Nyɔŋmɔ Suɔmɔnaa Nifeemɔ Eha Miná Miishɛɛ Yɛ Miwala Beaŋ Fɛɛ

Taakɛ Bill Yaremchuk Gba

Beni migbe Buu-Mɔɔ Biblia Gilead Skul ni no mli lɛ eyɔɔ South Lansing, New York, U.S.A. lɛ klas ni ji kpaanyɔ lɛ naa ákɛ maŋsɛɛ sanekpakpa shiɛlɔ lɛ sɛɛ otsii fioo komɛi lɛ, mifã gbɛ kɛtee Singapore ni yɔɔ shɔŋŋ lɛ, ni ji maŋsɛɛ he ni akɛha mi akɛ miyasɔmɔ yɛ jɛmɛ lɛ yɛ March 1947 mli.

AHA mi kɛ Dave Farmer ni lɛ hu eji Canadanyo ni gbe Gilead klas ni ji kpawo lɛ naa lɛ nitsumɔ akɛ mi kɛ lɛ fɛɛ ayasɔmɔ yɛ he kome. Wɔkɛ meele ko ni atsɛɔ lɛ Marine Adder ni tsutsu ko lɛ eji asraafoi ameele lɛ fã gbɛ kɛjɛ San Francisco, California.

Lɛjiadaamɔhe ni yɔɔ Hong Kong lɛ ji he klɛŋklɛŋ ni wɔmeele lɛ yawa yɛ Asia. Nɔ ni wɔna yɛ jɛmɛ lɛ ha wɔnaa kpɛ wɔhe waa diɛŋtsɛ. Anaa nifitemɔi ni Jeŋ Ta II lɛ kɛba lɛ yɛ he fɛɛ he—obaana gbɔmɛi ni kãmɔ gbɛjegbɛi lɛ ahe ní hɔmɔ miiye amɛ, ni amɛmiihe amɛgboi. Etsɛɛɛ ni wɔsaa wɔbote meele lɛ mli ekoŋŋ ni wɔwo wɔhiɛ wɔwo Manila, ni ji Philippines maŋtiase lɛ gbɛ.

Wɔna nibii ni yɔɔ gbeyei ni ejɛ ta lɛ mli kɛba yɛ jɛmɛ hu. Meelei ni Asraafoi ni wu shi Germany lɛ butubutui lɛ alɛlɛŋtsei lɛ egbɛ eshwã lɛjiadaamɔhe lɛ fɛɛ, ni mɛi babaoo hu miiye ohia futaa. Wɔkɛ Yehowa Odasefoi lɛ ateŋ mɛi fioo ko kpe yɛ jɛmɛ, ni amɛkɛ wɔ tee amɛ-Maŋtsɛyeli Asa lɛ nɔ. Yɛ naagbai srɔtoi ni amɛkɛkpeɔ lɛ fɛɛ sɛɛ lɛ, amɛyɛ miishɛɛ.

Enɛ sɛɛ lɛ, wɔyawa yɛ lɛjiadaamɔhe ni yɔɔ Batavia (amrɔ nɛɛ Jakarta) yɛ Indonesia. No mli lɛ maŋ ta miiya nɔ yɛ jɛmɛ ni aawu ta hu yɛ he ko ni bɛŋkɛ jɛmɛ, no hewɔ lɛ aŋmɛɛɛ wɔ gbɛ koni wɔyi shi yɛ meele lɛ mli. Beni wɔmeele lɛ shiɔ kɛyaa Singapore lɛ, mibɔi nɔ ni wɔkɛbaayakpe yɛ jɛmɛ hu lɛ he susumɔ. Ani nɛkɛ ji bɔ ni Asia maji fɛfɛji ni wɔkane amɛhe saji yɛ gbɛfãa he woji amli lɛ fɛɛ etsɔ?

Yɛ gbii fioo komɛi asɛɛ lɛ, miyiŋkɔshikɔshi feemɔi lɛ fɛɛ laaje. Etsɛŋ ni wɔkɛ shihilɛi komɛi baakpe ni baama nɔ mi eha wɔ akɛ Nyɔŋmɔ fiɔ nitsumɔ ni akɛwo mi kɛ Dave fɛɛ dɛŋ lɛ sɛɛ.

