɔ ni amɛbaa amɛhe shi amɛhaa enɔyeli lɛ. Baptisimɔ ‘yɛ Bi lɛ gbɛi amli’ lɛ tsɔɔ akɛ amɛjajeɔ akɛ Yesu Kristo ji amɛ Kpɔlɔ, Hiɛnyiɛlɔ, kɛ Maŋtsɛ. Amɛkpɛlɛɔ nitsumɔ ni Nyɔŋmɔ mumɔ krɔŋkrɔŋ loo enitsumɔ hewalɛ lɛ tsuɔ yɛ amɛshihilɛ kudɔmɔ mli lɛ hu nɔ. Enɛ tsɔɔ akɛ abaptisi amɛ ‘yɛ mumɔ krɔŋkrɔŋ lɛ gbɛi amli.’
4 Mɛɛ gbɛ nɔ atsɔɔ ahalaa sɔɔlɔi Kristofoi?
4 Ahalaa kaselɔi heei akɛ Yehowa Nyɔŋmɔ sɔɔlɔi yɛ amɛ baptisimɔ be lɛ mli. Namɔ halaa amɛ? Yɛ sane naatsɔɔmɔ naa lɛ, wiemɔi ni aŋmala ashwie shi yɛ 2 Korintobii 3:5 lɛ kɔɔ amɛhe, ni ji akɛ: “Wɔsalɛ [akɛ sɔɔlɔi] lɛ Nyɔŋmɔ mli ejɛ.” Amɛshweŋ woo ko ni nɔ kwɔ waa fe akɛ Yehowa Nyɔŋmɔ diɛŋtsɛ aaahala amɛ! Yɛ amɛ baptisimɔ sɛɛ lɛ, amɛbaaya nɔ amɛdara yɛ mumɔŋ akɛ “sanekpakpa” lɛ he sɔɔlɔi, bei abɔ ni amɛkpɛlɛɔ Nyɔŋmɔ mumɔ lɛ hiɛnyiɛmɔi anɔ ni amɛyaa nɔ amɛkɛ e-Wiemɔ lɛ tsuɔ nii lɛ.—Mateo 24:14; Bɔfoi lɛ Asaji 9:31.
Teokrase—Jeee Demokrase—Halamɔ
5. Ani ahalaa nɔkwɛlɔi kɛ asafoŋ sɔɔlɔi Kristofoi lɛ yɛ demokrase gbɛ nɔ? Tsɔɔmɔ mli.
5 Aatao nɔkwɛmɔ kpakpa kɛtsɔ nɔkwɛlɔi ni he esa kɛ asafoŋ sɔɔlɔi ni yeɔ buaa jogbaŋŋ lɛ anɔ, koni amɛkwɛ sɔɔlɔi ni yɔɔ ekãa ni amɛyifalɛ yaa hiɛ lɛ amumɔŋ hiamɔ nii anɔ. (Filipibii 1:1) Mɛɛ gbɛ nɔ atsɔɔ ahalaa mumɔŋ gbɔmɛi ni tamɔ nɛkɛ? Jeee kɛtsɔ gbɛ̀i ni tamɔ nɔ ni akɛtsuɔ nii yɛ Kristendom lɛ anɔ. Ákɛ nɔkwɛmɔnɔ lɛ, atsɔɔɔ demokrase gbɛ nɔ ahalaaa nɔkwɛlɔi Kristofoi, ni ji akɛ, kɛtsɔ mɛi ni kɛ amɛhe bɔɔ asafo lɛ he lɛ ateŋ mɛi ni fa ni aaafɔ̃ oshiki aha amɛ lɛ nɔ. Yɛ no najiaŋ lɛ, nɛkɛ halamɔi nɛɛ baa kɛtsɔɔ teokrase gbɛ nɔ. Mɛni enɛ tsɔɔ?
6. (a) Mɛni ji anɔkwa teokrase? (b) Mɛni hewɔ nɔkwɛlɔi kɛ asafoŋ sɔɔlɔi ahalamɔ lɛ ji teokrase nɔ lɛ?
