Wɔhefamɔ Nii Lɛ Ni Wɔkɛaatsu Nii Kɛmɔ Shi
1 Satan miitutua wekui ŋmɛnɛ, ni eefee bɔ ni eeenyɛ ni efite amɛ. Kristofoi le enɛ jogbaŋŋ. Kwɛ bɔ ni eyɔɔ mɔbɔ akɛ gbekɛbii kɛ amɛhe aaawo bɔlɛnamɔ mli jeŋba shara, daatɔɔ, tsofai fɔji kɛ nitsumɔ aloo nifɔji krokomɛi amli! Mɛi komɛi ena akɛ amɛbihii kɛ amɛbiyei lɛ miitsi amɛhe kɛmiijɛ Yehowa he, ni amɛkɛ amɛhe eha je lɛŋ jwɛŋmɔi kɛ akɔnɔi lɛ. (Abɛi 10:1; 17:21) Yɛ nakai beaŋ nɔŋŋ lɛ, obalaŋtai babaoo ehiɛ amɛhe yɛ hetsemɔ mli ni amɛmiitsu babaoo yɛ Yehowa sɔɔmɔ lɛ mli. Amɛjeŋba kɛ yijiemɔ kɛ woo ebaha Nyɔŋmɔ ni ekɛ miishɛɛ ebaha amɛfɔlɔi kɛ mɛi krokomɛi. (3 Yoh. 3, 4) Mɛni haa esoroɔ amɛ lɛ? Yɛ be babaoo mli lɛ, ejɛɔ fɔlɔi lɛ kɛ bii lɛ fɛɛ afaishitswaa akɛ amɛkɛ hefamɔ nii ni akɛha wɔ lɛ aaatsu nii kɛmɔ shi lɛ.
2 Agbala wɔjwɛŋmɔ kɛtee hefamɔ nibii ni he hiaa fɔlɔi kɛ obalaŋtai ŋmɛnɛ lɛ anɔ babaoo yɛ “Ŋwɛi Jalɛsaneyeli” Kpokpaa Wulu nɔ Kpeei lɛ ashishi. Asusu enɛɛmɛi ekomɛi ahe yɛ wiemɔ ni tsara nɔ ni yitso ji “Tsɔsemɔ yɛ Jalɛ Naa yɛ Weku Kɔkrɔɔ lɛ Mli” kɛ wiemɔ ni ji “Jeŋba Mli Hetsemɔ ji Obalaŋtai Ahefɛo” lɛ mli. Ani okaiɔ nɛkɛ wiemɔi nɛɛ, ni ani nyɛkɛtsu nii nyɛ diɛŋtsɛ kɛ agbɛnɛ yɛ nyɛweku lɛ mli?
FƆLƆI AGBƐNAA NII
3 Hefamɔ nii ni he hiaa kɛha tsɛmɛi ji ni amɛnu nɔ ni Yehowa taoɔ yɛ wekuyitso lɛ dɛŋ lɛ shishi ni amɛyoo akɛ ehe miihia ni amɛkɛ amɛhe afɔ Yehowa nɔ kɛha gbɛtsɔɔmɔ. Kɛji wekuyitso ko baatsɔɔ eweku lɛ Biblia mli Shishitoo mlai lɛ, esa akɛ lɛ diɛŋtsɛ lɛ ele enɛɛmɛi tsutsu. Shi le ni eeele kɛkɛ faaa. Esa akɛ akɛ shishitoo mlai nɛɛ atsu nii kɛ weku lɛ baana he sɛɛ kɛmɔ shi kwraa lɛ. Esa akɛ tsɛ ni ejɔɔ ehe nɔ lɛ anyiɛ weku lɛ hiɛ yɛ mumɔŋ gbɛjianɔtoo ni ji sɔlemɔ, nikasemɔ, kɛ sɔɔmɔ krɔŋŋ mli. (1 Tim. 5:8) Kɛji ebaakpa eŋa kɛ ebii lɛ gbɛ ni amɛkɛ bulɛ aha ehegbɛ lɛ, esa akɛ ejie miishɛɛ kpo yɛ toiboo ni efeɔ ehaa Nyɔŋmɔ kɛ E-gbɛjianɔtoo lɛ mli. (1 Yoh. 5:3) Kɛ tsɛ ko kase Yehowa ni ekɛ eweku lɛ hi shi yɛ henumɔ kɛ suɔmɔ mli, yɛ gbɛ ni yɔɔ tɛɛ nɔ lɛ, enaa bulɛ kɛjɛɔ amɛŋɔɔ, ni amɛfeɔ klalo akɛ amɛbaanyiɛ enɔkwɛmɔ nɔ lɛ sɛɛ. Enɛ kɛ yijiemɔ kɛ woo baaha Yehowa.
