Nibii Titri ni Eba yɛ Afii ni Mikɛsɔmɔ yɛ Maŋtsɛyeli lɛ Shishi lɛ Mli

YƐ AFI 1945 lɛ, mi kɛ Evelyn Trabert gbe Buu-Mɔɔ Gilead Biblia Skul lɛ klas ni ji ejwɛ nɔ nɔ lɛ naa, ni enɔ afii enyɔ ni nakai tutuamɔ lɛ ba. Nakai beaŋ lɛ, afeɔ Gilead Skul lɛ yɛ he ko ni bɛŋkɛ Ithaca, yɛ New York. Ahã wɔyasɔmɔ akɛ maŋsɛɛ sɔɔlɔi yɛ El Salvador, ni mikɛ nɔ ni miihe ashɛ afii 29 sɔmɔ yɛ jɛi. Dani magba bo mimaŋsɛɛ sɔɔmɔ nitsumɔ lɛ he sane lɛ, hã matsɔɔ bo nɔ hewɔ ni mikpɛ miyiŋ akɛ matsu nitsumɔ nɛɛ.

BƆ NI FEE NI WƆWEKU LƐ BALE ANƆKWALE LƐ

Afɔ mi yɛ afi 1923 yɛ Spokane, ni yɔɔ Washington, yɛ U.S.A. lɛ. No mli lɛ mifɔlɔi, ní atsɛɔ amɛ John Olson kɛ Eva Olson lɛ yaa Lutheran sɔlemɔ lɛ eko, shi amɛheee hɛl la tsɔɔmɔ lɛ amɛyeee. Amɛheee amɛyeee akɛ Nyɔŋmɔ ni yɔɔ suɔmɔ lɛ baapiŋ mɛi. (1 Yohane 4:8) No mli lɛ, mitsɛ tsuɔ nii yɛ he ko ni ashãa bodobodo yɛ. Gbi gbɛkɛ ko lɛ, nitsulɔi lɛ ateŋ mɔ kome jɛ Biblia lɛ mli etsɔɔ lɛ akɛ, Nyɔŋmɔ piŋŋŋ mɛi yɛ hɛl la mli. Etsɛɛɛ tsɔ ni Yehowa Odasefoi kɛ mifɔlɔi bɔi Biblia lɛ kasemɔ. Amɛkase nɔ ni Biblia lɛ tsɔɔ diɛŋtsɛ yɛ shihilɛ ni gbohii lɛ yɔɔ mli lɛ he.

No mli lɛ miye afii nɛɛhu pɛ, shi mikaiɔ bɔ ni mifɔlɔi ná nibii ni amɛkaseɔ lɛ he miishɛɛ lɛ lolo. Be ni amɛkase akɛ Nyɔŋmɔ gbɛ́i ji Yehowa, ni Triniti ko bɛ lɛ, amɛná miishɛɛ waa. (Yohane 8:32) Mifɔlɔi hu tsɔɔ mi nɔ ni amɛkaseɔ lɛ, ni mimɔ anɔkwalei nɛɛ amli kpɛŋŋ. Minuuu he kɔkɔɔkɔ akɛ Biblia lɛ kanemɔ nyaraa mɔ hiɛ. Misumɔɔ Nyɔŋmɔ Wiemɔ lɛ kasemɔ waa. Eyɛ mli akɛ mihiɛ gboɔ moŋ, shi mifata mifɔlɔi ahe kɛtee shiɛmɔ. Abaptisi amɛ yɛ afi 1934, ni abaptisi mi hu yɛ afi 1939, be ni miye afii 16.

Yɛ July 1940 mli lɛ, mifɔlɔi hɔ̃ɔ amɛshĩa lɛ, ni wɔfã kɛtee Coeur d’Alene, yɛ Idaho. Ní wɔtee jɛi lɛ, wɔ fɛɛ wɔbɔi gbɛgbamɔ nitsumɔ lɛ. Wɔyahai tsũ ko ni yɔɔ ŋwɛitsu ko ni asaa tsɔnei yɛ shishi lɛ nɔ. Afeɔ asafoŋ kpee yɛ wɔshĩa lɛ. Nakai beaŋ lɛ, asafoi fioo komɛi pɛ yɔɔ Maŋtsɛyeli Asa. Asafoi babaoo yahaiɔ tsũi ni amɛkpeɔ yɛ jɛi loo amɛkpeɔ yɛ nyɛmimɛi ashĩai.