6 Kɛ́ aaatsɔɔ mli kuku lɛ, anɔkwa teokrase ji nɔyeli kɛtsɔ Nyɔŋmɔ nɔ. Yehowa Odasefoi jɛɔ amɛsuɔmɔ mli amɛbaa amɛhe shi amɛhaa enɔyeli ni amɛ fɛɛ amɛfeɔ ekome koni amɛfee ŋwɛi suɔmɔnaa nii. (Lala 143:10; Mateo 6:9, 10) Nɔkwɛlɔi Kristofoi, loo onukpai, kɛ asafoŋ sɔɔlɔi lɛ ahalamɔ lɛ ji teokrase nɔ̃, ejaakɛ atsuɔ hii ni sa nɛɛ ayijiemɔ kɛ halamɔ lɛ he nii yɛ Nyɔŋmɔ gbɛjianɔtoo naa, taakɛ atsɔɔ mli yɛ Ŋmalɛi Krɔŋkrɔŋi lɛ amli lɛ. Ni ákɛ, Yehowa, “mɔ ni ta nii fɛɛ nɔ akɛ yitso” lɛ, yɛ hegbɛ akɛ etsɔɔ bɔ ni esa akɛ egbɛjianɔtoo ni anaa lɛ baatsu nii aha.—1 Kronika 29:11; Lala 97:9.
7. Mɛɛ gbɛ nɔ atsɔɔ ayeɔ Yehowa Odasefoi anɔ?
7 Ákɛ mɛi ni tamɔɔɔ jamɔ kui babaoo ni yɔɔ Kristendom lɛ, Yehowa Odasefoi ekpɛɛɛ yiŋ amɛhaaa amɛhe yɛ nɔ̃ mumɔŋ nɔyeli ni amɛaatsu nii yɛ shishi. Nɛkɛ Kristofoi anɔkwafoi nɛɛ bɔɔ mɔdɛŋ ni amɛkɛ amɛhe akpɛtɛ tɛi ni Yehowa efolɔ eshwie shi lɛ ahe. Ahalaaa nɔkwɛlɔi ni yɔɔ amɛteŋ lɛ awooo sɔɔmɔ gbɛhe mli kɛtsɔɔɔ asafo, osɔfoi anɔyeli, loo prɛsbiteria sɔlemɔ nɔyeli su ko nɔ. Kɛji akɛ mɛi ni yɔɔ je lɛ mli lɛ miisumɔ ni amɛkɛ amɛhe awo nɛkɛ halamɔi nɛɛ amli lɛ, Yehowa webii kpooɔ akɛ amɛaaŋmɛɛ saji ahe ni amɛkɛ amɛ afutu. Amɛkɛ amɛhe kpɛtɛɔ shidaamɔ ni bɔfoi lɛ ni hi shi yɛ klɛŋklɛŋ afii oha lɛ mli lɛ jaje lɛ he shiŋŋ, beni amɛkɛɛ akɛ: “Esa akɛ aboɔ Nyɔŋmɔ moŋ toi fe gbɔmɛi” lɛ. (Bɔfoi lɛ Asaji 5:29) No hewɔ lɛ, Odasefoi lɛ baa amɛhe shi amɛhaa Nyɔŋmɔ yɛ nibii fɛɛ mli. (Hebribii 12:9; Yakobo 4:7) Teokrase gbɛjianɔtoo sɛɛnyiɛmɔ kɛ ŋwɛi nɔkpɛlɛmɔ baa.
