Tafãa ko ni Ato He Gbɛjianɔ Jogbaŋŋ lɛ Wo Yibii
Nyɛmi yoo ko ni atsɛɔ lɛ María Isabel lɛ ji shiɛlɔ ko ni yɔɔ ekãa waa yɛ San Bernardo, ni ji maŋtiase ko ni yɔɔ Chile yɛ South America lɛ. Ekɛ eweku lɛ fɛɛ lɛ, Mapuchebii ji amɛ. Weku muu lɛ fɛɛ kɛ ekãa miiye kɛmiibua koni aná asafo yɛ Mapuchebii awiemɔ ni atsɛɔ lɛ Mapudungun hu lɛ mli.
Beni atswa adafi akɛ abaafee Kristo gbele lɛ Kaimɔ lɛ eko yɛ Mapudungun mli, ni ákɛ akala Kaimɔ lɛ he ninefɔɔ woji 2,000 yɛ nakai wiemɔ lɛ mli lɛ, eha María Isabel susu nii ahe waa. Mɛni ebaanyɛ efee kɛye ebua? Ekai niiashikpamɔi komɛi ni tsɔɔ bɔ ni Odasefoi oblahii kɛ oblayei komɛi nyɛ amɛye amɛklasbii kɛ amɛtsɔɔlɔi odase. Ekɛ efɔlɔi gba he sane, ni amɛ fɛɛ amɛkpɛ mli akɛ María Isabel asusu gbɛ ni ebaanyɛ etsɔ nɔ ejara ninefɔɔ woji lɛ yɛ skul lɛ he. Te ekpɛ mli akɛ ebaafee lɛ tɛŋŋ?
Klɛŋklɛŋ lɛ, María Isabel bi skul nɔkwɛlɔi lɛ gbɛ koni ekɛ ninefɔɔ wolo lɛ eko akpɛtɛ skul lɛ shinaa lɛ naa. Amɛkpɛlɛ nɔ, ni amɛjie eyi po yɛ nɔ ni eto akɛ ebaafee lɛ he. Gbi ko beni skulbii lɛ tee asɛmble lɛ, tsɔɔlɔ nukpa lɛ tswa ninefɔɔ wolo lɛ he adafi.
No sɛɛ lɛ, María Isabel bi gbɛ koni ekɛ woji lɛ aya klas fɛɛ klas. Beni tsɔɔlɔ ni yɔɔ klas lɛ eŋmɛ lɛ gbɛ sɛɛ lɛ, ebiɔ kɛji Mapuchebii yɛ klas lɛ. Ekɛɛ akɛ: “Misusu akɛ ekolɛ maná Mapuchebii aaafee 10 loo 15 ko kɛkɛ yɛ skul lɛ fɛɛ, shi miná mɛi ni fa fe nakai—mija ninefɔɔ woji lɛ 150 sɔŋŋ!”
“KULƐ EEKPA MƆ KO NI HIƐ EFÃ GBƐ”
Yoo ko ni na ninefɔɔ wolo lɛ yɛ skul lɛ shinaa lɛ naa lɛ bi mɔ ni esa akɛ ena koni egbala nifeemɔ lɛ mli etsɔɔ lɛ. Ehiɛ fee lɛ yaa beni aha eyana oblayoo fioo ko ni eye afii nyɔŋma lɛ! María Isabel kɛ ŋmɔlɔ kɛɛ akɛ: “Kulɛ eekpa mɔ ko ni hiɛ efã gbɛ.” Beni María Isabel eha yoo lɛ ninefɔɔ wolo lɛ eko, ni egbala mli etsɔɔ lɛ lɛ sɛɛ lɛ, ehe yoo lɛ adrɛs bɔni afee ni ekɛ efɔlɔi ayasara lɛ ni amɛkɛ lɛ agba Nyɔŋmɔ Maŋtsɛyeli lɛ he saji babaoo. Beni Mapuchebii 27, ni yoo lɛ fata he lɛ ba Kaimɔ lɛ, shiɛlɔi 20 ni shiɛɔ yɛ Mapudungun mli lɛ ná miishɛɛ waa. Amrɔ nɛɛ, kuu nɛɛ etsɔ asafo ni miishwere waa!
Ekɔɔɔ he eko afii abɔ ni oye lɛ, ani bo hu obaanyɛ ofɔ̃ oskulbii loo mɛi ni okɛ tsuɔ nii lɛ nine kɛya Kaimɔ lɛ, maŋshiɛmɔ ko, loo kpee wulu ko shishi? Mɛni hewɔ otaooo nii amli yɛ wɔwoji lɛ amli akɛ obaaná niiashikpamɔi srɔtoi ni baaha ona gbɛ ni obaanyɛ otsɔ nɔ ofee nakai? Kɛfata he lɛ, sɔlemɔ obi Yehowa ni ekɛ emumɔ krɔŋkrɔŋ lɛ aye abua bo koni oná ekãa kɛwie ehe otsɔɔ mɛi. (Luka 11:13) Kɛ́ ofee nakai lɛ, bo hu obaaná miishɛɛ, ni nɔ ni baajɛ onitsumɔ lɛ mli kɛba lɛ baawo bo hewalɛ waa.