Afee Ekome Kɛmiifee Yehowa Suɔmɔnaa Nii
1 Beni be baashɛ akɛ asusu wiemɔ nɛɛ he yɛ Sɔɔmɔ Kpee lɛ shishi lɛ, no mli lɛ wɔ fɛɛ wɔtee “Ŋwɛi Jalɛsaneyeli” Kpokpaa Wulu nɔ kpeei lɛ eko. Ŋwanejee ko bɛ he akɛ mumɔŋ nibii ni ato he gbɛjianɔ aha wɔ kɛtsɔ kpee lɛ nɔ lɛ ewo wɔ hewalɛ waa kɛha Maŋtsɛyeli nitsumɔ lɛ kɛ ekaa. No hewɔ lɛ wɔmiitao ni wɔŋɔ hegbɛ fɛɛ hegbɛ ni wɔɔna ni wɔkɛ mɛi krokomɛi aja Maŋtsɛyeli sane lɛ. Kɛ wɔto wɔgbɛjianɔ jogbaŋŋ ni wɔkɛ ekaa babaoo wo mli lɛ, wɔbaanyɛ wɔya nɔ wɔjaje Maŋtsɛyeli lɛ he sanekpakpa lɛ wɔtsɔɔ.
2 Eyɛ mli akɛ Blonya lɛ ebaho etee moŋ, shi mɛi babaoo kã he amɛmiijie nakai gbijurɔyeli mumɔ akɛ amɛmiiye Kristo fɔmɔ gbi lɛ kpo lolo yɛ January mli fɛɛ. Kɛha amɛ lɛ, Kristo ji abifao ko ni nyɛɛɛ ehe nɔ ko efee ni eka kooloi alɛɛ he ko mli. Akɛni ayeɔ nɛkɛ gbijurɔ nɛɛ akɛ akɛmiiwo Kristo hiɛ nyam hewɔ lɛ, ebaahi akɛ wɔɔwie nibii ni kɔɔ Kristo he lɛ yɛ wɔshiɛmɔ nitsumɔ lɛ mli. Trukaa odaseyeli hu haa wɔ hegbɛ ni wɔkɛwie yiŋtoo titri hewɔ ni afɔ Yesu lɛ he, koni wɔma Ŋmalɛi lɛ amli tsɔɔmɔi ni kɔɔ Nyɔŋmɔ Bi lɛ he akɛ wɔ Kpɔlɔ lɛ nɔ mi. Shiɛmɔ yɛ shinai anaa kɛ sɛɛsaramɔi amli lɛ baama bɔ ni Yesu he hiaa yɛ Kristofoi ashihilɛ mli lɛ nɔ mi.
Nɔ Ni Akɛhaa Lɛ
3 Wɔkɛ My Book of Bible Stories lɛ aloo Paradeiso yɛ Shikpɔŋ Nɔ lɛ baaha kɛha ehe yelikɛbuamɔ ni ji ₵700 kɛha eko aloo Live Forever bibii lɛ kɛha ₵400. Woji enyɔ nɛɛ fɛɛ kɛ gbɛi ni wɔɔtsɔ nɔ wɔkɛ mɛi awie Maŋtsɛyeli lɛ he sanekpakpa lɛ he lɛ haa wɔ. Bible Stories wolo lɛ Fa 6, ni jeɔ shishi kɛ sane 84 lɛ wieɔ kɛjɛ be mli ni afɔ Yesu kɛyashi be mli ni egbo lɛ he. Wɔyɛ saji kpakpai ni kɔɔ saneyitsei sɔrɔtoi ni wieɔ Yesu fɔmɔ he lɛ he yɛ mli. Saji lɛ ekomɛi ji “An Angel Visits Mary” (Bɔfo ko Basara Maria) , “Jesus Born in a Stable” (Afɔ Yesu yɛ Kooloi Alɛɛ He) , kɛ “Men Guided by a Star” (Hii ni Ŋulami ko Tsɔɔ Amɛ Gbɛ) . Taakɛ Obaayoo oya lɛ, obaana otii ni obaanyɛ okɛtsu nii ni okɛ mɛi ni okɛkpeɔ yɛ oshiɛmɔ nitsumɔ lɛ mli ni amɛkɛ miishɛɛ yeɔ Blonya lɛ awie he yɛ nɛkɛ saji etɛ nɛɛ pɛ po mli. Enɛ baafee anɔkwale, titri lɛ kɛ gbekɛbii yɛ weku lɛ mli.