Bɔ ni Fee ni Aŋmɛ Wɔ Gbɛ Koni Wɔhi Shi

Aaafee nyɔŋ kome sɛɛ beni wɔshi San Francisco lɛ, wɔmeele lɛ yakpeleke yɛ ŋshɔkpɔ ni atsɛɔ lɛ St. John’s Island lɛ nɔ, ni jɛmɛ ji he ni ahaa meelei yadamɔɔ kɛyashi beni abaaŋmɛ amɛ gbɛ ni amɛbote Singapore lɛjiadaamɔhe lɛ. Maŋ onukpai ni kwɛɔ gbɛfalɔi awoji amli lɛ ba ni amɛbakwɛ wɔnibii amli, ni amɛshi wɔgbɛfãa woji lɛ amli akɛ “Aŋmɛ Bo Gbɛ ni Ohi Shi.” Enɔ jetsɛremɔ lɛ, meele lɛ yabote lɛjiadaamɔhe lɛ. Beni meele lɛ mli onukpai lɛ ateŋ mɔ kome ekwɛ wɔwoji amli sɛɛ lɛ, wɔyi shi kɛjɛ meele lɛ mli.

Enɔ jetsɛremɔ lɛ wɔku wɔsɛɛ kɛtee lɛjiadaamɔhe lɛ ni wɔkɛ wɔnanemɛi maŋsɛɛ sanekpakpa shiɛlɔi krokomɛi ni wɔkɛ amɛ ta meele lɛ mli kɛfã gbɛ lɛ yaye shɛɛ. Amɛmiitsa amɛgbɛfãa lɛ nɔ kɛmiiya India kɛ Ceylon (amrɔ nɛɛ Sri Lanka), ni ji he ni amɛyaasɔmɔ yɛ lɛ. Beni meele kudɔɔtsɛ lɛ na wɔ lɛ, eba lɛjiadaamɔhe lɛ ni ebabi wɔ sane. Ekɛ mlifu bolɔ ewo wɔ akɛ kulɛ esaaa akɛ wɔyiɔ shi kɛjɛɔ meele lɛ mli. Mra mli beni wɔkpeleke yɛ ŋshɔkpɔ lɛ nɔ lɛ, maŋ onukpai ni kwɛɔ gbɛfalɔi awoji amli lɛ anɔkwɛlɔ ni atsɛɔ lɛ Owula Haxworth fã lɛ koni ekaŋmɛ wɔ gbɛ ni wɔyi shi kɛjɛ meele lɛ mli yɛ lɛjiadaamɔhe lɛ. Wɔleee famɔ nɛɛ he nɔ ko, ni mɔ ni ŋmɛ wɔ gbɛ ni wɔyi shi lɛ hu leee enɛ he nɔ ko.

Beni akɛ wɔ tee Owula Haxworth hiɛ lɛ, ehereee wɔ hiɛmɛɛ kwraa. Ebolɔ ewo wɔyi, ni ekɛɛ wɔ akɛ aŋmɛɛɛ wɔ gbɛ ni wɔbote Singapore maŋ lɛ mli. Akɛni wɔleee enɛ he nɔ ko hewɔ lɛ, wɔkɛ wɔgbɛfãa woji ni akɛ maŋ lɛ kadimɔ nii eshimɔ mli akɛ “Aŋmɛ Bo Gbɛ ni Ohi Shi” lɛ tsɔɔ lɛ. Ekɛ mlifu shá wɔgbɛfãa woji lɛ kɛjɛ wɔdɛŋ ni efolɔ nakai wiemɔi lɛ amli. Shi ehe ni eyabaaa nii lɛ, no mli lɛ meele lɛ eshi kɛtee jeeŋmɔ! Owula Haxworth ŋɔ wɔgbɛfãa woji lɛ eto afi kome, ni no sɛɛ lɛ ekɛ woji lɛ ku sɛɛ kɛbaha wɔ ni ashimɔ mli akɛ “Aŋmɛ Bo Gbɛ ni Ohi Shi.”