Yɛ afi 1941 lɛ, mi kɛ mifɔlɔi tee kpee ko yɛ St. Louis, yɛ Missouri. Atsɛ naagbee gbi ni akɛfee kpee lɛ akɛ “Gbekɛbii Agbi.” Nakai gbi lɛ, abi ní mɛi ni eye kɛjɛ afii 5 kɛyashi afii 18 lɛ abatara kpoku lɛ hiɛ gbɛ. Be ni wiemɔi lɛ ateŋ ekome, ni Nyɛminuu Joseph F. Rutherford hã lɛ baa naagbee lɛ, ekɛ wɔ gbekɛbii lɛ wie tɛɛ. Ebi ni gbekɛbii lɛ fɛɛ ateŋ mɛi ni kpɛlɛɔ nɔ akɛ ‘amɛbaabo Nyɔŋmɔ kɛ e-Maŋtsɛ lɛ toi lɛ’ ate shi adamɔ shi. Kɛkɛ ni wɔ fɛɛ wɔte shi wɔdamɔ shi. Nyɛminuu Rutherford wie akɛ: “Nyɛkwɛa Maŋtsɛyeli lɛ he odasefoi hei ni fa fe 15,000!” Kɛjɛ nakai be lɛ nɔ lɛ, mikpɛ miyiŋ akɛ mikɛ miwala fɛɛ baatsu gbɛgbamɔ nitsumɔ lɛ.

NITSUMƆI NI AKƐWO WƆWEKU LƐ DƐŊ

Yɛ nakai kpee lɛ sɛɛ nyɔji fioo komɛi lɛ, ahã wɔweku lɛ fã kɛtee maŋ ko ni atsɛɔ lɛ Oxnard, ni yɔɔ California wuoyigbɛ lɛ koni wɔyato asafo yɛ jɛi. Wɔhi tsɔne ko ni awɔɔ mli ni saatso kome pɛ yɔɔ mli lɛ mli. Daa gbɛkɛ lɛ, asaa okpɔlɔ ni wɔyeɔ nii yɛ nɔ lɛ nɔ ahãa mi ni mikãa nɔ. Enɛ ji tsakemɔ kpele diɛŋtsɛ kɛhã mi, ejaakɛ tsutsu ko lɛ mikome miyɛ mitsũ!

Yɛ December 7, 1941 lɛ, Japan tswa okplɛm ewo Pearl Harbor ni yɔɔ Hawaii lɛ, ni enɛ hewɔ lɛ, enɔ jetsɛremɔ lɛ, United States hu kɛ ehe wo Jeŋ Ta II lɛ mli. No sɛɛ etsɛɛɛ ni wɔyashɛ California lɛ. Nakai beaŋ lɛ, Japanbii lɛ anu shishi lɛji lɛ yɛ ŋshɔ ni yɔɔ jɛi niiaŋ lɛ mli, no hewɔ lɛ afã ní mɛi fɛɛ ni bɛŋkɛ ŋshɔ lɛ naa lɛ agbegbee amɛkanei kɛ́shɛ gbɛkɛ. Kɛ́ duŋ wo waa lɛ, ewa kɛhã nu shishi lɛji akɛ amɛaatutua amɛhenyɛlɔi yɛ shikpɔŋ lɛ nɔ.