8. Demokrase kɛ teokrase nifeemɔ gbɛjianɔtoo yɛ srɔto yɛ mɛɛ gbɛ nɔ?
8 Ákɛ Yehowa, Teokrat Kpeteŋkpele lɛ tsuji lɛ, wɔɔfee jogbaŋŋ akɛ wɔɔha srɔtofeemɔi ni kã demokrase kɛ teokrase nifeemɔi ateŋ lɛ ahi wɔjwɛŋmɔ mli. Demokrase nifeemɔ gbɛ̀i biɔ ni ana najiaŋdamɔlɔi ni amɛyifalɛ yeɔ egbɔ, ni nɔ ni afɔɔ namɔ ji tafaa kɛha nitsumɔ gbɛhe namɔ kɛ halamɔ kɛtsɔ oshiki ni mɛi ni fa lɛ aaafɔ̃ aha amɛ lɛ nɔ. Nɛkɛ nifeemɔ gbɛ̀i nɛɛ bɛ teokrase halamɔi amli. Enɛɛmɛi baaa kɛjɛɛɛ gbɔmɛi aŋɔɔ; ni asaŋ jeee mla gbɛjianɔtoo ko ni yɔɔ momo mli amɛjɛ. Eyɛ faŋŋ akɛ, beni Paulo wieɔ lɛ diɛŋtsɛ ehalamɔ kɛtsɔ Yesu kɛ Yehowa nɔ akɛ “jeŋmaji abɔfo” lɛ he lɛ, ekɛɛ Galatabii lɛ akɛ ehalamɔ lɛ, “jeee gbɔmɛi aŋɔɔ ejɛ ni jeee gbɔmɔ ko nɔ hu etsɔ, shi moŋ Yesu Kristo kɛ tsɛ Nyɔŋmɔ ni tée lɛ shi kɛjɛ gbohii ateŋ lɛ nɔ etsɔ.”—Romabii 11:13; Galatabii 1:1.
Mumɔ Krɔŋkrɔŋ Hala Amɛ
9. Mɛni Bɔfoi lɛ Asaji 20:28 kɛɔ yɛ nɔkwɛlɔi Kristofoi lɛ ahalamɔ he?
9 Paulo kai nɔkwɛlɔi ni yɔɔ Efeso lɛ akɛ Nyɔŋmɔ tsɔ mumɔ krɔŋkrɔŋ nɔ ehala amɛ. Ekɛɛ akɛ: “Nyɛlea nyɛhe nɔkwɛmɔ kɛ tooiku lɛ fɛɛ ni Mumɔ krɔŋkrɔŋ lɛ ewo nyɛ amɛnɔkwɛlɔi lɛ, koni nyɛlɛ Nyɔŋmɔ asafo lɛ ni ekɛ lɛ diɛŋtsɛ elá he lɛ.” (Bɔfoi lɛ Asaji 20:28, wɔma efã ko nɔ mi.) Ehe miihia ni mumɔ krɔŋkrɔŋ aya nɔ anyiɛ nakai nɔkwɛlɔi Kristofoi lɛ ahiɛ yɛ be mli ni amɛyaa nɔ amɛtsuɔ amɛ nitsumɔi akɛ Nyɔŋmɔ tooiku lɛ anɔ kwɛlɔi lɛ. Kɛji akɛ mɔ ko ni ahala lɛ awo gbɛhe ko mli lɛ shɛɛɛ ŋwɛi taomɔ nii lɛ ahe dɔŋŋ lɛ, yɛ be ni sa mli lɛ mumɔ krɔŋkrɔŋ lɛ baatsu nii koni ajie lɛ kɛjɛ egbɛhe lɛ mli.
