Aye Abua Mɛi ni Myanmar Lasuogbele lɛ Fite Amɛnibii Lɛ

YƐ May 2, 2008 lɛ, lasuogbele ko ni awo lɛ gbɛi yɛ blɔfo mli akɛ Cyclone Nargis lɛ tswa yɛ Myanmar ni ekpata nibii babaoo ahiɛ, ni etsɛɛɛ kɛkɛ ni ehe adafitswaa gbɛ eshwã je lɛŋ fɛɛ.a Beni ahum kpele ko tswa ni eloo ŋshɔŋ nu pii eshwie Irrawaddy Delta kpokpaa lɛ niiaŋ fɛɛ lɛ sɛɛ lɛ, abɔ amaniɛ akɛ mɛi ni miihe ashɛ 140,000 gboi loo amɛlaaje.

Naakpɛɛ sane ji akɛ, Yehowa Odasefoi babaoo ni yɔɔ jɛi niiaŋ lɛ ateŋ mɔ ko kwraa epilaaa. Nɔ titri ni ha eba lɛ nakai ji akɛ, amɛyaba abo yɛ amɛ-Maŋtsɛyeli Asai ni amamɔ amɛ jogbaŋŋ lɛ amli. Yɛ akrowai lɛ ateŋ ekome mli lɛ, Odasefoi 20 kɛ akrowa lɛ mlibii krokomɛi 80 yatara Maŋtsɛyeli Asa lɛ yiteŋ ŋmɛlɛtswai nɛɛhu sɔŋŋ beni nu afua lɛ kwɔɔ kɛshɛɔ mitai 4.5 lɛ. Amɛ fɛɛ amɛyi ná wala. Awerɛho sane ji akɛ, akrowa lɛ mlibii krokomɛi 300 ahiɛ kpata. Yɛ akrowai babaoo amli lɛ, Maŋtsɛyeli Asai lɛ pɛ ji tsũi ni wuleee.

Beni lasuogbele lɛ ba gbii enyɔ sɛɛ lɛ, Yehowa Odasefoi anitsumɔhe nine ni yɔɔ Yangon lɛ tsu mɛi kɛtee asafo ni yɔɔ Bothingone yɛ Irrawaddy Delta lɛ naabu lɛ aŋɔɔ koni amɛkɛ yelikɛbuamɔ ayaha amɛ. Kuu ni atsu amɛ lɛ fã gbɛ kɛtsɔ hei ni efite waa, amɛkwɛ jogbaŋŋ ni ojotswalɔi akahà amɛnibii lɛ, ni amɛtsɔmɔ gbohii ni ebɔi kpɔtɔmɔ ahe kɛyashɛ Bothingone, ni amɛhiɛ amɛdɛŋ omɔ, makroni gbiŋ, nu, kɛ kɛnɛrɛi. Amɛji klɛŋklɛŋ yelikɛbuamɔ kuu ni shɛ jɛmɛ. Beni kuu lɛ kɛ yelikɛbuamɔ nibii ha Odasefoi ni yɔɔ jɛmɛ lɛ sɛɛ lɛ, amɛjɛ Biblia lɛ mli amɛha amɛ wiemɔ kɛwo amɛ hewalɛ, ni amɛshi Bibliai kɛ Biblia kasemɔ woji amɛha amɛ, ejaakɛ lasuogbele lɛ eloo amɛnibii fɛɛ kɛtee.

Bɔ ni Odasefoi ni lasuogbele lɛ kpata amɛnibii ahiɛ lɛ fee amɛnii amɛha lɛ sa kadimɔ jogbaŋŋ. Odasefonyo ko ni yɔɔ asafo ko ni yɔɔ he ni nibii ahiɛ kpata babaoo yɛ lɛ mli, yɛ Irrawaddy kpokpaa lɛ nɔ lɛ kɛɛ akɛ: “Wɔnibii fɛɛ ahiɛ kpata. Wɔtsũi lɛ fɛɛ kumɔ. Wɔŋmɔshi nibii lɛ fɛɛ fite. Nu afua lɛ fite nu ni wɔnuɔ lɛ fɛɛ. Shi nyɛmimɛi hii kɛ yei lɛ yeee amɛtsui tamɔ bɔ ni mɛi krokomɛi ye amɛtsui waa lɛ. Amɛyɛ hekɛnɔfɔɔ yɛ Yehowa kɛ esafo lɛ mli. Kɛ́ wɔyɛ akrowa lɛ mli jio, wɔtee he kroko jio, wɔbaabo gbɛtsɔɔmɔi fɛɛ ni akɛbaaha wɔ lɛ toi.”