Nyɔji fioo komɛi asɛɛ, yɛ September 1942 lɛ, wɔtee New World Theocratic Assembly (Jeŋ Hee Teokrase Kpee) ní afee yɛ Cleveland, yɛ Ohio lɛ. Mikaiɔ wiemɔ ní yitso ji, “Peace​—Can It Last?” (“Toiŋjɔlɛ​—Ani Ebaahi Shi Daa?”) ní Nyɛminuu Nathan H. Knorr hã lɛ waa. Yɛ nakai wiemɔ lɛ mli lɛ, egbala gbalɛ ni yɔɔ Kpojiemɔ yitso 17 lɛ ni kɔɔ “kooloo lɛ” ni “yɛ, ni ebɛ, ni ebaajɛ bu kwɔŋkwɔŋ lɛ mli eje kpo kɛbaho hiɛkpatamɔ mli” lɛ he lɛ mli. (Kpojiemɔ 17:8, 11) Nyɛminuu Knorr tsɔɔ mli akɛ, “kooloo lɛ” ji Jeŋmaji Akpaŋmɔ lɛ, ni be ni awuɔ ta lɛ no mli lɛ ekpa nitsumɔ. No sɛɛ lɛ, etsɔɔ mli akɛ, abaasaa ato gbɛjianɔ kroko kɛhã jeŋ toiŋjɔlɛ, ni toiŋjɔlɛ be baaba yɛ no sɛɛ. Nakai pɛpɛɛpɛ eba lɛ. Yɛ afi 1945 Jeŋ Ta II lɛ ba naagbee lɛ. No sɛɛ lɛ, akɛ Jeŋmaji Ekomefeemɔ lɛ baye Jeŋmaji Akpaŋmɔ lɛ najiaŋ. Kɛjɛ nakai beaŋ kɛyaa lɛ, Yehowa Odasefoi bɔi sane kpakpa lɛ shiɛmɔ yɛ shikpɔji babaoo nɔ. Kwɛ bɔ ni wɔyi efa kɛjɛ nakai beaŋ!

Nakai gbalɛ lɛ hã mina akɛ nitsumɔ babaoo yɛ ni abaatsu. No hewɔ lɛ, be ni atswa adafi akɛ enɔ afi lɛ abaaje Gilead Skul lɛ shishi lɛ, mishwe akɛ maya skul nɛɛ eko koni matsɔ maŋsɛɛ sɔɔlɔ. Shi dani nakai be lɛ aaashɛ lɛ, yɛ afi 1943 lɛ, ahã miyasɔmɔ akɛ daa gbɛgbalɔ yɛ Portland, yɛ Oregon. Yɛ nakai beaŋ lɛ, wɔkɛ gramafon tswaa maŋshiɛmɔi wɔhãa shiatsɛmɛi yɛ amɛshinai anaa, kɛkɛ lɛ, wɔhã amɛ Biblia kasemɔ wolo ko ni kɔɔ Nyɔŋmɔ Maŋtsɛyeli lɛ he. Nakai afi lɛ mli fɛɛ lɛ, nɔ ni misusu he nɔŋŋ ji maŋsɛɛ sɔɔmɔ nitsumɔ lɛ.

Yɛ afi 1944 lɛ, afɔ̃ mi kɛ minaanyo Evelyn Trabert fɛɛ nine kɛhã Gilead Skul lɛ. Miná miishɛɛ waa akɛ atsɛ wɔ! Wɔtsɔɔlɔi lɛ kɛ nyɔji enumɔ tsɔɔ wɔ bɔ ni akaseɔ Biblia lɛ ahãa, ni wɔnya bɔ ni amɛtsɔɔ wɔ nii amɛhã lɛ he waa. Bɔ ni wɔtsɔɔlɔi lɛ baa amɛhe shi lɛ ta wɔtsuiŋ waa. Akɛ nɔkwɛmɔnɔ lɛ, bei komɛi lɛ amɛ ji mɛi ni toɔ niyenii yɛ okpɔlɔ nɔ amɛhãa wɔ. Wɔgbe Gilead Skul lɛ naa yɛ January 22, 1945.