10. Te ebaa lɛ tɛŋŋ ni mumɔ krɔŋkrɔŋ lɛ tsuɔ nitsumɔ ni he hiaa nɛkɛ yɛ teokrase halamɔi amli lɛ?
10 Te ebaa lɛ tɛŋŋ ni mumɔ krɔŋkrɔŋ lɛ tsuɔ nitsumɔ ni he hiaa waa lɛ? Klɛŋklɛŋ kwraa lɛ, nɔ ni aŋma ni kɛ taomɔ nii kɛha mumɔŋ nɔkwɛmɔ mamɔɔ shi lɛ jɛ mumɔ krɔŋkrɔŋ lɛ. Paulo tsɔɔ tɛi ni afolɔ ashwie shi ni esa akɛ ana yɛ nɔkwɛlɔi kɛ asafoŋ sɔɔlɔi ahe lɛ mli yɛ woji ni eŋma eyaha Timoteo kɛ Tito lɛ amli. Yɛ fɛɛ mli lɛ, etsĩ taomɔ nii srɔtoi aaafee 16 tã. Ákɛ nɔkwɛmɔnɔ lɛ, esa akɛ nɔkwɛlɔi afee mɛi ni anaŋ amɛhe sane ko atã, mɛi ni hiɛ kã shi, amɛjwɛŋmɔŋ kã shi, mɛi ni toɔ gbɛjianɔ kpakpa, gbɔfeelɔi, mɛi ni he esa kɛ nitsɔɔmɔ, kɛ weku yitsei ni feɔ nɔkwɛmɔnɔ kpakpa. Esa akɛ amɛŋmɛ pɛpɛɛpɛ yɛ dãa ni wa kɛ nitsumɔ mli, esaaa akɛ amɛfeɔ shika-suɔlɔi, ni esa akɛ amɛkɛ henɔyeli atsu nii. Nakai nɔŋŋ akɛ taomɔ nii ni nɔ kwɔlɔ ni tamɔ nakai nɔŋŋ mamɔ shi aha hii ni taoɔ ni ahala amɛ akɛ asafoŋ sɔɔlɔi.—1 Timoteo 3:1-10, 12, 13; Tito 1:5-9.
11. Mɛni ji hesaai lɛ ekomɛi ni esa akɛ ana yɛ hii ni taoɔ asafoŋ gbɛnaa nii lɛ ahe?
11 Nɛkɛ taomɔ nii nɛɛ amlitii tsɔɔ akɛ esa akɛ mɛi ni nyiɛɔ Yehowa jamɔ hiɛ lɛ afee mɛi ni feɔ nɔkwɛmɔnɔ kpakpa yɛ Kristofoi ajeŋba mli. Esa akɛ hii ni taoɔ asafoŋ gbɛnaa nii lɛ aye odase akɛ mumɔ krɔŋkrɔŋ lɛ kɛ amɛ miitsu nii. (2 Timoteo 1:14) Esa akɛ efee faŋŋ akɛ Nyɔŋmɔ mumɔ lɛ miiwo yibii ni ji “suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, hiɛshikamɔ” yɛ nɛkɛ gbɔmɛi nɛɛ amli. (Galatabii 5:22, 23) Yibiiwoo ni tamɔ nɛkɛ baaje kpo yɛ bɔ ni amɛkɛ amɛnanemɛi heyelilɔi kɛ mɛi krokomɛi yeɔ haa lɛ mli. Eji anɔkwale akɛ mɛi komɛi baateke nɔ yɛ mumɔ lɛ yibii komɛi ni amɛjieɔ lɛ kpo lɛ mli, yɛ be mli ni abaana hesaai krokomɛi kɛha nɔkwɛlɔi lɛ yɛ gbɛ ni nɔ kwɔ waa nɔ yɛ mɛi krokomɛi ahe. Shi, yɛ amɛshihilɛ fɛɛ mli lɛ, esa akɛ mɛi ni hiɛ kã nɔ akɛ aaahala amɛ akɛ nɔkwɛlɔi loo asafoŋ sɔɔlɔi lɛ atsɔɔ akɛ amɛji mumɔŋ gbɔmɛi, ni amɛshɛɔ Nyɔŋmɔ Wiemɔ lɛ mli taomɔ nii lɛ ahe.
12. Namɛi abaanyɛ akɛɛ akɛ mumɔ krɔŋkrɔŋ lɛ ehala amɛ?
12 Beni Paulo wo mɛi komɛi ŋaa akɛ amɛkase lɛ lɛ, enyɛ efee nakai kɛ wiemɔ mli heyeli, ejaakɛ lɛ diɛŋtsɛ lɛ eekase Yesu Kristo, ní ‘to okadi efɔ̃ shi eha wɔ koni wɔnyiɛ enanemaahei asɛɛ kpaakpa lɛ.’ (1 Petro 2:21; 1 Korintobii 11:1) No hewɔ lɛ, abaanyɛ akɛɛ akɛ, mumɔ krɔŋkrɔŋ lɛ ehala mɛi ni anaa Ŋmalɛ naa taomɔ nii lɛ yɛ amɛhe yɛ be mli ni ahalaa amɛ akɛ nɔkwɛlɔi loo asafoŋ sɔɔlɔi lɛ.