Odasefoi 30 komɛi ni amɛ hu amɛnibii fɛɛ fite lɛ kɛ miishɛɛ la Maŋtsɛyeli lalai be ni amɛfãa gbɛ ni he amɛ ŋmɛlɛtswai nyɔŋma kɛyaa he ni yelikɛbuamɔ kui lɛ esaa niyenii, atadei, kɛ wɔɔhei eto amɛ yɛ lɛ. Dani amɛbaashɛ he ni amɛyaa lɛ, amɛnu akɛ aafee Yehowa Odasefoi akpokpaa nɔ kpee ko yɛ maŋ ko ni bɛŋkɛ amɛ lɛ mli. Amɛkpɛ amɛyiŋ akɛ amɛbaaya kpee lɛ klɛŋklɛŋ koni amɛnine ashɛ Biblia mli hewalɛwoo nɔ, ni amɛ kɛ amɛnanemɛi Kristofoi lɛ abɔ.

Yɛ he ni lasuogbele lɛ tswa yɛ lɛ niiaŋ fɛɛ lɛ, Odasefoi ashĩai 35 fite kwraa, amɛshĩai lɛ ateŋ 125 ahe nibii fioo komɛi fite, ni Maŋtsɛyeli Asai 8 hu ahe nibii fioo komɛi fite. Miishɛɛ sane ji akɛ, lasuogbele lɛ esaaa nitsumɔhe nine lɛ tsũi lɛ ahe tsɔ.

Shishijee mli lɛ, akɛni lasuogbele lɛ ha tsei wuji kumɔ shwie gbɛjegbɛi ni bɛŋkɛ nitsumɔhe nine lɛ anɔ hewɔ lɛ, mɔ ko mɔ ko nyɛɛɛ aya jɛmɛ, ni mɛi ni yɔɔ jɛmɛ lɛ hu nyɛɛɛ aje kpo. Beni ahum lɛ naa ba shi ŋmɛlɛtswai fioo komɛi asɛɛ lɛ, mɛi ni tsuɔ nii yɛ nitsumɔhe nine lɛ ateŋ mɛi ni fa fe 30 fee ekome kɛjie tsei lɛ, ni jeee tsɔji wuji amɛkɛfee enɛ. Beni amɛtsuɔ nii lɛ, mɛi damɔ sɛɛ amɛmiikwɛ amɛ ni amɛnaa ekpɛ amɛhe. Etsɛɛɛ tsɔ ni yei komɛi ni ji Odasefoi bashɛ shi ni amɛhiɛ amɛdɛŋ lamlee ni mli ejɔ kɛ aduawai ni atse etsɛko ni amɛkɛbaha mɛi ni tsuɔ nii lɛ, ni amɛha akutsoŋbii ni naa ekpɛ amɛhe lɛ hu eko. Beni adafitswalɔ ko na nɔ ni yaa nɔ lɛ, ebi akɛ: “Namɛi tsuɔ nii jogbaŋŋ nɛkɛ?” Beni atsɔɔ lɛ lɛ, ekɛɛ akɛ, “Miná ni mɛi babaoo jieɔ ekomefeemɔ su kpakpa nɛɛ kpo taakɛ Yehowa Odasefoi feɔ lɛ!”

Odasefoi lɛ to kui enyɔ ashishi yɛ maŋ lɛŋ hei srɔtoi amrɔ nɔŋŋ koni amɛkwɛ ni akɛ yelikɛbuamɔ nibii ayaha mɛi ni osharai eba amɛ nɔ lɛ. Mɛi ohai abɔ kɛ amɛhe ha kɛtsu nii yɛ kui enyɔ nɛɛ ashishi. Gbii fioo komɛi asɛɛ lɛ, amamɔ shĩai heei aha Odasefoi ni amɛshĩai efite lɛ. Beni kui lɛ ateŋ ekome yashɛ shi koni amɛma shĩa hee amɛha Odasefonyo ko lɛ, ekutsoŋbii lɛ kwɛ nɔ ni yaa nɔ lɛ ni amɛnaa ekpɛ amɛhe waa. Ekutsoŋbii lɛ ateŋ mɔ kome kɛɛ akɛ: “Odasefonyo yoo nɛɛ sɔlemɔ lɛ mlibii lɛ miima eshĩa lɛ amɛmiiha lɛ. Minanemɛi Buddhafoi lɛ ateŋ mɔ ko ebayeko ebuako mi. Beni Odasefonyo nɛɛ bashiɛ etsɔɔ mi lɛ, kulɛ esa akɛ makpɛlɛ ni matsɔ Odasefonyo!”

Beni tsumalɔi lɛ kɛ yelikɛbuamɔ kui lɛ yakwɛ shĩa ko ni yɔɔ Thanlyn ni efite etã lɛ, bɔ ni Odasefoi aweku ni shĩa lɛ ji amɛnɔ lɛ fee amɛnii amɛha lɛ ta amɛtsuiiaŋ waa, weku nɛɛ kɛɛ akɛ: “Nɔ ko bako. Wɔshĩa lɛ fiteko. Wɔbaanyɛ wɔhi mli—ejeee naagba! Odasefoi komɛi po bɛ shĩa. Nyɛyaa nyɛyayea nyɛbuaa amɛ!”