MISƆMƆ AKƐ MAŊSƐƐ SƆƆLƆ

Yɛ June 1946 lɛ, mi kɛ Evelyn, kɛ Leo Mahan kɛ eŋa Esther Mahan tee Santa Ana, yɛ El Salvador. No mli lɛ, ŋmɔ ni yɔɔ jɛi lɛ ‘egba futaa.’ (Yohane 4:35) Be ni wɔshɛ jɛi lɛ sɛɛ nyɔji komɛi lɛ, wɔfee wɔ-klɛŋklɛŋ kpokpaa nɔ kpee yɛ Santa Ana. Wɔfɔ̃ mɛi nine kɛhã kpee lɛ, ni wɔmii shɛ wɔhe waa be ni mɛi aaashɛ 500 ba lɛ. Shiɛmɔ ni wɔshiɛɔ lɛ wo osɔfoi lɛ amli la, ni otsi sɛɛ lɛ, amɛbua mɛi anaa koni amɛbatutua wɔ, taakɛ miwie yɛ sane nɛɛ shishijee lɛ. Amɛka akɛ amɛbaawo wɔhe gbeyei koni wɔshi maŋ lɛŋ. Shi no moŋ hã wɔtswa wɔfai shi akɛ wɔbaahi shi ni wɔye wɔbua maŋbii lɛ. Osɔfoi lɛ wo amɛhe gbeyei ní amɛkakane Biblia lɛ, ni amɛteŋ mɛi fioo ko pɛ yɔɔ shika ní amɛbaanyɛ amɛkɛhe eko. Shi mɛi pii miitao akase anɔkwale lɛ. Eŋɔɔ amɛnaa akɛ wɔmiikase Spanish bɔ ni afee ni wɔtsɔɔ amɛ Yehowa kɛ shi ni ewo akɛ ebaafee shikpɔŋ lɛ paradeiso lɛ he nii.

Biblia mli nikaselɔi ni miná klɛŋklɛŋ lɛ ateŋ mɔ kome ji Rosa Ascencio. No mli lɛ, ekɛ nuu ko yɛ, shi amɛboteko gbalashihilɛ mli. Shi be ni ebɔi Biblia lɛ kasemɔ lɛ, etse ehe kɛje nuu lɛ he. Kɛkɛ ni nuu lɛ hu bɔi Biblia lɛ kasemɔ. Amɛbote gbalashihilɛ mli, abaptisi amɛ, ni amɛbatsɔmɔ Odasefoi ni yɔɔ ekãa. Rosa ji mɔ klɛŋklɛŋ ni batsɔ daa gbɛgbalɔ yɛ Santa Ana.b​—Kwɛmɔ shishigbɛ niŋmaa lɛ.

Rosa yɛ shwapo fioo ko. Be fɛɛ be ni ebaaya shiɛmɔ lɛ, eŋaa shwapo lɛ kɛ hiɛnɔkamɔ lɛ akɛ, Yehowa baahã lɛ nibii ni he hiaa lɛ lɛ. Be fɛɛ be lɛ, mɛi saŋŋ baheɔ nii yɛ Rosa shwapo lɛ naa. Ena faŋŋ akɛ Yehowa miikwɛ lɛ, taakɛ Mateo 6:33 lɛ wo shi lɛ. Eye Yehowa anɔkwa kɛyashi egbo.

Mi kɛ maŋsɛɛ sɔɔlɔi enumɔ komɛi yahai shĩa ko yɛ nuu ko ni ji guɔyelɔ ni ale lɛ waa lɛ dɛŋ. Gbi ko lɛ, osɔfo ko basara nuu lɛ ni ekɛɛ lɛ akɛ, kɛ́ efãaa wɔ yɛ etsũ lɛ mli lɛ, abaashwie lɛ kɛ eŋa lɛ fɛɛ kɛje sɔlemɔ lɛ mli. Nuu lɛ sheee osɔfo lɛ gbeyei, ni ekɛɛ lɛ akɛ, kɛ́ ashwie lɛ kɛje sɔlemɔ lɛ mli po lɛ, ejeee ehe sane ko. Emli ewo la momo yɛ nibii komɛi ní osɔfoi lɛ efee lɛ hewɔ. Ekɛɛ wɔ akɛ, wɔbaanyɛ wɔya nɔ wɔhi eshĩa lɛ kɛyashi be ni wɔsumɔɔ.

MƆ KO NI ABUƆ LƐ WAA BATSƆ ODASEFONYO

Yɛ El Salvador maŋtiase ni ji lɛ San Salvador mli lɛ, maŋsɛɛ sɔɔlɔ kroko hu kɛ tsumaa he ŋaalɔ ko ni atsɛɔ lɛ Baltasar Perla lɛ ŋa kase Biblia lɛ. No mli lɛ, hemɔkɛyeli ni nuu nɛɛ yɔɔ yɛ Nyɔŋmɔ mli lɛ etã yɛ osato ni jamɔŋ hiɛnyiɛlɔi babaoo feɔ lɛ hewɔ. Shi emli jɔ waa. Eyɛ mli akɛ no mli lɛ ejeee Odasefonyo moŋ, shi ekɛ ehe hã akɛ ebaatɛŋ bɔ ni abaama El Salvador nitsumɔhe nine lɛ ahã lɛ, ni ebaawa kɛma, ní eheee Odasefoi lɛ shika ko.