Wɔsɔɔmɔ Nitsumɔ lɛ Wo Yibii yɛ Singapore

Beni wɔyashɛ Singapore yɛ April 1947 mli lɛ, no mli lɛ nuu ko ni atsɛɔ lɛ Joshua pɛ ji Odasefonyo ni yɔɔ jɛmɛ. Esɔmɔ akɛ be-fɛɛ sɔɔlɔ loo gbɛgbalɔ kɛyashi egbo yɛ afi 1970 afii lɛ shishijee gbɛ. Etsɛɛɛ ni mɛi ni miikase Biblia mli anɔkwale lɛ ateŋ mɛi komɛi bɔi anɔkwalei lɛ shiɛmɔ kɛ mɛi krokomɛi tsɔɔmɔ. Aha wɔsɔlemɔ akɛ Nyɔŋmɔ awo nitsulɔi babaoo gbɛ kɛba mumɔŋ nikpamɔ lɛ mli lɛ hetoo.—Mateo 9:37, 38.

Yɛ 1949 lɛ, beni Owula Haxworth tee ehejɔɔmɔ be kpalaŋŋ yɛ England lɛ, maŋsɛɛ sanekpakpa shiɛlɔi ekpaa ni egbe Gilead klas ni ji 11 lɛ naa lɛ ba Singapore. Yɛ nakai beaŋ lɛ, Dave ni ekɛ mi esɔmɔ akɛ maŋsɛɛ sanekpakpa shiɛlɔi afii komɛi lɛ shi Singapore yɛ gbɔmɔtsoŋ naagba hewɔ. Eshi kɛtee Australia, he ni ekɛ anɔkwayeli sɔmɔ yɛ kɛyashi egbo yɛ afi 1973 mli lɛ. Aileen Franks ni mikɛ lɛ bote gbalashihilɛ mli yɛ afi 1956 mli lɛ ji mɛi ekpaa ni ba lɛ ateŋ mɔ kome.

Beni afii lɛ hoɔ lɛ, mɛi ni wɔkɛkase Biblia lɛ ateŋ mɛi babaoo ní amɛbii hu fata he lɛ batsɔmɔ Odasefoi. Amrɔ nɛɛ po, amɛteŋ mɛi komɛi miisɔmɔ akɛ be-fɛɛ sɔɔlɔi yɛ maŋsɛɛ shikpɔji anɔ. Niiashikpamɔ ko ni haa wɔnáa miishɛɛ babaoo lɛ kɔɔ Lester Haynes kɛ eŋa Joanie ni jɛ Amerika ni hi Singapore lɛ he. Wɔkɛ amɛ je Biblia mli nikasemɔ shishi yɛ afi 1950 afii lɛ amli. Amɛkpɛlɛ Biblia mli anɔkwalei lɛ anɔ yɛ be kukuoo mli, ni amɛku amɛsɛɛ kɛtee United States ni ayabaptisi amɛ yɛ jɛmɛ. Sɛɛ mli lɛ, sɔɔmɔ nitsumɔ ni Lester kɛ Joanie tsu lɛ wo yibii. Amɛye amɛbua mɛi babaoo ní amɛbii etɛ lɛ hu fata he, ni amɛbatsɔmɔ Odasefoi.

Joanie ŋma akɛ: “Kɛ́ mijwɛŋ nakai afi lɛ ni nyɛkɛ wɔ kase nii yɛ Singapore lɛ nɔ lɛ, mináa nɔmimaa akɛ nikasemɔ lɛ tsake bɔ ni wɔbaa wɔjeŋ wɔhaa lɛ kwraa. Kɛ́ ‘nyɛŋɔɔɔ wɔ akɛ nyɛbii’ kulɛ, benɛ wɔmiikpa je lɛŋ lolo. Mihiɛ esɔ waa akɛ bo ji mɔ ni tsɔɔ Les anɔkwale lɛ, ejaakɛ akɛ tsɔɔlɔ lɛ otɛo suɔmɔ kɛha Yehowa kɛ nyɛmimɛi Kristofoi lɛ owo emli. Eyɛ su nɛɛ lolo.”

Wɔsɔmɔ akɛ Weku yɛ Singapore

Yɛ afi 1962 lɛ, nɔ ko ni wɔkpaaa gbɛ ni ba lɛ ha wɔfee tsakemɔ wulu ko yɛ wɔsɔɔmɔ nitsumɔ lɛ mli. Datrɛfonyo ni kwɛɔ wɔ lɛ kɛɛ Aileen akɛ ehiɛ musu. Wɔmiisumɔ ni wɔya nɔ wɔsɔmɔ yɛ maŋsɛɛ, shi te wɔɔfee tɛŋŋ wɔfee nakai ni yɛ nakai beaŋ nɔŋŋ lɛ wɔtsɔse wɔbi lɛ? Nathan H. Knorr, ni no mli lɛ lɛ ekwɛɔ Yehowa Odasefoi ajeŋ muu fɛɛ sɔɔmɔ nitsumɔ lɛ nɔ lɛ ŋma wɔ wolo, ni ewo mi hewalɛ koni mitao nitsumɔ bɔni afee ni manyɛ maya nɔ mahi Singapore. Enɛ bafee kaa kpele kɛha mi.