13. Mɛɛ gbɛ nɔ mumɔ krɔŋkrɔŋ yeɔ ebuaa mɛi ni jieɔ hii ayi koni amɛsɔmɔ yɛ asafo lɛ mli lɛ yɛ?
13 Nɔ kroko hu yɛ ni tsɔɔ bɔ ni mumɔ krɔŋkrɔŋ lɛ tsuɔ nii yɛ nɔkwɛlɔi ni ajieɔ amɛyi ni ahalaa amɛ lɛ mli. Yesu kɛɛ akɛ, ‘Tsɛ lɛ ni yɔɔ ŋwɛi lɛ kɛ mumɔ krɔŋkrɔŋ haa mɛi ni biɔ lɛ lɛ.’ (Luka 11:13) No hewɔ lɛ, kɛji akɛ onukpai ni yɔɔ asafo lɛ mli lɛ kpe koni amɛjie hii ayi kɛha asafoŋ gbɛnaa nii lɛ, amɛsɔleɔ koni Nyɔŋmɔ mumɔ lɛ akudɔ amɛ. Amɛkɛ amɛ yijiemɔi lɛ damɔɔ nɔ ni ajaje yɛ Nyɔŋmɔ Wiemɔ ni jɛ mumɔŋ lɛ nɔ, ni mumɔ krɔŋkrɔŋ haa amɛnyɛɔ amɛyɔseɔ kɛji akɛ mɔ ni asusuɔ ehe kɛha halamɔ lɛ shɛɔ Ŋmalɛ naa taomɔ nii lɛ ahe lo. Esaaa akɛ mɛi ni jieɔ mɔ lɛ yi lɛ haa bɔ ni anaa mɔ lɛ, he ni eyashɛ yɛ ewoloŋlee mli, loo adebɔɔ naa nyɛmɔi komɛi ni eyɔɔ náa amɛnɔ hewalɛ bɔ ni esaaa. Nɔ titri ni esa akɛ agbala jwɛŋmɔ kɛya nɔ ji, kɛji akɛ mɔ lɛ ji mumɔŋ gbɔmɔ, mɔ ni asafo lɛ mli bii shashaoŋ shi akɛ amɛaaya eŋɔɔ kɛha mumɔŋ ŋaawoo.
14. Mɛni wɔkaseɔ kɛjɛɔ Bɔfoi lɛ Asaji 6:1-3?
14 Yɛ be mli ni onukpai akui kɛ nɔkwɛlɔi gbɛfalɔi náa nyɛmimɛi hii ni ajieɔ amɛyi koni amɛsɔmɔ akɛ onukpai kɛ asafoŋ sɔɔlɔi lɛ mli gbɛfaŋnɔ lɛ, afeɔ halamɔ lɛ diɛŋtsɛ yɛ okadi ni afee afɔ̃ shi yɛ klɛŋklɛŋ afii oha lɛ mli lɛ naa. Be ko lɛ, ehe bahia ni hii ni he esa yɛ mumɔŋ akwɛ nitsumɔ ko ni he hiaa nɔ. Nɔyeli kuu lɛ kɛ gbɛtsɔɔmɔ ni nyiɛ sɛɛ nɛɛ ha: “Nyɛtaoa nyɛteŋ hii kpawo ni yɔɔ gbɛi kpakpa ni Mumɔ krɔŋkrɔŋ kɛ nilee eyi amɛ obɔ, koni wɔŋɔ amɛ wɔto nɛkɛ nitsumɔ ni he hiaa nɛɛ nɔ.” (Bɔfoi lɛ Asaji 6:1-3) Yɛ be mli ni hii ni yɔɔ jɛmɛ lɛ jie mɛi lɛ ayi lɛ, hii ni akɛ gbɛnaa nii ewo amɛdɛŋ ni yɔɔ Yerusalem lɛ ji mɛi ni hala amɛ. Anyiɛɔ nɔkwɛmɔnɔ ni tamɔ nakai nɔŋŋ sɛɛ ŋmɛnɛ.