4 Obaanyɛ Ohi Shi Kɛya Naanɔ wolo lɛ yitso ni ji 6, ni jeɔ shishi yɛ baafa 57 lɛ saneyitso ji “Yesu Kristo—Ani Nyɔŋmɔ Tsu Lɛ?” Enɛ kɛ saji ni abaanyɛ awie he babaoo haa ni kɔɔ Yesu shihilɛ he dani ebatsɔ adesa, ewala yɛ shikpɔŋ nɛɛ nɔ, kɛ yiŋtoo hewɔ ni eba, kɛ gbɛhe ni ehiɛ amrɔ nɛɛ akɛ Nyɔŋmɔ Maŋtsɛyeli lɛ Nɔyelɔ lɛ he lɛ haa. Yɛ anɔkwale mli yɛ nɛkɛ be nɛɛ mli yɛ afi lɛ mli hewɔ lɛ, ebaana sɛɛnamɔ ni yɔɔ Obaanyɛ Ohi Shi Kɛya Naanɔ wolo lɛ ni ooogbala mɛi ajwɛŋmɔ kɛba nɔ lɛ he, koni eha miishɛɛ ni amɛyɔɔ yɛ wɔ Nuŋtsɔ lɛ he lɛ aya hiɛ.
5 Kɛ aheee wolo ni akɛhaa lɛ, obaanyɛ okɛ “Naa! Miifee Nii Fɛɛ Ehee” wolo bibioo lɛ aha. Yɛ enɛ hu mli lɛ obaanyɛ oma gbɛfaŋnɔ ni Yesu na akɛ ekɛ ehe aha kɛha wɔ kpɔmɔ kɛjɛ esha kɛ gbele mli lɛ nɔ mi. Obaanyɛ ogbala jwɛŋmɔ kɛya baafai 18 kɛ 19 nɔ ni okɛma sane nɛɛ nɔ mi.
6 Shiɛlɔi babaoo ni ji obalaŋtai ni yɔɔ wɔteŋ lɛ kɛ amɛwekui kɛ mɛi krokomɛi ni yɔɔ asafo lɛ mli lɛ baanyɛ ana gbɛfaŋnɔ ni da yɛ Maŋtsɛyeli nitsumɔ ni he hiaa waa nɛɛ mli. Amɛteŋ mɛi komɛi baanyɛ ni amɛkɛ amɛhe awo gbɛgbalɔi awamɔ nitsumɔ lɛ mli. Onukpai akuu lɛ ato shiɛmɔyaa he gbɛjianɔ ni esa bɔ ni hiamɔ lɛ ji yɛ asafo lɛ mli.
7 Eyɛ mli akɛ January ji nyɔŋ ni deka bɛ mli kwraa kɛha okwaafoi pii yɛ maŋ nɛɛ mli hei sɔrɔtoi moŋ, shi esa akɛ mɔ fɛɛ mɔ abɔ mɔdɛŋ ni ena gbɛfaŋnɔ ni da yɛ ekomefeemɔ ni wɔkɛfeɔ Yehowa suɔmɔnaa nii lɛ mli. Gbɛ kome ni wɔɔtsɔ nɔ wɔwo Maŋtsɛyeli sane lɛ he miishɛɛ lɛ mli hewalɛ ji ni wɔkɛtsa nɔ ko ni yɔɔ gbɔmɛi lɛ ajwɛŋmɔ mli lɛ nɔ. Wɔnaa hegbɛ fɛfɛo kɛhaa enɛ feemɔ yɛ January, akɛni yɛ bei babaoo mli lɛ mɛi pii susuɔ jamɔ mli gbijurɔyelii lɛ ahe lɛ hewɔ.