Gbɔi lɛ ateŋ mɛi babaoo miitsu nii akɛ onukpai yɛ nitsumɔi ni nɔtsɛmɛi lɛ jɛɛɛ maŋ lɛ mli lɛ amli. Akɛni mikɛ mihe wo be-fɛɛ sɔɔmɔ nitsumɔ lɛ mli beni migbe skul naa nɔŋŋ, aaafee afii 23 ni tsɔ be ni mikɛ shihilɛ nɛɛ kpe lɛ hiɛ hewɔ lɛ, mibɛ heloonaa nitsumɔ mli niiashikpamɔ ko. No hewɔ lɛ miwo London nitsumɔhe ko ni taoɔ nitsumɔ ehaa mɛi lɛ nyɔmɔ ni amɛkɛ niiashikpamɔ ni miyɔɔ akɛ mɔ ko ni miitsu Nyɔŋmɔjamɔ nitsumɔ yɛ maŋsɛɛ lɛ afee nitsumɔ taomɔ wolo amɛha mi, ni amɛkɛ wolo nɛɛ maje nitsumɔi ni yɔɔ Singapore ni nɔtsɛmɛi lɛ jeee Singaporebii lɛ ateŋ babaoo.

Hetoo ni minine shɛɔ nɔ be fɛɛ be ji, “Edɔ wɔ akɛ gbɛhe ko bɛ kɛha mɔ ko ni ená niiashikpamɔi tamɔ onɔ̃ lɛ.” Nɔ ni amɛtaoɔ amɛtsɔɔ ji akɛ, mihe esa fe nine kɛha nitsumɔ lɛ! Nyɔji ho, ni Aileen fɔ́ Judy. No mli lɛ Nyɛminuu  Knorr eba Odasefoi ni yɔɔ Singapore lɛ saramɔ, ni eyasara Judy kɛ emami yɛ helatsamɔhe lɛ. Eha wɔ tsui akɛ: “Nyɛbaanyɛ nyɛhi maŋsɛɛ sanekpakpa shiɛlɔi lɛ ashĩa lɛ mli, kɛ́ ehe miihia ni nyɛfee nakai kɛyashi Bill aaaná nitsumɔ.”

Nyɔji fioo komɛi asɛɛ lɛ, miná nitsumɔ yɛ majimaji ateŋ kɔɔyɔŋ lɛlɛ kɛ gbɛfãa nitsumɔhe ko akɛ mɔ ni kɛ mɛi ni miitao amɛkɛ nitsumɔhe lɛ kɔɔyɔŋ lɛji lɛ afã gbɛ lɛ shãraa. Minyɔmɔwoo lɛ haa wɔnáa wɔdaaŋ ŋmaa kɛkɛ. Afii enyɔ sɛɛ lɛ, miná nitsumɔ yɛ Amerika kɔɔyɔŋ lɛlɛ kɛ gbɛfãa nitsumɔhe ko, ni awo mi nyɔmɔ ni fa fe mitsutsu nyɔmɔwoo lɛ toi enyɔ. Be ni be shwie mli lɛ, mihe bamɔ shi yɛ gbɛfãa nitsumɔ nɛɛ mli ni miná be babaoo kɛha miweku lɛ kɛ Kristofoi asɔɔmɔ nitsumɔ lɛ.

Wɔtswa wɔshihilɛ kɛbɔle Yehowa sɔɔmɔ lɛ he ni wɔkɛ Nyɔŋmɔjamɔ nibii ye klɛŋklɛŋ gbɛhe. Enɛ ha miná sɔɔmɔ hegbɛi babaoo yɛ Yehowa Odasefoi asafo lɛ mli. Aileen kɛ ehe wo be-fɛɛ sɔɔmɔ nitsumɔ lɛ mli ekoŋŋ. Yɛ nakai beaŋ lɛ, Maŋtsɛyeli shiɛmɔ nitsumɔ lɛ shwere yɛ Singapore. Yɛ afi 1960 afii lɛ teŋgbɛ lɛ, wɔhe ŋwɛitsu ŋsɔɔdoi enyɔ fɛfɛo ko yɛ he ni nitsumɔhei babaoo yɔɔ yɛ maŋ lɛ mli lɛ, ni wɔkɛfee Maŋtsɛyeli Asa. Asafoi ejwɛ kpeɔ yɛ jɛmɛ.