Yɛ Yangon he ko lɛ, mɛi komɛi bɔ mɔdɛŋ akɛ amɛaaba abo yɛ sɔlemɔtsui ni yɔɔ jɛmɛ lɛ ateŋ ekome mli. Shi aŋa sɔlemɔtsu lɛ shinaa lɛ ni ehiii mɔ ko mɔ ko mlibotemɔ. Mɛi lɛ amli fu waa ni amɛka akɛ amɛbaajwa sɔlemɔtsu lɛ shinaa lɛ. Nɔ ni tamɔɔɔ nakai lɛ, Yehowa Odasefoi lɛ ha mɛi babaoo yaba abo yɛ Maŋtsɛyeli Asai anɔ beni lasuogbele lɛ tswaa lɛ. Ákɛ nɔkwɛmɔnɔ lɛ, nuu ko kɛ eŋa ni ji Odasefoi lɛ ha amɛkutsoŋbii 20 ni ehao lɛ yaba abo yɛ Maŋtsɛyeli Asa ni yɔɔ Dala lɛ nɔ. Beni je tsɛre lɛ, wekui nɛɛ bɛ he ko ni amɛbaaya, ni hɔmɔ hu miiye amɛ. Nuu lɛ na mɔ ko ni miihɔɔ omɔ ni ehe bɔ ni baashɛ mɛi nɛɛ fɛɛ anaa.

Weku ko ni yɔɔ Yangon lɛ mlibii lɛ ateŋ mɛi komɛi ji Yehowa Odasefoi, ni amɛteŋ mɛi krokomɛi yaa sɔlemɔi srɔtoi. Yɛ lasuogbele lɛ sɛɛ lɛ, weku lɛ mlibii lɛ fɛɛ tee kpee yɛ Maŋtsɛyeli Asa lɛ nɔ. Mɛni hewɔ? Amɛteŋ mɔ kome tsɔɔ mli akɛ: “Wɔsɔlemɔ lɛ kɛɛ amɛbaaba amɛbasara wɔ yɛ ahum lɛ sɛɛ, shi amɛbaaa. Odasefoi lɛ pɛ ba. Nyɛha wɔ omɔ kɛ nu. Nyɛfeee nyɛnii taakɛ sɔlemɔi krokomɛi lɛ feɔ lɛ!” Wekumɛi ni jeee Odasefoi lɛ ná Buu-Mɔɔ lɛ mli sane ni akase ni yitso ji “Yehowa Feɔ Toi Ehaa Wɔbolɔmɔi Lɛ” he miishɛɛ, ni amɛkɛ amɛhe wo sanegbaa lɛ mli babaoo.

Lasuogbele lɛ sɛɛ otsi lɛ, yoo ko ni Odasefoi kɛ lɛ kaseɔ Biblia lɛ tee asafoŋ kpee. Beni kpee lɛ yaa nɔ lɛ, akane wolo ko ni jɛ nitsumɔhe nine lɛ ŋɔɔ, wolo nɛɛ tsɔɔ nɔ ni afee kɛye abua mɛi kɛ niiashikpamɔi ni mɛi ni yi ná wala yɛ lasuogbele lɛ mli lɛ ná. Yoo lɛ bɔi yaafo beni akaneɔ wolo lɛ. Etsui nyɔ emli waa ni ená miishɛɛ babaoo ejaakɛ enu akɛ Odasefoi lɛ ateŋ mɔ ko mɔ ko hiɛ kpatako, ni amɛ fɛɛ amɛyɛ shweshweeshwe. Sɛɛ mli lɛ, aha yoo lɛ hiamɔ nibii komɛi ni ashi buu aha lɛ yɛ etsu lɛ masɛi tuuntu. Yoo lɛ kɛɛ akɛ enu he akɛ Odasefoi lɛ ye amɛbua lɛ jogbaŋŋ.

Yesu kɛɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Ni kaselɔ Yakobo hu ma nɔ mi akɛ anɔkwa hemɔkɛyeli kɛ nitsumɔi kpakpai nyiɛɔ. (Yakobo 2:14-17) Yehowa Odasefoi kɛ hiɛdɔɔ tsuɔ wiemɔi nɛɛ ahe nii ni amɛbɔɔ mɔdɛŋ akɛ amɛaajie suɔmɔ ni tamɔ nakai kpo kɛtsɔ yelikɛbuamɔ ni amɛkɛhaa mɛi ni ehia amɛ lɛ nɔ.—w09 03/01-E.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 11]

Biblia lɛ kɛɔ akɛ anɔkwa hemɔkɛyeli kɛ nitsumɔi kpakpai nyiɛɔ