15. Yɛ mɛɛ gbɛ nɔ Nɔyeli Kuu lɛ fata hii ni ahalaa amɛ lɛ he?
15 Yehowa Odasefoi a-Nɔyeli Kuu lɛ halaa Nitsumɔhe Niji Ajinafoi Akui lɛ fɛɛ tɛ̃ɛ. Kɛji akɛ amɛmiikpɛ amɛyiŋ yɛ mɔ ni baanyɛ atsu gbɛnaa nii ni tsii nɛɛ he nii lɛ, Nɔyeli Kuu lɛ haa Yesu wiemɔ nɛɛ hiɔ amɛjwɛŋmɔ mli, akɛ: “Mɔ fɛɛ mɔ ni aŋɔ pii aha lɛ lɛ, pii aaatao yɛ edɛŋ; ni mɔ ni atuu pii awo edɛŋ lɛ, aaabi nɔ ni teke nɔ shi yɛ edɛŋ.” (Luka 12:48) Kɛfata Nitsumɔhe Niji Ajinafoi Akui amli bii ni ahalaa amɛ lɛ he lɛ, Nɔyeli Kuu lɛ halaa Betel onukpai kɛ nɔkwɛlɔi gbɛfalɔi. Shi kɛlɛ, amɛkɛ nitsumɔ woɔ nyɛmimɛi ni hiɛ gbɛnaa nii adɛŋ koni amɛdamɔ amɛnajiaŋ yɛ mɛi komɛi ahalamɔ mli. Ayɛ Ŋmalɛ naa nɔdaamɔnɔ kɛha enɛ hu feemɔ.
‘Halamɔ Onukpai Taakɛ Mifao Lɛ’
16. Mɛni hewɔ Paulo shi Tito yɛ Kreta lɛ, ni mɛni enɛ tsɔɔ yɛ teokrase halamɔi ahe ŋmɛnɛ?
16 Paulo kɛɛ enaanyo nitsulɔ Tito akɛ: “Enɛ hewɔ mishio yɛ Kreta, koni oto nibii ni eshwɛ lɛ gbɛjianɔ pɛpɛɛpɛ, ni owowoo onukpai yɛ maŋ fɛɛ maŋ mli, taakɛ bɔ ni mikɛɛo momo lɛ.” (Tito 1:5) Kɛkɛ ni Paulo tsɔɔ taomɔ nii ni esa akɛ Tito atao yɛ hii ni he baasa kɛha nɛkɛ halamɔi nɛɛ ahe lɛ mli. No hewɔ lɛ, ŋmɛnɛ, Nɔyeli Kuu lɛ halaa nyɛmimɛi hii ni he esa yɛ nitsumɔhe niji lɛ mli koni amɛdamɔ amɛnajiaŋ yɛ onukpai kɛ asafoŋ sɔɔlɔi ni amɛhalaa amɛ lɛ mli. Akwɛɔ jogbaŋŋ koni mɛi ni tsuɔ nii akɛ Nɔyeli Kuu lɛ najiaŋdamɔlɔi lɛ anu Ŋmalɛ naa gbɛtsɔɔmɔi kɛha halamɔi nɛɛ ashishi jogbaŋŋ ni amɛnyiɛ sɛɛ. No hewɔ lɛ, Nɔyeli Kuu lɛ gbɛtsɔɔmɔ shishi ahalaa hii ni he esa koni amɛsɔmɔ yɛ Yehowa Odasefoi asafoi lɛ amli yɛ jeŋ fɛɛ lɛ.
17. Te nitsumɔhe nine tsuɔ yijiemɔi kɛha nɔkwɛlɔi kɛ asafoŋ sɔɔlɔi ahe nii amɛhaa tɛŋŋ?
17 Kɛji akɛ ajie nɔkwɛlɔi kɛ asafoŋ sɔɔlɔi ayi aha Buu Mɔɔ Asafo lɛ nitsumɔhe nine lɛ koni ahala amɛ lɛ, hii ni he esa kɛ amɛhe fɔ̃ɔ Nyɔŋmɔ mumɔ lɛ nɔ kɛha gbɛtsɔɔmɔ yɛ nɛkɛ halamɔi nɛɛ amli. Nɛkɛ hii nɛɛ nuɔ he akɛ akɔntaabuu ko ebakã amɛnɔ, amɛyɔseɔ akɛ esaaa akɛ amɛkɛ amɛniji shwieɔ mɔ ko nɔ oya, koni amɛkɛ amɛhe akawo ehe eshai amli.—1 Timoteo 5:22.