Be ni amaa nitsumɔhe nine lɛ, Baltasar kɛ Odasefoi babaoo tsu nii, ni no kɔne eyiŋ akɛ ena anɔkwa jamɔ lɛ. Abaptisi lɛ yɛ July 22, 1955, ni no sɛɛ etsɛɛɛ lɛ, abaptisi eŋa Paulina hu. Amɛbii enyɔ lɛ fɛɛ miisɔmɔ Yehowa. Amɛbinuu ni atsɛɔ lɛ Baltasar junior lɛ kɛ afii 49 esɔmɔ yɛ New York Betel. Efĩɔ jeŋ muu fɛɛ shiɛmɔ nitsumɔ lɛ sɛɛ yɛ jɛi, ni esɔmɔɔ akɛ United States Nitsumɔhe Nine Ajinafoi Akuu lɛ mli nyo.c​—Kwɛmɔ shishigbɛ niŋmaa lɛ.

Be ni abɔi kpeei wuji feemɔ yɛ San Salvador lɛ, Nyɛminuu Perla ye ebua wɔ ni wɔnine shɛ shwɛmɔhe wulu ko ni wɔbaanyɛ wɔkpe yɛ jɛi lɛ nɔ. Be ni wɔkpe yɛ jɛi klɛŋklɛŋ kwraa lɛ, sɛii lɛ babaoo kamɔ shi efolo. Shi afi fɛɛ afi lɛ, mɛi hei bafataa he, ni etsɛɛɛ ni sɛii lɛ fɛɛ yi ní anáaa he ko po atara. Wɔna faŋŋ akɛ, Yehowa miijɔɔ nɔ ni wɔtsuɔ lɛ nɔ. Mina mɛi ní mikɛkase Biblia lɛ ekomɛi yɛ kpeei nɛɛ ashishi. Ni mimii shɛɔ mihe waa kɛ́ abaptisi mɛi ni mikɛkase nii lɛ eko Biblia mli nikaselɔ. Minaa mɛi hee nɛɛ akɛ minabii.

Yɛ kpee lɛ eko shishi lɛ, nyɛmi nuu ko banina mi ni ekɛɛ mi akɛ eetao ekpa mi fai. Minaaa nɔ ni etsɔɔ lɛ, ni miyooo lɛ hu. Ewie akɛ: “Mifata gbekɛbii hii ni tswara nyɛ tɛi yɛ Santa Ana lɛ ahe.” Mimii shɛ mihe waa be ni miná mile akɛ amrɔ nɛɛ, ekɛ mi fɛɛ miisɔmɔ Yehowa lɛ. Nakai sanegbaa lɛ kai mi akɛ be fɛɛ sɔɔmɔ nitsumɔ lɛ ji nitsumɔ ni fe fɛɛ ni mɔ ko baanyɛ atsu.

YIŊ NI MIKPƐ LƐ HÃ MITSUI NYƆ MIMLI

Mikɛ nɔ ni miihe ashɛ afii 29 sɔmɔ akɛ maŋsɛɛ sɔɔlɔ yɛ El Salvador. Misɔmɔ yɛ Santa Ana, Sonsonate, kɛ Santa Tecla, ni naagbee kwraa lɛ miyasɔmɔ yɛ San Salvador. Nakai beaŋ fɛɛ lɛ, mifɔlɔi miigbɔlɔ, no hewɔ lɛ ehe bahia ni mayaye mabua amɛ. Enɛ hewɔ lɛ, be ni misɔle saŋŋ sɛɛ lɛ, mikpɛ miyiŋ yɛ afi 1975 mli akɛ, mashi maŋsɛɛ sɔɔmɔ nitsumɔ lɛ ni maku misɛɛ kɛya Spokane.

