Ye Obua Kɛha Asafoŋ kpeei Ni Tswaa Mɔ Emaa Shi
1 Akɛ Nyɔŋmɔ webii lɛ, kɛ wɔbua wɔhe naa kutuu lɛ, wɔfeɔ nakai koni wɔwowoo wɔhe hewalɛ yɛ suɔmɔ kɛ nitsumɔi kpakpai ahe. Wɔkaseɔ Nyɔŋmɔ Wiemɔ lɛ yɛ gbɛ ni mɔɔ shi ni etswaa mɔ emaa shi nɔ ni wɔwoɔ wɔhe ekaa kɛtsɔ wɔhiɛnɔkamɔ lɛ jajemɔ yɛ faŋŋ mli lɛ nɔ.—Heb. 10:23-25.
Bɔ Ni Ooofee Oye Obua
2 Klɛŋklɛŋ nii ni he hiaa bɔni afee ni onyɛ okɛ ohe awo mli ji ni oootsɔ hiɛ osaa ohe jogbaŋŋ kɛha kpeei lɛ. Efaaa akɛ wɔɔle nɔ ni abaasusu he lɛ kɛkɛ. Esa akɛ wɔle gbɛ ni wɔɔtsɔ nɔ wɔha saji sɔrɔtoi lɛ ahetoo yɛ wɔhesaamɔ ni tsɔɔ hiɛ lɛ mli, koni enyɛ etswa wɔnyɛmimɛi lɛ ema shi. Abɛi 15:28 kɛɔ akɛ: “Jalɔ tsui jwɛŋɔ hetoohamɔ he.”
3 Kɛ atsɛ bo ni owie lɛ, bɔɔ mɔdɛŋ ni oha efee kuku ni oti lɛ aje kpo hu. Bɔɔ mɔdɛŋ ni owie yɛ bo diɛŋtsɛ owiemɔ mli be fɛɛ be moŋ fe ni oookane kɛjɛ wolo lɛ mli kɛkɛ. Ehe ehiaaa ni owie sanebimɔ lɛ fai lɛ fɛɛ he yɛ ohetoohamɔ lɛ mli. Yɛ be mli ni akɛ hetoo lɛ eha pɔtɛɛ sɛɛ lɛ mɔ kroko hu baatsɔɔ bɔ ni emli ŋmalɛi lɛ kɔɔ he lɛ hu mli. Mɔ kroko hu baagbala jwɛŋmɔ kɛya sane naataomɔ ni fiɔ sɛɛ lɛ nɔ, ni mo kroko hu kɛ bɔ ni sane lɛ kɔɔ shihilɛ ni yɔɔ asafo lɛ loo shikpɔŋkuku lɛ he lɛ baaha. Enɛɛmɛi fɛɛ biɔ ni asusu nii ahe jogbaŋŋ kɛtsɔ hiɛ.
4 Ehe miihia ni wɔbo sane lɛ toi jogbaŋŋ kɛ mɛi komɛi miiha saji ahetoo lɛ. Kaimɔ akɛ, amɛmiiwie ni amɛkɛtswa bo amɛma shi, ni amɛkɛwo bo hewalɛ yɛ suɔmɔ kɛ nitsumɔi kpakpai ahe. Te obaafee tɛŋŋ onyɛ ofee enɛ kɛ obooo amɛ toi lɛ? Kɛ obo sane lɛ toi yɛ be mli ni mɛi krokomɛi haa saji ahetoo lɛ, ebaaye ebua bo koni okakɛɛ nɔ̃ kometoo lɛ nɔŋŋ ekoŋŋ kɛ atsɛ bo ni owie. Ni, kɛ ona hegbɛ akɛ owie lɛ, kaimɔ akɛ, onyɛmimɛi lɛ miibo bo toi koni etswa amɛ ema shi. No hewɔ lɛ, WIEMƆ WAA!
Nikasemɔ Nɔkwɛlɔ Lɛ Gbɛfaŋnɔ
5 Nɔkwɛlɔi yɛ nibii babaoo ni amɛkɛbaaha koni eha nikasemɔ lɛ afee nɔ ni shishinumɔ yɔɔ mli ni tswaa mɔ emaa shi. Esa akɛ etsɔ hiɛ esaa ehe jogbaŋŋ koni enyɛ efee mɔ ni he esa kɛha nitsɔɔmɔ.