18, 19. (a) Mɛɛ gbɛ nɔ atsɔɔ ahaa aleɔ halamɔi komɛi ni áfee? (b) Te atsuɔ nifeemɔ ni ji yijiemɔ kɛ halamɔ muu lɛ fɛɛ he nii ahaa tɛŋŋ?
18 Ekolɛ akɛ halamɔi komɛi baamaje kɛtsɔ wolo ni Asafo lɛ kɛ egbɛi eshi nɔ ni jɛ mla gbɛjianɔtoo ko ŋɔɔ lɛ nɔ. Abaanyɛ akɛ wolo ni tamɔ nɛkɛ atsu nii ni akɛhala nyɛmimɛi ni fa fe mɔ kome yɛ asafo lɛ mli.
19 Teokrase halamɔi baa kɛjɛɔ Yehowa ŋɔɔ kɛtsɔɔ e-Bi lɛ kɛ Nyɔŋmɔ shikpɔŋ nɔ gbɛjianɔtoo ni anaa, ni ji “tsulɔ anɔkwafo kɛ nilelɔ” lɛ kɛ e-Nɔyeli Kuu lɛ nɔ. (Mateo 24:45-47) Mumɔ krɔŋkrɔŋ kudɔɔ loo etsɔɔ nifeemɔ muu nɛɛ ni ji yijiemɔ kɛ halamɔ ni yaa nɔ lɛ gbɛ. Nakai enɛ ji ejaakɛ atsɔɔ taomɔ nii loo hesaai lɛ amli faŋŋ yɛ Nyɔŋmɔ Wiemɔ, ní mumɔ krɔŋkrɔŋ kanya eŋmaa lɛ mli, ni mɔ aŋkro ni ahala lɛ lɛ yeɔ odase akɛ eewo nakai mumɔ lɛ yibii. No hewɔ lɛ, esa akɛ abu nakai halamɔi lɛ akɛ mumɔ krɔŋkrɔŋ hala. Bɔ ni ahala nɔkwɛlɔi kɛ asafoŋ sɔɔlɔi yɛ teokrase gbɛ nɔ yɛ klɛŋklɛŋ afii oha lɛ mli lɛ, nakai nɔŋŋ eji anɔkwale ŋmɛnɛ hu.
Wɔdaa Shi yɛ Yehowa Gbɛtsɔɔmɔ Hewɔ
20. Mɛni hewɔ wɔkɛ David kpãa gbee yɛ henumɔ ni ekɛŋma Lala 133:1 lɛ?
20 Yɛ be ni mumɔŋ shweremɔ kɛ teokrase lɛ náa nɔyaa yɛ Maŋtsɛyeli shiɛmɔ nitsumɔ lɛ mli nɛɛ, wɔdaa shi akɛ Yehowa ji mɔ titri ni nɔkwɛlɔi kɛ asafoŋ sɔɔlɔi ahalamɔ nɛɛ jɛ. Nɛkɛ Ŋmalɛ naa gbɛjianɔtoo nɛɛ yeɔ ebuaa ni ahiɛɔ Nyɔŋmɔ jalɛ tɛi ni nɔ kwɔlɔ lɛ amli yɛ wɔteŋ akɛ Yehowa Odasefoi. Agbɛnɛ hu, nɛkɛ hii nɛɛ a-Kristofoi amumɔ kɛ mɔdɛŋbɔɔ yɛ anɔkwayeli mli lɛ yeɔ ebuaa wɔ toiŋjɔlɛ kɛ ekomefeemɔ akɛ Yehowa tsuji lɛ babaoo. Taakɛ lalatsɛ David ji lɛ, etsirɛɔ wɔ ni wɔjajeɔ akɛ: “Kwɛ bɔ ni ehi, bɔ ni eyɔɔ fɛo, kɛ́ nyɛmimɛi fee ekome kɛhi shi lɛ!”—Lala 133:1.