Agu Wɔnitsumɔ Lɛ!

Afii komɛi asɛɛ lɛ, shitee-kɛwoo ha wɔta adowa wolo nɔ. Yɛ January 14, 1972 lɛ, wɔtee koni wɔyafee kpee yɛ Maŋtsɛyeli Asa lɛ nɔ taakɛ wɔfɔɔ feemɔ lɛ. Shi akɛ kɔsɔŋkɔsɔ ni kladowa yɔɔ he ewo shinaa lɛ sɛɛ. Akɛ wolo ko ekpɛtɛ shi ni aŋma yɛ nɔ akɛ ajie Yehowa Odasefoi Asafo ni yɔɔ Singapore lɛ gbɛi kɛjɛ jamɔ kui ni akpɛlɛɔ amɛnɔ lɛ ateŋ. Agu wɔnitsumɔ lɛ!a

Maŋtsɛyeli Asa lɛ ni aŋa lɛ haaa wɔkpa Yehowa jamɔ, shi sane ni no mli lɛ eyɔɔ mijwɛŋmɔ mli ji, ‘Mɛni ji Nyɔŋmɔ suɔmɔnaa nii kɛha miweku lɛ?’ Misusu miyiŋ akɛ kɛ́ atswa wɔnane shishi tu kɛjɛ Singapore maŋ lɛ mli lɛ, wɔnyɛŋ wɔku wɔsɛɛ koni wɔyasara wɔnanemɛi ni yɔɔ jɛmɛ lɛ dɔŋŋ. No hewɔ lɛ, mibi mɔ ni kwɛɔ minɔ yɛ minitsumɔhe lɛ kɛ́ abaanyɛ aha mayatsu nii yɛ Kuala Lumpur, yɛ Malaysia. Kɛ́ miná lɛ nakai lɛ, miweku lɛ baanyɛ afã gbɛ kɛya kɛba ni efeŋ naagba. Nɔ ni fee mi naakpɛɛ ji akɛ, ekɛ fɔ̃ mihiɛ akɛ miyakwɛ nitsumɔhe lɛ nine ni yɔɔ Kuala Lumpur lɛ nɔ, ni kɛ́ mikpɛlɛ nɔ lɛ minyɔmɔwoo lɛ baafa fe nyɔmɔ ni awoɔ mi lɛ toi enyɔ, ni akɛ nibii krokomɛi hu baafata he aha mi.

Shi mibi mihe akɛ, ‘Ani eji Nyɔŋmɔ suɔmɔnaa nii akɛ wɔshi Singapore kɛ wɔnyɛmimɛi lɛ hu?’ Mi kɛ miweku lɛ fee ekome ni wɔkɛ sane nɛɛ fɔ̃ Yehowa hiɛ yɛ sɔlemɔ mli. Wɔmu sane naa akɛ Yehowa ni kɛ wɔ ba Singapore. No hewɔ lɛ, ákɛ weku yitso lɛ mikpɛ miyiŋ akɛ wɔbaahi shi. Minitsumɔ nɔkwɛlɔ lɛ naa kpɛ ehe akɛ miŋɔɔɔ hegbɛ nɛɛ ni baaha maná shika pii lɛ.

Akɛni agu wɔnitsumɔ lɛ hewɔ lɛ, be fɛɛ be lɛ wɔjwɛŋmɔ yɛ nɔ akɛ abaanyɛ amɔ wɔ trukaa ni awo wɔ tsuŋ, ni enɛ ha wɔfee yeyeeye babaoo beni wɔtsuɔ sɔɔmɔ nitsumɔ lɛ kɛ wɔheloonaa nitsumɔi lɛ. Shihilɛi komɛi ni wɔkɛkpe lɛ ha wɔnu wiemɔi ni yɔɔ Lala 34:8 lɛ shishi jogbaŋŋ akɛ: “Yehowa bɔfo lɛ bɔɔ nsara yɛ mɛi ni sheɔ lɛ gbeyei lɛ ahe kɛkpeɔ, ni ejieɔ amɛ.”

