Sanekpakpa Lɛ Kɛhamɔ—Kɛtsɔ Reasoning Wolo Lɛ Kɛ Nitsumɔ Jogbaŋŋ Nɔ
1 “Mina ni kulɛ mi-Reasoning wolo lɛ yɛ biɛ!” Ani nɛkɛ jwɛŋmɔ nɛɛ eba oyitsoŋ da yɛ be mli ni obɔɔ mɔdɛŋ ni ojie Ŋmalɛ naa sanebimɔ ko naa yɛ shiɛmɔ mli aloo yɛ be mli ni oyeɔ odase trukaa yɛ nitsumɔ he loo yɛ skul lɛ? Mɛi ni amɛbale Reasoning wolo lɛ mli saji jogbaŋŋ ni amɛhiɛɔ kɛyaa he fɛɛ he lɛ ena akɛ amɛbaanyɛ amɛkɛ amɛhe afɔ nɔ kɛha yelikɛbuamɔ yɛ be ni sa mli. Ni bo hu?
2 Kɛjɛ be mli ni ajie Reasoning wolo lɛ kpo yɛ 1985 kɛbaa nɛɛ, shwɛ fioo kulɛ Wɔ Maŋtsɛyeli Sɔɔmɔ lɛ fɛɛ eko kɛ ŋaawoo ni hi jogbaŋŋ kɛha gbɛ ni abaanyɛ atsɔ nɔ akɛtsu nii lɛ ha. Ani okaiɔ gbɛi ni atsɔ nɔ afee enɛ yɛ Sɔɔmɔ Kpeei lɛ fai komɛi amli ni tsɔɔ bɔ ni anyɛɔ akɛ Reasoning wolo lɛ tsuɔ nii yɛ gbɛi sɔrɔtoi anɔ kɛ sɛɛnamɔi ni yɔɔ he lɛ? Afee nɔkwɛmɔ nii ni tsɔɔ bɔ ni fɔlɔi baanyɛ amɛkɛtsu nii ni amɛkɛye amɛbua amɛweku lɛ yɛ be mli ni amɛsaa amɛhe kɛha shiɛmɔyaa lɛ, aloo yɛ be mli ni onukpa ko yeɔ ebuaa obalaŋta ko ni je lɛ gbalaa lɛ lɛ, kɛ be mli ni shiɛlɔi ni he wa yeɔ buaa mɛi ni yelikɛbuamɔ he hiaa amɛ lɛ. (kmGA 10/86 bf. 2; kmGA 11/86 bf. 2) Saji lɛ ekome wo obalaŋtai lɛ hewalɛ ni amɛkɛ Reasoning wolo lɛ atsu nii yɛ be mli ni amɛsaa amɛhe yɛ mumɔŋ kɛhaa skulyaa lɛ. (kmGA 9/87 bf. 2) Saji krokomɛi hu kɛ ŋaawoi ni anyɛɔ atsuɔ he nii eha yɛ gbɛi ni wɔɔtsɔ nɔ ni wɔkɛtsu nii yɛ wɔsɔɔmɔ lɛ fai sɔrɔtoi lɛ fɛɛ mli kɛ bɔ ni wɔɔtsake bɔ ni wɔkɛtsuɔ nii lɛ mli koni esa shihilɛ lɛ, tamɔ yɛ be mli ni wɔtsuɔ shikpɔŋkuku ni abuɔ emli shiai ahe waa lɛ amli nii lɛ.—kmGA 1/88 p. 4.
ANI WƆKƐMIITSU NII KƐMIIMƆ SHI
3 Kɛji wɔkɛ Reasoning wolo lɛ baatsu nii jogbaŋŋ lɛ, klɛŋklɛŋ lɛ esa akɛ wɔle emli saji. No sɛɛ lɛ esa akɛ wɔbɔ mɔdɛŋ ni wɔkɛ eŋaawoi lɛ atsu nii. Ani oka akɛ okɛ hiɛkpamɔ wiemɔ ni atsɔɔ lɛ baatsu nii yɛ be mli ni okɛ Saneyitso Kɛha Sanegbaa hee ni akɛtsuɔ nii lɛ haa lɛ? Kɛ okɛ ŋaawoo ni ji enyɔ ni atsɔɔ yɛ saneyitso ni ji “Kingdom” (Maŋtsɛyeli) ni yɔɔ Reasoning wolo lɛ baafa 12 lɛ tsu nii ni owie Kpojiemɔ 21:3-5 he kuku lɛ, no lɛ obaanyɛ okɛ wɔ Saneyitso Kɛha Sanegbaa hee ni ji “Namɔ Esa Akɛ Wɔja?” lɛ atsa sane lɛ nɔ.
4 Kɛ wɔkɛ wiemɔ ni yɔɔ fa ni ji “Conversation Stoppers” (Mɛi ni Tsiɔ Sanegbaa Naa) lɛ tsu nii lɛ, wɔbaaye omanye ni wɔbaaye mɛi ni teɔ shi woɔ yɛ shishijee mli lɛ anɔ. Mɛni hewɔ osusuuu bɔ ni ooofee ni oha mɛi ni tsiɔ sanegbaa naa lɛ hetoo lɛ he. Akɛ nɔkwɛmɔ nɔ lɛ, kɛji mɔ ko kɛɛ “Mibɛ he miishɛɛ” lɛ, obaanyɛ okɛ ŋaawoo ni ji ejwɛ ni yɔɔ baafa 16 lɛ atsu nii, ni ogbele kɛya Kpojiemɔ 14:7, no sɛɛ lɛ maa nɔ mi oha lɛ akɛ ŋmalɛ nɛɛ ji nɔ ni ha ohɛle shi akɛ ehe miihia ni ole anɔkwale Nyɔŋmɔ lɛ ni oja lɛ. Kaa enɛ okwɛ. Mɛi komɛi eye omanye yɛ wiemɔi ni tamɔ nɛkɛ lɛ kɛ nitsumɔ mli.
5 Yɛ anɔkwale mli lɛ, jɔɔmɔi ni jɛɔ Reasoning wolo lɛ kɛ nitsumɔ mli baa lɛ fa babaoo. Kɛ wɔto be pɔtɛɛ ko koni wɔkɛsaa wɔhe kɛha gbɛi krokomɛi ni wɔɔtsɔ nɔ kɛ hiɛkpamɔ wiemɔi ni baaŋɔɔ wɔ toibolɔi pɔtɛɛ komɛi anaa lɛ, wɔbaana ekaa babaoo akɛ wɔɔje kpo kɛha shiɛmɔyaa, yɛ shikpɔŋkuku ni afɔɔ mli nitsumɔ babaoo lɛ po mli. Mɛni hewɔ oŋɔɔɔ be ni he hiaa lɛ ni okɛti saji ni eho ni kɛ ŋaawoi ni tsɔɔ bɔ ni abaanyɛ akɛ Reasoning wolo lɛ atsu nii jogbaŋŋ eha lɛ ekomɛi amli?—kmGA 6/87 bf. 5; kmGA 11/88 bf. 8.
6 Yehowa ajɔɔ omɔdɛŋbɔi lɛ anɔ kɛmɔ shi yɛ be mli ni obɔɔ mɔdɛŋ ni ogbele “Nyɔŋmɔ nibii wuji” lɛ anɔ otsɔɔ mɛi krokomɛi lɛ. (Bɔfoi 2:11) Kɛkɛ lɛ amɛbaafee ekome kɛkɛɛ Yehowa taakɛ Lalatsɛ David kɛɛ lɛ: “Oyiŋtoi lɛ ajara wa yɛ mihiɛ akɛ nɔ ko!”—Lala 139:17.