6 Kɛ akane kuku lɛ mli agbe naa lɛ, ehi yɛ be fɛɛ mli akɛ nɔkwɛlɔ lɛ aaabi sane lɛ bɔ ni aŋma lɛ yɛ nikasemɔ lɛ mli lɛ pɛpɛɛpɛ ejaakɛ nakai ji bɔ ni nyɛmimɛi lɛ kpaa gbɛ ni amɛsaa amɛhe akɛ amɛbaaha hetoo. Ja amɛnuuu sanebimɔ lɛ shishi dani ehe baahia ni atsake sanebimɔ lɛ loo agbala mli koni eha efee mlɛo eha amɛ.
7 Esaaa akɛ nɔkwɛlɔ lɛ wieɔ babaoo. Tsɔɔlɔ kpakpa jwɛŋŋ ehaaa enikaselɔi lɛ. Yɛ no najiaŋ lɛ, eyeɔ ebuaa amɛ ni amɛjwɛŋɔ tɛɛ ni amɛshɛɔ sanenaamuu ni ja lɛ he. Kɛ mɛi ni haa saji ahetoo lɛ shi otii komɛi ni he hiaa yɛ amɛwiemɔi lɛ amli, aloo ashi bɔ ni ŋmalɛi lɛ kɔɔ sane lɛ he lɛ, bi sanebimɔi pɔtɛɛ komɛi ni ejie otii lɛ akpo. Shi kɛlɛ, ŋaawoo ko nɛ: Kaabi saji krokomɛi ni he ehiaaa ofata he kɛkɛ, kɛ jeee nakai lɛ obaafutu sanebimɔi krokomɛi ahetoi ni yɔɔ nyɛmimɛi lɛ ajwɛŋmɔ mli lɛ. Abaanyɛ akɛ sanebimɔi bibii komɛi atsu nii koni no aha OTII TITRII lɛ fɛɛ aje kpo aloo ni no aha akɛ sane lɛ ato shihilɛ lɛ he. Shi esa akɛ akɛ sanebimɔi bibii nɛɛ atsu nii yɛ nilee naa, kɛ jeee nakai lɛ otii bibii ni he ehiaaa tsɔ lɛ baaha otii titrii lɛ anɔ. Yɛ enɛ gbɛfaŋ lɛ, wɔmiijie yi akɛ yɛ be kɛ bei amli lɛ, asafoŋ onukpai lɛ ati saji ni yɔɔ Kingdom Ministry School Textbook (Maŋtsɛyeli Sɔɔmɔ Skul Wolo) lɛ baafai 31 kɛyashi 41 lɛ mli.
Be Nɔ Yeli
8 Kwɛmɔ be nɔ yeli hu jogbaŋŋ. Kaimɔ akɛ, maŋshiɛmɔ lɛ heɔ minitii 45, ni Buu-Mɔɔ Nikasemɔ lɛ heɔ aaafee ŋmɛlɛtswaa kome. No hewɔ lɛ, kɛ lalai kɛ sɔlemɔi lɛ fata he lɛ, esa akɛ anyɛ afee kpeei enyɔ nɛɛ yɛ ŋmɛlɛtswai enyɔ mli. Teokrase Sɔɔmɔ Skul lɛ kɛ Sɔɔmɔ kpee lɛ eko fɛɛ eko hiɛ miniti 45 ni lalai kɛ sɔlemɔi fataaa he. Ni Asafo Woloŋ Nikasemɔ lɛ hu heɔ ŋmɛlɛtswaa kome. Ebiɔ ni wɔ nikasemɔi aye be ni ato lɛ pɛpɛɛpɛ koni wɔnyɛ wɔfee nɔ fɛɛ nɔ yɛ gbɛjianɔtoo naa. Ehaa efeɔ mlɛo ehaa nyɛmimɛi ni amɛhefatalɔi heee yeee lɛ kɛ mɛi ni ji gbekɛbii lɛ hu. Ekɔɔɔ he eko bɔ ni kpee lɛ he hiaa ha, kɛ eeye be fe nine lɛ nyɛmimɛi lɛ ahe hiaa amɛ. Feemɔ bɔ fɛɛ bɔ ni ooonyɛ ni oha nikasemɔ lɛ abote ebe mli pɛpɛɛpɛ.
9 Wɔ fɛɛ wɔyɛ gbɛfaŋnɔ ni wɔɔtsu ni wɔha Nyɔŋmɔ Wiemɔ lɛ ni wɔkase akɛ asafo lɛ he aba sɛɛnamɔ ni wɔkɛ tswa wɔhe wɔma shi. Tsɔ hiɛ osaa ohe kɛ jwɛŋmɔ akɛ okɛ osaji ahetoohamɔ lɛ baatswa mɛi krokomɛi ama shi. Obaana kpeei lɛ ahe miishɛɛ waa ni obaaye obua ni asafo lɛ ada yɛ mumɔŋ.