3 Eyeɔ Ebuaa Bo Ni Onyɛ Odamɔ Naagbai Anaa

HELA NI TSAMƆ WA

Yoo ko ni atsɛɔ lɛ Rose lɛ wie akɛ: “Miyɛ hela ko ni hãa mipiŋɔ waa be fɛɛ be. Mináaa miishɛɛ kwraa.” Nɔ kome ni ye etsui waa ji akɛ, ehela lɛ hewɔ lɛ, bei komɛi kɛ́ eekase Biblia lɛ, ewaa kɛhãa lɛ akɛ ekɛ ejwɛŋmɔ baama nɔ ni ekaseɔ lɛ kɛ nibii ni kɔɔ ejamɔ lɛ he lɛ anɔ. Shi Yesu wiemɔi ni yɔɔ Mateo 19:26 lɛ wa lɛ waa. Jɛmɛ kɛɔ akɛ: “Nyɔŋmɔ nyɛɔ nii fɛɛ efeɔ.” Rose na akɛ, jeee nikanemɔ pɛ nɔ atsɔɔ akaseɔ nii. Bɔ ni epiŋɔ lɛ hewɔ lɛ nikanemɔ wa hã lɛ, no hewɔ lɛ, ebɔi Biblia kɛ Biblia kasemɔ woji ni arikɔdi lɛ toiboo.a Ewie akɛ: “Eji jeee nibii nɛɛ kulɛ, naanyobɔɔ ni yɔɔ mi kɛ Nyɔŋmɔ teŋ lɛ baafite kwraa.”

Bei komɛi kɛ́ Rose susu nibii ni be ko ni eho lɛ enyɛɔ efeɔ shi amrɔ nɛɛ enyɛɛɛ efee lɛ ahe lɛ, eyeɔ awerɛho. Shi kɛ́ enu he nakai lɛ, wiemɔi ni yɔɔ 2 Korintobii 8:12 lɛ shɛjeɔ emii. Jɛmɛ kɛɔ akɛ: “Kɛ́ mɔ ko yɛ he suɔmɔ waa lɛ, no lɛ, kɛ́ ejɛ nɔ ni eyɔɔ lɛ mli ehã, shi jeee nɔ ni ebɛ lɛ mli lɛ, esa hiɛ jogbaŋŋ.” Ŋmalɛ nɛɛ hãa Rose naa akɛ, Nyɔŋmɔ yɛ nɔ ni enyɛɔ etsuɔ lɛ he miishɛɛ, ejaakɛ yɛ ehela lɛ fɛɛ sɛɛ lɛ, ekɛ enyɛmɔ fɛɛ sɔmɔɔ Nyɔŋmɔ.

KƐ́ OMƆ KO GBO

Delphine, ni wɔtsĩ etã kɛtsɔ hiɛ lɛ, wie akɛ: “Be ni mibiyoo ni eye afii 18 lɛ gbo lɛ, edɔ mi aahu akɛ, efee mi akɛ minyɛŋ mahi wala mli dɔŋŋ. Minu he akɛ nibii eyaŋ lɛ jogbaŋŋ dɔŋŋ.” Shi wiemɔi ni yɔɔ Lala 94:19 lɛ shɛje emii waa. Mɔ ni ŋma lala nɛɛ kɛɛ Nyɔŋmɔ yɛ ŋmalɛ nɛɛ mli akɛ: “Kɛ́ tsuiyelii hã mifee gbedee lɛ, oshɛjeɔ mimii ni ohãa mimii shɛɔ mihe.” Ewie akɛ, “Misɔle koni Yehowa aye abua mi ni mana nibii ni manyɛ mafee koni mikanu dɔlɛ he fe nine.”

Ekɛ ehe hã koni etsu nitsumɔ ko ni baaye abua mɛi krokomɛi. Sɛɛ mli lɛ, ekɛ ehe to kreyɔŋ ni gbekɛbii kɛkɔlaa nii lɛ he ni ewie akɛ, kɛ́ ekomɛi kumɔ po lɛ, abaanyɛ akɛkɔla nii lolo. Yɛ gbɛ ni tamɔ nakai nɔŋŋ nɔ lɛ, eyɛ mli akɛ etamɔ nɔ ni lɛ hu ekumɔ moŋ, shi ena akɛ, ebaanyɛ eye ebua mɛi krokomɛi lolo. Ewie akɛ: “Mibana akɛ, Biblia mli saji kɛ shishitoo mlai ni mikɛshɛjeɔ mɛi ni mikɛkaseɔ Biblia lɛ amii lɛ, ji gbɛ ni Yehowa tsɔɔ nɔ eshɛjeɔ mi hu mimii.” Eŋmala mɛi ni atsĩ amɛtã yɛ Biblia lɛ mli ni ye awerɛho waa be ni amɛmɔ ko gbo lɛ agbɛ́ii eshwie shi. Ewie akɛ: “Amɛteŋ mɔ fɛɛ mɔ sɔleɔ waa.” Ena hu akɛ, “kɛ́ okaneee Biblia lɛ, onyɛŋ odamɔ onaagbai lɛ anaa.”

Yɛ Delphine gbɛfaŋ lɛ, Biblia lɛ ni ekaseɔ lɛ eye ebua lɛ koni ekɛ ejwɛŋmɔ ama hiɛnɔkamɔ kɛhã wɔsɛɛ lɛ nɔ moŋ fe naagbai ni ekɛkpe lɛ anɔ. Hiɛnɔkamɔ ni yɔɔ Bɔfoi 24:15 lɛ shɛjeɔ emii. Jɛmɛ kɛɛ: “Abaatee jalɔi kɛ mɛi ni ejaaa fɛɛ shi.” Te hiɛnɔkamɔ ni Delphine yɔɔ akɛ abaatee ebiyoo lɛ shi lɛ mli wa hã tɛŋŋ? Ewie akɛ eyɛ nɔmimaa waa akɛ, kɛ́ be ni Yehowa eto lɛ shɛ lɛ, ebaana ebiyoo lɛ ekoŋŋ. Efeɔ ebiyoo lɛ he mfoniri ni atee lɛ shi ni amɛta amɛbɔɔ lɛ mli. Ekɛfata he akɛ: “Bɔ ni gbi ni mifɔ mibiyoo lɛ yɔɔ faŋŋ yɛ mijwɛŋmɔ mli lɛ, nakai nɔŋŋ be ni mikɛ mibiyoo lɛ baata wɔbɔɔ lɛ mli lɛ hu yɔɔ faŋŋ yɛ mijwɛŋmɔ mli.”