Sɔɔmɔ Hegbɛ Hee

Misanegbaa lɛ naamuu ji akɛ, beni mikɛ nɔ ni fa fe afii 46 esɔmɔ yɛ Singapore sɛɛ lɛ, yɛ afi 1993 mli lɛ akɛfɔ̃ wɔhiɛ akɛ wɔyahi New Zealand, he ni wɔbaanyɛ wɔsɔmɔ ni wɔfeŋ yeyeeye babaoo ni shihilɛ lɛ enyɛŋ wɔnɔ pii yɛ lɛ. Ekã shi faŋŋ akɛ edɔ waa akɛ wɔbaashi wɔshieŋtsɛmɛi ni yɔɔ Singapore ni wɔná suɔmɔ babaoo wɔha amɛ lɛ. Shi wɔyeee wɔtsui tsɔ ejaakɛ wɔle akɛ atswa amɛhemɔkɛyeli lɛ ama shishitoo kpakpa ni la nyɛɛɛ asha nɔ. Enɛ eye ebua amɛ ni amɛmiinyɛ amɛmiidamɔ kaai ni amɛkɛkpeɔ lɛ anaa.—1 Korintobii 3:12-14.

Amrɔ nɛɛ, mi kɛ Aileen kɛ nɔ ni fa fe afii 14 esɔmɔ yɛ New Zealand, ni eyɛ mli akɛ wɔgbɔlɔ moŋ shi wɔyɛ miishɛɛ yɛ sɔɔmɔ ni wɔsɔmɔɔ akɛ gbɛgbalɔi krɛdɛi lɛ mli. Minyɛmimɛi lɛ ateŋ mɛi enyɔ—Mike ni eye afii 94, kɛ Peter ni eye afii 90—yɛ wala mli lolo, ni amɛkɛ anɔkwayeli miisɔmɔ Yehowa yɛ Canada.

Yɛ afi 1998 lɛ, Judy ni ji wɔbiyoo lɛ ku sɛɛ etee Asia ekoŋŋ ni eyasɔmɔ yɛ jɛmɛ afii komɛi. Eŋma yɛ woji ni eŋmala wɔ lɛ ateŋ ekome mli akɛ: “Daa gbi lɛ midaa Yehowa shi ejaakɛ eha miná hegbɛ kpele akɛ miisɔmɔ yɛ biɛ! Agbɛnɛ hu, miida nyɛ shi akɛ nyɛtsɔse mi kɛ suɔmɔ, ni nyɛyaa nɔ nyɛkɛ nyɛhe shãa afɔle koni manyɛ maya nɔ masɔmɔ yɛ biɛ.” Yɛ afi 2003 mli lɛ, eku esɛɛ kɛba New Zealand ekoŋŋ koni ebakwɛ mi kɛ Aileen.b

Wɔmiida Yehowa shi akɛ wɔshihilɛ ha wɔnyɛ wɔhere Nuŋtsɔ lɛ tsɛmɔ akɛ nitsulɔi babaoo abatsu nikpamɔ nitsumɔ lɛ nɔ. Nakai ni wɔfee lɛ eha wɔná miishɛɛ ni wɔnyɛŋ naa wɔtsɔɔ. Ni kɛ́ ‘je lɛ ho etee’ taakɛ Biblia lɛ ema nɔ mi akɛ ebaaba mli lɛ, wɔbaana Nyɔŋmɔ shiwoo ni nɔ bɛ lɛ mlibaa akɛ: “Mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:17.

[Shishigbɛ niŋmai]

[Mfoniri ni yɔɔ baafa 29]

Beni wɔshɛ Singapore yɛ afi 1947 lɛ, no mli lɛ Joshua pɛ ji Odasefonyo ni yɔɔ jɛmɛ

[Mfoniri ni yɔɔ baafa 29]

Mi kɛ Dave Farmer yɛ Hong Kong yɛ afi 1947, beni wɔmiiya Singapore

[Mfoniri ni yɔɔ baafa 29]

Mi kɛ Aileen yɛ afi 1958

[Mfoniri ni yɔɔ baafa 31]

Wɔ kɛ wɔbiyoo Judy

[He ni Sane lɛ Jɛ]

Kimroy Photography

[He ni Mfoniri ni yɔɔ baafa 28 lɛ Jɛ]

Kimroy Photography