Abaajara Kaimɔ lɛ He Ninefɔ̃ɔ Wolo Kɛjɛ April 2 Kɛyaa
1. Mɛɛ be wɔbaajara Kaimɔ lɛ he ninefɔ̃ɔ wolo lɛ afi nɛɛ, ni te daa afi ninefɔ̃ɔ nɛɛ he hiaa ha tɛŋŋ?
1 Kɛjɛ April 2 kɛyashi April 17 lɛ, wɔbaajara ninefɔ̃ɔ woji kɛha nifeemɔ ni he hiaa fe fɛɛ yɛ afi lɛ mli, ni ji Kristo gbele lɛ Kaimɔ lɛ. Mɛi babaoo ni yɔɔ wiemɔ lɛ he miishɛɛ lɛ kpɛlɛɔ ninefɔ̃ɔ nɛɛ ni akɛhaa daa afi lɛ nɔ yɛ bei ni eho lɛ amli. Akɛ nɔkwɛmɔnɔ lɛ, yɛ Kaimɔ gbi lɛ nɔ lɛ, yoo ko tswa nitsumɔhe nine lɛ tɛlifoŋ ni ekɛɛ akɛ: “Bianɛ nɔŋŋ mishɛ shĩa, ni mina ninefɔ̃ɔ wolo ko hɔ mishinaa lɛ shishi. Miisumɔ ni maya eko, shi mileee be ni akɛbaafee.” Nyɛmi nuu ni ekɛwie yɛ tɛlifoŋ lɛ nɔ lɛ tsɔɔ lɛ he ni ebaana sane nɛɛ yɛ, yɛ ninefɔ̃ɔ wolo lɛ nɔ. Yoo lɛ mu amɛsanegbaa lɛ naa kɛ shiwoo nɛɛ akɛ, “Maya nifeemɔ lɛ shishi gbɛkɛ nɛɛ!”
2. Mɛni wɔbaanyɛ wɔkɛɛ kɛ́ wɔkɛ ninefɔ̃ɔ wolo lɛ miiha?
2 Bɔ ni Wɔɔfee Wɔkɛha: Akɛni be ni wɔkɛbaajara ninefɔ̃ɔ woji lɛ yɛ shikpɔŋkuku lɛ mli fɛɛ lɛ faaa hewɔ lɛ, ehi jogbaŋŋ akɛ wɔɔha wɔwiemɔ afee kuku. Wɔbaanyɛ wɔkɛɛ akɛ: “Hɛloo. Wɔmiisumɔ ni wɔfɔ̃ okɛ oweku lɛ nine kɛya nifeemɔ ko ni he hiaa ni afeɔ lɛ daa afi lɛ shishi, ni abaafee afi nɛɛ nɔ lɛ Hɔgbaa, April 17 yɛ jeŋ fɛɛ. [Okɛ ninefɔ̃ɔ wolo lɛ aha shĩatsɛ lɛ.] Nakai gbi lɛ ji gbi ni akɛbaakai Yesu gbele lɛ. Abaaha Biblia mli wiemɔ ko kɛtsɔɔ bɔ ni wɔɔfee wɔná Kristo kpɔmɔnɔ lɛ he sɛɛ, ni aheee nɔ ko. Ninefɔ̃ɔ wolo nɛɛ tsɔɔ be kɛ he ni abaafee kpee nɛɛ yɛ wɔkutso lɛ mli.”
3. Te wɔɔfee tɛŋŋ wɔfɔ̃ mɛi babaoo nine kɛba Kaimɔ lɛ?
3 Kɛ́ nyɛsafo lɛ shikpɔŋkuku lɛ da lɛ, ekolɛ asafoŋ onukpai lɛ baaha nyɛshi ninefɔ̃ɔ wolo lɛ eko yɛ mɛi ni bɛ shĩa lɛ ashinai anaa, kɛ́ nyɛbaanyɛ nyɛkɛwo he ni mɛi ni hoɔ kɛyaa kɛbaa lɛ enaŋ. Bɔɔ mɔdɛŋ akɛ obaafɔ̃ mɛi ni okuɔ osɛɛ oyasaraa amɛ, owekumɛi, mɛi ni okɛtsuɔ nii, onanemɛi skulbii, kɛ mɛi krokomɛi ni ole amɛ lɛ nine. Kɛ́ nyɛmiijara ninefɔ̃ɔ woji lɛ yɛ otsi lɛ naagbee lɛ, nyɛkɛ woji tɛtrɛbii lɛ afataa he, kɛ́ eeehi. Ani obaanyɛ okɛ ohe awo gbɛgbalɔi awamɔ nitsumɔ lɛ mli yɛ April mli koni onyɛ otsu babaoo yɛ tafãa nɛɛ mli?
4. Mɛni hewɔ wɔsumɔɔ ni mɛi ni yɔɔ wiemɔ lɛ he miishɛɛ lɛ aba Kaimɔ lɛ?
4 Kɛ́ mɛi ni yɔɔ wiemɔ lɛ he miishɛɛ lɛ ba Kaimɔ lɛ, ebaafee odaseyeli kpele diɛŋtsɛ kɛha amɛ! Amɛbaaná amɛle suɔmɔ kpele ni Yehowa jie lɛ kpo kɛtsɔ kpɔmɔnɔ lɛ ni ekɛha lɛ nɔ. (Yoh. 3:16) Abaatsɔɔ amɛ bɔ ni Nyɔŋmɔ Maŋtsɛyeli lɛ baatsu adesai ahiamɔ nii ahe nii eha amɛ. (Yes. 65:21-23) Amɛbaaná hegbɛ hu ni amɛkɛ mɛi ni kwɛɔ shitaramɔ nɔ lɛ awie kɛji amɛmiisumɔ ni akɛ amɛ akase Biblia lɛ, ni amɛle nibii babaoo. Wɔsɔlemɔ ji akɛ, mɛi babaoo ni hiɛ tsui ni ja lɛ baahere ninefɔ̃ɔ nɛɛ nɔ ni amɛbafata wɔhe kɛye Kaimɔ lɛ!