21. Yesaia 60:17 miiba mli ŋmɛnɛ yɛ mɛɛ gbɛ nɔ?
21 Kwɛ bɔ ni wɔdaa shi yɛ Yehowa gbɛtsɔɔmɔ kɛtsɔ e-Wiemɔ kɛ mumɔ krɔŋkrɔŋ lɛ nɔ lɛ hewɔ! Ni shishinumɔ diɛŋtsɛ yɛ wiemɔi ni aŋmala ashwie shi yɛ Yesaia 60:17 lɛ mli, akɛ: “Akɔɔble najiaŋ lɛ mikɛ shika aaaba, ni dade najiaŋ lɛ mikɛ jwiɛtɛi aaaba, ni tsei anajiaŋ lɛ akɔɔble, ni tɛi anajiaŋ lɛ dade; ni maŋɔ hejɔlɛ mafee onɔyelɔi, ni maŋɔ jalɛ mafee o-nukpai.” Akɛni atee nɔ akɛ teokrase nifeemɔi etsu nii babaoo yɛ Yehowa Odasefoi ateŋ hewɔ lɛ, wɔnine eshɛ nɛkɛ shihilɛi ni jɔɔmɔ yɔɔ mli nɛɛ anɔ yɛ Nyɔŋmɔ gbɛjianɔtoo ni yɔɔ shikpɔŋ nɔ lɛ fɛɛ mli.
22. Wɔdaa shi yɛ gbɛ ni ja nɔ yɛ mɛni he, ni mɛni esa akɛ wɔtswa wɔfai shi akɛ wɔbaafee?
22 Wɔdaa shi babaoo yɛ teokrase gbɛjianɔtoo ni tsuɔ nii yɛ wɔteŋ lɛ hewɔ. Ni wɔhiɛ sɔɔ nitsumɔ ni wa ni kɛlɛ ehaa mɔ tsui nyɔɔ emli ni nɔkwɛlɔi kɛ asafoŋ sɔɔlɔi ni atsɔ teokrase gbɛjianɔtoo nɔ ahala amɛ lɛ tsuɔ lɛ waa diɛŋtsɛ. Wɔjɛ wɔtsui muu fɛɛ mli wɔmiijie wɔ-Ŋwɛi Tsɛ ni yɔɔ suɔmɔ lɛ yi, mɔ ni eha wɔshwere yɛ mumɔŋ ni ejɔɔ wɔ babaoo nakai lɛ. (Abɛi 10:22) No hewɔ lɛ, nyɛhaa wɔtswaa wɔfai shi akɛ wɔkɛ Yehowa gbɛjianɔtoo lɛ baanyiɛ. Nɔ ni fe fɛɛ lɛ, nyɛhaa wɔyaa nɔ wɔsɔmɔa kutuu yɛ ekomefeemɔ mli ni wɔkɛwo Yehowa gbɛi kpeteŋkpele ni yɔɔ krɔŋkrɔŋ ni sa woo lɛ hiɛ nyam ni wɔkɛjie eyi.
Te Obaaha Hetoo Oha Tɛŋŋ?
• Mɛni hewɔ wɔbaanyɛ wɔkɛɛ akɛ nɔkwɛlɔi kɛ asafoŋ sɔɔlɔi ahalamɔ lɛ ji teokrase nɔ, shi jeee demokrase nɔ?
• Mɛɛ gbɛ nɔ mumɔ krɔŋkrɔŋ lɛ tsɔɔ ehalaa Kristofoi hii ni sa?
• Nɔyeli Kuu lɛ nine yɛ nɔkwɛlɔi kɛ asafoŋ sɔɔlɔi ahalamɔ lɛ mli yɛ mɛɛ gbɛ nɔ?
• Mɛni hewɔ esa akɛ wɔda Yehowa shi yɛ teokrase halamɔi ahewɔ?
[Mfonirii ni yɔɔ baafa 15]
Onukpai kɛ asafoŋ sɔɔlɔi ená hegbɛ akɛ amɛaasɔmɔ kɛtsɔ teokrase halamɔ nɔ