Mitsɛ gbo yɛ afi 1979, ni mikɛ afii kpaanyɔ ni nyiɛ sɛɛ lɛ kwɛ minyɛ. Akɛni egbɔjɔ kwraa hewɔ lɛ, ehe bahia ni mahi ehe be fɛɛ be. Egbo be ni eye afii 94. Mináaa enɛ mlɛo kwraa. Tsuiŋdɔlɛ kɛ piŋmɔ ni minu he lɛ hã migbɔjɔ kwraa. Mibaye anansi, ni ewaa mɔ he waa. Shi minu he akɛ Yehowa kɛ esuɔmɔ nine lɛ hiɛ mimli. Ebo misɔlemɔi lɛ toi, ni eye ebua mi kɛkpee nakai shihilɛ ni jaraa lɛ naa. Yehowa eye shi ni ewo akɛ ebaakwɛ mi kɛyashi migbɔlɛ mli tete lɛ nɔ.​—Yesaia 46:4.

Yɛ afi 1990 lɛ, mifã kɛtee Omak, yɛ Washington. Be ni mitee jɛi lɛ, minyɛ mishiɛ mihã mɛi ni wieɔ Spanish lɛ, ni no hã minu he akɛ mihe eba sɛɛnamɔ ekoŋŋ. Abaptisi mi-Biblia mli nikaselɔi lɛ babaoo. Be ni be shwie mli lɛ, minyɛɛɛ makura mishĩa ni yɔɔ Omak lɛ dɔŋŋ. No hewɔ lɛ, yɛ November 2007 lɛ, mifã kɛtee maŋ ko ni bɛŋkɛ Omak ní atsɛɔ lɛ Chelan, yɛ Washington lɛ mli. Spanish asafo ní yɔɔ biɛ lɛ kwɛɔ mi jogbaŋŋ, ni mihiɛ sɔɔ enɛ waa. Akɛni mi pɛ ji Odasefonyo ni egbɔ yɛ biɛ hewɔ lɛ, amɛsumɔɔ mi tamɔ amɛ diɛŋtsɛ amɛnaa.

Mikpɛ miyiŋ akɛ miboteŋ gbalashihilɛ mli ní mafɔ bii, koni manyɛ masɔmɔ Yehowa jogbaŋŋ kɛmɔ shi. (1 Korintobii 7:34, 35) Mina akɛ minyɛŋ maná nɔ fɛɛ nɔ yɛ shihilɛ nɛɛ mli. No hewɔ lɛ, mikɛ mijwɛŋmɔ ema nɔ ni he hiaa fe fɛɛ, ni ji mitsui fɛɛ ni mikɛaasɔmɔ Yehowa lɛ nɔ. Miye mibua mɛi babaoo ni amɛbale anɔkwale lɛ, ni minaa amɛ akɛ mimusuŋ bii. Ni yɛ jeŋ hee lɛ mli lɛ, maná be babaoo kɛfee nɔ fɛɛ nɔ ni mitaoɔ mafee. Ŋmalɛ ni misumɔɔ waa ji Lala 145:16, he ni Yehowa ewo shi yɛ akɛ ‘ebaahã nɔ fɛɛ nɔ ni hiɛ kã lɛ atɔ kɛ nii ni etaoɔ’ lɛ.

Amrɔ nɛɛ miye afii 91, ni miyɛ gbɔmɔtsoŋ hewalɛ ni sa lolo, no hewɔ lɛ mika he miisɔmɔ akɛ daa gbɛgbalɔ. Gbɛgbamɔ nitsumɔ lɛ hãa mifeɔ klɛklɛ ni mitsui nyɔɔ mimli yɛ shihilɛ mli. Be ni mitee El Salvador klɛŋklɛŋ kwraa lɛ, no mli lɛ kpaako aje shiɛmɔ nitsumɔ lɛ shishi yɛ jɛi. Shi amrɔ nɛɛ, ayɛ shiɛlɔi ni fa fe 39,000 yɛ El Salvador. Mile akɛ Satan nyɛŋ atsi wɔnitsumɔ lɛ naa, eyɛ mli moŋ akɛ eyaa nɔ ekaa akɛ ebaafee nakai. Bɔ ni wɔyifalɛ lɛ yaa hiɛ lɛ woɔ mihemɔkɛyeli lɛ mli hewalɛ waa. Miyɛ nɔmimaa akɛ, Yehowa kɛ emumɔ krɔŋkrɔŋ lɛ miifi ewebii lɛ asɛɛ.