4 Ani okaiɔ kpee lɛ fa ni yitso ji “Fɔlɔi—Nyɛtoa Nikasemɔ he Gbɛjianɔ Koni Ekɔ Gbekɛbii lɛ Ahe” lɛ? Afee nɔkwɛmɔ nɔ ko ni tsɔɔ weku ko ni miikase nii kɛjɛ February 15, 1987 Watchtower lɛ mli afata he. Fɔlɔi lɛ susu gbekɛbii lɛ ateŋ mɔ fɛɛ mɔ kɛ he ni ebaanyɛ ekase nii kɛyashɛ lɛ he. Ejeee sanebimɔ-kɛ-ehetoohamɔ ni afee lɛ kpɛŋŋ, shi fɔlɔi lɛ bɔ mɔdɛŋ koni amɛha anɔkwale lɛ ashɛ amɛbii lɛ atsuii amli akɛ oti ni ma amɛhiɛ. Nyɛmimɛi yei lɛ titri baakai bɔ ni nyɛ lɛ fi ewu lɛ sɛɛ, ni ekɛtsɔɔ heshibaa kɛha lɛ ni ekɛfee nɔkwɛmɔ nɔ kpakpa kɛha gbekɛbii lɛ.—Efe. 5:21-24.
GBEKƐBII—MƐNI YEHOWA TAOƆ YƐ NYƐDƐŊ?
5 Bɔ ni nyɛfɔlɔi lɛ yɔɔ Satan tutuamɔ shishi lɛ, nakai nɔŋŋ nyɛ hu nyɛji. Mɛni ji nyɛhefamɔ nii? Toiboo ni nyɛaafee nyɛha Yehowa kɛ nyɛfɔlɔi. Akɛ ŋaawoi ni hi jogbaŋŋ ni baaye abua nyɛ ha yɛ kpee lɛ shishi wiemɔi lɛ amli. Ani okaiɔ enɛɛmɛi? Otii lɛ ateŋ ekome ni obaakai ji akɛ onyɛŋ okpɛtɛ ofɔlɔi lɛ ahe kɛbote jeŋ hee lɛ mli. Kɛ aaawie yɛ gbɛ kroko nɔ lɛ, esa akɛ oha anɔkwale lɛ afee bo diɛŋtsɛ onɔ. Ofɔlɔi lɛ lɛɔ bo ni amɛhaa bo ohiamɔ nibii. Amɛkɛ afi babaoo etee enɛ. Shi yɛ be mli ni odaa lɛ, aakpa gbɛ akɛ bo diɛŋtsɛ obaatere omumɔŋ sɔi ni jwere onɔ lɛ. Yehowa miikpa bo gbɛ ni ofee nɔ ni ole akɛ eja lɛ. (Jaj. 11:9) Kɛji okase akɛ Yehowa gbɛ lɛ ja lɛ, no lɛ eji nɔ ni ka onɔ akɛ ooona jwɛŋmɔ kpakpa koni okɛnyiɛ sɛɛ.
6 Yɛ be mli ni odaa lɛ, kaa ni bakaa ohiɛ akɛ ooohiɛ jeŋba mli hetsemɔ mli lɛ yaa nɔ yɛ be fɛɛ mli. Jeŋba mli hemujiwoo egbɛ eshwa je lɛ mli fɛɛ tamɔ tsɛŋemɔ hela, ni okɛ enɛ kpeɔ daa gbi. Ohefamɔ nii lɛ damɔ suɔmɔ ni ooosumɔ nɔ ni ja ni ooonyɛ efɔŋ lɛ nɔ. (Lala 52:3; 97:10) Okɛ mɛi ni sumɔɔ Yehowa lɛ abɔ. Kanemɔ nibii ni tswaa mɔ emaa shi. Kwɛmɔ nibii ni he tse. (Fil. 4:8) Kɛ oyaje kaa mli lɛ, kaimɔ nɔ ni jɛ mli ba kɛha nakai obalanyo ni bɛ yitsoŋ lɛ. (Abɛi 7:6-27) Ha ni Yehowa akudɔ ojwɛŋmɔ kɛ onifeemɔi, ni obaahi emasɛi shweshweeshwe.
7 Hɛɛ, esa akɛ fɔlɔi kɛ amɛbii fɛɛ ahiɛ ahi amɛhe nɔ yɛ osharai ni ebɔle wɔ fɛɛ wɔhe kɛkpe lɛ ahe. Kɛ wɔkɛ wɔhefamɔ nii lɛ tsu nii kɛmɔ shi lɛ, wɔbaaye omanye yɛ ta lɛ mli ni wɔbaana hegbɛ hu akɛ wɔɔjie Yehowa yi kɛya naanɔ.